ၸုမ်းသိုဝ်ႇ DVB တေပူတ်းလၢႆးၵၢၼ် ပွႆႇသဵင်ၸၢဝ်းၶိူဝ်း
လိူၼ်ၼႃႈၼႆႉ ၸုမ်းသိုဝ်ႇ DVB တေပူတ်းလၢႆးၵၢၼ်ပွႆႇသဵင် တၢင်းရေႊၻီႊဢူဝ်ႊလႄႈ
လၢႆးၵၢၼ်ၸၢဝ်းၶိူဝ်း 8 ၸၢဝ်းၶိူဝ်း ဢၼ်ယၢမ်ႈပွႆႇဢွၵ်ႇမႃး
တီႈမိူင်းၼေႃႊဝေႊယ် ၶၢဝ်းတၢင်းႁိမ်း 20 ပီ။ ဢိင်ဢၢင်ႈဝႃႈ ယွၼ်ႉၸဝ်ႈတႃႇၼ လႄႈ
ဝၢၼ်ႈမိူင်းလႅၵ်ႈလၢႆႈ ၶိုတ်းၵၢပ်ႈမႃး။
ဝွၵ်း ယွၼ်းသူင်ႇသင်ႇထိုင်ပီႈၼွင်ႉတႆး ဢၼ်ပိုၼ်ဢွၵ်ႇတၢင်း ၾဵတ်ႊၿုၵ်ႊၶ် |
ပူၼ်ႉမႃးမိူဝ်ႈဝၼ်းဢင်းၵၢၼ် တီႈ
26/08/2014 ၸုမ်းသိုဝ်ႇလွတ်ႈလႅဝ်းမိူင်းမၢၼ်ႈ (Democratic Voice of Burma-
DVB) ႁဵတ်းပၢင်ၵုမ် တၢင်းဢွၼ်ႊလၢႆႊ တင်းၸုမ်းၸၢဝ်းၶိူဝ်းသေ
တႅပ်းတတ်းၵဵဝ်ႇၵပ်းလွင်ႈၵၢၼ်ငၢၼ်း ပိူဝ်ႈတႃႇ ႁဵတ်းသၢင်ႈၵႂႃႇ
ႁႂ်ႈပေႃးတၼ်းၶိုတ်းငဝ်းလၢႆးၵၢပ်ႈပၢၼ် ဢၼ်ပဵၼ်ယူႇယၢမ်းလဵဝ်။ ၵူၺ်းၵႃႈ
ၾၢႆႇၼိုင်ႈၵေႃႈ ၶူင်းၵၢၼ် ရေႊၻီႊဢူဝ်ႊ(Radio Program) ဢၼ်ႁႅင်းထွမ်ႇၵူၼ်း
ႁိုဝ် ၵူၼ်းဢၼ်ထွမ်ႇမၼ်းယွမ်းဢေႇလူင်းၼၼ်ႉ သမ်ႉ
တေပူတ်းၶူင်းၵၢၼ်မၼ်းၽွင်ႈၵေႃႈမီးၼႆလႄႈ ၼႂ်းၼၼ်ႉ ပႃးလၢႆးၵၢၼ်
ပွႆႇသဵင်တၢင်းရေႊၻီႊဢူဝ်ႊ (Radio) ဢၼ်မီး ၸၢဝ်းၶိူဝ်း 8 ၸၢဝ်းၶိူဝ်း။
လွင်ႈတၢင်း
ဢၼ်လႆႈပူတ်းထွၼ်ပႅတ်ႈလၢႆးၵၢၼ်ရေႊၻီႊဢူဝ်ႊ
ႁူမ်ႈတင်းလၢႆးၵၼ်ပွႆႇသဵင််ၸၢဝ်းၶိူဝ်းၼႆႉ ဢိင်ၼိူဝ်
