သိူဝ်ၽိူၵ်ႇတုၵ်းယွၼ်းႁႂ်ႈၵိုတ်းယင်ႉပၢင်တိုၵ်း လႄႈ ထႅမ်ႁႅင်းသိုၵ်း
ၽွင်းတႅၼ်းသိူဝ်ၽိူၵ်ႇ ၸႄႈဝဵင်းၵေးသီး တၢင်ႇလၢတ်ႈၼႂ်း သၽႃး တုၵ်းယွၼ်း
ႁႂ်ႈၵိုတ်းယင်ႉပၢင်တိုၵ်း၊ ၵိုတ်းယင်ႉလွင်ႈ ထႅမ်ႁႅင်းသိုၵ်း
ဢၼ်တိုၵ်းတေႃးၵၼ်၊ ယွၼ်ႉပိူဝ်ႈၵူၼ်းမိူင်း ထူပ်းတၢင်းယၢပ်ႇၽိုတ်ႇၵိၼ်းၸႂ်။
ၸၢႆးဢွမ်သႅင်မိူင်း တင်း ၼၢင်းဝႃႇၼု |
ဝၼ်းတီႈ 15/07/2014 (မိူဝ်ႈဝႃး)
ၸၢႆးဢွမ်သႅင်မိူင်း၊ ၽွင်းတႅၼ်းပႃႇတီႇသိူဝ်ၽိူၵ်ႇ (SNDP) ၸႄႈဝဵင်းၵေးသီး
ၸိုင်ႈတႆးပွတ်းၸၢၼ်း
တၢင်ႇလၢတ်ႈႁၢႆးငၢၼ်းၼႂ်းသၽႃးၵႂႃႇဝႃႈၶၢဝ်းယၢမ်းမိူဝ်ႈလဵဝ်ၼႆႉ
ပဵၼ်ၶၢဝ်းၵူၼ်းဝၢၼ်ႈၵူၼ်းမိူင်း ႁဵတ်းၵၢၼ်ၽုၵ်ႇသွမ်ႈ၊ ဢၼ်ပဵၼ်ပၢင်တိုၵ်း
ထႅမ်ႁႅင်းသိုၵ်းၶဵင်ႈၶႅင်တေႃႇၵၼ်ယူႇၼႆႉ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း
ဢမ်ႇၸၢင်ႈႁဵတ်းၵၢၼ်ၽုၵ်ႇသွမ်ႈ။ ၵွပ်ႈၼၼ်လႄႈ
တုၵ်းယွၼ်းႁႂ်ႈၵိုတ်းယင်ႉပၢင်တိုၵ်း၊ ဢၼ်ထႅမ်ႁႅင်းသိုၵ်းတေႃႇၵၼ် ၼႆႉၵေႃႈ
ႁႂ်ႈလူတ်းယွမ်း၊ ႁႂ်ႈၵူၼ်းဝၢၼ်ႈၵူၼ်းမိူင်း ပေႃးလႆႈပွၵ်ႈႁဵတ်းၵၢၼ်သူၼ်
ၵၢၼ်ႁႆႈ ၵၢၼ်ၼႃး- ဝႃႈၼႆ။
ၵဵဝ်ႇၵပ်းလွင်ႈၼႆႉ ၼၢင်းဝႃႇၼု
ၽွင်းတႅင်းသၽႃးၵူၼ်းမိူင်း ၵုၼ်ႁဵင်၊ ပႃႇတီႇသိူဝ်ၽိူၵ်ႇၵေႃႈ ၵမ်ႉထႅမ်ၶေႃႈ
တၢင်ႇယိုၼ်ႈ ၸၢႆးဢွမ်သႅင်မိူင်းသေ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ-
မိူဝ်ႈလဵဝ်ၼႆႉ လႆႈငိၼ်းၶၢဝ်ႇဝႃႈ ၵူၼ်းဝၢၼ်ႈၵူၼ်းမိူင်း ၼႂ်းၸႄႈဝဵင်းၵေးသီး
