CSSU သပ်းၸႅင်ႈ ၵၢၼ်ၽွမ်ႉႁူမ်ႈတႆး တပ်ႉသိုၵ်းတင်းပႃႇတီႇၵၢၼ်မိူင်း
ၸုမ်းၶၢဝ်ႇၽူႈတွႆႇႁွၵ်ႈ တိတ်းတေႃႇတွင်ႈထၢမ် ၸဝ်ႈပိုၼ်ၶမ်း၊ ၵဵဝ်ႇၵပ်းလွင်ႈ
ၶၢဝ်းတၢင်းၵေႃပွင်ၵၢၼ် ၽွမ်ႉႁူမ်ႈၸိုင်ႈတႆး (CSSU) လူင်းပိုၼ်ႉတီႈ
သပ်းလႅင်းၼႄၼႃႈၵၢၼ် CSSU ၼႂ်းၸိုင်ႈတႆး လၢႆလၢႆၸႄႈဝဵင်း။
ၵၢၼ်ၽွမ်ႉႁူမ်ႈတႆးၼၼ်ႉ ထိုင်ဝႆႉၶၼ်ႈတွၼ်ႈ ႁဵတ်းၵၢၼ်ႁူမ်ႈၵၼ်လႆႈ၊
ႁူမ်ႈမူႇၸုမ်းပႆႇလႆႈ- လႆႈၵႂၢမ်းတွပ်ႇ ၼင်ႇၼႆ။
ၸဝ်ႈပိုၼ်ၶမ်း ၼႂ်းပၢင်ႁၢႆးငၢၼ်းၼႄ ၸုမ်းၽူႈၼမ်းၼႂ်း ၶွင်ႇသီႇဢဝ်ၶိုၼ်းၸိုင်ႈတႆး (RCSS) ပူၼ်ႉမႃးမိူဝ်ႈဝၼ်းတီႈ 14/07/2014 |
ထၢမ်-မႂ်ႇသုင်ၶႃႈ လႆႈငိၼ်းဝႃႈ
ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ႁဝ်းၶႃးၼႆႉ ၸဝ်ႈပိုၼ်ၶမ်းႁဝ်း
လႆႈပဵၼ်တူဝ်တႅၼ်း ဢွၼ်ႁူဝ် Sub-committee သေ လႆႈမိူဝ်းၵႂႃႇသပ်းလႅင်းၼႄ
လွင်ႈၼႃႈၵၢၼ်တႃငၢၼ်း ၵဵဝ်ႇၵပ်းလွင်ႈ CSSU တီႈၼႂ်း
မိူင်းတႆးႁဝ်းၶႃႈလၢႆၸႄႈဝဵင်း ဝႃႈၼႆ။ ပဵၼ်ၸိူင်ႉႁိုဝ်
ၶႂ်ႈပိုင်ႈလၢတ်ႈၼႄပၼ်ၽွင်ႈဢေႃႈ။
တွပ်ႇ-လွင်ႈ Sub-committee ႁဝ်း 6 ၵေႃႉ
လႆႈဢွၵ်ႇတၢင်းမိူဝ်းမိူင်းတႆးၼႆႉ ၸွမ်းၼင်ႇၶေႃႈတႅပ်းတတ်းပၢင်ၵုမ် ၶွပ်ႈ 6
လိူၼ် မိူဝ်ႈဝၼ်းတီႈ 1-2/05/2014 တီႈပၢင်ၵုမ်တႅပ်းတတ်းဝႃႈ
