ၶွင်ႊသီႊႁူမ်ႈတုမ်ၵူႈၸၢဝ်းၶိူဝ်း ၸတ်းပၢင်ၵုမ်လူင် တီႈၵဵင်းမႆႇ၊ ဢုပ်ႇလွင်ႈ ႁဵတ်းသၢင်ႈၵၢၼ်ငၢၼ်းမႃး လႄႈ ဢၼ်တေႁဵတ်းသၢင်ႈၵႂႃႇတၢင်းၼႃႈ ဢိၵ်ႇ လွင်ႈငမ်းယဵၼ်။

မိူဝ်ႈလဵဝ် ၶွင်ႊသီႊႁူမ်ႈတုမ်ၵူႈၸၢဝ်းၶိူဝ်း (UNFC) ၸတ်းပၢင်ၵုမ်လူင် တီႈၵဵင်းမႆႇ (မိူင်းထႆး)၊ ပၢင်ၵုမ်လူင်ၼႆႉ မီးတေႃႇထိုင်ႁၢင်လိူၼ်ၼႆႉ။ ပၢင်ၵုမ်လူင် တၢင်ႇလၢတ်ႈၼႄၵၢၼ်ငၢၼ်း ဢၼ်ၵေႃၵမ်ၵၢၼ်ငဝ်ႈငုၼ်း UNFC  ႁဵတ်းသၢင်ႈမႃး ၶၢဝ်းတၢင်း 3 ပီၶိုင်ႈ၊ တမ်းပိူင် ဢၼ်တေႁဵတ်းၵႂႃႇတၢင်းၼႃႈ၊ ၵဵဝ်ႇၵပ်းလွင်ႈ ၵၢၼ်ၵိုတ်းယိုဝ်း ပတ်းပိုၼ်ႉၸိုင်ႈမိူင်း၊ လွင်ႈငမ်းယဵၼ်၊ လွင်ႈၵၢၼ်မိူင်း၊ ပိူဝ်ႈတႃႇတေႁူပ်ႉထူပ်းၵၼ် ၸိူဝ်းၼႆႉ။ ပိူင်လူင်မၼ်း ႁႂ်ႈၶွတ်ႇလိူတ်ႈၵၼ်မၼ်ႈၵႅၼ်ႇသေ ႁႂ်ႈပဵၼ်ဢဵၼ်ပဵၼ်ႁႅင်း တႃႇႁႃတၢင်းဢွၵ်ႇ ဢၼ်လၢတ်ႈမႃးၸိူဝ်းၼႆႉ - ၽူႈၼမ်းၼႂ်း ၶုၼ်ဢူၵ်ႉၵႃႇ လၢတ်ႈ။

ပၢင်ၵုမ်လူင် 3 ပီၶိုင်ႈၼႆႉ ပိူဝ်ႈတႃႇမူၼ်ႉမႄးပၵ်းပိူင်မူႇၸုမ်း၊ ပိူဝ်ႈတႃႇ လိူၵ်ႈၽူႈၼမ်းမႂ်ႇ ဢၼ်တေသိုပ်ႇၵႂႃႇ ၶၢဝ်းတၢင်းၼႃႈထႅင်ႈ။ တီႈပၢင်ၵုမ်ၼၼ်ႉ ၼၢင်းဢွင်ႇသၢၼ်းၸုၵျီႇၵေႃႈ တႅမ်ႈလိၵ်ႈမႃးထိုင်၊ လၢတ်ႈဝႃႈ- မိူဝ်ႈလဵဝ်ၼႆႉ ပိူဝ်ႈတႃႇၸၢဝ်းၶိူဝ်းလႄႈ ဝၢၼ်ႈမိူင်းၼၼ်ႉ ပဵၼ်ၶၵ်ႉတွၼ်ႈယႂ်ႇလူင် ဢၼ်လမ်ႇလွင်ႈ။ ဢၼ်ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၶဝ် လတ်းၶၢမ်ႈပူၼ်ႉမႃး ၼႂ်းၵႄႈလွင်ႈယၢပ်ႇၽိုတ်ႇလူင်သေ ပဵၼ်မႃးလွင်ႈၽွမ်ႉႁူမ်ႈၼႆၵေႃႈ ယိၼ်းၸူမ်းဢဝ်ၵုၼ်းမုၼ်ၸွမ်း၊ လုၵ်ႉဢဝ်တီႈပၢင်ၵုမ်လူင်ၼႆႉသေ ႁႂ်ႈမၼ်ႈၵႅၼ်ႇၵိုမ်း ၵေႃႇသၢင်ႈလႆႈလွင်ႈငမ်းယဵၼ်ဝၢၼ်ႈမိူင်း၊ ႁႂ်ႈၵႄႈလိတ်ႈလႆႈပၼ်ႁႃၵၢၼ်မိူင်း တၢင်းၼႃႈ- ဝႃႈၼႆ။

