ဝၼ်းတီႈ 26/06/2014 တပ်ႉသိုၵ်းလူင်ပွင်ၸိုင်ႈမၢၼ်ႈ ပႃႈတႂ်ႈတိူင်းသိုၵ်းဝၼ်းဢွၵ်ႇၵၢင် (ယလၶ) ၶူဝ်လမ်၊ တပ်ႉၶလယ 247 ဢၼ်ပၵ်းတီႈၼမ်ႉၸၢင်၊ ၸဝ်ႈႁၢၼ်မဵဝ်းမိၼ်ႉ ဢွၼ်ႁူဝ် ႁႅင်းသိုၵ်းမွၵ်ႈ 200 ပၢႆ ၵႂႃႇလေႃႇတိုၵ်း တပ်ႉသိုၵ်းၸိုင်ႈတႆး (SSPP/SSA) ဢၼ်ပၵ်းပႂ်ႉဢဝ်ႁူမ်ႇလူမ်ႈတီႈၶူဝ် တႃႈၽႃသွင်ႇ ၼႂ်းၸႄႈဝဵင်းၵေးသီး ၸိုင်ႈတႆး ပွတ်းၸၢၼ်း။

ၾၢႆႇၼိုင်ႈၵေႃႈ တပ်ႉသိုၵ်းၸိုင်ႈတႆး လႆႈႁႅၼ်းသိုၵ်းသေ ၶိုၼ်းၵႂႃႇလေႃႇတိုၵ်း တပ်ႉပၢင်သဝ်းၸူဝ်ႈၶၢဝ်း ၶွင်သိုၵ်းမၢၼ်ႈ ဢၼ်ပၵ်းယူႇတီႈဝၢၼ်ႈၵၢတ်ႈ၊ သွင်ၾၢႆႇလႆႈပဵၼ်ပၢင်တိုၵ်းၵၼ် ၼႂ်းထုင်ႉၼၼ်ႉႁၢဝ်ႈႁၢဝ်ႈႁႅင်းႁႅင်း၊ မိူဝ်ႈဝႃးၼႆႉ တႄႇ ပဵၼ်ပၢင်တိုၵ်းၸဵမ်မိူဝ်ႈ 2 မူင်းဝၢႆးဝၼ်း တေႃႇထိုင်ၵၢင်ၶမ်ႈ 6 မူင်း ၵေႃႈ တိုၵ်ႉယိုဝ်းၵၼ်ႁၢဝ်ႈႁႅင်းယူႇ၊ မိူဝ်ႈၼႆႉၵေႃႈ သွင်ၾၢႆႇတိုၵ်ႉၶဵင်ႈၶႅင်ၵၢၼ်သိုၵ်းတေႃႇၵၼ်ဝႆႉယူႇ- ၽူႈမီးၸၼ်ႉတီႈ ငဝ်ႈလုမ်း SSPP/SSA လၢတ်ႈ။

ၵဵဝ်ႇၵပ်းလွင်ႈၼႆႉ ၽူႈမီးၸၼ်ႉ ဢၼ်ႁွတ်ႈတီႈၼႃႈသိုၵ်းၵေႃႉၼိုင်ႈ  ၵေႃႈလၢတ်ႈဝႃႈ- သိုၵ်းမၢၼ်ႈ ယူႇၼႂ်းဝၢၼ်ႈ၊ ဢဝ်ႁိူၼ်းၵူၼ်းဝၢၼ်ႈႁဵတ်းႁူဝ်ႉသေ ယိုဝ်းၵွင်ႈလူင်သႂ်ႇတီႈတပ်ႉပၢင်သဝ်းတႃႈၽႃသွင်ႇ၊ ႁဵတ်းႁႂ်ႈႁဝ်းၶႃႈ ဢမ်ႇၸၢင်ႈ ယိုဝ်းတုမ်ႉတွပ်ႇၶိုၼ်း။ ၵွပ်ႈၼၼ် သိုၵ်းႁဝ်းဢၼ်မႃးထႅမ်ႁႅင်း တပ်ႉႁဝ်းၶႃႈၼၼ်ႉၵေႃႈ လႆႈၵႂႃႇလူမ်ႇတပ်ႉၶဝ် တီႈဝၢၼ်ႈၵၢတ်ႈ။ ၾၢႆႇၼိုင်ႈၵေႃႈ လႆႈငိၼ်းဝႃႈသိုၵ်းမၢၼ်ႈ ထႅမ်ႁႅင်းသိုၵ်းမႃးထႅင်ႈ တၢင်းဝၢၼ်ႈၵၢတ်ႈ တႃႇရူတ်ႉၵႃးသိုၵ်း 12 လမ်း၊ ၵွပ်ႈၼၼ်လႄႈ ပၢင်တိုၵ်းတေၸၢင်ႈယိုတ်ႈယၢဝ်းထႅင်ႈယူႇ- ဝႃႈၼႆ။

ၼွၵ်ႈသေၼၼ်ႉ သိုၵ်းမၢၼ်ႈဢၼ်ထႅမ်ႁႅင်းသိုၵ်း လုၵ်ႉတၢင်းၵေးသီး ၵႂႃႇတၢင်းၼွင်ၵႃး၊ ပၢင်ႇၸေႈ၊ လွႆယွႆး၊ ၼမ်ႉပုၵ်း ၸိူဝ်းၼႆႉၵေႃႈ တင်းတပ်ႉသိုၵ်းၸိုင်ႈတႆး SSPP/SSA လႆႈယိုဝ်းၵၼ်လၢႆလၢႆတီႈ။