ႁႂ်ႈဢဝ်ၶၢဝ်းယၢမ်းသေ ၵႂႃႇသပ်းလႅင်းၼႄ ၵၢၼ်တူင်ႉၼိုင်
ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ဢၼ်ႁဝ်းလႆႈတင်ႈမႃးယဝ်ႉ 6 လိူၼ်၊
ႁႂ်ႈလုၵ်ႈၸုမ်းၼႂ်းမိူင်း ပေႃးလႆႈ ႁူႉၸွမ်း ဝႃႈၼႆလႄႈ
ႁဝ်းၸင်ႇလႆႈၶဝ်ႈၵႂႃႇၼႂ်းမိူင်းတႆး။
ၸိူဝ်းဢၼ်ပဵၼ်လုၵ်ႈၸုမ်းတင်းမူတ်းၼႆႉ
မီးပႃႇတီႇႁူဝ်သိူဝ်၊ ပႃႇတီႇသိူဝ်ၽိူၵ်ႇ၊ တပ်ႉသိုၵ်းဝၢၼ်ႈႁႆး၊ တပ်ႉသိုၵ်း
လွႆတႆးလႅင်း၊ ၸုမ်း CBO ၼႂ်းမိူင်းၼွၵ်ႈမိူင်းလၢႆလၢႆၸုမ်း၊
ၶဝ်ႈႁူမ်ႈပဵၼ်လုၵ်ႈၸုမ်း ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆးဝႆႉ။
ပေႃးမီးပၢင်ၵုမ်မိူဝ်ႈလႂ် ၶဝ်ၸဝ်ႈသူင်ႇၽူႈတၢင်တူဝ်
မႃးၶိုၼ်ႈၵူႈၸုမ်းယူႇသေတႃႉ ပေႃးပွၵ်ႈမိူဝ်းၶိုၼ်းၼႆ ၵၢၼ်ၶဝ်
ၸဝ်ႈသမ်ႉၼမ်ႁင်းၽႂ်ႁင်းမၼ်းလႄႈ ငဝ်ႈငုၼ်းၸုမ်းၽႂ်ၸုမ်းမၼ်းၼႆႉ
ဢမ်ႇမီးၶၢဝ်းယၢမ်းဢွၵ်ႇသပ်းလႅင်းၼႄ လုၵ်ႈၸုမ်းတီႈၼႂ်းတၢင်ႇၸႄႈဝဵင်း
ၼႂ်းမိူင်းတႆးလႆႈၵူႈတီႈလႄႈ လုၵ်ႈၸုမ်းၵမ်ႈၼမ်ၵေႃႈဢမ်ႇလႆႈႁူႉၸွမ်း။ ၵွပ်ႈၼၼ်
ၼႂ်းပၢင်ၵုမ်ႁူဝ်ႁုပ်ႈ 6 လိူၼ်ၼၼ်ႉ ၸင်ႇၵွႆႈတႅပ်းတတ်းဝႃႈ တေလႆႈပႂ်ႉ
Sub-committee သေ ၶိုၼ်းၵႂႃႇၸွမ်း သပ်းလႅင်းပၼ် ႁႂ်ႈပွင်ႇၸႂ်၊
ႁႂ်ႈလုၵ်ႈၸုမ်းၵူႈတီႈတီႈလႆႈႁူႉၸွမ်းၼႆလႄႈ ၸင်ႇလႆႈတင်ႈႁဝ်း 6 ၵေႃႉသေ
လႆႈၶဝ်ႈၵႂႃႇ။
