သိုၵ်းတႆးတင်းသိုၵ်းမၢၼ်ႈ ပဵၼ်ပၢင်ၵိုတ်းၵၼ် ၵူၼ်းဝၢၼ်ႈလႆႈပၢႆႈ



တပ်ႉသိုၵ်းၸိုင်ႈတႆး (SSPP/SSA) တင်း သိုၵ်းမၢၼ်ႈ ပဵၼ်ပၢင်တိုၵ်းၵၼ် ပွတ်းႁႃႈဝၢၼ်ႈ ၵွင်းၸဝ်ႈမိူင်း ၼႂ်းၸႄႈဝဵင်း ၵေးသီး၊ ၵူၼ်းဝၢၼ်ႈၼႂ်းပိုၼ်ႉတီႈ 6 ဝၢၼ်ႈလႆႈပၢႆႈယၢၼ် ႁိူၼ်းယေးဝၢၼ်ႈသူၼ်ထႅင်ႈ။


ၸၼ်ႉၽူႈၼမ်း SSPP/SSA လၢႆၸဝ်ႈလၢႆၵေႃႉ တီႈငဝ်ႈငုၼ်းဝၢၼ်ႈႁႆး မိူဝ်ႈၸတ်း ဝၼ်းၵိူတ်ႇလၢႆးလုၵ်ႉၽိုၼ်ႉၸိုင်ႈတႆး ၶွပ်ႈၶူပ်ႇ 56 ပီ
ပိုၼ်ႉတီႈၼႃႈလိၼ် ဢၼ်တပ်ႉသိုၵ်းၸိုင်ႈတႆး (SSPP/SSA) ပၵ်းတပ်ႉယူႇသဝ်း ၼႂ်းၸႄႈဝဵင်းၵေးသီး ၸိုင်ႈတႆး ပွတ်းၸၢၼ်းၼၼ်ႉ ဢိင်ၼိူဝ်သိုၵ်းမၢၼ်ႈၶလယ 248 ႁၢင်ႈႁႅၼ်းသိုၵ်းမႃးလေႃႇတိုၵ်း လၢႆငႃးသိုၵ်းလႄႈ မိူဝ်ႈဝႃး (ဝၼ်းတီႈ 20/07/2014) လႆႈပဵၼ်ပၢင်တိုၵ်းၵၼ် တင်ႈတႄႇဝၢႆးဝၼ်းမွၵ်ႈယၢမ်း 1 မူင်း တေႃႇထိုင်ႁူဝ်ၶမ်ႈ၊ မိူဝ်ႈၼႆႉ ၵေႃႈ ပဵၼ်ပၢင်တိုၵ်းၵၼ်ထႅင်ႈ တင်ႈတႄႇယၢမ်း 7 မူင်းၵၢင်ၼႂ်။

ၽူႈၵွၼ်းတပ်ႉ SSPP/SSA ဢၼ်ႁွတ်ႈၼႃႈသိုၵ်းၵေႃႉၼိုင်ႈ လၢတ်ႈဝႃႈ- ပၢင်တိုၵ်းဝၼ်းတီႈ 20 ၼၼ်ႉ သိုၵ်းမၢၼ်ႈ ၶလယ 248 မိူင်းၼၢႆး၊ တႂ်ႈတိူင်းသိုၵ်းဝၼ်းဢွၵ်ႇၵၢင် (ၶူဝ်လမ်) ၵႂႃႇႁွၼ်ႈထဝ်ႇတူင်ႉၼိုင် ၾၢႆႇဢွၵ်ႇဝဵင်းၵေးသီး ယၢၼ် 8 လၵ်း၊ ၼႂ်းဢိူင်ႇႁႃႈဝၢၼ်ႈ တင်း ဢိူင်ႇပၢင်ႇၸေႈႄလႈ လႆႈပဵၼ်ပၢင်တိုၵ်းၵၼ်တင်းတပ်ႉသိုၵ်းၸိုင်ႈတႆး (SSPP/SSA)။ သိုၵ်းမၢၼ်ႈတပ်ႉၼႆႉ လုၵ်ႉတီႈတႃႈသၢင်းၶိုၼ်ႈမႃး၊ ပဵၼ် ၶလယ 248 ၊ မိူဝ်ႈဝႃး မႃးယိုဝ်းႁဝ်းတီႈၵွင်းၸဝ်ႈမိူင်း၊ ယူႇယူႇ မွၵ်ႈ 15 မိၼိတ်ႉ မႃးယိုဝ်းႁဝ်းတိၵ်းတိၵ်းသေ လႆႈပဵၼ်ပၢင်တိုၵ်းၵၼ်တေႃႇႁူဝ်ဝၼ်းၶမ်ႈ။ မိူဝ်ႈၼႆႉ ၵၢင်ၼႂ် 7 မူင်းၵေႃႈ ဢဝ်ၵွင်ႈလူင်မႃးယိုဝ်းႁဝ်းၸဵမ်ၸဝ်ႉ၊ မိူဝ်ႈလဵဝ် ပၢင်တိုၵ်းၼႆႉ ၽႄႈလၢမ်းၵႂႃႇထိုင်တၢင်းပၢင်ႇၸေႈယဝ်ႉ- ဝႃႈၼႆ။

