ၶူင်းၵၢၼ်ၾၢႆၼမ်ႉၶူင်းပွတ်းၼိူဝ် ၵူၼ်းမိူင်းမႆႈၸႂ် လွင်ႈၼမ်ႉထူမ်ႈ



ဢိင်ၼိူဝ်ၵူၼ်းမိူင်း မႆႈၸႂ်လွင်ႈၼမ်ႉၸၢင်ႈထူမ်ႈ ယွၼ်ႉၶူင်းၵၢၼ် ၾၢႆၼမ်ႉၶူင်း ပွတ်းၼိူဝ်သေ ၼၢင်းဝႃႇၼု တၢင်ႇလၢတ်ႈတွင်ႈထၢမ် ၼႂ်းသၽႃး။ ၵႅမ်ၽွင်းလူင် ၾၢႆႇၾႆးၾႃႉဝႃႈ ဢမ်ႇတၢပ်ႈမႆႈၸႂ်၊ ၶွမ်ႊပၼီႊၸိူဝ်း ၵေႃႇသၢင်ႈၶူင်းၵၢၼ်ၵေႃႈ ၸိုဝ်ႈယႂ်ႇ။


(ၶႂႃမိုဝ်း) ၼၢင်းဝႃႇၼု ၽွင်းတႅၼ်းသၽႃးၵူၼ်းမိူင်း ၵုၼ်ႁဵင်
ၵဵဝ်ႇၵပ်းလွင်ႈၼႆႉ ၽွင်းတႅၼ်းသၽႃးၵူၼ်းမိူင်း ၵုၼ်ႁဵင် ၼၢင်းဝႃႇၼု တွင်ႈထၢမ်ၼႂ်းပၢင်ၵုမ်သၽႃးၵူၼ်းမိူင်း ဢၼ်ၸတ်းမိူဝ်ႈဝၼ်းတီႈ 16/09/2014 တီႈၼေႇပျီႇတေႃႇ ဝႃႈ- 1.ၶူင်းၵၢၼ်ၾႆးၾႃႉ ၼမ်ႉၶူင်း ပွတ်းၼိူဝ် ဢၼ်ႁဵတ်းသၢင်ႈယူႇၼႆႉ ၽႅဝ်ထိုင်ၸၼ်ႉလႂ်ယဝ်ႉ။ 2.ပေႃးဝႃႈ ႁဵတ်းသၢင်ႈၶူင်းၵၢၼ်ၼႆႉ တေတုမ်ႉတိူဝ်ႉသၽႃႇဝ /သိင်ႇဝႅတ်ႉလွမ်ႉ လႄႈ တူင်ႇဝူင်းၵူၼ်းၸိူင်ႉႁိုဝ်။ လွင်ႈၼႆႉ လႆႈသပ်းလႅင်းၼႄဝႆႉ တီႈၵူၼ်းမိူင်းၸိူင်ႉႁိုဝ်၊ ပေႃးဝႃႈပဵၼ်မႃးပၼ်ႁႃ ႁၢင်ႈႁႅၼ်းဝႆႉ ပိူဝ်ႈတႃႇၵႄႈလိတ်ႈပၼ်ၸိူင်ႉႁိုဝ်။ 3.ပေႃးဝႃႈ ႁဵတ်းၶူင်းၵၢၼ်ၼႆႉ ယဝ်ႉတူဝ်ႈယဝ်ႉ ၵူၼ်းပိုၼ်ႉတီႈ တေမီးၼမ်ႉတွၼ်းၽွၼ်းလီ ၸိူင်ႉႁိုဝ်။ 4.ယွၼ်ႉၶူင်းၵၢၼ်ၼႆႉသေ ပေႃးဝႃႈၼမ်ႉထူမ်ႈၼႆ တႃႇတေၵႄႈလိတ်ႈၼၼ်ႉ ႁၢင်ႈႁႅၼ်းဝႆႉၸိူင်ႉႁိုဝ်။ 5.ပေႃးဝႃႈၼမ်ႉထူမ်ႈၸိုင် ပိုၼ်ႉတီႈဢၼ်ၼမ်ႉတေထူမ်ႈထိုင်ၼၼ်ႉ တၢင်းၵႂၢင်ႈဢေႊၵႃႊမီးၵႃႈႁိုဝ်- ၸိူဝ်းၼႆႉ။