လႆႈႁူပ်ႉၽေးသိုၵ်း၊ ၺႃးတၢင်းယၢပ်ႇၽိုတ်ႇယွၼ်ႉပၢင်တိုၵ်း၊ ၾၢႆႇပႃႇတီႇတႆး
ပႃႇတီႇသၢင်ႇသီႈၶဝ် ၵႂႃႇၵမ်ႉထႅမ်ၸွႆႈၶူဝ်းၶွင်ၵေႃႈ
လႆႈငိၼ်းဝႃႈဢမ်ႇတဵမ်ထူၼ်ႈ။ ၵွပ်ႈၼၼ် လူင်ပွင်ၸိုင်ႈ
ထုၵ်ႇလီၼႄၼမ်ႉၸႂ်ၽိူၵ်ႇၸိုၼ်ႈ ၶၢဝ်သႂ်သေ ၸွႆႈထႅမ်ပၼ်/
ပူၵ်းပွင်ပၼ်ၵူၼ်းဝၢၼ်ႈ ၵူၼ်းမိူင်း- ဝႃႈၼႆ။
လုၵ်ႈဢွၼ်ႇၵူၼ်းပၢႆႈၽေးၵမ်ႈၽွင်ႈ တိုၵ်ႉၵုမ်းမူႇၶဝ်ႈၵၼ် |
ဢိင်ၼိူဝ် သိုၵ်းမၢၼ်ႈတင်း
တပ်ႉသိုၵ်းၸိုင်ႈတႆး (SSPP/SSA) လႆႈပဵၼ်ပၢင်တိုၵ်းၵၼ်၊
လႆႈၶဵင်ႈၶႅင်ၵၢၼ်သိုၵ်း တေႃႇၵၼ်ၼႆႉ ၵူၼ်းဝၢၼ်ႈတႃႈၽႃသွင်ႇ၊ ဝၢၼ်ႈငူးလိူမ်၊
ဝၢၼ်ႈလွႆၶေႃ၊ ဝၢၼ်ႈပၢင်ႇၸေႈ၊ ဝၢၼ်ႈလွႆယွႆးၸိူဝ်းၼႆႉ လႆႈပၢႆႈ ၽေးသိုၵ်းဝႆႉ။
မိူဝ်ႈလဵဝ် မီးၵူၼ်းမိူင်းမွၵ်ႈ 200 ပၢႆ လႆႈပၢႆႈယၢၼ်ႁိူၼ်းယေး၊
မီးသင်ၶၸဝ်ႈမွၵ်ႈ 50 တူၼ်ပၢႆ လႆႈပၢႆႈ ယၢၼ်ဝတ်ႉဝႃးၽႃသိူဝ်ႇ။
လုၵ်ႈဢွၼ်ႇႁူင်းႁဵၼ်းၵေႃႈ ဢမ်ႇလႆႈႁဵၼ်းလိၵ်ႈလၢႆး။ သူၼ် ႁႆႈ ၼႃးၵူၼ်းဝၢၼ်ႈ
တႃႇ 200 ဢေႇၵႃႉပၢႆၵေႃႈ လႆႈပွႆႇဝႆႉ ဢမ်ႇၸၢင်ႈႁဵတ်းၵၢၼ်ၽုၵ်ႇသွမ်ႈ။ ၵွပ်ႈၼၼ်
ၼင်ႇႁိုဝ်တေပူၵ်းပွင်လႆႈၽဝ ၵူၼ်းဝၢၼ်ႈၵူၼ်း မိူင်းၶိုၼ်းၼၼ်ႉ
လူင်ပွင်ၸိုင်ႈၵေႃႈလီ၊ လၢႆလၢႆၾၢႆႇၵေႃႈလီ၊ ႁႂ်ႈၵိုတ်းယင်ႉပၢင်တိုၵ်းသေ
ၸွႆႈထႅမ်ၵၢၼ်ပူၵ်းပွင်ၽဝ ၵူၼ်းမိူင်း ႁႂ်ႈၶိုၼ်ႈယႂ်ႇမႂ်ႇသုင်သေၵမ်း-
ၸၢႆးဢွမ်သႅင်မိူင်း တၢင်ႇလၢတ်ႈၼႂ်းသၽႃးၵႂႃႇ ၼင်ႇၼႆ။
ဢိင်ၼိူဝ်လွင်ႈၼႆႉသေ ၼၢင်းဝႃႇၼု
ၵေႃႈလၢတ်ႈဝႃႈ- ၶၢဝ်းယၢမ်းမိူဝ်ႈလဵဝ်ၼႆႉ မၼ်းဢမ်ႇၸႂ်ႈၶၢဝ်းယၢမ်းဢၼ်