ထၢမ်- ဢၼ်လႆႈမိူဝ်းၼႆႉ လႆႈမိူဝ်းၵႂႃႇထိုင်တီႈလႂ်လၢႆလၢႆ၊ ႁူပ်ႉၽႂ်မႃးလၢႆလၢႆ၊ ၶၢဝ်းတၢင်းပဵၼ်ၸိူင်ႉႁိုဝ်ၶႃႈ။
တွပ်ႇ-ပိူင်လူင်မၼ်း ဢၼ်ႁဝ်းၵႂႃႇၼႆႉမီး 2
တွၼ်ႈ၊ တွၼ်ႈ 1 ၵႂႃႇသပ်းလႅင်းၼႄၼႃႈၵၢၼ် CSSU ဢၼ်လႆႈႁဵတ်းသၢင်ႈ
မႃးၶၢဝ်းတၢင်း 6 လိူၼ်ၼၼ်ႉ တီႈလုၵ်ႈၸုမ်း၊ ထႅင်ႈတွၼ်ႈၼိုင်ႈသမ်ႉ
ၵႂႃႇသူႇၸႂ်းႁူဝ်ပဝ်ႈ ၼႂ်းၸုမ်း CSSU ။ ၸုမ်း CSSU ၼႆႉ လႆႈတင်ႈဝႆႉ
ၸုမ်းႁဵတ်းၵၢၼ် 2 ၸုမ်း။ ၸုမ်းၼိုင်ႈ ၸုမ်းႁူဝ်ပဝ်ႈ၊
ၸုမ်းၼိုင်ႈၸုမ်းၽူႈၼမ်းၼႂ်း။ ၸုမ်းႁူဝ်ပဝ်ႈၼၼ်ႉ ပဵၼ်ၸုမ်းဢၼ်ႁႅင်းယႂ်ႇ
မိူၼ်ၼင်ႇႁူဝ်ပဝ်ႈ 4 ၸဝ်ႈၼႆႉ ၶဝ်ပဵၼ်ႁူဝ်ပဝ်ႈဝႆႉလႄႈ တီႈၶဝ်ၸဝ်ႈၵေႃႈ
ႁႂ်ႈလႆႈၵႂႃႇၶဝ်ႈႁႃသူႇၸႂ်း တွင်ထၢမ်ၵၢင်ၸႂ်ၶဝ်ၸဝ်ႈမီးၸိူင်ႉႁိုဝ်၊
ယဝ်ႉၵေႃႈၶဝ်ၸဝ်ႈၶႂ်ႈၸီႉၸမ်ႈ ပၼ်တၢင်းႁၼ်ထိုင် ၸိူင်ႉႁိုဝ်ၼႆၼၼ်ႉ
ႁႂ်ႈပေႃးလႆႈႁူႉၸွမ်း။ ပေႃးလႆႈႁူႉယဝ်ႉ ပေႃးထိုင်ပၢင်ၵုမ်ထႅင်ႈ 6 လိူၼ်
ဢၼ်ပဵၼ်ပၢင်ၵုမ်ႁူဝ်ပီၼၼ်ႉ ၸင်ႇၵွႆႈဢဝ်မႃးသပ်းလႅင်းၼႄၵၼ်။
ယဝ်ႉၵေႃႈၼႂ်းပၢင်ၵုမ် ၸင်ႇၵွႆႈတႅပ်းတတ်းဝႃႈ မိူဝ်းၼႃႈႁဝ်းတေႁဵတ်းသင်
ဢၼ်ဝႃႈၼၼ်ႉ ႁႂ်ႈလႆႈၶေႃႈမုလ်း တီႈႁူဝ်ပဝ်ႈၶဝ်မႃးၽွင်ႈ။
ဢိင်ၼိူဝ်လွင်ႈတၢင်းၸိူဝ်းၼႆႉသေ 1.ၵႂႃႇသပ်းလႅင်း ၼႄလုၵ်ႈၸုမ်း။
2.ၵႂႃႇၶိုၼ်းသူႇၸႂ်း ႁူဝ်ပဝ်ႈၶဝ်သေလႄႈ ၵႂႃႇယွၼ်းတၢင်းႁၼ်ထိုင်