ၵႅမ်ၽွင်းလူင်ၾၢႆႇၾႆးၾႃႉ ဢူးမေႃႇတႃႇထူၺ်း တွပ်ႇပၼ်ဝႃႈ-  ၵၢၼ်တဵင်ၾၢႆ ႁဵတ်းၶူင်းၵၢၼ်ၾႆးၾႃႉ မိူင်းတူၼ်ၼႆႉ ပေႃးဝႃႈၼမ်ႉထူမ်ႈၸိုင် တေၸၢင်ႈထူမ်ႈလႆႈ တေႃႇထိုင်ၶူဝ်တႃႈၵေႃႈ၊ ယွၼ်ႉပိူဝ်ႈ ၸၢင်ႈထူမ်ႈထိုင်တီႈတႃႈၵေႃႈလႄႈ မိူဝ်ႈလဵဝ် ႁႂ်ႈၵူၼ်းဝၢၼ်ႈၵူၼ်းမိူင်းငိူင်ႉဝႄႈဢွၵ်ႇယဝ်ႉ။ ၸိုဝ်ႈၶူင်းၵၢၼ် ၼႆႉၵေႃႈ တေဢမ်ႇၸႂ်ႉဝႃႈ ၶူင်းၵၢၼ်ၾၢႆၾႆးၾႃႉ မိူင်းတူၼ်၊ တေဝႃႈၶူင်းၵၢၼ်ၾၢႆၼမ်ႉၶူင်း ပွတ်းၼိူဝ်။ ပေႃးႁဵတ်းသၢင်ႈၶူင်းၵၢၼ်မႃး တေၶတ်းၸႂ် ႁႂ်ႈမၼ်းတုမ်ႉတိူဝ်ႉၵူၼ်းမိူင်း ဢေႇတီႈသုတ်း။ ၼမ်ႉတွၼ်းၽွၼ်းလီ ဢၼ်လႆႈမႃးတီႈၶူင်းၵၢၼ်ဢၼ်ၼႆႉၵေႃႈ တေသပ်းလႅင်းၼႄ ၵူၼ်းဝၢၼ်ႈၵူၼ်းမိူင်းၵႂႃႇ။ ပေႃးၶူင်းၵၢၼ်ၼႆႉ ႁဵတ်းဢွၵ်ႇလႆႈမႃးၾႆးၾႃႉၸိုင် ပိူင်လူင်မၼ်း တေၸႂ်ႉတီႈၼႂ်းမိူင်း၊ ပေႃးဝႃႈမၼ်းလိူဝ် ၸင်ႇတေၶၢႆပၼ် ၼွၵ်ႈမိူင်း- ဝႃႈၼႆ။

ႁႅင်းၾႆးၾႃႉ ၶူင်းၵၢၼ်ၾၢႆၼမ်ႉၶူင်း ပွတ်းၼိူဝ်ၼႆႉ တေႁဵတ်းဢွၵ်ႇလႆႈ 7,000 မႄႊၵႃႊဝတ်ႊ။ ပေႃးဝႃႈ ၾၢႆတႅၵ်ႇ/ၵူၼ်ႇ ပိုၼ်ႉတီႈဢၼ်ၼမ်ႉထူမ်ႈလႆႈ မီးတၢင်းၵႂၢင်ႈ 262 သၶႂႄႊမၢႆႊ။

