ၼၢင်းဝႃႇၼု ထုၵ်ႇတၵ်ႉႁၢမ်ႈတေဢမ်ႇလႆႈ လၢတ်ႈၶေႃႈၵႂၢမ်း လၢႆးလုၵ်ႉၽိုၼ်ႉၼႂ်းသၽႃး
ၼၢင်းဝႃႇၼု ထုၵ်ႇႁူဝ်ပဝ်ႈသၽႃးၸိုင်ႈမိူင်းႁူမ်ႈတုမ် ဢူးတူႇရသူၺ်ႇမၢၼ်း
တၵ်ႉႁၢမ်ႈၼႂ်းသၽႃးဝႃႈ မိူဝ်ႈလဵဝ်လႄႈမိူဝ်းၼႃႈ တေဢမ်ႇလႆႈလၢတ်ႈၶေႃႈၵႂၢမ်း
ဢၼ်ဝႃႈၸုမ်းယိပ်းၵွင်ႈၵၢင်ႇၸၢဝ်းၶိူဝ်း လုၵ်ႉၽိုၼ်ႉ။
ၼၢင်းဝႃႇၼု ၽွင်းတႅၼ်းၵုၼ်ႁဵင် (ႁၢင်ႈလဵၵ်ႉ) ဢူးတူႇရသူၺ်ႇမၢၼ်း |
ဝၼ်းတီႈ 15/07/2014
ဢိင်ၼိူဝ်ပဵၼ်ပၢင်ၵုမ်သၽႃးလၢင်ႈ (သၽႃးၵူၼ်းမိူင်း)ပွၵ်ႈၵမ်း 10 သေ
ၽွင်းတႅၼ်းၵူၼ်းမိူင်း ၸႄႈဝဵင်းၵေးသီး
ၸၢႆးဢွမ်သႅင်မိူင်းတၢင်ႇလၢတ်ႈတုၵ်းယွၼ်းၼႂ်းသၽႃး၊
ႁႂ်ႈသိုၵ်းမၢၼ်ႈလူတ်းယွမ်းပၼ်ႁႅင်းသိုၵ်း၊ လူတ်းလွင်ႈတူင်ႉၼိုင်ၵႂႃႇမႃး၊
ႁႂ်ႈသိုၵ်းသွင်ၾၢႆႇ (သိုၵ်းမၢၼ်ႈတင်းသိုၵ်းတႆး) ယႃႇပေတိုၵ်းတေႃးၵၼ်။
ႁႂ်ႈပူၵ်းပွင်ပၼ် ၵူၼ်းပၢႆႈၽေးသိုၵ်း၊
ႁႂ်ႈၵူၼ်းဝၢၼ်ႈၵူၼ်းမိူင်းႁႂ်ႈလႆႈႁဵတ်းၵိၼ်ၵၢၼ်လဵင်ႉတွင်ႉၵႂႃႇလွတ်ႈလႅဝ်းထၢင်ႇႁၢင်ႈႄလႈႁႂ်ႈလႆႈ
ပူၵ်းပွင်ၽဝၶိုၼ်ႈယႂ်ႇမႂ်ႇသုင်။
ၵဵဝ်ႇၵပ်းလွင်ႈၼႆႉၼၢင်းဝႃႇၼု ၵမ်ႉထႅမ်၊
ၵူၺ်းၵႃႈလႆႈလၢတ်ႈပႃးၶေႃႈၵႂၢမ်းၸုမ်းၸၢဝ်းၶိူဝ်းယိပ်းၵွင်ႈၵၢင်ႇလုၵ်ႉၽိုၼ်ႉ။
ဝၢႆးၼၢင်းဝႃႇၼုလၢတ်ႈၵမ်ႉထႅမ် ႁူဝ်ပဝ်ႈသၽႃးၸိုင်ႈမိူင်းႁူမ်ႈတုမ်၊
ဢၼ်ပဵၼ်ပႃးႁူဝ်ပဝ်ႈသၽႃးလၢင်ႈ/ ၵူၼ်းမိူင်း ဢူးတူႇရသူၺ်ႇမၢၼ်း
တွၵ်းၸိုဝ်ႈတွၵ်းသဵင်ၼၢင်းဝႃႇၼုသေလၢတ်ႈဝႃႈ-
ယႃႇပေၸႂ်ႉၶေႃႈၵႂၢမ်းဢၼ်ဝႃႈလၢႆးလုၵ်ႉၽိုၼ်ႉ (တေႃႇလၢၼ်ႇယေး) ထႅင်ႈသေပွၵ်ႈ-
ဝႃႈၼႆ။
ၼၢင်းဝႃႇၼုလၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ-
