ၸၢႆးႁိၼ်ပဝ်း လၢတ်ႈၼႄၸၢတ်ႈပၢၼ်ၵူၼ်း လဵၼ်ႈႁႅင်း
ၸွမ်းၼင်ႇၸုမ်းၶၢဝ်ႇၽူႈတွႆႇႁွၵ်ႈ တိတ်းတေႃႇ တွင်ႈထၢမ်သေ ၸၢႆးႁိၼ်ပဝ်း
ပီႈၼွင်ႉတႆးမိူင်းၵုတ်ႈ တွပ်ႇလၢတ်ႈၼႄ လွင်ႈၽဝၸၢတ်ႈပၢၼ် ၵူၼ်းလဵၼ်ႈႁႅင်း
ၾၢႆႇတူဝ်ၶိင်းလဝ်းလီ ၵၢမ်ႈၼိူဝ်ႉမၢၵ်ႈ ၼင်ႇၼႆ။
Photo: Facebook |
ထၢမ်-
မႂ်ႇသုင်ၶႃႈပီႈၸၢႆးၶိတ်ႉငူၺ်ႇႁဝ်းၶႃႈ။ ပီႈၸၢႆးၶိတ်ႉငူၺ်ႇ (ၸၢႆးႁိၼ်ပဝ်း)
ႁဝ်းၶႃႈၼႆႉလႆႈႁူႉဝႃႈပႃးဝႃႇသၼႃႇ သူင်ၾၢႆႇ လဵၼ်ႈႁႅင်း၊
တေလႆႈဝႃႈၸၢႆးႁႅင်းလူင်၊ ပီႈၸၢႆးၶိတ်ႉငူၺ်ႇႁဝ်းၼႆႉ ပဵၼ်ၵူၼ်းမိူင်းလႂ်ၶႃႈ။
တွပ်ႇ-ၸႃႇတိမိူင်းၵုတ်ႈၶႃႈ၊
ပွၵ်ႉပၢင်ႇမိူင်းသႃ၊ ဝၢႆးမႃးႁွင်ႉပီးတွင်ႇယတ်ႉၵွတ်ႉ။
တီႈၼႆႈပီႈၼွင်ႉတႆးတင်းပီႈၼွင်ႉတႆးသႃ ယူႇသဝ်း \ၵိၼ်သၢင်ႈ ၶႂ်ႈၽႃႇၶိုင်ႈၵၼ်။
ထၢမ်- ဢၼ်တင်ႈဝႆႉၸိုဝ်ႈတႆးၸွင်ႇမီးၶႃႈ။
တွပ်ႇ- မီးၶႃႈဢေႃႈ၊
ပေႃႈမႄႈတင်ႈၸိုဝ်ႈဝႆႉဝႃႈ ၸၢႆးႁိၼ်ပဝ်းၼႆၶႃႈဢေႃႈ၊
ၶိူဝ်းႁိူၼ်းႁိၼ်ႁွင်ႉၸွမ်းၶိူဝ်း ႁွင်ႉၸၢႆးႁိၼ်ပဝ်းၼႆၶႃႈ။
ၸိုဝ်ႈပေႃႈႁွင်ႉၸၢႆးၸိၼ်ႉပဝ်း၊ ၸိုဝ်ႈမႄႈႁွင်ႉဝႃႈၼၢင်းဢေယိင်း။
ပဵၼ်ၵူၼ်းၸိူဝ်ႉသၢႆတၢင်း မိူင်းဝၼ်း။
ထၢမ်- လွင်ႈဢၼ်လဵၼ်ႈမႃႇလဵၼ်ႈႁႅင်းႁႂ်ႈပေႃးမင်ႈပေႃးၵႅၼ်ႇၼႆႉ ပီႈၸၢႆးၶိတ်ႉငူၺ်ႇႁဝ်းတႄႇမႃးမိူဝ်ႈလႂ်၊ ႁဵတ်းႁိုဝ်သူၼ်ၸႂ်မႃးၶႃႈ။
တွပ်ႇ- မိူဝ်ႈၶိုၼ်ႈႁူင်းႁဵၼ်းၸၼ်ႉၸွမ် တီႈဝဵင်းလိူဝ်ႇႁၼ်ပိူၼ်ႈလဵၼ်ႈသေ ၾိုၵ်းလဵၼ်ႈၸွမ်း၊ တႄႇလဵၼ်ႈမႃးမိူဝ်ႈပီ 1997 ။