တီႈႁူဝ်ပဝ်ႈတင်း 4 ၸဝ်ႈ။ ႁဝ်းလႆႈ ဢွၵ်ႇၶၢဝ်းတၢင်းမိူဝ်းၵႂႃႇ
ၸဵမ်မိူဝ်ႈဝၼ်းတီႈ 08/06/2014 ထိုင် ၵဵင်းတုင်၊ ၵႂႃႇမိူင်းပဵင်း၊ ၵႃလိ၊
ၵုၼ်ႁဵင်၊ မိူင်းပၼ်ႇ၊ လၢင်းၶိူဝ်း၊ မိူင်းၼၢႆး၊ ၼမ်ႉၸၢင်၊ ပၢင်လူင်၊
တူၼ်ႈတီး၊ ပၼ်ႇၶိုၼ်ႈၵႂႃႇတၢင်းလႃႈသဵဝ်ႈ။ ပွတ်းႁွင်ႇတေမီးလႃႈသဵဝ်ႈ၊ သီႇပေႃႉ၊
သႅၼ်ဝီ ၸိူဝ်းၼႆႉ။ တင်းမူတ်း တေမီးမွၵ်ႈ 20 ၸႄႈဝဵင်းၸိူဝ်းၼႆႉ။
ထၢမ်- ဢၼ်လႆႈသပ်းလႅင်းၼႄ ႁူဝ်ပဝ်ႈတင်း 4 ၸဝ်ႈၼႆႉၶႃႈလူး၊ လႆႈႁူပ်ႉတင်း 4 ၸဝ်ႈယူႇၶႃႈႁႃႉ။
တွပ်ႇ-ႁူဝ်ပဝ်ႈသိူဝ်ၽိူၵ်ႇၵေႃႈ
လႆႈၵႂႃႇႁူပ်ႉယူႇ၊ ႁူဝ်ပဝ်ႈႁူဝ်သိူဝ်၊ ႁူဝ်ပဝ်ႈဝၢၼ်ႈႁႆး ။
ႁူဝ်ပဝ်ႈႁူဝ်သိူဝ်လႄႈ ႁူဝ်ပဝ်ႈဝၢၼ်ႈႁႆး သွင်ႁူဝ်ပဝ်ႈၼႆႉ ၶဝ်ၵေႃႈမွပ်ႈပၼ်တီႈ
JAC ၸုမ်းဢၼ်ၶဝ်ၸဝ်ႈလႆႈၶွတ်ႇၽွတ်ႈဝႆႉ။ ၸုမ်းႁူဝ်သိူဝ်၊ ၸုမ်းဝၢၼ်ႈႁႆး၊
တပ်ႉသိုၵ်းၵူၼ်းမိူင်းတႆး လႃႈသဵဝ်ႈ ဢၼ်ပဵၼ်သႅင်ၵႅဝ်ႉတင်းၵႃလိ၊ ၶဝ်ၸဝ်ႈ 3
ၸုမ်းၼႆႉ ႁူမ်ႈပဵၼ် JAC ဝႆႉ။ ႁူဝ်ပဝ်ႈ ၸဝ်ႈၶုၼ်ထုၼ်းဢူးလႄႈ
ႁူဝ်ပဝ်ႈၸဝ်ႈပၢင်ႇၾႃႉၼႆႉ မွပ်ႈပၼ် JAC ဝႃႈၼႆသေ ႁဝ်းၵေႃႈလႆႈၵႂႃႇထူပ်း
ၸဝ်ႈသိူဝ်ထႅၼ်ႈ၊ ၸဝ်ႈၵၢႆႇၾႃႉ၊ ၸၢႆးၼုတ်းၶဝ်ၸိူဝ်းၼႆႉ။ ယဝ်ႉၵေႃႈ
ပွၵ်ႈမႃးၶိုၼ်းထူပ်း ၸဝ်ႈယွတ်ႈသိုၵ်း။ လႆႈဝႃႈလႆႈထူပ်းႁူဝ်ပဝ်ႈ တင်းမူတ်း။