ၵၢပ်ႈဝၢၼ်ႈပၢၼ်မိူင်းၶိုတ်းၵၢပ်ႈၶိုၼ်ႈယႂ်ႇမႃး ၵူၼ်းဝၢၼ်ႈၵူၼ်းမိူင်း
သူင်တူၺ်းၵၢၼ်ပွႆႇသဵင်ဢၼ်ၵိုၵ်းႁၢင်ႈ ႁိုဝ် ႁၢင်ႈႁဵင် (TV)
ၵေႃႈတၢင်းၼိုင်ႈ။ ၸွမ်းၼင်ႇၶေႃႈယင်ႇသဵင် ၵၢင်ၸႂ်ၵူၼ်းမိူင်း ဢၼ်တၢင်း BBC ၊
ဢိရႃဝၻီႇ ၶဝ်ထတ်းတူၺ်း ႁၼ်ဝႃႈၵူၼ်းထွမ်ႇ ၵၢၼ်ပွႆႇသဵင် DVB
ဢေႇလိူဝ်ၸုမ်းသိုဝ်ႇတၢင်ႇဢၼ် ၵေႃႈတၢင်းၼိုင်ႈ။ ဢိင်ၼိူဝ် ၸဝ်ႈတႃႇတ
ၽူႈၸွႆႈႁႅင်းၵၢၼ်ငိုၼ်းတွင်းၵေႃႈ ဢမ်ႇပေႃးၶႂ်ႈပၼ်ႁႅင်း လွင်ႈပွႆႇသဵင်
တၢင်းရေႊၻီႊဢူဝ်ႊ (Radio) ယဝ်ႉၵေႃႈ တၢင်းၼိုင်ႈ- ဝႃႈၼႆ။
ၵဵဝ်ႇၵပ်းလွင်ႈၼႆႉ ဢူးဢေးၶျၢၼ်းၼၢႆႇ
ႁူဝ်ၼႃႈၽူႈၸတ်းၵၢၼ်လူင်ၸုမ်းသိုဝ်ႇ DVB ၵေႃႈလၢတ်ႈဝႃႈ- ၼႂ်းၵၢၼ်ပွႆႇသဵင်
တင်းသဵင်ႈၼႆႉ ပေႃးတႅၵ်ႈၵၼ်တင်း သိုဝ်ႇတၢင်ႇဢၼ် မိူၼ်ၼင်ႇၶူင်းၵၢၼ် ထီႊဝီႊ
(TV) ၸိူဝ်းၼႆႉ မၼ်းပိူင်ႈၵၼ်ၼမ်။ ၵၢၼ်ပွႆႇသဵင်ၼႆႉ သင်ၸိူဝ်ႉဝႃႈတင်းမူတ်း
25% ။ ႁူင်းပွႆႇသဵင် BBC, RFA, VOA ၸိူဝ်းၼႆႉၵူၼ်းထွမ်ႇ % မၼ်းၼမ်၊
ၵူၺ်းၵႃႈ DVB ၼႆႉ ၵူၼ်းထွမ်ႇမၼ်း မီးမွၵ်ႈ 2% ၵူၺ်း။ ၸူးၸႂ်ႁဝ်းၶႃႈတႄႉ
ၵွပ်ႈႁဝ်းၶႃႈၵေႃႉဢွၼ်တႄႇ ႁဵတ်းမႃးလႄႈ ဢမ်ႇၶႂ်ႈပူတ်းထွၼ်ပႅတ်ႈ။ ၵူၺ်းၵႃႈ
ၸဝ်ႈတႃႇၼၶဝ်သမ်ႉဝႃႈ ႁႂ်ႈ DVB ၼႆႉ ၸုၵ်းပေႉတူဝ်ပေႉၶိင်းႁုင်းၵူၺ်း၊ တေလႆႈ
ႁဵတ်းၶၢဝ်ႇ SMS သူင်ႇၸွမ်းၶိူင်ႈၾူၼ်ႊမိုဝ်းထိုဝ်၊ ဢမ်ႇၼၼ် တဵၵ်းတူဝ် * သေ