ထၢမ်- တင်ႈတႄႇၶဝ်ႈမႃးထိုင်ၼႂ်းဝူင်းၵၢၼ်
ဢၼ်ၶႄႉၶႅင်ႇလွင်ႈမႃႇၶႅင်ႁႅင်းၵိုမ်းၼႆႉ ၵမ်းဢွၼ်တၢင်းသုတ်း၊
ဢၼ်လႆႈတေႃႇသူႈမႃးပဵၼ်ၸိူင်ႉႁိုဝ်ၶႃႈ။
တွပ်ႇ- မိူဝ်ႈတႄႇလဵၼ်ႈၼၼ်ႉ
ၸဵပ်းတင်းတူဝ်တင်းၶိင်း၊ ဢဝ်ယႃႈယႃလုပ်ႈလုပ်ႈတႃးတႃး။ ပေႃးႁၼ်ပိူၼ်ႈ
မီးမႃႇမီးႁႅင်း သမ်ႉၶွႆပိူၼ်ႈလႄႈယွမ်း/ၶၢမ်ႇလဵၼ်ႈမႃးတိၵ်းတိၵ်း၊
လဵၼ်ႈမႃးလႆႈ 2 ပီ၊ ပီ 1999 ၶဝ်ႈၶႄႉၶဵင်ႇတီႈမိူင်းၵုတ်ႈ၊ ၸၼ်ႉဢွၼ်ႇ၊ လႆႈထီႉ 3
၊ဝၢႆးမႃးလႆႈထီႉ 1-2-3 လၢႆလၢႆပၢင်။မိူဝ်ႈလဵဝ်ၶႆႈၶဵင်ႇမႃးတင်းမူတ်း 31 ပၢင်။
ထၢမ်-31 ပၢင်ၼႆႉဢၼ်ပေႉသေလႆႈသူး (ရၢင်းဝလ်း) လၢႆပၢင်၊ဢၼ်ၵၢၼ်ႉပိူၼ်ႈ မီးလၢႆပၢင်ၶႃႈ။
တွပ်ႇ- ဢၼ်ၵၢၼ်ႉပိူၼ်ႈၼမ်ၼမ်မီး 3-4
ပၢင်၊ဝၢႆးမႃးၶႄႉၶဵင်ႇပေႉပိူၼ်ႈၵမ်ႈၼမ်ယူႇၶႃႈ။ ၽွင်းတႄႇလဵၼ်ႈမႃးၼၼ်ႉ
ၼမ်ႉၼၵ်းမီးမွၵ်ႈ 135 ပွင်ႇ၊ မိူဝ်ႈလဵဝ်မီး 150 ပၢႆ။
ထၢမ်- မိူၼ်ၼင်ႇၶဝ်ႈၶႄႉၶဵင်ႇတီႈမိူင်းၵုတ်ႈၵေႃႈလီ၊ ယူႇတီႈႁူင်းႁဵၼ်းသေၶႄႉၶဵင်ႇ၊ လွင်ႈၵၢၼ်ႁဵၼ်းၵၢၼ်သွၼ်ၼႆႉ လူးလၢတ်ႈပၼ်ၽွင်ႈၶႃႈ။
တွပ်ႇ-
ဝၢႆးသေၶႃႈႁဝ်းဢွၵ်ႇႁူင်းႁဵၼ်းယဝ်ႉသေ ၸင်ႇၾိုၵ်းမႃးၵူၺ်း၊
ၼႂ်းႁူင်းႁဵၼ်းတႄႉဢမ်ႇလႆႈၵႂႃႇၶဵင်ႇၸၼ်ႉႁူင်းႁဵၼ်းၶႃႈ။
ၵၢၼ်လဵၼ်ႈႁႅင်းၾၢႆႇၵႃႇယပလၼႆႉ ႁဵတ်းႁႂ်ႈတူဝ်ၶိင်းႁဝ်းႁၢင်ႈလီ၊
ဢဵၼ်ၼိူဝ်ႉႁဝ်းသၢႆလိူတ်ႈႁဝ်းၸိူဝ်းၼႆႉၽူၵ်ႈလီႁၼ်လီ။
