ၼႂ်းလိၵ်ႈပိုၼ်ၽၢဝ်ႇ ၶွင်ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး (SHRF) လၢတ်ႈဝႃႈ- ဝၼ်းထီႉ 26/08/2014 ၵူၼ်းပၢႆႈၽေး မွၵ်ႈ 300 ပၢႆ လႆႈယိုၼ်ႈလိၵ်ႈတုၵ်းယွၼ်းထိုင်တီႈ လူင်ပွင်ၸိုင်ႈတဵင်းၸဵင်ႇ ႁႂ်ႈသိုၵ်းမၢၼ်ႈ ထွၼ်ဢွၵ်ႇ တီႈ ဝၢၼ်ႈၽႃသွင်ႇ၊ ၸႄႈဝဵင်းၵေးသီး လႄႈ တုၵ်းယွၼ်းပႃး လွင်ႈသၢႆႈတႅၼ်း ၵႃႈႁိူၼ်းၶဝ်လုလႅဝ် ဢိၵ်ႇ ၶူဝ်းသူၼ်ၶူဝ်းႁိူၵ်ႈ ၼႂ်းၶၢဝ်းတၢင်း သွင်လိူၼ်ပူၼ်ႉမႃး- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ပူၼ်ႉမႃး မိူဝ်ႈလိူၼ်ၵျုၼ်ႊ (2014) ၼႆႉ သိုၵ်းမၢၼ်ႈ ႁႅင်းသိုၵ်းမွၵ်ႈ 3000 ပၢႆ ထႅမ်ႁႅင်းၶဝ်ႈမႃးတူင်ႉၼိုင် ၼႂ်းၸႄႈဝဵင်းၵေးသီး လႄႈ ဝဵင်းတၢင်ႉယၢၼ်း။ ၶဝ်ႈမႃးၼႂ်းၼႃႈလိၼ် ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်း ၸိုင်ႈတႆး (SSPP/SSA) သေ ယႃႉလုပႅတ်ႈ ၶေႃႈတူၵ်းလူင်း ၵၢၼ်ၵိုတ်းယိုဝ်းၵၼ်။ မိူဝ်ႈဝၼ်းတီႈ 26/06/2014 သိုၵ်းမၢၼ်ႈ ယိုတ်းဢဝ်တီႈလိၼ်/ ႁိူၼ်းၵူၼ်းမိူင်း၊ ဢဝ်ၵွင်ႈလူင်ယိုဝ်းသႂ်ႇ ၼႂ်းဝၢၼ်ႈၽႃသွင်ႇ၊ ႁဵတ်းႁႂ်ႈ ၵူၼ်းဝၢၼ်ႈ ၵူဝ်ႁႄ ပၢႆႈၵႂႃႇသဝ်းပိုင်ႈဝၢၼ်ႈႁိမ်းႁွမ်း တီႈဝၢၼ်ႈဝၢပ်ႈ မွၵ်ႈ 300 ပၢႆ။ တပ်ႉသိုၵ်းမၢၼ်ႈၵေႃႈ မႃးပၵ်းသဝ်းထင်ယူႇဝႆႉၼႂ်း ဝၢၼ်ႈၽႃသွင်ႇလႄႈ ႁိမ်းႁွမ်းဝၢၼ်ႈၽႃသွင်ႇ ဢဵၼ်ႁႅင်းမွၵ်ႈ 500 ပၢႆ ယႃႉတဝ်ဢဝ် ၶူဝ်းႁိူၼ်းၶူဝ်းယေး မၢၵ်ႇတဝ်ႈၶဝ်ႈၼမ်ႉၵူၼ်းဝၢၼ်ႈၸိူဝ်းၼႆႉ - ၼႆယဝ်ႉ။

မိူဝ်ႈ ဝၼ်းတီႈ 07/08/72014 ၼႆႉ ၸုမ်းတူင်ႇဝူင်းၵူၼ်းတႆး သူင်ႇလိၵ်ႈထိုင် ၵျွၼ်ႇ ၶႄႊရီႊ ဢၼ်ပဵၼ် ၽွင်းလူင်ၽၢႆႇၼွၵ်ႈမိူင်း ဢမႄႊရိၵၼ်ႊ၊ ၽွင်းမၼ်း ဢွၵ်ႇၶၢဝ်းတၢင်းမႃးဢႅဝ်ႇယဵမ်ႈတီႈမိူင်းမၢၼ်ႈ၊ ႁႂ်ႈဢဝ်လွင်ႈသိုၵ်းမၢၼ်ႈ ႁဵတ်းပၢင်တိုၵ်းယူႇၼႆႉ လၢတ်ႈပၼ်တီႈလူင်ပွင်ၸိုင်ႈမၢၼ်ႈ။ ၵူၺ်းၵႃႈ ၽွင်းမၼ်းၸဝ်ႈ မႃးယဵမ်ႈယူႇၼႆႉ ၸုမ်းသိုၵ်းမၢၼ်ႈသမ်ႉ ထႅမ်ႁႅင်းသိုၵ်းသေ လေႃႇတိုၵ်းတပ်ႉသိုၵ်းၸိုင်ႈတႆး SSPP/SSA ယူႇ။  