ၸၢႆးဢွမ်သႅင်မိူင်းတၢင်ႇလၢတ်ႈၵႂႃႇဝႃႈ ႁႂ်ႈၵိုတ်းယိုတ်းပၢင်တိုၵ်းသေ
ပူၵ်းပွင်ပၼ်ၽဝၵူၼ်းမိူင်းၽႂ်းၽႂ်း။ ၵဝ်ၶႃႈသမ်ႉၶိုၼ်ႈလုၵ်ႉလၢတ်ႈ
ၵမ်ႉထႅမ်ၶေႃႈၵႂၢမ်းဢၼ်ၸၢႆးဢွမ်သႅင်မိူင်းတုၵ်း ယွၼ်း။
ၼႂ်းၶေႃႈၵႂၢမ်းဢၼ်ၵမ်ႉထႅမ်ၵႂႃႇၼၼ်ႉၵဝ်ၶႃႈ သမ်ႉၸႂ်ႉပႃးၶေႃႈၵႂၢမ်းဝႃႈ
ၸုမ်းၸၢဝ်းၶိူဝ်းယိပ်းၵွင်ႈၵၢင်ႇ လုၵ်ႉၽိုၼ်ႉၼႆလႄႈ
တူႇရဢူးသူၺ်ႇမၢၼ်းႁူဝ်ပဝ်ႈသၽႃးလၢတ်ႈဝႃႈ- ၼၢင်းဝႃႇၼု
ၶေႃႈၵႂၢမ်းဢၼ်လၢတ်ႈဝႃႈလၢႆးလုၵ်ႉ ၽိုၼ်ႉၼႆႉတေဢမ်ႇလႆႈၸႂ်ႉသေပွၵ်ႈ၊
မိူဝ်ႈလဵဝ်ၵေႃႈပေႃႈလီ၊ မိူဝ်းၼႃႈၵေႃႈယဝ်ႉ တၵ်းတေဢမ်ႇလႆႈၸႂ်ႉ၊ တေလႆႈ
ဝႃႈၸုမ်းယိပ်းၵွင်ႈၵၢင်ႇၼႆၵူၺ်း- ဝႃႈၼႆ။
ၼၢင်းဝႃႇၼုသိုပ်ႇလၢတ်ႈထႅင်ႈဝႃႈ-
ဢႃႇယုၵဝ်ၶႃႈမႃးႁဵတ်းၵၢၼ်ၽွင်းတႅၼ်းၼႂ်းသၽႃးၼႆႉမီး 3 ပီပၢႆယဝ်ႉ၊ ၶေႃႈၵႂၢမ်း
ဢၼ်ၼႆႉယႃႇပေၸႂ်ႉၼႆဢမ်ႇတွၼ်ႉလႆႈငိၼ်းမႃးသေပွၵ်ႈ၊
ၶႃႈလဵပ်ႈႁဵၼ်းဢမ်ႇထိုင်ႁိုဝ်၊ ၵဝ်ၶႃႈ ဢမ်ႇႁူႉပွင်ႇဢမ်ႇၶဝ်ႈၸႂ်
ပိူင်သၽႃးႁိုဝ်တႄႉၵေႃႈဢမ်ႇႁူႉ။ ဢၼ်ၵဝ်ၶႃႈလႆႈႁူႉၼႆႉ
ၼႂ်းသၽႃးၼႆႉတေဢမ်ႇလႆႈလၢတ်ႈ ၶေႃႈၵႂၢမ်းတူၵ်းတႂ်ႈတႅမ်ႇ၊
ၵႂၢမ်းတႂ်ႈသိၼ်ႈတႂ်ႈသိူဝ်ႈ၊ ၵႂၢမ်းဢၼ်တူၵ်ႇၸိုဝ်ႈတွၵ်းသဵင်
ၶႃႉၸိုဝ်ႈၶၢႆသဵင်ၵေႃႉလႂ်ၵေႃႉၼိုင်ႈ၊ ဢဝ်တၢင်းၽိတ်းပူဝ်ႉသႂ်ႇ
ႁူဝ်ၵေႃႉလႂ်ၵေႃႉၼိုင်ႈႄလႈ ၶေႃႈၵႂၢမ်းဢၼ်ႁဵတ်းႁႂ်ႈႁူဝ်ပဝ်ႈသၽႃး
ဢမ်ႇမႅၼ်ႈၸႂ်ၸိူဝ်းၼႆႉၵူၺ်း- ဝႃႈၼႆ။
ၼၢင်းဝႃႇၼုၼႆႉၶဝ်ႈပႃးၼႂ်းၶွမ်ႊမတီႊတႃႇၶဵၼ်ႇတႅမ်ႈမၢႆမီႈၼႂ်းသၽႃး။
ပဵၼ်ၽွင်းတႅၼ်းၶဵတ်ႇ/ပိုၼ်ႉတီႈလိူၵ်ႈတင်ႈမၢႆ 2
ၸႄႈဝဵင်းၵုၼ်ႁဵင်ၸိုင်ႈတႆးပွတ်းၸၢၼ်း၊
ပဵၼ်ၽွင်းတႅၼ်းသၽႃးလၢင်ႈႁိုဝ်သၽႃးၵူၼ်းမိူင်း။
Tags: News, Politic