ပဵၼ်ၵၢၼ်ၶႄႉၶဵင်ႇတၢင်းႁၢင်ႈလီတူဝ်ၶိင်းၵူၺ်း။ ၵၢၼ်လဵၼ်ႈၵႃႇယပလၼႆႉ
ပေႃးၸမ်ပွႆးၶႄႉၶဵင်ႇယဝ်ႉလဵၼ်ႈပိူင်ၼိုင်ႈ။
ပေႃးၵႆပၢင်ၶႄႉၶဵင်ႇလဵၼ်ႈပိူင်ၼိုင်ႈ။
လွင်ႈတၢင်းၵိၼ်တၢင်းယႅမ်ႉၵေႃႈလႆႈတူၺ်းတူၺ်းသေၵိၼ်။
ပေႃးဝႃႈၸမ်ဝၼ်းၶႄႉၶဵင်ႇယဝ်ႉ မိူၼ်ၼင်ႇဢၼ်ၶႆဢၼ်မၼ်း၊
ဢၼ်ဝၢၼ်ဢၼ်ၸဵမ်းၸိူဝ်းၼႆႉလႆႈလူတ်းယွမ်းၵိၼ်။
လႆႈၵိၼ်ပၼ်ၶႆႇၵႆႇတူမ်ႈဢၼ်ဢမ်ႇသုၵ်းတႄႉတႄႉၼၼ်ႉ။
ထၢမ်- ၼင်ႇႁိုဝ်ၵူၼ်းသူၼ်ၸႂ်
ပႃးဝႃႇသၼႃႇတေလႆႈလဵပ်ႈႁဵၼ်းၸွမ်းၼၼ်ႉ ပေႃးလုၵ်ႉမႃးလွင်ႈၶွင်ၵိၼ်ၶွင်ယႅမ်ႉ၊
လွင်ႈၾိုၵ်းၸိူဝ်းၼႆႉလၢတ်ႈၼႄပၼ်ၽွင်ႈၶႃႈ။
တွပ်ႇ- ၵၢင်ၶိုၼ်းမႃးတူမ်ႈၶႆႇဝႆႉသေ
ပေႃးၵၢင်ၼႂ်မႃးတွၵ်းၵိၼ်ၶႆႇမွၵ်ႈ 4 လုၵ်ႈ၊
မွၼ်းမၼ်းဢမ်ႇၵိၼ်၊ၵိၼ်ဢၼ်ၶၢဝ်မၼ်းၵူၺ်း။ ၵိၼ်ပၼ်ၵူၺ်ႈၶဝ်ႁိုဝ်ႉ၊
ထူဝ်ႇၽူးဢုၼ်ႇတႆးၸိူဝ်းၼႆႉ။
ထၢမ်- လွင်ႈၵိၼ်ၶဝ်ႈၵိၼ်ၽၵ်းၶႃႈလူး။
တွပ်ႇ-ပေႃးၸမ်ပၢင်ၶႄႉၶဵင်ႇမႃးလႆႈၵိၼ်ပၼ်ၼိူဝ်ႉၵမ်ႈၼမ်၊
ၶဝ်ႈလႆႈလူတ်းယွမ်းၵိၼ်။ လႆႈၵိၼ်ၼိူဝ်ႉတူမ်ႈပႃတူမ်ႈၶဝ်၊ဢမ်ႇသႂ်ႇၵိူဝ်။
ပေႃးၵႆၶၢဝ်းယၢမ်းပၢင်ၶႄႉၶႅင်ႇၵိၼ်ၼိူဝ်ႉလႅင် (ၼိူဝ်ႉဝူဝ်း) ၵမ်ႈၼမ်၊
ပေႃးၸမ်ၶၢဝ်းယၢမ်းၶႄႉၶႅင်ႇမႃးလွႆးလွႆးယဝ်ႉ
ၶိုၼ်းမႄးၵိၼ်ပၼ်မိူၼ်ၼင်ႇၼိူဝ်ႉၵႆႇၶဝ်ပႃၶဝ်။
ဢၼ်လီသေပိူၼ်ႈပဵၼ်ၼိူဝ်ႉပႃၶႃႈ။
ထၢမ်-ဢၼ်ၾိုၵ်းမႃးၼႆႉၵူၼ်းတၢင်းႁိူၼ်းပၼ်ႁႅင်းၸိူင်ႉႁိုဝ်ၶႃႈ။
ဢၼ်ဝႃႈၵၢၼ်လဵၼ်ႈႁႅင်းဢမ်ႇလႆႈလွင်ႈလႆႈတႃ
