ၵဵဝ်ႇၵပ်းလွင်ႈၼႆႉ ၵိူတ်ႇၶိုၼ်ႈမိူဝ်ႈဝၼ်းတီႈ 26/07/2014 ၵၢင်ၶမ်ႈယၢမ်း 6 မူင်း၊ တီႈၶွၵ်ႈၶင် တပ်ႉပၢင်သဝ်းပလိၵ်ႈ ဝဵင်းၵျွၵ်ႉမႄး။ တီႈႁွင်ႈၶင်ၵူၼ်းၸၢႆးၼၼ်ႉ ၶုၼ်သိုၵ်း (ၾၢႆႇပလိၵ်ႈ) ထုၼ်းၶၢႆႇၸူဝ်း၊ ႁူဝ်သိုၵ်းလူင် (ပလိၵ်ႈ) ၶိၼ်ႇလႃႉထေး၊ ႁူဝ်သိုၵ်း (ပလိၵ်ႈ)ၼွင်ႇၼွင်ႇ ၶဝ်ၸိူဝ်းၼႆႉတူၵ်းပုၼ်ႈၽွၼ်း ပႂ်ႉၽၵ်းတူ။ ၽွင်းၼၼ်ႉ ၵူၼ်းတူၵ်း ပုၼ်ႈၽွၼ်း ပလိၵ်ႈၵေႃႉၼိုင်ႈ ၵႂႃႇပၼ်ၽႃႈႁူမ်ႇၶူဝ်းၼွၼ်းႄလႈ ၵူၼ်းတူၵ်းၶွၵ်ႈၶဝ် ဢဝ်တိုဝ်ႉတၢင်း ပေႃႉထုပ်ႉ ၸဝ်ႈၼႃႈတီႈ ၸိူဝ်းပႂ်ႉၶွၵ်ႈသေယႃႉၶွၵ်ႈလႅဝ်ယဝ်ႉလႅၼ်ႈပၢႆႈ- ၵူၼ်းၸမ်ၸႂ်ပလိၵ်ႈ ၵုမ်းၶွၵ်ႈၵေႃႉၼိုင်ႈလၢတ်ႈ။

ၽွင်းၵႂႃႇပၼ်ၽႃႈႁူမ်ႇၶူဝ်းၼွၼ်းၼၼ်ႉ ၵူၼ်းတူၵ်းၶွၵ်ႈတဵၵ်းဢီးၽၵ်းတူသေမင်။ ပလိၵ်ႈဝၢတ်ႇၸဵပ်း 5 ၵေႃႉ၊ ၽူႈၵွၼ်းၶွၵ်ႈၶင် ထုၵ်ႇထုပ်ႉတွႆႇဝၢတ်ႇၸဵပ်းလိူဝ်ၸႂ်၊ လုပ်ႇၶီႈၶင်ႈႁၵ်းလၢႆသိၵ်ႈ ၽွင်းၶဝ်ယႃႉၶွၵ်ႈလႅဝ်သေလႅၼ်ႈပၢႆႈ ၼၼ်ႉ ပလိၵ်ႈၶဝ်ၵေႃႈဢဝ်ၵွင်ႈယိုဝ်းသႂ်ႇ၊ ၵူၼ်းလႅၼ်ႈပၢႆႈၼႂ်း 7 ၵေႃႉၼၼ်ႉ ထုၵ်ႇယိုဝ်းတၢႆ 3 ၵေႃႉ၊ ဝၢတ်ႇၸဵပ်း4 ၵေႃႉ၊ ၶဝ် 4 ၵေႃႉၵေႃႈ ထုၵ်ႇဢဝ်လိူင်ႈ (ၸွႆးတြႃး) ၵဵဝ်ႇၵပ်းလွင်ႈယႃႉၶွၵ်ႈထႅင်ႈ- ၵူၼ်းၸမ်ၸႂ်တပ်ႉပလိၵ်ႈ သိုပ်ႇလၢတ်ႈ ၼင်ႇၼႆ။

ပလိၵ်ႈၸိူဝ်းထုၵ်ႇပေႃႉထုပ်ႉ ဝၢတ်ႇၸဵပ်း 5 ၵေႃႉၼၼ်ႉ ဢဝ်သူင်ႇယူတ်းယႃတူဝ်ဝႆႉ တီႈႁူင်းယႃ ဝဵင်းၵျွၵ်ႉမႄး။ ၽူႈၵွၼ်းပလိၵ်ႈ ဢၼ်ဝၢတ်ႇၸဵပ်းလိူဝ်ၸႂ်ၼၼ်ႉ သူင်ႇၵႂႃႇယူတ်းယႃတူဝ် တီႈဝဵင်းတႃႈလိူဝ်ႇ (မၼ်းတလေး) ။