မီးၶၢဝ်ႇဢၼ်ပႆႇယိုၼ်ယၼ် လၢတ်ႈဝႃႈ- တပ်ႉသိုၵ်းၸိုင်ႈတႆး SSPP/SSA  ႁုပ်ႈယိုတ်းလႆႈတပ်ႉပၢင်သဝ်း ၶွင်သိုၵ်းမၢၼ်ႈ ဢၼ်ပၵ်းတီႈဝၢၼ်ႈၵၢတ်ႈၼၼ်ႉယဝ်ႉ- ဝႃႈၼႆ။

ၼႂ်းတူင်ႇဝူင်း ၵူၼ်းၸမ်ၸႂ်ၽူႈမီးၸၼ်ႉသိုၵ်းမၢၼ်ႈၵေႃႉၼိုင်ႈလၢတ်ႈဝႃႈ- တပ်ႉသိုၵ်းၸိုင်ႈတႆး SSPP/SSA ၼႆႉ ဢမ်ႇႁဵတ်းၸွမ်းၶေႃႈတူၵ်းလူင်း၊ ထႅမ်ႁႅင်းသိုၵ်းသိုဝ်ႉမၢၵ်ႇၵွင်ႈၸိုၼ်းယၢမ်း၊ ၶႂၢၵ်ႈပၵ်းတပ်ႉမႂ်ႇၸိူဝ်းၼႆႉ။ ၵွပ်ႈၼၼ် ၾၢႆႇသိုၵ်းမၢၼ်ႈလႆႈတႅမ်ႈလိၵ်ႈတၢင်ႇထိုင် လူင်ပွင်ၸိုင်ႈၼေႇပျီႇတေႃႇ၊ ပိူဝ်ႈတႃႇႁႃတၢင်းၽိတ်း SSPP/SSA ဝႆႉ။ ယွၼ်ႉၼၼ်ႉ သိုၵ်းမၢၼ်ႈၸင်ႇလႆႈမႃးလေႃႇတိုၵ်း SSPP/SSA - ဝႃႈၼႆ။

ၶူဝ်တႃႈၽႃသွင်ႇၼႆႉ မီးၼႂ်းၸႄႈဝဵင်းၵေးသီး ၸိုင်ႈတႆးပွတ်းၸၢၼ်း။ ပိူဝ်ႈတႃႇၼမ်ႉတွၼ်းၽွၼ်းလီ ၵူၼ်းဝၢၼ်ႈ ၵူၼ်းမိူင်းႄလႈ  တပ်ႉသိုၵ်းၸိုင်ႈတႆး SSPP/SSA ႁဵတ်းသၢင်ႈဝႆႉ။ ထိုင်မႃးၼႂ်းပီ 2009 တပ်ႉသိုၵ်းမၢၼ်ႈ တဵၵ်းၸႂ်ႉ ႁႂ်ႈတပ်ႉသိုၵ်းၸိုင်ႈတႆး (SSPP/SSA) လႅၵ်ႈလၢႆႈႁဵတ်းပီႇတုၸိတ်ႉ၊ ၾၢႆႇတပ်ႉ SSPP/SSA ဢမ်ႇႁပ်ႉႄလႈ လႆႈပဵၼ် ပၢင်တိုၵ်းၵၼ်၊ ထိုင်မႃးပီ 2011 သိုၵ်းမၢၼ်ႈ ၶလယ 22 တင်းၶလယ 286 ပႃႈတႂ်ႈငဝ်ႈငုၼ်းၵုမ်းၵမ်ၽႅၼ်ၵၢၼ်သိုၵ်း (ၸၵၶ) 2 မိူင်းၼွင် ၵႂႃႇယိုဝ်း SSPP/SSA  တီႈတႃႈၽႃသွင်ႇ သေ ပွႆႇမၢၵ်ႇသႂ်ႇၶူဝ်၊ ၽဝ်ပႅတ်ႈၶူဝ်တႃႈၽႃသွင်ႇ၊ တတ်းၶၢတ်ႇပႅတ်ႈသဵၼ်ႈတၢင်းၵႂႃႇမႃးၵူၼ်းဝၢၼ်ႈၵူၼ်းမိူင်း။ ထိုင်မႃးႁူဝ်ပီ 2012  SSPP/SSA တင်းလူင်ပွင်ၸိုင်ႈမၢၼ်ႈ တူၵ်းလူင်းၵိုတ်းတိုၵ်းၵၼ် ၵေႃႇသၢင်ႈလွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ်ယဝ်ႉ သိုၵ်းမၢၼ်ႈၵေႃႈထွၼ်ဢွၵ်ႇ ၼႂ်းပိုၼ်ႉတီႈ။ ထိုင်မႃးၼႂ်းပီ 2013 SSPP/SSA  လႆႈၶိုၼ်းသၢင်ႈၶူဝ်မႂ်ႇ သိုပ်ႇၸႂ်ႉၵၢၼ်မႃး။

မိူဝ်ႈလဵဝ်ၼႆႉ သိုၵ်းမၢၼ်ႈသမ်ႉမႃးလေႃႇတိုၵ်းထႅင်ႈၼႆ မၢင်ၽဝ်ႇၵေႃႈတၢင်းသဵၼ်ႈၼႆႉ မၼ်းၶဝ်ႈပၢႆးတိုၵ်း (ပိဝ်ႇႁႃႇ) ၶွင်သိုၵ်းမၢၼ်ႈလႄႈ သိုၵ်းမၢၼ်ႈၶႂ်ႈယႃႉပႅတ်ႈႁိုဝ်။ ၵွပ်ႈၼၼ် သိုၵ်းမၢၼ်ႈဢၢၼ်းၽဝ်ပႅတ်ႈထႅင်ႈႁိုဝ်ၵေႃႈဢမ်ႇႁူႉ- ၵမ်ႈၽွင်ႈ ထတ်းသၢင်ၵၼ်ၼင်ႇၼႆ။