ၸွမ်းၼင်ႇၾိင်ႈထုင်းတႆးႁဝ်းၵႆႉဝႃႈႁင်းၵၼ်ၼၼ်ႉ ၸွင်ႇမီးၶႃႈႁႃႉ။
တွပ်ႇ- ပေႃႈႁဝ်းလႆႈၸႂ်ၶႃႈဢေႃႈ၊
လဵၼ်ႈမိူဝ်ႈတူဝ်ႈတၼ်းၵူၺ်း။ မၢင်ပွၵ်ႈမၢင်လႂ်ၼွင်ႉယိင်းၶႃႈႁဝ်းၵႆႉဝႃႈ
ပီႈၸၢႆးႁဝ်းၵုမ်ႇလဵၼ်ႈဢၼ်ၼႆႉယူႇတိၵ်းတိၵ်း ၵၢၼ်ၵေႃႈဢမ်ႇပေႃးႁဵတ်းလီလီဝႃႈၼႆ။
မိူဝ်ႈထိုင်ၶၢဝ်းႁႅင်ႈဢိုတ်းႁဵၼ်းၵေႃႈ ၵႂႃႇသွၼ်ပၼ်လိၵ်ႈတႆးၸိူဝ်းၼႆႉ။
မၢင်ပီမၢင်လႂ်ဢမ်ႇပေႃးလႆႈယူႇႁိူၼ်းလီလီ။ ၶူႈသွၼ်လိၵ်ႈတႆးၼႆႉတႄႇမိူဝ်ႈပီ
2001 ၊ 2008-09 ၸိူဝ်းၼႆႉ။
ထၢမ်- ယူႇတီႈႁဵတ်းၾၢႆႇလဵၼ်ႈဢဵၼ်ႁႅင်းသေ မိူဝ်ႈလဵဝ်ၼႆႉပိုတ်ႇဝႆႉတီႈၾိုၵ်းလဵၼ်ႈႁႅင်းႁႃလၢႆးလႆႈၸိူဝ်းၼႆႉ ငဝ်းလၢႆးပဵၼ်ၸိူင်ႉႁိုဝ်ၶႃႈ။
တွပ်ႇ-
မိူဝ်ႈလဵဝ်ငဝ်းလၢႆးၶႅမ်ႉမႃးယူႇၶႃႈ၊ မိူဝ်ႈလဵဝ်ၵူၼ်းၵူႈၵေႃႉၵေႃႈ
ၶဝ်သူၼ်ၸႂ်ပၢႆးယူႇလီ၊တေႁဵတ်းႁိုဝ်ၵိၼ်/ လဵၼ်ႈၸိူဝ်းၼႆႉ
ပိူၼ်ႈဢွၼ်ၵၼ်မႃးၾိုၵ်းမီးတင်းၼမ်။
မၢင်ၸိူဝ်းၵေႃႈပိူၼ်ႈမႃးႁွင်ႉသေၵႂႃႇသွၼ်ပၼ်ပိူၼ်ႈ၊ လႆႈငိုၼ်းလိူၼ်တီႈၶဝ်သေ
ၶိုၼ်ႈမႃးလွႆးလွႆး။
ထၢမ်- ၼင်ႇႁိုဝ်ၵူၼ်းတၢင်းလင်ၵေႃႈလႆႈလဵပ်ႈႁဵၼ်းႁူႉၸွမ်းၼၼ်ႉ ၵၢၼ်လဵၼ်ႈႁႅင်းၼႆႉပဵၼ်ၵၢၼ်ႁႃလဵင်ႉတွင်ႉႁဝ်း မႃးလႆႈယူႇၶႃႈၼေႃႈ။
တွပ်ႇ- ပဵၼ်ၶႃႈဢေႃႈ။ မၢင်ၸိူဝ်းၵေႃႈႁဵတ်းၵၢၼ်ၸိူင်ႉၼႆသေ လဵင်ႉလုၵ်ႈလဵင်ႉမေးၵေႃႈမီးတင်းၼမ်ယူႇၶႃႈ။
ထၢမ်- သင်ဝႃႈယူႇတီႈၵူၼ်းဢမ်ႇႁူႉ၊