ၼၢင်းဝႃႇၼု လၢတ်ႈဝႃႈ ယွၼ်ႉပိူဝ်ႈၶူင်းၵၢၼ်ၼႆႉသေ ၼမ်ႉၶူင်း တင်းၼမ်ႉပၢင် တေယိုင်ႈၶိုၼ်ႈပွတ်းၼိူဝ်။ ၼမ်ႉပၢင် တေထိုင်  ပွတ်းၵုၼ်ႁဵင် ၵႃလိ ၊ ၼမ်ႉၶူင်း သမ်ႉတေထိုင်ၶူဝ်တႃၵေႃႈ ၸိူဝ်းၼႆႉ တေထူမ်ႈပႃး ဝၢၼ်ႈတႃႈၵေႃႈၵဝ်ႇ။ ၵွပ်ႈၼႆ ၵူၼ်းဝၢၼ်ႈၵူၼ်းမိူင်း ပွတ်းၵုၼ်ႁဵင် တႃႈၵေႃႈၸိူဝ်းၼႆႉ ဢွၼ်ၵၼ်မႆႈၸႂ် လွင်ႈၼမ်ႉထူမ်ႈ လႄႈ လွင်ႈတေလႆႈၶၢႆႉပၢႆႈ ဢွၵ်ႇၼွၵ်ႈပိုၼ်ႉတီႈၸိူဝ်းၼႆႉ။ ထႅင်ႈပိူင်ၼိုင်ႈ ၼမ်ႉၸၢင်ႈထူမ်ႈပႃး  ႁုၼ်ႇႁၢင်ႈပုတ်ႉထၸဝ်ႈ/ၽြႃးတႃႈၵေႃႈ၊ ၽြႃးသႅင်မိူင်း၊ ၽြႃးႁူဝ်လိုင်း ဢၼ်ႁဵတ်းသၢင်ႈဝႆႉ ၸဵမ်မိူဝ်ႈ ပီသၵ်ႉၵရဵၸ်ႉ 166 ၸိူဝ်းၼႆႉ။ ၵူၼ်းဢၼ်တေလႆႈၼမ်ႉတွၼ်းၽွၼ်းလီ ယွၼ်ႉၶူင်းၵၢၼ်ၼႆႉ တေပဵၼ်ၵူၼ်းၵမ်ႈဢေႇၵူၺ်း။ ၵွပ်ႈၼႆ လီလႆႈမႆႈၸႂ် တႃႇၵူၼ်းၸိူဝ်းယူႇသဝ်း ၼႂ်းပိုၼ်ႉတီႈၸိူဝ်းၼၼ်ႉ- ဝႃႈၼႆ။

ၵပ်းၵၢႆႇလွင်ႈၼႆႉ ဢူးမေႃႇတႃႇထူၺ်း တွပ်ႇလၢတ်ႈဝႃႈ- ဢမ်ႇလႆႈမႆႈၸႂ်၊ ၸိူဝ်းသၢင်ႈၶူင်းၵၢၼ်ၼႆႉၵေႃႈ ပဵၼ်ၶွမ်ႊပၼီႊ ဢၼ်ၸိုဝ်ႈယႂ်ႇလွၼ်ႉလွၼ်ႉ- ဝႃႈၼႆ။

ၵဵဝ်ႇၵပ်းလွင်ႈၶူင်းၵၢၼ်ၼႆႉသေ ၽူႈလဵပ်ႈႁဵၼ်းၵၢၼ်သိုၵ်း ၵၢၼ်မိူင်းၵေႃႉၼိုင်ႈ ထတ်းသၢင်ၼႄတီႈ ၸုမ်းၶၢဝ်ႇၽူႈတွႆႇႁွၵ်ႈ ဝႃႈ- ၶူင်းၵၢၼ်ၼႆႉ မၼ်းၵဵဝ်ႇၶွင်ႈၵၢၼ်သိုၵ်း တင်းၵၢၼ်မိူင်း၊ ယွၼ်ႉပိူဝ်ႈဝႃႈ ၸွမ်းထုင်ႉသၢပ်ႇၼမ်ႉၶူင်းၼႆႉ မီးၸုမ်းတႆးယိပ်းၵွင်ႈၵၢင်ႇ 3 ၸုမ်း။ 1.ပေႃးဝႃႈ ႁဵတ်းၶူင်းၵၢၼ်ၼႆႉ မၢၼ်ႈတေၸႂ်ႉ ႁႅင်းသိုၵ်းဢဝ်ႁူမ်ႇလူမ်ႈ သဵၼ်ႈတၢင်း၊ ပေႃးထႅမ်ႁႅင်းသိုၵ်းမႃးၵေႃႈ ၸၢင်ႈပဵၼ်ပၢင်တိုၵ်း၊ ယွၼ်ႉပိူဝ်ႈ ပၢင်တိုၵ်းသေ သိုၵ်းမၢၼ်ႈတေၸႂ်ႉၵူၼ်းဝၢၼ်ႈၵူၼ်းမိူင်း ၶၢႆႉတီႈယူႇတၼ်းသဝ်း။ 2.ပေႃးဝႃႈၵေႃႇသၢင်ႈၾၢႆၼႆႉ ၶိုၼ်ႈမႃးယဝ်ႉ ၼမ်ႉတေထူမ်ႈ။ ယွၼ်ႉၼႆ ၵၢၼ်ၽုၵ်ႇသွမ်ႈၵေႃႈ တေလူႉၵွႆ၊ ပေႃးၵၢၼ်ၽုၵ်ႇသွမ်ႈ လူႉၵွႆၵေႃႈ ၵူၼ်းဝၢၼ်ႈၵူၼ်းမိူင်းဢမ်ႇၸၢင်ႈ ႁဵတ်းၵၢၼ်၊ ပေႃးဢမ်ႇၸၢင်ႈႁဵတ်းၵၢၼ်ၵေႃႈ ၵူၼ်းမိူင်း တေၶၢႆႉတီႈယူႇထႅင်ႈ။ လၢႆးၼႆႉ ပဵၼ်လၢႆးသိုၵ်းယဵၼ် ပဵၼ်ၵၢၼ်ဢဝ်လၢႆးဢူၼ်ႈဢွၼ်ႇသေတိုၵ်းတေႃးတၢင်းဢွမ်ႈ၊ ၾၢႆႇၼိုင်ႈၵေႃႈ တေဢဝ်လၢႆးႁၢဝ်ႈႁႅင်းသေတိုၵ်း။ မၢၼ်ႈဢဝ်သွင်လၢႆးၼႆႉ သေတိုၵ်း- ဝႃႈၼႆ။