ထၢမ်- ပိူင်လူင်မၼ်း ဢၼ်ၶွတ်ႇၽွတ်ႈမႃး CSSU ၼႆႉ မီးယိူင်းဢၢၼ်းၸိူင်ႉႁိုဝ်ၶႃႈ။
တွပ်ႇ- ပိူင်လူင်မၼ်းတႄႉ
ယိူင်းဢၢၼ်းပဵၼ်လွင်ႈၽွမ်ႉႁူမ်ႈၵူၺ်း၊ လွင်ႈၽွမ်ႉႁူမ်ႈၼႆႉ ၸႅၵ်ႇဝႆႉ 2 ၸၼ်ႉ၊
ၸၼ်ႉၼိုင်ႈ ၼႆႉ ဢၼ်ပဵၼ်ၵူၼ်းမိူင်းတႆးႁဝ်း ဢၼ်ပဵၼ်ႁႅင်းယႂ်ႇလႄႈ တင်း
ၵူၼ်းဢၼ်သူၼ်ၸႂ်ၵၢၼ်ဝၢၼ်ႈ ၵၢၼ်မိူင်း၊ တင်းမုၵ်ႉ ၸုမ်း CBO ။
သွင်ပႃႇတီႇၵၢၼ်မိူင်းတႆး လႄႈ သွင်တပ်ႉသိုၵ်းတႆး၊ ၼႆႉပဵၼ်ၸုမ်းႁႅင်းယ်ႂ်ႇ။
လိူဝ်ၼၼ်ႉ ပဵၼ်ၸုမ်း CBO ၼႂ်းမိူင်း/ၼွၵ်ႈမိူင်း။ လွင်ႈၼႆႉ
ၶၼ်ႈတီႈၼိုင်ႈပဵၼ်ၼႂ်းတႆး ဢွၼ်တၢင်း၊ ပေႃးတႆးႁဝ်းလႆႈယဝ်ႉ ထႅင်ႈပီၼႃႈၼႆႉ
တေၶိုၼ်ႈ ထႅင်ႈၶၼ်ႈ 2 ၊ ပဵၼ်ၸၢဝ်းၶိူဝ်။ တေႁွင်ႉတေဢုပ်ႇပႃးၸၢဝ်းၶိူဝ်း
မိူၼ်ၼင်ႇၸၢဝ်းၶိူဝ်းပဢူဝ်း/ဢင်းသႃး/ထၼု/
တွင်ႇလိုဝ်း/ပလွင်ႈ/ၵူဝ်းၵၢင်ႉ/ဝႃႉ/ဢႃးၶႃႇ/ လႃႇႁူႇ
ၸိူဝ်းၼႆႉလၢႆလၢႆၸၢဝ်းၶိူဝ်း။ ၼႂ်းပီၼႃႈၼႆႉ တေဢၢၼ်းႁဵတ်းပႃး
ပၢင်ၵုမ်ၸၢဝ်းၶိူဝ်းသေ ၶိုၼ်းမႄးၶွတ်ႇၽွတ်ႈထႅင်ႈ၊ တၢင်းယိူင်းဢၢၼ်းတႄႉ
လွင်ႈၽွမ်ႉႁူမ်ႈၵူၺ်း၊ ၶၼ်ႈၼိုင်ႈပဵၼ်တႆး၊ ၶၼ်ႈသွင်ပဵၼ်ၸၢဝ်းၶိူဝ်း။
ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU)
ၼႆႉ ဢၼ်တႅမ်ႈမၢႆဝႆႉၼၼ်ႉ မီးယိူင်းဢၢၼ်း 1.ႁႂ်ႈၵူၼ်းမိူင်းတႆး ႁဝ်းၵူႈၸၢဝ်း