ဢိင်ၼိူဝ်ပဵၼ်ပၢင်တိုၵ်းၵၼ်သေ ၵူၼ်းဝၢၼ်ႈပၢင်ႇၸေႈ၊ ဝၢၼ်ႈၵျွင်း၊ ဝၢၼ်ႈပႃတႅပ်း၊ ဝၢၼ်ႈပၢင်ႇမူင်ႈ၊ ဝၢၼ်ႈၶၢၼ်၊ ဝၢၼ်ႈမႆႉၵေး ၸိူဝ်းၼႆႉလႆႈပၢႆႈယၢၼ်ႁိူၼ်းယေးတီႈယူႇ။

ၵဵဝ်ႇၵပ်းလွင်ႈၼႆႉ ၵူၼ်းဢၼ်ၵႂႃႇၸွႆႈၵူၼ်းပၢႆႈၽေး ၽူႈဢွၼ်ႁူဝ်ၵူၼ်းၼုမ်ႇၸိုင်ႈတႆး ၸၢႆးႁၢၼ် လၢတ်ႈဝႃႈ- တီႈတၢင်း ဝၢၼ်ႈဝၢပ်ႈၵေႃႈ မီးငႃးသိုၵ်းမၢၼ်ႈယူႇ၊ ၵွပ်ႈၼၼ် ၵူၼ်းဝၢၼ်ႈဢမ်ႇၸၢင်ႈပၢႆႈၵႂႃႇတီႈဝတ်ႉ(ၵျွင်း)မုၼ်ၸဝ်ႈ တီႈ ဝၢၼ်ႈဝၢပ်ႈ။ ၵမ်ႈၼမ်တႄႉ ပၢႆႈမူၵ်းယွမ်ႇမူၵ်းယုမ်း။ မိူဝ်ႈလဵဝ်ၼႆႉ ႁဝ်းၶႃႈတိုၵ်ႉႁႃတၢင်း ပိူဝ်ႈတႃႇၵႂႃႇႁွင်ႉၶဝ် ငိူင်ႉဝႄႈ ၽေးသိုၵ်း ၵႂႃႇယူႇသဝ်းတီႈဢၼ်မီးလွင်ႈႁူမ်ႇလူမ်ႈ။ ၵူၼ်းမိူင်းၸိူဝ်း ဢၼ်လႆႈပၢႆႈၼႆႉ မီးၵႃႈႁိုဝ်ၵေႃႈႁဝ်းၶႃႈ ပႆႇႁူႉတႅတ်ႈ တေႃး- ဝႃႈၼႆ။

ၵပ်းၵၢႆႇလွင်ႈဢၼ်ပဵၼ်ပၢင်တိုၵ်းၼႆႉ ၵေႃႉယၢမ်ႈႁၢပ်ႇၵၢၼ်ၼႂ်းလၢႆးလုၵ်ႉၽိုၼ်ႉ ၸဝ်ႈၸၢႆးၵေႃး လၢတ်ႈတီႈ ၸုမ်းၶၢဝ်ႇ ၽူႈတွႆႇႁွၵ်ႈဝႃႈ- သိုၵ်းမၢၼ်ႈၼႆႉ ပေႃးဝႃႈၶဝ်တိုၵ်းယိုဝ်းလႆႈတပ်ႉပၢင်သဝ်းတီႈႁႃႈဝၢၼ်ႈၼႆၸိုင် ၶဝ်တေလႆႈသၼ်လွႆသုင် တီႈၼၼ်ႈလႄႈ ပေႃးဢဝ်ၽႅၼ်ၵၢၼ်သိုၵ်းဝႃႈ မိူၼ်ၼင်ႇၶဝ်ၵုမ်းလႆႈတႃႈၽႃသွင်ႇလႄႈ ႁိမ်းႁွမ်းၸိူဝ်းၼၼ်ႉတင်းသဵင်ႈ။ ၾၢႆႇၼိုင်ႈၵေႃႈ ပေႃးဝႃႈၵုမ်းလႆႈသဵၼ်ႈတၢင်းၵေးသီး- တႃႈၽႃသွင်ႇၵေႃႈ မိူၼ်ၼင်ႇတတ်းၶၢတ်ႇလႆႈ သဵၼ်ႈတၢင်း ၵေးသီး- တႃႈၽႃသွင်ႇ- သႅင်ၵႅဝ်ႉ၊ တတ်းၶၢတ်ႇၵၼ်၊ လွင်ႈၵႂႃႇမႃးတူင်ႉၼိုင်ၶွင် SSPP/SSA တိတ်းတေႃႇၵၼ် ပွတ်းႁွင်ႇ လႄႈပွတ်းၸၢၼ်း။ ၼႂ်းၸႄႈဝဵင်းမိူင်းသူႈ ပွတ်းတႃႈသၢမ်ပူးၵေႃႈ တေႃႈၼင်ႇၼၼ်၊ ပေႃးဝႃႈသိုၵ်းမၢၼ်ႈပၵ်းဢဝ်တီႈယူႇ ၼိူဝ်သၼ်လွႆသုင် ၵုမ်းလႆႈ တီႈၼၼ်ႈၵေႃႈ မၼ်းတတ်းၶၢတ်ႇလႆႈသိုၵ်းတႆး SSPP/SSA သၢႆတိတ်းတေႃႇၵႂႃႇမႃး တၢင်း ၸၢၼ်း။ ၵွပ်ႈၼၼ် သိုၵ်းမၢၼ်ႈၸင်ႇၶတ်းၸႂ် ႁၢင်ႈႁႅၼ်း ပိူဝ်ႈတႃႇယိုတ်းဢဝ်လႆႈတီႈယူႇၸိူဝ်းၼႆႉ - ဝႃႈၼႆ။

