ဢမ်ႇဝႃႈ လွင်ႈသင် ဢီႈသင် ၽွမ်ႉၵၼ်ၼႆႉမၼ်းလီ ဢမ်ႇၽွမ်ႉၵၼ်ၼႆႉတိုၼ်းယူႇၾၢႆႇၵၢၼ်ႉပုၼ်ႈ ဢၼ်ဝႃႈၼၼ်ႉ လုၵ်ႈဢွၼ်ႇဢူမ်မိုဝ်းၵေႃႈႁူႉ။ သင်ဝႃႈၼႂ်းၵၢင်ၸႂ်တႆးႁဝ်းၵူႈၵေႃႉ ၶႂ်ႈလႆႈလွင်ႈၽွမ်ႉႁူမ်ႈႄတႉၸိုင် ပေႃးပဵၼ်ၵၢၼ်တႃႇ ၸိူဝ်ႉၸၢတ်ႈဝၢၼ်ႈမိူင်း ႁဝ်းၼင်ႇၵၼ်ထုၵ်ႇလႆႈ “ယွမ်း ယွမ်း ယွမ်း” ပၼ်ၵၼ်သေ ၸွႆႈဝူၼ်ႉၸွႆႈသၢင်ႈ ၵႂၢမ်းၶဝ်ႈၸႂ် လူၺ်ႈႁဵတ်ႇၽူလ်ၵၼ်ၵူႈၾၢႆႇၾၢႆႇ။ ဢမ်ႇၵွမ်ႉၵႃႈ ႁူဝ်ၼႃႈ ႁိုဝ် ၽူႈၼမ်း ၸိူဝ်းပဵၼ်ၽူႈယႂ်ႇၵူၼ်းလူင်ၵူၺ်း လုၵ်ႈၼွင်ႉၵေႃႈ ဢမ်ႇလီသွတ်ႇၸိမ်လၢတ်ႈၵႂၢမ်း ၶတ်းႁူ၊ ၵႂၢမ်းဢမ်ႇထုၵ်ႇၸႂ်၊ ၶေႃႈၵႂၢမ်းပူၼ်ႉပႅၼ် ၵႂၢမ်းမႅၼ်ပႅၼ်သုင် ဢိၵ်ႇတင်း ၵႂၢမ်းႄသႉၵႂၢမ်းၼႄးၾၢႆႇပုၼ်ႉၾၢႆႇၼႆႉ ဢမ်ႇလီပဵၼ်တႅမ်လဵၵ်းလူင်မႃးၸိမ်တွၵ်ႇ ႁွႆးၸတ်ႉ ႁွႆႈငၢၵ်ႈ မႄႇၶႂၢၵ်ႈ ဢၼ်မီး ဢၼ်ပဵၼ် ႁႂ်ႈမၼ်းၵႂၢင်ႈယႂ်ႇငၢၵ်ႈၽၢတ်ႇႄၽၵၼ်။ လိူဝ်သေၼၼ်ႉ ၵူၼ်းမိူင်းၵေႃႈ ဢမ်ႇထုၵ်ႇလီဢုပ်ႇသႄႉ လွင်ႈလႆၸွမ်း ၵႂၢမ်းၵေႃႉမႃးဢုပ်ႇမႃးၶႆႈ လွင်ႈဢမ်ႇလီ၊ လွင်ႈယုပ်ႈယွမ်း ႁိုဝ် ဢမ်ႇဝႃႈ သုၼ်ႇတူဝ် သုၼ်ႇၸုမ်း သုၼ်ႇတင်းၼမ် ဢၼ်တေၸၢင်ႈပဵၼ်လွင်ႈတႅၵ်ႇၸတ်ႈပႅင်းၸင်း။ ပိူင်လူင်မၼ်းၸုမ်းတူင်ႇဝူင်းၵူၼ်း ႁိုဝ် ၽူႈၸိူဝ်းတူင်ႉၼိုင် ႁဵတ်းၵၢၼ်တႃႇသုၼ်ႇပုၼ်ႈၵူၼ်းၼမ်တင်းလၢႆ ၶႅၼ်းထုၵ်ႇလႆႈမီးၸႂ်ပၢင်ႇၸိုၼ်ႈၶၢဝ်သႂ် ဢမ်ႇထုၵ်ႇလီ လႅၼ်ႈလႆလွင်ႈ ၸွမ်းၸႂ် ၸွမ်းႁွႆး ၸွမ်းၵႂၢမ်းၽူႈၶႂ်ႈတမ်သႄႇ မႄႇလိူင်ႈ။