ၶိူဝ်း ႁူမ်ႈမိုဝ်းၵၼ်သေ ၵႄႈလိတ်ႈၵမ်ၸႃတႃ (ၵၢမ်ႇၵျမ်ႇမႃႇ)
မိူင်းတႆးႁဝ်းဝၼ်းၼႃႈ။ 2.ပေႃးဝႃႈၵူၼ်းမိူင်းၸိုင်ႈတႆး ၵူႈၸၢဝ်းၶိူဝ်း
ၽွမ်ႉႁူမ်ႈၵၼ်လႆႈယဝ်ႉ ႁႂ်ႈႁူမ်ႈၵၼ်ၶဵၼ်ႇတႅမ်ႈလႆႈ ယူင်ႉသၢင်ႈၵၢၼ်မိူင်း
(Political Frame Work) သေ ႁူမ်ႈၵၼ်ႁဵတ်းၵၢၼ် တႃႇဝၢၼ်ႈမိူင်းတႆးႁဝ်း။
ထၢမ်- လွင်ႈၽွမ်ႉႁူမ်ႈၼႆႉ
ပေႃးလၢတ်ႈတႄႉငၢႆႈယူႇ၊ ၽႅၼ်ၵၢၼ်လွင်ႈၽွမ်ႉႁူမ်ႈမိူဝ်ႈလဵဝ်ၼႆႉ
ႁူမ်ႈယိူင်းဢၢၼ်း ၶႃႈႁႃႉ၊ ဢမ်ႇၼၼ် ႁူမ်ႈၵၢၼ်ၶႃႈႁႃႉ၊ ႁူမ်ႈမူႇၸုမ်းၶႃႈႁႃႉ
လွင်ႈတေႁဵတ်းလွင်ႈၽွမ်ႉႁူမ်ႈၼႆႉ CSSU ၶႂ်ႈႁႂ်ႈမၼ်းပဵၼ်ၾၢင်ႁၢင်ႈ
ၸိူင်ႉႁိုဝ်။
တွပ်ႇ- ပိူင်လူင်မၼ်းတႄႉ ဢွၼ်တၢင်းသုတ်း
ႁႂ်ႈပေႃးပဵၼ်မႃး လွင်ႈၽွမ်ႉႁူမ်ႈၼႂ်းၼႃႈၵၢၼ်ၵၼ်၊ ႁူမ်ႈႁဵတ်းၵၢၼ်၊
ႁူမ်ႈၵၼ်ပဵၼ်မူႇပဵၼ်ၸုမ်းတႄႉဢမ်ႇၸႂ်ႈ။ ႁူမ်ႈၼႃႈၵၢၼ်
ႁူမ်ႈႁဵတ်းၵၢၼ်ဢၼ်ဝႃႈၼၼ်ႉ လွၵ်းၸုၵ်းၵၢၼ်မိူင်း ႁႂ်ႈမိူၼ် ၵၼ်/
ပဵၼ်ဢၼ်လဵဝ်ၵၼ်။ ၼႂ်း CSSU ႁဝ်းဝႃႈတႄႉ ၽႂ်ၶႂ်ႈယူႇၸုမ်းလႂ်ၵေႃႈယဝ်ႉ
ပဵၼ်ၸုမ်းသင် ၵေႃႈယဝ်ႉ၊ ၵူၺ်းၵႃႈ ၼႃႈၵၢၼ်ၼႆႉ ပေႃးႁဝ်းႁဵတ်းၵၢၼ်မႃး
လွၵ်းၸုၵ်းမၼ်း ႁႂ်ႈပဵၼ်ဢၼ်လဵဝ်ၵၼ်။ လၢတ်ႈၵေႃႈႁႂ်ႈလၢတ်ႈၵႂႃႇတၢင်းလဵဝ် ၵၼ်၊
ပႆၵေႃႈႁႂ်ႈပႆၵႂႃႇတၢင်းလဵဝ်ၵၼ်။
