ပူၼ်ႉမႃးမိူဝ်ႈဝၼ်းသဝ်တီႈ 19/07/2014 ၊ ၵၢင်ၼႂ်ယၢမ်း 09:30 ပႃႇတီႇၵၢၼ်မိူင်း မိူၼ်ၼင်ႇပႃႇတီႇ ၻီႊမူဝ်ႊၶရေႊသီႊ ၸိူဝ်ႉၸၢတ်ႈ ႁိုဝ် ပႃႇတီႇၼူၵ်ႉယုင်း (NLD) ၊ ပႃႇတီႇၻီႊမူဝ်ႊၶရေႊသီႊၸိူဝ်ႉၶိူဝ်းတႆး ႁိုဝ် ပႃႇတီႇႁူဝ်သိူဝ် (SNLD) တင်း ၸုမ်းၶႅၵ်ႇလီပၢင်ၸႃႉ ႁူမ်ႈၵၼ်ၵႂႃႇတီႈဝတ်ႉဢႃႇၸႃႇၼီႇ(ၽူႈႁတ်းငၢၼ်) မိူင်းပွၼ်သေ ဝၢင်းတူင်ႇမွၵ်ႇမွင်ၸႂ် ၼပ်ႉယမ် တီႈၶုမ်ၵုတ်းၸဝ်ႈၸၢမ်ႇထုၼ်း ၸဝ်ႈၾႃႉမိူင်းပွၼ်။

ပႃႇတီႇ NLD မီးပႃႈယူႇမီႇၸေႃႇ (ၽူႈၼမ်းၼႂ်းပႃႇတီႇ NLD မိူင်းတႆး) ဢွၼ်ႁူဝ်လုၵ်ႈၸုမ်း NLD တင်းမူတ်း 30 ၵေႃႉ၊ ႁူမ်ႈပႃးပႃႇတီႇႁူဝ်သိူဝ် SNLD ပၢင်လူင်/ လွႆလႅမ်/ မိူင်းပွၼ် ဢိၵ်ႇၸုမ်းၶႅၵ်ႇလီပၢင်ၸႃႉ မဵတ်ႉတႃႇႁွမ်ႁိုၼ်း (လွႆလႅမ်) တင်းမူတ်းမီးၵူၼ်း 50 ၵေႃႉပၢႆပၢႆ။ တႄႇဝၢင်းတူင်ႇမွၵ်ႇ ၼပ်ႉယမ်ယၢမ်း 10:30 မူင်းသေ ယဝ်ႉတူဝ်ႈၵႂႃႇမိူဝ်ႈယၢမ်း 10:45 မူင်း။

ဢွၼ်ၼႃႈ ယၢမ်း 10:00 မူင်းၼၼ်ႉ ပႃႇတီႇ NLD, SNLD  ပၢင်လူင်လႄႈမိူင်းပွၼ် တင်း ၸုမ်းၶႅၵ်ႇလီပၢင်ၸႃႉ လွႆလႅမ်၊ ႁူမ်ႈၵၼ် ႁွမ်းတၢၼ်းလဵင်ႉၽဵလ်း(ၵၢပ်ႈသွမ်း)သင်ၶ တီႈဝတ်ႉၽူႈႁတ်းငၢၼ်(ဢႃႇၸႃႇၼီႇ)၊ လဵင်ႉလူပႃးပီႈၼွင်ႉ ၸိူဝ်းႁွတ်ႈၽႅဝ်ၶဝ်ႈႁူမ်ႈ ႁွမ်းတၢၼ်းယၢတ်ႇၼမ်ႉ။ ထိုင်မႃးဝၢႆးဝၼ်း ယၢမ်း 13 မူင်း ၵႂႃႇတီႈႁေႃၸဝ်ႈၾႃႉ ၸဝ်ႈၸၢမ်ႇထုၼ်းသေ ထၢႆႇၶႅပ်းႁၢင်ႈၵိုၵ်းႁေႃ ၸဝ်ႈၸၢမ်ႇထုၼ်း။