ၵၢၼ်ၽွမ်ႉႁူမ်ႈၼႆႉ တၵ်းဢမ်ႇဢဝ်မႆႉထတ်းမႃးတႅၵ်ႈတတ်းၼၢင် မၵ်းႁူဝ် မၢၵ်းႁၢင် မၵ်းၵၢင်မၼ်းသေ ဢမ်ႇပၼ်လိူဝ် ပၼ်ယွမ်း၊ ဢမ်ႇဝၢင်းလၵ်းပၵ်းၼႅၼ်ႈၶၢတ်ႈႁူဝ်ႉလွမ်ႉၵႅတ်ႇပိူင်တၢႆ၊ ဢမ်ႇဢဝ်တၢင်းထုၵ်ႇၸႂ်ၾၢႆႇလႂ် ၾၢႆႇၼိုင်ႈ ႁိုဝ် တၢင်းယၢမ်ႈဢၼ်တိုဝ်းၵမ် မႃးပဵၼ်ပိူင်တၢႆ။ မိူၼ်ၼင်ႇ မၢဝ်ႇသၢဝ် တေသွၼ်ႉမိင်ႈၵူပ်ႉၵူႈၵၼ်ၼၼ်ႉ ပေႃးတေ ဢဝ်ၶေႃႈႁၢမ်ႈ တၵ်းဢမ်ႇလႆႈဢႅဝ်ႇၵၢင်ၶမ်ႈၵၢင်ၶိုၼ်း ဢမ်ႇလႆႈၵိၼ်လဝ်ႈၵိၼ်ပႅင်ႈ ဢမ်ႇလႆႈႁဵတ်းၼၼ် ႁဵတ်းၼႆ ဢမ်ႇလႆႈၵႂႃႇၶမ်ႈမႃးလိုၵ်း၊ ဢွၵ်ႇၶေႃႈၸီႉသင်ႇ တၵ်းတေလႆႈႁဵတ်းၼၼ် ႁဵတ်းၼႆ  ဢဝ်တၢင်းယၢမ်ႈဢၼ်တိုဝ်းၵမ် ႁင်းၽႂ် ႁင်းမၼ်း မႃးဝၢင်းပဵၼ်ပၵ်းပဵၼ်ပိူင်ၸိုင် တင်းမၢဝ်ႇတင်းသၢဝ် ပႆႇတၼ်းၵူပ်ႉၵူႈပဵၼ်ၼႃႈႁိူၼ်းၵေႃႈ ပေႃးပဵၼ် မၢဝ်ႇႁၢင်ႉ သၢဝ်ႁၢင်ႉ ၸဵမ်ပိုင်းယဝ်ႉ၊ ၵၢၼ်ၽွမ်ႉႁူမ်ႈႁဝ်းၵေႃႈ ႁၢင်ႉၵၢတ်ႈမႃးမိူၼ်ၼႆတေႃႇႁၢၼ်ႉၼႆႉ။ တႃႇတေ ႁႂ်ႈၶၢမ်ႈပူၼ်ႉၸၼ်ႉၼႆႉလႆႈၼၼ်ႉ တၵ်းထုၵ်ႇလႆႈဝႆႉပႅတ်ႈလွင်ႈတၢင်းတိုဝ်းၵမ် (ၵူတ်းပိူင်) ၸဝ်ႈၵဝ်ႇ ႁင်းၽႂ်ႁင်းမၼ်း သေလူးၵွၼ်ႇ။ မိူဝ်ႈလႂ်ပဵၼ်ၼႃႈႁိူၼ်းၸွမ်းၵၼ်ယဝ်ႉ ၸင်ႇမႃးႁူမ်ႈၵၼ်ဝၢင်းပၵ်းပိူင် ဢၼ်မႅၼ်ႈၸွမ်းငဝ်းလၢႆး ယၢမ်းလဵဝ် ႄလႈ တေသၢင်ႇထုၵ်ႇထုၵ်ႇၸွမ်းသၢႆငၢႆမိူဝ်းၼႃႈၼၼ်ႉၵွၼ်ႇ ၼႃႈႁိူၼ်းတေမူၼ်းလႆႈ။