ထၢမ်- လွင်ႈၼႆႉ မၼ်းဢမ်ႇသၢၼ်ၶတ်းၵၢင်ၸႂ်
သင်ၶလႄႈၵူၼ်းမိူင်းဝႆႉၶႃႈႁႃႉ။ မိူၼ်ၼင်ႇပေႃႈမႄႈ ၵူၼ်းမိူင်းတႄႉ
ၶႂ်ႈႁႂ်ႈပႃႇတီႇပဵၼ်ဢၼ်လဵဝ်ၵၼ်၊ တပ်ႉသိုၵ်းပဵၼ်ဢၼ်လဵဝ်ၵၼ်
တုၵ်းယွၼ်းယူႇၸိူင်ႉၼႆ ၶိူဝ်းၶိူဝ်းယႂ်းယႂ်း။ လွင်ႈၼႆႉ
ၶႂ်ႁႂ်လၢတ်ႈၼႄဢိတ်းၼိုင်ႈဢေႃႈ။
တွပ်ႇ-ပေႃးၵိုင်ႉၵၢင်ႉထွမ်ႇတူၺ်းတႄႉ
ပွင်ႇဝႃႈမၼ်းသၢၼ်ၶတ်း၊ ၵွပ်ႈဝႃႈ ပေႃႈမႄႈၵူၼ်းမိူင်းတုၵ်းယွၼ်းဝႆႉတႄႉ ပႃႇတီႇ
ၵၢၼ်မိူင်းသွင်ဢၼ်ႁႂ်ႈပဵၼ်ၼိုင်ႈ၊ တပ်ႉသိုၵ်းသွင်ဢၼ်ႁႂ်ႈပဵၼ်ၼိုင်ႈ၊
ၼၼ်ႉမၼ်းပွင်ႇဝႃႈ ဢၼ်ႁဝ်းၶႂ်ႈပဵၼ်။ ဢၼ်ႁဝ်း ၶႂ်ႈပဵၼ်ၼႆႉ မၼ်းတေမႃးၶၼ်ႈတီႈ 2
ၵူၺ်း၊ ၶၼ်ႈ 1 ဢၼ်ႁဝ်းႁဵတ်းပဵၼ်လႆႈ။ ဢၼ်ႁဝ်းႁဵတ်းပဵၼ်လႆႈၼႆႉ မၼ်းပဵၼ်
ႁဝ်းႁူမ်ႈၵၼ်ႁဵတ်းၵၢၼ် ၸွမ်းလွၵ်းၸုၵ်းၵၢၼ်မိူင်းဢၼ်လဵဝ်ၼၼ်ႉၵူၺ်း၊
တႃႇတေႁူမ်ႈၵၼ်ပဵၼ်ၸုမ်း/ ပဵၼ်ဢၼ် ၼိုင်ႈဢၼ်လဵဝ်ၼႆႉ
ပဵၼ်ဢၼ်ႁဝ်းၶႂ်ႈပဵၼ်ၵူၺ်းလႄႈ မၼ်းၵိုင်ႉၵၢင်ႉပႆႇပဵၼ်မႃးလႆႈ။
ဢၼ်ႁဝ်းပဵၼ်လႆႈမိူဝ်ႈလဵဝ်တႄႉ ႁဝ်းႁဵတ်းဢၼ်ႁဝ်းပဵၼ်လႆႈၼၼ်ႉၵူၺ်း။
ၵွပ်ႈပိူဝ်ႈၼႆ
ပေႃးတူၺ်းဢၼ်ႁဝ်းပဵၼ်လႆႈဝႃႈတႄႉ မၼ်းၵေႃႈတေလႅပ်ႈသၢၼ်ၶတ်း
ၵူၼ်းမိူင်းတုၵ်းယွၼ်းယူႇ။ ၵူၺ်းၵႃႈ ဢၼ်ႁဝ်းၶႂ်ႈပဵၼ်ၼၼ်ႉ (aim)
ယိူင်းဢၢၼ်းတႄႉ သွင်ပႃႇတီႇ သွင်တပ်ႉသိုၵ်း ထုၵ်ႇလီပဵၼ်ဢၼ်လဵဝ်ၵၼ်၊
