ၸုမ်းပုတ်ႉထသႃသၼႃ မိူင်းမၢဝ်း လႄႈ ထမ်မၸၵ်ၵ မိူင်းမၢဝ်း ဢွၼ်ႁူဝ် ၸတ်းႁဵတ်းပၢင်တၢၼ်ႈၶႆႈ လိၵ်ႈလၢႆး ပၢႆးၶိုၼ်ႈယႂ်ႇ၊ မီးပီႈၼွင်ႉၵူၼ်းမိူင်း တီႈၸမ်တီႈၵႆ ၶဝ်ႈႁူမ်ႈၼပ်ႉႁူဝ်ပၢၵ်ႇ။

ဝၼ်းပုတ်ႉ တီႈ 27/08/2014 (မိူဝ်ႈဝႃး) လိူၼ်သိပ်းမႂ်ႇ 3 ၶမ်ႈ၊ တင်ႈတႄႇယၢမ်း 9 မူင်း တေႃႇထိုင်ႁူဝ်ၶမ်ႈ 6 မူင်းၶိုင်ႈ (ယၢမ်းမိူင်းၶႄႇ) ၸုမ်းပုတ်ႉထသႃသၼႃ မိူင်းမၢဝ်း လႄႈ ထမ်မၸၵ်ၵ မိူင်းမၢဝ်း ဢွၼ်ႁူဝ် ၸတ်းႁဵတ်းပၢင်တၢၼ်ႈၶႆႈ လိၵ်ႈလၢႆးတႆး ၸႂ်ႉၸိုဝ်ႈဝႃႈ “ပၢင်တၢၼ်ႈၶႆႈ လိၵ်ႈလၢႆး ပၢႆးၶိုၼ်ႈယႂ်ႇ” ဢွင်ႈတီႈသႅင်ႇ/ ႁၢၼ်ႉၶဝ်ႈၽၵ်း ၼမ်ႉမၢဝ်းသႂ် ဝဵင်းမိူင်းမၢဝ်း၊ ဢၼ်မီးႁိမ်းသၢပ်ႇမႄႈၼမ်ႉမၢဝ်း။ မီးပေႃႈမႄႈပီႈၼွင်ႉၵူၼ်းမိူင်း ၶဝ်ႈႁူမ်ႈမွၵ်ႈ 400 ပၢႆ၊ သင်ၶၸဝ်ႈ မီး 30 တူၼ်ပၢႆ- ၼႆယဝ်ႉ။
ပၢင်တၢၼ်ႈၶႆႈလိၵ်ႈလၢႆး ပၢႆးၶိုၼ်ႈယႂ်ႇၼႆႉ မီးၽူႈလူင်ႉလႅၼ်ႇ ၸဝ်ႈပၢႆးမေႃတႆး ၶဝ်ႈႁူမ်ႈမွၵ်ႇလၢတ်ႈၶေႃႈၵႂၢမ်း ပၼ်တၢင်း ႁူႉ မီး 5 ၸဝ်ႈ/ၵေႃႉ။ ၸဝ်ႈတိုၼ်းတႆး သတ်ႉထမ်မတတ်ႉသ ႁူဝ်ပဝ်ႈၸုမ်း ပုတ်ႉထသႃသၼႃ မိူင်းမၢဝ်း။ ၸဝ်ႈမုၼိၼ်ႇတ ႁူဝ်ပဝ်ႈလုမ်းပုတ်ႉထမိူင်းမၢဝ်း။ လုင်းၸၢႆးပၢၼ်း ႁူဝ်ပဝ်ႈၸုမ်းတႆး မိူင်းမၢဝ်း။ ၶူးပူင်သွၼ်လိၵ်ႈလၢႆးတႆး မေႃသွၼ်လုင်းၸၢႆးၾႃႈ၊ ၶူးပူင်သွၼ်လိၵ်ႈလၢႆးတႆး လုင်းၸၢႆးဢူးၶမ်း- ၸိူဝ်းၼႆႉ။

ပၢင်တၢၼ်ႈၶႆႈ လိၵ်ႈလၢႆး ပၢႆးၶိုၼ်ႈယႂ်ႇ တီႈမိူင်းမၢဝ်း

ယိူင်းဢၢၼ်း ၸတ်းပၢင်တၢၼ်ႈၶႆႈ လိၵ်ႈလၢႆး ပၢႆးၶိုၼ်ႈယႂ်ႇၼႆႉ ၵွပ်ႈပိူဝ်ႈႁူင်းႁဵၼ်းတႆးဢမ်ႇမီးလႄႈ ၼင်ႇႁိုဝ်လုၵ်ႈႁဵၼ်း တႆး၊ ပီႈၼွင်ႉတႆး ပေႃးမီးတၢင်းႁူႉၵဵဝ်ႇၵပ်းလွင်ႈလိၵ်ႈလၢႆး ၵႂၢင်ႈၶႂၢင်ၵႂႃႇထႅင်ႈ- ၼႆယဝ်ႉ။