ၵူၼ်းယွင်ႇယႃႈမႃႉယိုဝ်းပလိၵ်ႈတၢႆ ပွတ်းမိူင်းပၼ်ႇ
ၵူၼ်းယွင်ႇယႃႈမႃႉ ဢဝ်ၵွင်ႈယၢမ်းယိုဝ်းပလိၵ်ႈမၢၼ်ႈ
ၽွင်းၶဝ်ႈတီႉၺွပ်းၵုမ်းတူဝ်၊ ပလိၵ်ႈတိူဝ်ႉဝၢတ်ႇ ၸဵပ်းတီႈဢိုၵ်း
ၵႂႃႇသဵင်ႈၸႂ်တၢႆတီႈႁူင်းယႃမိူင်းပၼ်ႇ။
ပလိၵ်ႈမၢၼ်ႈမိူင်းပၼ်ႇ ၵေႃႉထုၵ်ႇၵွင်ႈယၢမ်းယိုဝ်းဝၢတ်ႇၸဵပ်းလူႉတၢႆ Photo: taifreedom.net |
ဝၼ်းတီႈ 16/07/2014 (မိူဝ်ႈဝႃး)ၼႆႉ
တီႈဝၢၼ်ႈတူင်ႈတႅပ်ႇ ဢိူင်ႇဝူဝ်းလၢႆး ၸႄႈဝဵင်းမိူင်းပၼ်ႇ၊ ဢၼ်မီး
ၾၢႆႇၼိူဝ်ဝဵင်းမိူင်းပၼ်ႇ ယၢၼ်မွၵ်ႈ 6 လၵ်းၼၼ်ႉ မီးၵူၼ်းၵေႃႉၼိုင်ႈ
ၸို်ဝ်ႈႁွင်ႉၸၢႆးသေႃးပေႇတ ဢႃယုမွၵ်ႈ 34-35 ၊ ယွင်ႇယႃႈမႃႉသေ ပႃးၵွင်ႈယၢမ်း
ပၼ်ႇၵႂႃႇပၼ်ႇမႃးၼႂ်းဝၢၼ်ႈ၊ ႁၼ်ၽႂ်ၵေႃႈပၢၼ်းၽိတ်းႄလႈ
ၵူၼ်းဝၢၼ်ႈလႆႈၵႂႃႇတၢင်ႇလၢတ်ႈ ၸဝ်ႈၼႃႈတီႈပလိၵ်ႈ တီႈမိူင်းပၼ်ႇ
ႁႂ်ႈမႃးတီႉၺွပ်း။
မၼ်းၸၢႆးၼႆႉ ပႃးတင်းၵွင်ႈယၢမ်းသေ
သုၵ်ႉသၵ်ႉၼႂ်းဝၢၼ်ႈလႄႈ ၵူၼ်းဝၢၼ်ႈၶဝ်မႃးတၢင်ႇလၢတ်ႈတီႈ ၾၢႆႇၵၢၼ်ၽွင်းငမ်းႄလႈ
ပလိၵ်ႈ 4 ၵေႃႉ ၸင်ႇပႃးၵၼ်ၵႂႃႇၸူးမၼ်းၸၢႆး၊ မိူဝ်ႈမၼ်းႁၼ်ပလိၵ်ႈမႃးႁႃ
မၼ်းၵေႃႈလၢၵ်ႈၵွင်ႈယၢမ်းယိုဝ်းႁၢတ်ႇသႂ်ႇ တိူဝ်ႉၺႃး တီႈဢိုၵ်း (တူႉယႄးဢူၵ်ႉ)
ၵျေႃႇသၢၼ်းဢူးႄလႈ ၶဝ်ၸင်ႇလႆႈဢဝ်ၵျေႃႇသၢၼ်းဢူး ႁၢမ်ၵႂႃႇႁူင်းယႃ၊ ၵူၺ်းၵႃႈ
ၽိူဝ်ထိုင်တီႈႁူင်းယႃ ၵေႃႈသဵင်ၸႂ်ၶၢတ်ႇတၢႆ မိူဝ်ႈဝႃးယၢမ်းဝၢႆးဝၼ်း-
ၵူၼ်းပွတ်း မိူင်းပၼ်ႇ ၵေႃႉၼိုင်ႈ လၢတ်ႈၼင်ႇၼႆ။
ၸၢႆးသေႃးပေႇတၼႆႉ ထုၵ်ႇၸဝ်ႈၼႃႈတီႈၶဝ်တီႉၺွပ်းၵႂႃႇ၊ မိူဝ်ႈလဵဝ် မႃးမီးဝႆႉတီႈတပ်ႉပၢင်သဝ်းပလိၵ်ႈ မိူင်းပၼ်ႇ။
ၵူၼ်းၸမ်ၸႂ်တပ်ႉပၢင်သဝ်းပလိၵ်ႈၵေႃႉၼိုင်ႈလၢတ်ႈဝႃႈ-
မိူဝ်ႈလဵဝ်ၼႆႉ မတ်ႉမၼ်းဝႆႉတီႈၼႂ်းၶွၵ်ႈမိူင်းပၼ်ႇ၊ တေပိုတ်ႇၶၻီး (ဢမု)
ၵႂႃႇၸွမ်းၼင်ႇပိူင်ပဵၼ်မီး။ ၵမ်ႈၼမ်လၢတ်ႈဝႃႈ မၼ်းပဵၼ်ၵူၼ်းယွင်ႇ
ၼႆသေတႃႉၵေႃႈ မၼ်းၸၢႆးယွင်ႇယႃႈမႃႉၵူၺ်း- ဝႃႈၼႆ။
ဝၢၼ်ႈတူင်ႈတႅပ်ႇၼႆႉယူႇၼႂ်းဢိူင်ႇဝူဝ်းလၢႆး ၸႄႈဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း။
ၾၢႆႇၼိုင်ႈၵေႃႈ ၽွင်းၶၢဝ်းလဵဝ်ၵၼ်
မိူဝ်ႈဝႃးဝၢႆးဝၼ်းၼႆႉ ၸွမ်သိုၵ်းဢွင်ႇတၢၼ်းထုတ်ႉ (ၵႅမ်ၽူႈၵွၼ်း
ႁွင်ႈၵၢၼ်ၾၢႆႇၵႅတ်ႇၶႄ မၢႆ 2 လႄႈ ၽူႈၵွၼ်းၽႅၼ်ၵၢၼ်သိုၵ်းၶိုၵ်ႉတွၼ်း)
ၶီႇႁိူဝ်းဝိၼ်မႅင်းဝီႈ လုၵ်ႉတီႈတူၼ်ႈတီး မႃးမိူင်းပၼ်ႇ၊ မႃးၵူတ်ႇထတ်းတပ်ႉ၊
မႃးႁူပ်ႉ ထူပ်း ၽူႈမီးပုၼ်ႈၽွၼ်းၼႂ်းတပ်ႉသိုၵ်းၶဝ်တီႈမိူင်းပၼ်ႇ - ၼႆယဝ်ႉ။
Tags: Drug, News