သမ်ႉၶႂ်ႈၾိုၵ်းႁႂ်ႈတူဝ်ၶိင်းႁၢင်ႈလီ ပိူဝ်ႈတႃႇမႃႇၶႅင်ႁႅင်းၵိုမ်းၼႆ
ပေႃးႁဝ်းမႃးၾိုၵ်းၼိုင်ႈလိူၼ်ၼႆႉ ႁဝ်းလႆႈၸၢႆႇႁႅင်းငိုၼ်းတွင်းၵႃႈႁိုဝ်ၶႃႈ။
တွပ်ႇ- ၶူင်းၵၢၼ်မၼ်းဢမ်ႇမိူၼ်ၵၼ်။ ဢၼ်ဢေႇတီႈသုတ်းၼိုင်ႈမိုၼ်ႇ၊ ဢၼ်ၼမ်သေပိူၼ်ႈ မၢင်တီႈမီးၼိုင်ႈလိူၼ်ႁႃႈမိုၼ်ႇၵွၼ်ႇၶႃႈ။
ထၢမ်- ဢၼ်တေၶဵင်ႇၵႂႃႇတၢင်းၼႃႈ ဢၼ်ဝၢင်းၽႅၼ်ဝႆႉၼႂ်းပီ 2014-15 မီးပၢင်ပွႆးသင်ၽွင်ႈၶႃႈ။
တွပ်ႇ-
ဢၼ်ၸမ်သေပိူၼ်ႈမီးၼႂ်းၸႄႈမိူင်းၼႆႉ၊ ပေႃးမွၵ်ႈဝၼ်းတီႈ 22/10/2014
မႃးတေၵႂႃႇတီႈမျိတ်ႉၵျီးၼႃးမိူင်းၶၢင်။ လွင်ႈၼႆႉၼႂ်းတိူင်းမၼ်းတလေး
(ဝဵင်းတႃႈလိူဝ်ႇ) တေလိူၵ်ႈ။ တေလိူၵ်ႈတီႈမိူင်းၵုတ်ႈၼႆႉသေ
ပေႃးဝႃႈၶႃႈႁဝ်းပေႉပိူၼ်ႈၼႆၶဝ်တေႁွင်ႉသေၸင်ႇသူင်ႇၵႂႃႇမျိတ်ႉၵျီးၼႃး၊
ပေႃးဢမ်ႇပေႉပိူၼ်ႈၵေႃႈၶိုၼ်းမႃးၶႃႈဢေႃႈ။
ၼင်ႇႁိုဝ်တိူင်းမၼ်းတလေးႁဝ်းတေပေႉပိူၼ်ႈၼၼ်ႉ
ၶဝ်ႁႂ်ႈၶဝ်ႈၶႄႉၶဵင်ႇပၼ်ၼႂ်းၼမ်ႉၼၵ်း 65 ၵီႊလူဝ်ႊၼႆၶႃႈ။
ထၢမ်- ဢၼ်လႆႈၶဝ်ႈၶဵင်ႇသေပေႉပိူၼ်ႈမႃးဢၼ်သုင်တီႈသုတ်းပဵၼ်ပၢင်ပွႆးသင်ၶႃႈ။
တွပ်ႇ-
ပဵၼ်ပွႆးၼႂ်းမၼ်းတလေးဢၼ်ဝႃႈသူၺ်ႇမၢၼ်းမွင်ႇ။ ပွႆးၼႆႉၶႃႈလႆႈ 3 ပီထပ်းၵၼ်ပီ
2011-12-13 ။ၼႂ်းပိုၼ်းသူၺ်ႇမၢၼ်းမွင်ႇၼႆႉ ဢၼ်လႆႈထပ်းၵၼ် 3
ပီၸိူင်ႉၼႆဢမ်ႇမီးသေၵေႃႉၶႃႈ။ ပွႆးၼႆႉပဵၼ်ၼႂ်းတိူင်းမၼ်းတလေးၵူၺ်း၊
ၼႂ်းၸၼ်ႉၸႄႈမိူင်းတႄႉယၢမ်ႈၵႂႃႇၶႄႉၶဵင်ႇ တီႈတႃႈၵုင်ႈသေလႆႈထီႉ 3
