မိူဝ်ႈဝၼ်းတီႈ 25/08/2014 ၽူႈၼမ်းသိုၵ်းသုင်သုတ်း ၸွမ်သိုၵ်းလူင် မိၼ်းဢွင်ႇလၢႆႇ ႁပ်ႉႁူပ်ႉထူပ်းဢုပ်ႇဢူဝ်း ပႃႇတီႇ/တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSP/UWSA) ၊ ၸုမ်းဢူၺ်းလီၻီႊမူဝ်ႊၶရႅတ်ႊတိၵ်ႊၸိူဝ်ႉၸၢတ်ႈ- ၸိုင်ႈတႆးပွတ်းဢွၵ်ႇ (NDAA-ESS) ၸုမ်းမိူင်းလႃး ၊ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) 3 ၸုမ်း တီႈႁွင်ႈႁေႃပယိၼ်ႉၼွင်ႇ ဝဵင်းလူင်ၼေႇပျီႇတေႃႇ။ ဢွၼ်ၼႃႈၼႆႉ တင်း 3 ၸုမ်း လႆႈႁူပ်ႉၸွမ်ၸိုင်ႈတဵင်းၸဵင်ႇ တီႈႁွင်ႈလုမ်းၵၢင်ၼႃး၊ ဝၢႆးၼၼ်ႉ ၸင်ႇႁူပ်ႉ ၸွမ်းသိုၵ်းလူင် မိၼ်းဢွင်ႇလၢႆႇ- ၼႆယဝ်ႉ။

ဢၼ်ႁူပ်ႉထူပ်းၵၼ်ပွၵ်ႈၼႆႉ ပိူင်လူင်မၼ်း ပိူဝ်ႈတႃႇ ၵၢၼ်ၵိုတ်းယိုဝ်းပတ်းပိုၼ်ႉၸိုင်ႈမိူင်း၊ ၵၢၼ်ပူၵ်းပွင် ပိုၼ်ႉတီႈ ဝၢၼ်ႈ ဢိူင်ႇၶိုၼ်ႈသင်ႉၶိုၼ်ႈသုင်၊ လွင်ႈပိူဝ်ႈတႃႇႁူမ်ႈၵၼ်တီႇၽဵဝ်ႈမူၺ်ႉယႃႈမဝ်းၵမ် ၸိူဝ်းၼႆႉ- ၽူႈမီးၸၼ်ႉ တီႈငဝ်ႈငုၼ်းပၢင်သၢင်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈၼင်ႇၼႆ။

ဢၼ်ၵႂႃႇႁူပ်ႉထူပ်းၸွမ်ၸိုင်ႈတဵင်းၸဵင်ႇ တင်း ၽူႈၵွၼ်းသိုၵ်းသုင်သုတ်း မိၼ်းဢွင်ႇလၢႆႇၼႆႉ ၸုမ်းမိူင်းလႃး (NDAA-ESS) ပဵၼ်ၵႅမ်ႁူဝ်ပဝ်ႈသၢၼ်းပိူဝ်ႇ လႄႈ ၽူႈၼမ်းၼႂ်း ၸဝ်ႈသႅင်လႃး ဢွၼ်ႁူဝ် 12 ၵေႃႉ။ ၸုမ်းဝႃႉ UWSP/UWSA မီးၵႅမ်ႁူဝ်ပဝ်ႈ သႅဝ်းမိၼ်ႇလႅင် ဢွၼ်ႁူဝ်တင်းမူတ်း 16 ၵေႃႉ။ ၸုမ်းတႆး SSPP/SSA မီးၵႅမ်ႁူဝ်ပဝ်ႈ ၸဝ်ႈၶိူဝ်းတႆး ဢွၼ်ႁူဝ် 12 ၵေႃႉ- ၼႆယဝ်ႉ။

ၸုမ်းဝႃႉ ၸုမ်းမိူင်းလႃး ဝၢၼ်ႈႁႆး 3 မူႇၸုမ်းၼႆႉ ပဵၼ်ၸုမ်းဢူၺ်းလီ မႁႃမိတ်ႈ ၵၢၼ်သိုၵ်း။ မိူဝ်ႈပီ 2011 လိူၼ်ၵျုၼ်ႊ ဢိင်ၼိူဝ်သိုၵ်းမၢၼ်ႈႁၢင်ႈႁႅၼ်းသိုၵ်း လေႃႇတိုၵ်းၶၢင်သေ ၵေႃႇတင်ႈမႃး။ ဝၢႆးၵေႃႇတင်ႈယဝ်ႉ လႆႈဢွၵ်ႇလိၵ်ႈပိုၼ်ၽၢဝ်ႇ တုၵ်းယွၼ်းႁႂ်ႈ သိုၵ်းမၢၼ်ႈၵိုတ်း ၵၢၼ်ႁႅၼ်းသိုၵ်းလေႃႇတိုၵ်းၶၢင်။