ၽိုၼ်ၶၢဝ်ႇ မျၢၼ်ႇမႃႉဢလိၼ်း ဝၼ်းတီႈ 15/07/2014 ယၢမ်ႈဢွၵ်ႇၸီႉၸမ်ႈဝႃႈ - တပ်ႉသိုၵ်းၸိုင်ႈတႆး SSPP/SSA ၼႆႉ ဢမ်ႇႁဵတ်းၸွမ်းၶေႃႈၵိၼ်ၵႅၼ်ႇဢၼ်တူၵ်းလူင်းၵၼ်။ ယူႇယူႇလွမ်ငွႆးမူၵ်းယိုဝ်းသိုၵ်းမၢၼ်ႈတိၵ်းတိၵ်းလႄႈ သွင်ၾၢႆႇလႆႈ ပဵၼ်ပၢင်တိုၵ်းၵၼ်- ၵႅမ်ၽွင်းလူင် ၾၢႆႇၵႅတ်ႇၶႄ ၸွမ်ႁၢၼ်ၵျေႃႇၺုၼ်ႉ လၢတ်ႈ။

ၽူႈၼမ်းၼႂ်း SSPP/SSA ၸဝ်ႈၶုၼ်သႅင် လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ မိူဝ်ႈမၼ်းၸဝ်ႈႁွတ်ႈၽႅဝ်တီႈ ၼေႇပျီႇတေႃႇ ဝႃႈ- တီႈတႃႈၽႃသွင်ႇၼႆႉ ၸဵမ်မိူဝ်ႈပႆႇၵိုတ်းတိုၵ်းၵၼ်ၵေႃႈ ပဵၼ်ႁဝ်းၶႃႈယူႇသဝ်း၊ ႁဝ်းၶႃႈႁဵတ်းသၢင်ႈၶူဝ်ပၼ် ပိူဝ်ႈတႃႇ ၵူၼ်းဝၢၼ်ႈၵူၼ်းမိူင်းၵႂႃႇမႃးငၢႆႈလူမ်၊ သိုၵ်းမၢၼ်ႈသမ်ႉဢဝ် ၼမ်ႉမၼ်းမဵၼ် ႁူတ်းသေ ၾႆးၸုတ်ႇ ပွႆႇမၢၵ်ႇၵွႆပႅတ်ႈမိူဝ်ႈပီ 2011 ။  ႁဝ်းၶႃႈမႃးၵိုတ်းတိုၵ်းၵၼ်ယဝ်ႉ ႁဝ်းၶႃႈၶိုၼ်းႁဵတ်းၶူဝ် (တႃႈၽႃသွင်ႇ) ပၼ်ၵူၼ်းဝၢၼ်ႈၵူၼ်းမိူင်းၸႂ်ႉထႅင်ႈသေ ႁဝ်းၶႃႈဢဝ်ႁႅင်းသိုၵ်းပၵ်းယူႇမႃး ၸဵမ်မိူဝ်ႈၼၼ်ႉ၊ ၵမ်းၼႆႉ ၾၢႆႇမၢၼ်ႈသမ်ႉမႃး ႁႂ်ႈႁဝ်းၶၢႆႉပၢႆႈတီႈယူႇထႅင်ႈ၊ ၼႆႉပဵၼ် ဝၢၼ်ႈမိူင်းႁဝ်း တီႈၵိူတ်ႇႁဝ်းလူး ဝူၼ်ႉတူၺ်းလီလီလႄႈ- ဝႃႈၼႆ။

တပ်ႉသိုၵ်းၸိုင်ႈတႆး SSPP/SSA တင်းလူင်ပွင်ၸိုင်ႈမၢၼ်ႈၼႆႉ တူၵ်းလူင်းၵိုတ်းယိုဝ်းၵၼ် ၸၼ်ႉၸိုင်ႈမိူင်း ႁူမ်ႈတုမ်ဝႆႉ သေတႃႉၵေႃႈ ဢမ်ႇၵိုတ်းလႆႈပၢင်တိုၵ်းတႄႉတႄႉ။ ယင်းတိုၵ်ႉသိုပ်ႇပဵၼ်ပၢင်တိုၵ်းယူႇသေ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း လႆႈပၢႆႈယၢၼ်ႁိူၼ်းယေးတီႈယူႇ။




 
© 2012 All Rights Reserved | Asean Celebrity | Fonts @ AtFonts | Free Templates