မႃးၶႃႈဢေႃႈ၊ပီ 2013 ၊ မိူဝ်ႈၼၼ်ႉတၢင်တူဝ်မိူင်းတႆးပွတ်းႁွင်ႇသေ လႆႈမႃး။
ထၢမ်-ၶႂ်ႈယွၼ်းထၢမ်ၵၢင်ၸႂ်ပီႈၸၢႆးႁဝ်းၶႃႈ၊
ၵႃႈၵွၼ်ႇပူၼ်ႉမႃးမိူင်းၵုတ်ႈၼႆႉပိူၼ်ႈၵေႃႈဝႃႈပဵၼ်မိူင်းတႆးႁဝ်းယူႇ။
တူၵ်းတႂ်ႈဢိင်းၵလဵတ်ႈသေ တေလႆႈဝႃႈၽၢတ်ႇဢွၵ်ႇမိူင်းတႆးႁဝ်းၵႂႃႇၵေႃႈမီး 100
ပီပၢႆယဝ်ႉ၊ လွင်ႈၼႂ်းၸႂ်ၼႂ်းၶေႃးၸၢႆးႁိၼ်ပဝ်း
ႁဝ်းလူး၊ၵဵဝ်ႇၵပ်းလွင်ႈပဵၼ်တႆးသေ သမ်ႉဢမ်ႇလႆႈၶႄႉၶဵင်ႇပၼ်တႃႇမိူင်းတႆး၊
သမ်ႉလႆႈၶႄႉၶဵင်ႇပၼ်တႃႇတိူင်းမၼ်းတလေးၼႆႉ ၼႂ်းၸႂ်ၼႂ်းၶေႃးမီးၸိူင်ႉႁိုဝ်ၶႃႈ။
တွပ်ႇ-
ပေႃးပဵၼ်လႆႈတႄႉၶႂ်ႈၶႄႉၶဵင်ႇတႃႇမိူင်းတႆးႁဝ်း။
မိူင်းၵုတ်ႈသမ်ႉပႃးၵႂႃႇၼႂ်းတိူင်းမၼ်းတလေးသေ
ၵႃႈလႆႈၶႄႉၶဵင်ႇၼႂ်းတိူင်းမၼ်းတလေး၊
ၸူးၵၢင်ၸႂ်တႄႉၶႂ်ႈတၢင်တူဝ်မိူင်းတႆးသေၶဝ်ႈၶႄႉၶဵင်ႇၵူႈတီႈယူႇၶႃႈ။
မၢင်ပွၵ်ႈမၢင်လႂ်ၵႂႃႇႁၼ်ၽူႈတၢင်တူဝ်မိူင်းတႆးသမ်ႉဢမ်ႇၸႂ်ႈတႆး၊
မၢင်ၸိူဝ်းသမ်ႉပဵၼ်မၢၼ်ႈ၊ တႆးႁဝ်းၼႆႉ (ၵူၼ်းလဵၼ်ႈႁႅင်း) ဢေႇဝႃႈဢေႇၶႃႈ။
ထၢမ်- ဢၼ်လႆႈၶဝ်ႈၶႄႉၶဵင်ႇမႃးသေ ဢၼ်ဢမ်ႇႁၢၼ်ႉၸႂ်တီႈသုတ်း ၸွင်ႇမီးၶႃႈ။ ဢၼ်ႁၢၼ်ႉၸႂ်တီႈသုတ်း သမ်ႉပဵၼ်တီႈလႂ်ၶႃႈ။
တွပ်ႇ- ဢၼ်ဢမ်ႇႁၢၼ်ႉၸႂ်ၼၼ်ႉဢမ်ႇမီးၶႃႈ။
ဢၼ်ႁၢၼ်ႉၸႂ်တီႈသုတ်းတႄႉပဵၼ်ပီ 2013 ၊လႆႈသူး (ရၢင်းဝလ်း)
သၢမ်ပီထပ်းၵၼ်ၼႆႉပဵၼ်ဢၼ်ႁၢၼ်ႉၸႂ်/ ၸူမ်းသိူဝ်းသေပိူၼ်ႈၶႃႈ။
ဢၼ်လႆႈၶႄႉမႃးၼႆႉပဵၼ်မၢၼ်ႈၵမ်ႈၼမ်၊ လိူဝ်သေၼၼ်ႉပဵၼ်ရၶႅင်ႇ၊ ၶၢင်၊ ၶျၢင်း။
