သိူဝ်ၽိူၵ်ႇ တုၵ်းယွၼ်းပူတ်းထွၼ် ၶွမ်ႊမသျိၼ်ႊ ၵၢၼ်လိူၵ်ႈတင်ႈ ၸႄႈဝဵင်းၼမ်ႉၶမ်း
ပႃႇတီႇသိူဝ်ၽိူၵ်ႇ ဝဵင်းၼမ်ႉၶမ်း တုၵ်းယွၼ်းႁႂ်ႈပူတ်း ထွၼ်ယႃႉပႅတ်ႈ
ၶွမ်ႊမသျိၼ်ႊၵၢၼ်လိူၵ်ႈတင်ႈ တီႈၸႄႈဝဵင်း ၼမ်ႉၶမ်းသေ
ၵေႃႇတင်ႈၶိုၼ်းမႂ်ႇမႂ်ႇ။ ၵွပ်ႈဝႃႈ မိူဝ်ႈပၢင်လိူၵ်ႈတင်ႈပီ 2010 ၼၼ်ႉ
ၶွမ်ႊမသျိၼ်ႊၵၢၼ်လိူၵ်ႈတင်ႈ တီႈၸႄႈဝဵင်းၼမ်ႉၶမ်း
ဢမ်ႇႁဵတ်းၸွမ်းပိူင်/မၢႆမီႈ ၵၢၼ်လိူၵ်ႈတင်ႈ၊ ႁဵတ်းႁႂ်ႈပၢၼ်းသေး ၵျေႃႇမျိၼ်ႉ
ပႃႇတီႇသၢင်ႇသီႈ ပေႉၵၢၼ်လိူၵ်ႈတင်ႈ။
ၵဵဝ်ႇၵပ်းလွင်ႈၼႆႉ
ပႃႇတီႇမူဝ်ႇၶရႅတ်ႉတိၵ်ႉပႃႇတီႇၸၢဝ်းၶိူဝ်းတႆး ႁိုဝ် ပႃႇတီႇသိူဝ်ၽိူၵ်ႇ
(SNDP) တႅမ်ႈလိၵ်ႈတၢင်ႇထိုင် ႁူဝ်ပဝ်ႈၶွမ်ႊမသျိၼ်ႊၵၢၼ်လိူၵ်ႈတင်ႈ
ၸႄႈတွၼ်ႈမူႇၸႄႈဝႃႈ- ၶွမ်ႊမသျိၼ်ႊၵၢၼ်လိူၵ်ႈတင်ႈ ၸႄႈဝဵင်းၼမ်ႉၶမ်း
တင်းၵေႃၽႄ ပႃးၸဵမ်ၽူႈၶဝ်ႈၶွမ်ႊမသျိၼ်ႊၵၢၼ်လိူၵ်ႈတင်ႈတင်းသဵင်ႈၼႆႉ
ႁဝ်းၶႃႈဢမ်ႇယုမ်ႇယမ်၊ ၵွပ်ႈၼၼ် ႁႂ်ႈၶိုၼ်း မႄးၶွတ်ႇၽွတ်ႈပၼ်မႂ်ႇမႂ်ႇ-
ယိုၼ်ႈယွၼ်းၵႂႃႇၼင်ႇၼႆ။
လွင်ႈတၢင်း ဢၼ်ယိုၼ်ႈယွၼ်းပွၵ်ႈၼႆႉ
တီႈၸႄႈဝဵင်းၼမ်ႉၶမ်း မီးတီႈယူႇၽွင်းတႅၼ်းၵူၼ်းမိူင်းပဝ်ႇဝႆႉ၊ ၵွပ်ႈၼၼ်
ၼႂ်းပီ 2014 ၼႆႉ တေမီးပၢင်လိူၵ်ႈတင်ႈသွမ်ႈ တႅၼ်းတီႈယူႇ
ၽွင်းတႅၼ်းၵူၼ်းမိူင်း တီႈဝဵင်းၼမ်ႉၶမ်း ဢၼ်ပဝ်ႇဝႆႉ။
လွင်ႈတၢင်းဢၼ်
တုၵ်းယွၼ်းႁႂ်ႈပူတ်းထွၼ်ယႃႉပႅတ်ႈၶွမ်ႊမသျိၼ်ႊ ၵၢၼ်လိူၵ်ႈတင်ႈၼႆႉ-
1.ႁူဝ်ပဝ်ႈ ၶွမ်ႊမသျိၼ်ႊ တီႈဝဵင်းၼမ်ႉၶမ်းၼႆႉ