ႁႂ်ႈထွမ်ႇၶၢဝ်ႇလႆႈၸိူဝ်းၼႆႉ။ ၾၢႆႇၼိုင်ႈ ၵေႃႈ
ပိူဝ်ႈတႃႇႁႂ်ႈၸုၵ်းပေႉတူဝ်လႆႈႁင်းၵူၺ်းၼႆႉ ၾၢႆႇပိုၼ်ၽၢဝ်ႇတၢင်း
ႁူင်းပွႆႇႁၢင်ႈသဵင် ထီႊဝီႊ (TV) ၵေႃႈ တေၶတ်းၸႂ် ႁဵတ်းၵႂႃႇ။ သင်ဝႃႈ
သူၼ်ၸႂ်ၶႂ်ႈၶၢႆႉၶဝ်ႈမႃးႁဵတ်းၶူင်ၵၢၼ် TV ၵေႃႈ ၶဝ်ႈႁဵတ်းၵၢၼ်လႆႈယူႇ- ဝႃႈၼႆ။
ၸုမ်းသိုဝ်ႇ DVB
ဢၼ်ၵုမ်းယိပ်းၾၢႆႇပွႆႇသဵင် / ရေႊၻီႊဢူဝ်ႊၼႆႉ ၼႂ်းမိူင်းမီး 4 ၵေႃႉ၊
တီႈလုမ်းၵဵင်းမႆႇ မီး 8 ၵေႃႉ၊ ၼႂ်းၸၢဝ်းၶိူဝ်း 8 ၸၢဝ်းၶိူဝ်း
မီးၸၢဝ်းၶိူဝ်းလႂ် 2 ၵေႃႉ။ ၵူၼ်းၸိူဝ်းႁဵတ်းၵၢၼ်ရေႊၻီႊဢူဝ်ႊ ၸိူဝ်းၼႆႉ
တေထုၵ်ႇပူတ်း ၵၢၼ်။
ၵဵဝ်ႇၵပ်းလွင်ႈၸၢဝ်းၶိူဝ်း
တေၶဝ်ႈႁဵတ်းၶူင်းၵၢၼ်ၾၢႆႇ ထီႊဝီႊ (TV program) ဢၼ် DVD ပွႆႇယူႇ 24
ၸူဝ်ႈမူင်းၼႆႉ ၼႂ်းၽူႈမီးပုၼ်ႈၽွၼ်းၸုမ်းၸၢဝ်းၶိူဝ်း
ယင်းပႆႇလႆႈဢုပ်ႇဢူဝ်းၵၼ်။ ၵူၺ်းၵႃႈ လႆႈႁူႉဝႃႈ ၼႂ်းၸၢဝ်းၶိူဝ်း တေဢုပ်ႇၵၼ်
ၼႂ်းဝၼ်းသဝ်ၼႃႈ (ဝၼ်းတီႈ 30/08/2014)ၼႆႉ၊ တေယိုၼ်ႈယွၼ်း
ႁႂ်ႈပေႃးၸၢင်ႈသိုပ်ႇပွႆႇသဵင်ရေႊၻီႊဢူဝ်ႊၵႂႃႇ တေႃႇထိုင်ၵၢၼ်လိူၵ်ႈတင်ႈ ပီ
2015 ၊ ၵွပ်ႈဝႃႈ ပေႃးထိုင်ပီ 2015 မႃး ႁူင်းပွႆႇသဵင် တေပဵၼ်သဵင်
ပၼ်တၢင်းႁူႉ တိုၵ်းသူၼ်းတႃႇၸၢဝ်းၶိူဝ်းၽႂ် ၸၢဝ်းၶိူဝ်းမၼ်း၊
ပေႃးပူတ်းပႅတ်ႈၵေႃႈ တႃႇတေထႅမ်ၸွႆႈပၼ်တၢင်းႁူႉၵူၼ်းမိူင်း ၼႂ်းၸႄႈ