ၶၢင်ၶဝ်ၵေႃႈၶႂ်ႈမိူၼ်တႆးႁဝ်းၼင်ႇၵဝ်ႇ၊ ၶၢင်ၵေႃႈမီးဢေႇၶႃႈဢေႃႈ။
ထၢမ်- ၼႂ်းၸၢဝ်းၶိူဝ်းႁဝ်းၼႆႉပႃးၸဵမ်ၼႂ်းတႆးႁဝ်း ပိူဝ်ႈတႃႇတေပဵၼ်ၵူၼ်းလဵၼ်ႈႁႅင်းၼႆႉ လွင်ႈယူပ်ႈယွမ်းမီးသင်ၶႃႈ။
တွပ်ႇ-တၢင်းႁၼ်ထိုင်ၶႃႈတႄႉ
ပေႃးပဵၼ်ၵူၼ်းၸၢႆးမၢဝ်ႇတႆးႁဝ်းၼႆ
သမ်ႉၵိၼ်လဝ်ႈၵိၼ်ယႃႈၵမ်ႈၼမ်၊ၼၼ်ႉပဵၼ်လွင်ႈယူပ်ႈယွမ်းႁႅင်း၊
သမ်ႉသူင်ႇတၢင်းၵျေႃႇတၢင်းမူၼ်ႈ။ ၵႂႃႇတီႈလႂ်ၵေႃႈလူဝ်ႇပႃးလဝ်ႈၵွၼ်ႇ၊
ပေႃးဢမ်ႇပႃးလဝ်ႈဢမ်ႇမူၼ်ႈပၢင်ဢမ်ႇမူၼ်း။ ၵူၼ်းလဵၼ်ႈဢဵၼ်ႁႅင်းၼႆႉ
လဝ်ႈၼႆႉဝႄႈလႆႈၼမ်ၵႃႈႁိုဝ်ၵေႃႈလီၵႃႈၼၼ်ႉ၊
ဢမ်ႇၵိၼ်လႃးလႃးတႄႉဢမ်ႇဝႃႈၼင်ႇၵဝ်ႇၶႃႈ။
ထၢမ်-
ဢၼ်ၶႂ်ႈထၢမ်ပီႈၸၢႆးႁဝ်းၵမ်းလိုၼ်းသုတ်းတႄႉ
ၵဵဝ်ႇၵပ်းလွင်ႈလဵၼ်ႈႁႅင်းၵေႃႈလီ၊ၵဵဝ်ႇၵပ်းလွင်ႈလိၵ်ႈလၢႆးႁဝ်းၵေႃႈလီ၊
ဢၼ်ႁဝ်းၶႃႈဢမ်ႇထၢမ်မႅၼ်ႈသေ ဢၼ်ပီႈၸၢႆးႁဝ်းၶႂ်ႈလၢတ်ႈၼၼ်ႉ
ပိုင်ႈသင်ႇလၢတ်ႈထိုင်ပီႈၼွင်ႉၵူၼ်းမိူင်းတႆးႁဝ်းၽွင်ႈၶႃႈ။
တွပ်ႇ-ဢၼ်ၶႃႈႁဝ်းၶႂ်ႈသင်ႇလၢတ်ႈတႄႉ
ၶႂ်ႈႁႂ်ႈၵူၼ်းၼုမ်ႇတႆးႁဝ်းယႃႇပေယူႇလွၵ်ႇယူႇလၢႆ၊
ပေႃးမီးၶၢဝ်းယၢမ်းၵေႃႈႁႂ်ႈၾိုၵ်းမႃႇၾိုၵ်းႁႅင်း။
ပိူင်ၼိုင်ႈလွင်ႈၵၢၼ်ၵိၼ်လဝ်ႈမဝ်းယႃႈၼႆႉႁႂ်ႈၶဝ်ယွမ်း။
မိူဝ်ႈလဵဝ်လိၵ်ႈလၢႆးတႆးႁဝ်းၵေႃႈၶိုၼ်ႈသင်ႉၶိုၼ်ႈသုင်မႃးလွႆးလွႆးယဝ်ႉ၊
ၶႂ်ႈႁႂ်ႈဢွၼ်ၵၼ်ၸႂ်ႉတိုဝ်းၼမ်ၼမ်သေ ႁႂ်ႈမၼ်းၸၼ်ႉသုင်သေၼႆႉၶႃႈဢေႃႈ။
Tags: Health, Interview