ပဵၼ်ဢၼ်ႁဝ်းၶႂ်ႈပဵၼ်၊ ၼႆႉပဵၼ်ယိူင်းဢၢၼ်းႁဝ်းယဝ်ႉ။
ၵွပ်ႈပိူဝ်ႈသင်ၶဢွၼ်ႁူဝ်သေ ၵူၼ်းဝၢၼ်ႈၵူၼ်းမိူင်း တုၵ်းယွၼ်း မႃးယဝ်ႉလႄႈ
မိူဝ်ႈပၢင်ၵုမ် 6 လိူၼ် ၼႂ်းလိူၼ်မေႊၼၼ်ႉ ႁဝ်းတႅပ်းတတ်းၼႂ်းပၢင်ၵုမ်၊
ဢွၵ်ႇၶေႃႈပိုၼ်ၽၢဝ်ႇဝႃႈ- ဢၼ်ၵူၼ်းမိူင်းတုၵ်းယွၼ်းမႃး
ႁႂ်ႈသွင်ပႃႇတီႇႁူမ်ႈၵၼ်၊ တပ်ႉသိုၵ်းႁူမ်ႈၵၼ်ၼၼ်ႉ ႁဝ်းတေၶတ်းၸႂ်။
ၵေႃပွင်ၵၢၼ် ၽွမ်ႉႁူမ်ႈၸိုင်ႈတႆး (CSSU) တေၶတ်းၸႂ်ႁဵတ်းၸွမ်းၼင်ႇ
ပေႃႈမႄႈၵူၼ်းမိူင်းတုၵ်းယွၼ်းမႃး။ ၵွပ်ႈၼႆ ပေႃးႁဝ်းၸႅၵ်ဝႆႉ ၶၼ်ႈတွၼ်ႈမၼ်းသေ
ႁဵတ်းတႄႉ တိုၼ်းဢမ်ႇသၢၼ်ၶတ်း။
ပေႃးဝႃႈ ဢၼ်ႁဝ်းၶႂ်ႈႁဵတ်းၼၼ်ႉ
ႁဝ်းတေဢမ်ႇၸၢင်ႈႁဵတ်းၸွမ်း၊ ဢၼ်ႁဝ်းႁဵတ်းပဵၼ်လႆႈၼၼ်ႉၵူၺ်း ႁဝ်းတေႁဵတ်း
ၸွမ်းၼႆတႄႉမၼ်းသၢၼ်ၶတ်း။ ၵူၺ်းၵႃႈ ဢၼ်ႁဝ်းႁဵတ်းယူႇမိူဝ်ႈလဵဝ်တႄႉ ပဵၼ်ဢၼ်
တင်း သွင်ပႃႇတီႇ၊ တင်းသွင် တပ်ႉသိုၵ်း
တင်းတၢင်ႇမူႇတၢင်းၸုမ်းႁူမ်ႈႁဵတ်းလႆႈ။ ဢၼ်ႁဝ်းၶႂ်ႈႁဵတ်း
ဢၼ်ႁဝ်းၶႂ်ႈပဵၼ်ၼၼ်ႉ မၼ်းပဵၼ်တၢင်းယိူင်း ဢၢၼ်း (aim) ႁဝ်းလႄႈ (CSSU)
ႁဝ်းၵေႃႈ တေၶတ်းၸႂ်ႁဵတ်းၸွမ်းၼင်ႇ ပေႃႈမႄႈၵူၼ်းမိူင်းတုၵ်းယွၼ်းဝႆႉၼၼ်ႉယူႇ၊
ၵူၺ်းၵႃႈ မၼ်းတေပဵၼ်ၶၼ်ႈ 2 ၊ ဢမ်ႇၸႂ်ႈၶၼ်ႈ 1 ။
(ၶႅၼ်းတေႃႈပႂ်ႉသိုပ်ႇဢၢၼ်ႇထႅင်ႈ တွၼ်ႈ 2)
Tags: Interview, Politic