မိူင်းၸၢဝ်းၶိူဝ်း ၼၼ်ႉ ဢမ်ႇမီးသင်- ၼႆယဝ်ႉ။
ၸၢႆးမွၼ်းၶိူဝ်း
ၽူႈၸတ်းၵၢၼ်ပွႆႇသဵင်ၾၢႆႇတႆး DVB ႁိုဝ် ဢၼ်ၵူၼ်းမိူင်းတႆးၵမ်ႈၼမ် ႁူႉၸၵ်းဝႃႈ
သဵင်တႆးၼေႃႊဝေႊယ် (ၼေႃႊဝူၺ်ႊ) လၢတ်ႈဝႃႈ- လၢႆးဢၼ်ၶဝ်ယင်ႇၵၢင်ၸႂ်ၵူၼ်းမိူင်း
(Survey) ၼႆႉ ပဵၼ်လၢႆးဢၼ်ၶိုတ်းၵၢပ်ႈၶိုတ်းပၢၼ်သေ
ၶဝ်ႈထိုင်လႆႈတီႈဝဵင်းယႂ်ႇဝဵင်းလူင် ၸိူင်ႉၼင်ႇ ၼႂ်းတႃႈၵုင်ႈ
ဝဵင်းတႃႈလိူဝ်ႇၸိူဝ်းၼႆႉၵူၺ်း။ မိူဝ်ႈလဵဝ် ငဝ်းလၢႆးၵၢပ်ႈပၢၼ် ဝၢၼ်ႈမိူင်း
ၶိုၼ်ႈယႂ်ႇမႃးလႄႈ ဢၼ်ႁဝ်းဢဝ်သဵင်ၶၢဝ်ႇ (ပႃးႁၢင်ႈထၢႆႇ)
တၢင်ႇၼိူဝ်ၾဵတ်ႊၿုၵ်ႊၶ် (Facebook) ၸိူဝ်းၼႆႉ ၵေႃႈ ၵူၼ်းထွမ်ႇမၼ်းၼမ်၊
ပေႃးၶိုၼ်ႈၵႂႃႇၸူဝ်ႈၵႅပ်ႉၵေႃႈ ၵဝ်သျႄႊမႂ်း-မႂ်းသျႄးၵဝ်သေ
ၵမ်းၼိုင်ႈၵူၺ်းၵေႃႈ ၽႄႈၵႂႃႇ ၼမ်။ ၵူၺ်းၵႃႈ ပေႃးဝႃႈၵူၼ်းဝၢၼ်ႈၼွၵ်ႈၼႃးပၢင်ႇ
တီႈဢၼ်ဢမ်ႇလႆႈၾႆးၾႃႉ/ ဢမ်ႇမီးၾႆးၾႃႉၸိူဝ်းၼၼ်ႉ ဢမ်ႇၸၢင်ႈ တူၺ်းထီႊဝီႊ၊
ဢမ်ႇမီးႁူႉလွင်ႈၾဵတ်ႊၶ်ၿုၵ်ႉ၊ ဢမ်ႇႁူၸၵ်း ဢိၼ်ႊထိူဝ်ႊၼႅတ်ႉ
လိူဝ်သေရေႊၻီႊဢူဝ်ႊ ဢမ်ႇၸၢင်ႈ ၸႂ်ယႂ်ႇသင်။ မိူၼ်ၼင်ႇ ၼႂ်းမိူင်းတႆး
ပွတ်းမိူင်းၶၢၵ်ႇ မိူင်းယၢင်း ပွတ်းဢွၵ်ႇၶူင်းၸိူဝ်းၼႆႉ
လႆႈမုင်ႈမွင်းထွမ်ႇရေႊၻီႊဢူဝ်ႊ တၢင်းႁူင်းပွႆႇသဵင်ၵူၺ်း- ဝႃႈၼႆ။
ၽူႈၸတ်းၵၢၼ်ပွႆႇသဵင်ၾၢႆႇတႆး DVB