ပေႃးဝႃႈ ၽၵ်းတူၾၢႆၼႆႉႁၵ်း/ၵူၼ်ႇပႅတ်ႈၼႆ ၸႄႈမိူင်းယၢင်းလႅင်/ ယၢင်းၽိူၵ်ႇ/ မွၼ်း ၸိူဝ်းၼႆႉ တေထုၵ်ႇ ၼမ်ႉထူမ်ႈ။ ၵွပ်ႈပိူဝ်ႈၾၢႆၼႆႉ ဢမ်ႇမီးၽွၼ်းလီ တႃႇၵူၼ်းဝၢၼ်ႈၵူၼ်းမိူင်းသင်လႄႈ ၶႂ်ႈႁႂ်ႈလူင်ပွင်ၸိုင်ႈ ၵိုတ်းယိုတ်းပႅတ်ႈၾၢႆၼႆႉ- ၽူႈလဵပ်ႈႁဵၼ်းၵၢၼ်သိုၵ်း ၵၢၼ်မိူင်း လၢတ်ႈထႅင်ႈၼင်ႇၼႆ။

ၼိူဝ်မႄႈၼမ်ႉၶူင်းၼႆႉ လူင်ပွင်ၸိုင်ႈမၢၼ်ႈ တေတဵင်ၾၢႆ ႁဵတ်းၶူင်းၵၢၼ်ၾႆးၾႃႉႁႅင်းၼမ်ႉ 6 တီႈ၊ ၼႂ်းၸိုင်ႈတႆး 4 တီႈ၊ ၼႂ်းမိူင်းယၢင်းလႅင် 1 တီႈ၊ ၼႂ်းမိူင်းယၢင်းၽိူၵ်ႇ 1 တီႈ။ တႃႇတေႁဵတ်းၶူင်းၵၢၼ်ၸိူဝ်းၼႆႉ လူင်ပွင်ၸိုင်ႈမၢၼ်ႈ လႆႈလူင်းလၢႆးမိုဝ်း ပၼ်ၶေႃႈၵိၼ်ၵႅၼ်ႇ (ပၼ်ၶွၼ်ႊထရႅၵ်ႊ) တီႈၶွမ်ႊပၼီႊၶႄႇ တင်းၶွမ်ႊပၼီႊထႆး။ ၶွမ်ႊပၼီႊၶႄႇပဵၼ် ၶွမ်ႊပၼီႊသၢမ်ၽႃ (Three Gorges group Corporation-CTGC) ၊ ၶွမ်ႊပၼီႊထႆး ဢီႊၵဵတ်ႊ (EGAT) ၊ ၶွမ်ႊပၼီႊ ၵူႈၸိုင်ႈမိူင်း (International Group of Entrepreneurs Company-IGOEC) ၸိူဝ်းၼႆႉ။




 
© 2012 All Rights Reserved | Asean Celebrity | Fonts @ AtFonts | Free Templates