မူႇၸုမ်းၸၢဝ်းၶိူဝ်း ၸိူဝ်းၶဝ်ႈႁူမ်ႈပၢင်ၵုမ်လူင် UNFC ၼႆႉ  တင်းမူတ်းမီး 12 ၸုမ်း။ 1.ၸုမ်းၶၢင်လွတ်ႈလႅဝ်း (KIO) ၊ 2.ႁူမ်ႈတုမ်ၸိူဝ်ႉၸၢတ်ႈယၢင်းၽိူၵ်ႇ (KNU) ၊ 3.ပႃႇတီႇမႂ်ႇသုင်ၸိူဝ်ႉၸၢတ်ႈယၢင်းလႅင် (KNPP) ၊ 4.ပႃႇတီႇမိူင်းမွၼ်းမႂ်ႇ (MNSP) ၊ 5.တႅဝ်းႁူမ်ႈၸိူဝ်ႉၸၢတ်ႈၶျၢင်း (CNF) ၊ 6.ပႃႇတီႇမႂ်ႇသုင်ၸိုင်ႈတႆး (SSPP) ၊ 7.ၸုမ်းပူတ်းပွႆႇၸိူဝ်ႉၸၢတ်ႈပဢူဝ်း (PNLO) ၊ 8.တႅဝ်းႁူမ်ႈပူတ်းပွႆႇမိူင်းပလွင်ႈ (PSLF) ၊ 9.ၸုမ်းလႃးႁူႇ (LDU) ၊ 10.ၸုမ်းၶျၢင်း (ANC) ၊ 11.ၸုမ်းၸိူဝ်ႉၸၢတ်ႈဝႃႉ (WNO) ၊ 12.တပ်ႉသိုၵ်းဢူၺ်းလီၻီႊမူဝ်ႊၶရႅတ်ႊတိၵ်ႊ ၵူႈၸၢဝ်းၶိူဝ်း မိူင်းမၢၼ်ႈ (MNDAA) ၸုမ်းၵူဝ်းၵၢင်ႉ - ၸိူဝ်းၼႆႉ။

ၼွၵ်ႈသေၼၼ်ႉ တၢင်ႇမူႇတၢင်ႇၸုမ်း မိူၼ်ၼင်ႇ ၸုမ်းရၶႅင်ႇ (ALP) ၊ ၸုမ်းရၶႅင်ႇ  (AA) ၊ ၸုမ်းယၢင်းပုတ်ႉထ (DKBA) ၊ ၸုမ်းယၢင်း ၶွင်ႊသီႊငမ်းယဵၼ် PC ၊ တႅဝ်းႁူမ်ႈၻီႊမူဝ်ႊၶရႅတ်ႊတိၵ်ႊ လုၵ်ႈႁဵၼ်းမိူင်းမၢၼ်ႈ ပတ်းပိုၼ်ႉ (ABSDF) ၸိူဝ်းၼႆႉၵေႃႈ ၶဝ်ႈႁူမ်ႈ၊  မီးၵူၼ်းၶဝ်ႈႁူမ်ႈတင်းမူတ်း 100 ပၢႆ- ၼႆယဝ်ႉ။

ပၢင်ၵုမ်လူင်ၼႆႉ ႁွင်ႉဝွၵ်ႇၸိူၼ်းဝႆႉၸုမ်းဝႃႉ UWSA တင်းၸုမ်းမိူင်းလႃး DNAA-ESS သေတႃႉ ဢမ်ႇမႃးၶဝ်ႈႁူမ်ႈ။ ပၢင်ၵုမ်လူင်ၼႆႉ တေယဝ်ႉတူဝ်ႈ ဝၼ်းတီႈ 28/08/2014 ။ ပေႃးဝႃႈထိုင်မႃးဝၼ်းတီႈ 29-30/08/2014 ၼႆႉ တေႁူပ်ႉဢုပ်ႇၸုမ်းၸိူဝ်း ဢၼ်ဢမ်ႇၸႂ်ႈလုၵ်ႈၸုမ်း UNFC မိူၼ်ၼင်ႇ RCSS ၸိူဝ်းၼႆႉ- ၶၢဝ်ႇ- RFA ဢွၵ်ႇၵႂႃႇၼင်ႇၼႆ။