ၸၢႆးမွၼ်းၶိူဝ်း ယင်းသိုပ်ႇလၢတ်ႈဝႃႈ - ၶဝ်ႈႁဵတ်းၵၢၼ်ပွႆႇသဵင်ၾၢႆႇတႆး ၸွမ်း
DVB တင်ႈတႄႇ 1996 လိူၼ်မၢတ်ႉၶျ် မႃးတေႃႇထိုင်မိူဝ်ႈလဵဝ် ၶၢဝ်းတၢင်း 18
ပီပၢႆသေ တေထုၵ်ႇပူတ်းထွၼ်ပႅတ်ႈ ၼႂ်းပၢႆလိူၼ်
ဢွၵ်ႇထူဝ်ႊၿိူဝ်ႊသဵင်ႈၼႆႉယဝ်ႉၼၼ်ႉ သူၼ်ႇၼိုင်ႈၵေႃႈယိၼ်းသေလၢႆလူင်လၢင်
ဢိၵ်ႇတင်းၸႂ်လဵၵ်ႉၶေႃးၶူမ် တႅၼ်းပီႈၼွင်ႉၽူႈထွမ်ႇယိၼ်းသဵင်ၾၢႆႇတႆး
ၸိူဝ်းၵႆႉလႆႈလၵ်ႉသွပ်ႉသႅပ်ႉႁွင်ႉၵၼ်မႃးပႂ်ႉ ငွမ်ငႅမ်ထွမ်ႇ
ၽွင်းၸမ်ၶၢဝ်းယၢမ်း ပွႆႇသဵင်ၾၢႆႇတႆးဝၼ်းပုတ်ႉတေမႃး
မိူဝ်ႈပၢၼ်သိုၵ်းမၢၼ်ႈၽွင်းငမ်းဝၢၼ်ႈမိူင်း လႄႈႁိပ်ႇငႅၼ်းႁႅတ်ႉႁၢမ်ႈ
ႁုၵ်းႁၢႆႉႁၢဝ်ႈႁႅင်း ၼၼ်ႉ ၸူဝ်ႈၸၢတ်ႈပၢၼ်ၼႆႉ တိုၵ်ႉမီးယူႇၼႂ်းတႃ။
ၸၢႆးမွၼ်းၶိူဝ်း သိုပ်ႇလၢတ်ႈဝႃႈ
ၸိူင်ႉႁိုဝ်ၵေႃႈလီ သဵင်တႆးၼေႃႊဝေႊယ် ႁိုဝ် သဵင်တႆး DVB ၼႆႉ
တိုၼ်းပဵၼ်ၵိင်ႇၵၢၼ်ႈ ဢၼ်ၽႄငွၵ်ႈဢွၵ်ႇမႃးတီႈ ၸုမ်းၶၢဝ်ႇၽူႈတွႆႇႁွၵ်ႈ
သူၼ်ႇၼိုင်ႈၵူၺ်းလႄႈ ၼမ်ႉမိုၵ်ႉဢၼ်တေသိုပ်ႇတႅမ်ႈၶၢဝ်ႇၵေႃႈ ဢမ်ႇႁႅင်ႈ
လွတ်ႇၶေႃးတႃႇသႅၼ်ႇ ၶၢၼ်ႁဵၵ်ႈႁွင်ႉ သဵင်ပွင်ႉၵူၼ်းမိူင်းၵေႃႈ တၵ်းတေဢမ်ႇယဵၼ်
တိုၼ်းတေပႂ်ႉတွႆႇႁွၵ်ႈ ပူၵ်းလိုပ်ႈၶဵၼ်ပၼ်ၵူၼ်းမိူင်း
ၸူဝ်ႈလူမ်းထူၺ်ႈတိုၵ်ႉမီးပႆႇသဵင်ႈ ဢိၵ်ႇတင်းတေသိုပ်ႇသၢႆၸႂ်
ပဵၼ်သဵင်တႆးမိူင်းလွႆၵႂႃႇ - ဝႃႈၼႆ။
Tags: Human Right, News