မိူဝ်ႈဝၼ်းတီႈ 8-9/08/2014 သိုၵ်းမၢၼ်ႈ တင်းသိုၵ်းတႆး ပဵၼ်ပၢင်တိုၵ်းၵၼ် ၾၢႆႇၸၢၼ်းဝၢၼ်ႈတႃႈၽႃသွင်ႇ မွၵ်ႈ 4 လၵ်း။ ထိုင်မႃးဝၼ်းတီႈ 22/08/2014 ၼႆႉၵေႃႈ တပ်ႉသိုၵ်းမၢၼ်ႈလႄႈ တပ်ႉသိုၵ်းၸိုင်ႈတႆး (SSPP/SSA) ပဵၼ်ပၢင်တိုၵ်းၵၼ်ထႅင်ႈ ၸဵင်ႇၸၢၼ်းဝၼ်းဢွၵ်ႇ ဝၢၼ်ႈၽႃသွင်ႇ မွၵ်ႈ 6 လၵ်း။ ဢၼ်လႆႈပဵၼ်ပၢင်တိုၵ်းၼႆႉ  ယွၼ်ႉသိုၵ်းမၢၼ်ႈႁွၼ်ႈထဝ်ႇၵႂႃႇမႃး သွၵ်ႈတဝ်ႁႃသိုၵ်းတႆးလႄႈ လႆႈပဵၼ် ပၢင်တိုၵ်းၵၼ်။  ၾၢႆႇသိုၵ်းမၢၼ်ႈ ဢဝ်ၵွင်ႈလူင် ၵွင်ႈၸၢၵ်ႈၸိူဝ်းၼႆႉ ယိုဝ်းသႂ်ႇတပ်ႉပၢင်သဝ်း သိုၵ်းတႆး- ၼႆယဝ်ႉ။

ၵူၼ်းပၢႆႈၽေးၶဝ် လႆႈမႃးပိုင်ႈဢိင်တီႈဝတ်ႉ/ၵျွင်း မုၼ်ၸဝ်ႈဝၢၼ်ႈဝၢပ်ႈ၊ လႆႈပိုင်ႈဢိင်ၶဝ်ႈၼမ်ႉတၢင်းၵိၼ် ၶူဝ်းၼုင်ႈ ဢၼ်ပီႈၼွင်ႉတၢင်ႇတီႈ မႃးလူႇတၢၼ်းတွၼ်ႈပၼ်သေ  ယူႇၵႂႃႇဝၼ်းလႂ်ဝၼ်းၼၼ်ႉ။ ၵူၼ်းဝၢၼ်ႈ ထုၵ်ႇသိုၵ်းမၢၼ်ႈ ႁႄႉႁၢမ်ႈ ဢမ်ႇပၼ်ၵႂႃႇႁဵတ်းသူၼ် ႁဵတ်းၼႃး ၽုၵ်ႇသွမ်ႈ။ ၵူၼ်းဝၢၼ်ႈဢမ်ႇမီး တၢင်းၽိတ်းသင်ၵေႃႉၼိုင်ႈ ယွၼ်ႉႁူမၼ်းၼူၵ်ႇသေ ဢမ်ႇလႆႈငိၼ်းသဵင် ဢၼ်သိုၵ်းမၢၼ်ႈႁွင်ႉမၼ်းလႄႈ ထုၵ်ႇသိုၵ်းမၢၼ်ႈ ပေႃႉ ထုပ်ႉ ပိတ်ႉ ပၼ်ပေႃးၶႂ်ႈ လိုမ်းတူဝ်- ၼႆယူႇ။

တီႈၼႂ်းၽိုၼ်လိၵ်ႈ ဢၼ်တုၵ်းယွၼ်းၵႂႃႇတီႈ လူင်ပွင်ၸိုင်ႈတဵင်းၸဵင်ႇၼၼ်ႉ ပဵၼ်လွင်ႈယွၼ်း ၵႃႈသၢႆႈတႅၼ်း လွင်ႈလူႉသုမ်း ဢၼ်သိုၵ်းမၢၼ်ႈ ယိုတ်းဢဝ်တီႈလိၼ်ၵူၼ်းဝၢၼ်ႈ၊ တီႈသူၼ်/ႁႆႈ/ၼႃး မိူၼ်ၼင်ႇ သူၼ်ထူဝ်ႇလိၼ်၊ သူၼ်ၶဝ်ႈၵၢပ်ႇ တင်းၵႂၢင်ႈတႃႇ 422.5 ဢေႇၵႃႉ။ လိူဝ်သေၼၼ်ႉ သိုၵ်းမၢၼ်ႈ ယိုဝ်းႁႅမ်ၵိၼ် ဝူဝ်းၵႂၢႆး မူ ၵႆႇ ၵူၼ်းမိူင်းထႅင်ႈတင်းၼမ်- ၼႆယဝ်ႉ။

ၽိုၼ်လိၵ်ႈၵူၼ်းပၢႆႈၽေး တႃႈၽႃသွင်ႇၼႆႉ လႆႈသူင်ႇထိုင်ပႃး ၽူႈၵွၼ်းသိုၵ်းသုင်သုတ်း တပ်ႉသိုၵ်းမၢၼ်ႈ ၸွမ်သိုၵ်းလူင် မိၼ်းဢွင်ႇလၢႆႇ၊ ၽူႈၵွၼ်းတိူင်း သီႇတိူင်း ၼႂ်းၸိုင်ႈတႆး၊ လူင်ပွင်ၸိုင်ႈမိူင်းတႆး ဢိၵ်ႇပႃးၸုမ်း ပႃႇတီႇ ၵၢၼ်မိူင်း တႆးၵူႈၸုမ်း- ၼႆယဝ်ႉ။