ၵူၼ်းၵေႃႉၼိုင်ႈလႄႈၵေႃႉၼိုင်ႈ တၢင်ႇတၢင်းၽိတ်းၼိူဝ်ၵၼ်၊
ယွင်ႈတၢင်းၽိတ်းၵွင်ၼိူဝ်ႁူဝ်ၵၼ်ၸိူဝ်းၼႆႉ။ ယွၼ်ႉပိူဝ်ႈ
ႁဵတ်းၸိူင်ႉၼႆမႃးလႄႈ ၼႂ်းဝၢၼ်ႈမိူင်းႁဝ်းလႆႈပဵၼ်ပၢင်တိုၵ်းသိုၵ်းသိူဝ်
ၵၼ်မႃးမီး 60 ပီပၢႆ၊ ၽႂ်ၵေႃႈဢမ်ႇၽဵဝ်ႈၽႂ်လႆႈ တႄႉၼင်ႇၵဝ်ႇ။ ၵွပ်ႈၼၼ်
ၵူၼ်းဝၢၼ်ႈၵူၼ်းမိူင်းၼႆႉ ထိုင်ၶၢဝ်းထုၵ်ႇလႆႈပူၵ်းပွင် ၽဝၸူဝ်ႈပၢၼ်
ႁႂ်ႈၶိုၼ်ႈယႂ်ႇမႂ်ႇသုင် ယဝ်ႉ။ ၵွပ်ႈၼၼ် တင်းသွင်ၾၢႆႇသွင်ပႃႈၼႆႉ
ထုၵ်ႇလႆႈဢဝ်ၵၢၼ်ပူၵ်းပွင် ၶိုၼ်ႈယႂ်ႇမႂ်ႇသုင်ပဵၼ်လၵ်းသေ ႁဵတ်းတႃႇၵူၼ်း
ဝၢၼ်ႈၵူၼ်းမိူင်း၊ ဢမ်ႇထုၵ်ႇလီဢဝ်ၼမ်ႉတွၼ်းၽွၼ်းလီ ၼိူဝ်ၵၢၼ်မိူင်း၊
ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း တုၵ်ႉၶယၢပ်ႇ ၽိုတ်ႇ၊ ပေႃးဢမ်ႇၼၼ်
လွင်ႈငမ်းယဵၼ် ဢၼ်ႁဝ်းၶႂ်ႈလႆႈၼၼ်ႉ တေဢမ်ႇလႆႈသေပွၵ်ႈ- ဝႃႈၼႆ။
ၵဵဝ်ႇၵပ်းလွင်ႈၵၢၼ်သိုၵ်းၼၼ်ႉ
ၾၢႆႇသိုၵ်းမၢၼ်ႈဝႃႈ ႁႂ်ႈတပ်ႉသိုၵ်းၸိုင်ႈတႆး (SSPP/SSA) ထွႆထွၼ်ဢွၵ်ႇထုင်ႉ
ၼႃႈလိၼ် ဢၼ်ပဵၼ်ပၢင်တိုၵ်း ၶဵင်ႈၵၢၼ်သိုၵ်း၊ ယွၼ်ႉပိူဝ်ႈမႃးပၵ်းသိုၵ်းၼႆႉ
မၼ်းပဵၼ်ၵၢၼ်ပူၼ်ႉပႅၼ်၊ ႁႂ်ႈတပ်ႉသိုၵ်း ၸိုင်ႈတႆး
ပၵ်းယူႇတီႈငဝ်ႈငုၼ်းဝၢၼ်ႈႁႆးၵူၺ်း။ ၵူၺ်းၵႃႈ
ၾၢႆႇတပ်ႉသိုၵ်းၸိုင်ႈတႆးၵေႃႈလၢတ်ႈဝႃႈ ႁဝ်းယူႇသဝ်းတူင်ႉၼိုင်
မႃးပီယၢဝ်းၶၢဝ်းႁိုင်၊ ၸဵမ်မိူဝ်ႈၵိုတ်းသိုၵ်းပီ 1989 ။ ယွၼ်ႉလွင်ႈၼႆႉသေ
သွင်ၾၢႆႇလႆႈၶဵင်ႈၵၢၼ်သိုၵ်းတေႃႇၵၼ် ပဵၼ်ပၢင်တိုၵ်းၵၼ်မႃး။
Tags: News, Politic