ဢမ်ႇၸႂ်ႈၵူၼ်းၸႃႇတိဝဵင်းၼမ်ႉၶမ်း။
2.ႁူဝ်ပဝ်ႈလႄႈမူႇၸုမ်းၶွမ်ႊမသျိၼ်ႊၵၢၼ်လိူၵ်ႈတင်ႈ ၸႄႈဝဵင်းၼမ်ႉၶမ်းၼႆႉ
ဢမ်ႇၸႂ်ႈၵူၼ်းမီးသီလ သမႃထိ ဢၼ်ၵူၼ်းမိူင်းဝဵင်းၼမ်ႉၶမ်းၶဝ်ၼပ်ႉထိုဝ်။
3.မိူဝ်ႈပၢင်လိူၵ်ႈ တင်ႈ ပီ 2010 ၼၼ်ႉ ပိုၼ်ႉတီႈလိူၵ်ႈတင်ႈမၢႆ 2
ၸႄႈဝဵင်းၼမ်ႉၶမ်းၼၼ်ႉ ဢူးၸေႃးလႃႉ (ပႃႇတီႇသိူဝ်ၽိူၵ်ႇ) ပေႉၵၢၼ်လိူၵ်ႈတင်ႈ၊
လႆႈၶႅပ်းၵၢင်ၸႂ်ၼမ်။ ၵူၺ်းၵႃႈ သမ်ႉပၼ်ၽွင်းတႅၼ်းပႃႇတီႇသၢင်ႇသီႈ (USDP)
ဢူးၵျေႃႇမျိၼ်ႉ ၵေႃႉၵၢၼ်ႉၵၢၼ်လိူၵ်ႈတင်ႈ ပေႉၵၢၼ်လိူၵ်ႈတင်ႈၵႂႃႇ။
ဝၢႆးလိူၵ်ႈတင်ႈယဝ်ႉ ထိုင်မႃးဝၼ်းတီႈ
09/11/2010 ပႃႇတီႇသိူဝ်ၽိူၵ်ႇ လႆႈတၢင်ႇလိၵ်ႈထိုင် ႁႂ်ႈထတ်းထွင်ပၼ်
လွင်ႈပၢင် လိူၵ်ႈတင်ႈဢမ်ႇတဵင်ႈထမ်းတြႃး။ ၵူၺ်းၵႃႈ
ၾၢႆႇၽွင်းငမ်းဢမ်ႇသႂ်ႇၸႂ်၊ ဢမ်ႇဝႆႉပဵၼ်လိူင်ႈယႂ်ႇ။ ၵွပ်ႈၼၼ်
ပိူဝ်ႈတႃႇပႂ်ႉပႃး ၵုမ်းၵမ်လွင်ႈတဵင်ႈထမ်း ၼႂ်းၵၢၼ်လိူၵ်ႈတင်ႈၼႆႉ
လွင်ႈတိုဝ်းၵမ်ၶဝ်ၵေႃႈလီ၊ လွင်ႈႁပ်ႉပုၼ်ႈၽွၼ်းၶဝ်ၵေႃႈလီ မီးတၢင်း
ယူပ်ႈယွမ်း- ဝႃႈၼႆ။
ၵွပ်ႈၼႆ ၶွမ်ႊမသျိၼ်ႊၵၢၼ်လိူၵ်ႈတင်ႈ
ၸႄႈဝဵင်းၼမ်ႉၶမ်း၊ ႁူဝ်ပဝ်ႈလႄႈ ၽူႈၶဝ်ႈၶွမ်ႊမသျိၼ်ႊၵၢၼ်လိူၵ်ႈတင်ႈ
တင်းသဵင်ႈၼၼ်ႉ ႁႂ်ႈပူတ်းထွၼ်ပၼ်ၼႆ ပေႃႈမႄႈၵူၼ်းမိူင်းၼမ်ႉၶမ်း
တုၵ်းယွၼ်းႁႂ်ႈၶိုၼ်းမႄး ၶွတ်ႇၽွတ်ႈ ၶွမ်ႊမသျိၼ်ႊ ၵၢၼ်လိူၵ်ႈတင်ႈၸုမ်းမႂ်ႇ၊
ၵႅမ်ႁူဝ်ပဝ်ႈ ပႃႇတီႇသိူဝ်ၽိူၵ်ႇ ၸၢႆးၸေႃးလႃႉ လူင်းလၢႆးမိုဝ်း ၵႂႃႇၼင်ႇၼႆ။
Tags: News, Politic