ၵၢၼ်ႁူမ်ႈႁွမ်းၵၼ်ၵေႃႈ ၵေႃႉၼိုင်ႈလႄႈၵေႃႉၼိုင်ႈ ၸုမ်းၼိုင်ႈလႄႈၸုမ်းၼိုင်ႈ ပေႃးတေဢဝ်လၵ်းၼမ်း(ပေႃႇလသီႇ) ၶွင်ၽႂ်ၶွင်မၼ်းမႃးဝၢင်းပဵၼ်လၵ်းၵေႃႈ တိုၼ်းပဵၼ်ပၼ်ႁႃ ဢၼ်ဢမ်ႇယွမ်းႁပ်ႉၵၼ်လႆႈတင်ႈတႄႇႁႅၵ်ႈႁူဝ်တီးၵမ်းလဵဝ် ယဝ်ႉ။ ၾၢႆႇၼိုင်ႈဝႃႈ မိူင်းႁူမ်ႈတုမ် 14 ၸႄႈမိူင်း၊ ၾၢႆႇၼိုင်ႈဝႃႈ 8 ၸႄႈမိူင်း၊ ၾၢႆႇၼိုင်ႈဝႃႈ ၶႂ်ႈႁႂ်ႈႁဝ်းယူႇတႂ်ႈမၼ်း၊ ၾၢႆႇပုၼ်ႉၾၢႆႇၼႆႉ ၶႂ်ႈပဵၼ်ၾၢႆႇပေႉပုၼ်ႈ၊ ၾၢႆႇၼိုင်ႈဝႃႈ တေၶဝ်ႈလွၵ်းႁၢင်ႈၵၢင်ႁႅဝ်ႉ ၾၢႆႇလႂ်ၾၢႆႇလႂ်ၾၢႆႇၼိုင်ႈ ၸိူဝ်းၼႆႉ လၢတ်ႈဢဝ်ႁင်းၽႂ် ထၢင်ႇဢဝ်ႁင်းမၼ်း၊ ၵဝ်ဢမ်ႇႁပ်ႉပိူင်မႂ်း မႂ်းဢမ်ႇႁပ်ႉလၵ်းၵဝ် ၸိူဝ်းၼႆႉ ၸင်ႇဝႃႈ ၵၢၼ်ၽွမ်ႉႁူမ်ႈ တႆး ပဵၼ်မၼ်မႃး ၸိူင်ႉၵၢတ်ႈမႃး လၢႆသိုပ်ႇၸူဝ်ႈၵူၼ်း ၵႃၼႄးၵဝ်ႉ ၵဝ်ႉၼႄးၵႃ။

ၵၢၼ်ၸိူဝ်းၼႆႉ ဢမ်ႇၸႂ်ႈ ၶႂ်ႈႁႂ်ႈပႃႇတီႇၵၢၼ်မိူင်းၶွင်တႆး ႄလႈ ၸုမ်းသိုၵ်းတႆးၽွမ်ႉႁူမ်ႈၵၼ်လၢႆလၢႆၵူၺ်း ၵူၼ်းမိူင်းတႆး ၵူႈၵေႃႉၵေႃႈ မီးသုၼ်ႇ မီးပုၼ်ႈၽွၼ်းၼၵ်းၼၵ်းၼႃၼႃၼင်ႇၵၼ်ၵူႈၵေႃႉ။ လိူဝ်သေ ဢမ်ႇၸွမ်းၾၢႆႇ ၸွမ်းသႄႉၼႄး ၶႃႉၸိုဝ်ႈၶၢႆသဵင်လွင်ႈဢမ်ႇလီၾၢႆႇလႂ်ၾၢႆႇၼိုင်ႈယဝ်ႉ ယင်းထုၵ်ႇလႆႈပၼ်ႁႅင်းၵမ်ႉၸွႆႈလွင်ႈႁဵတ်းသၢင်ႈတၢင်းလီၶွင်ၶဝ်၊ ၸွႆႈၵၢၼ်ၸွႆႈႁႅင်း သူပ်းတူဝ်ႁူဝ်ၸႂ်ငိုၼ်းတွင်း ၼူၵ်ႉၸွၵ်ႇပေႉၶႃးဢဝ်ၶႃး ၸၢင်ႉငႃးပေႉတုမ်ဢဝ်တုမ်။ တၢင်းၾၢႆႇပႃႇတီႇ ၵၢၼ်မိူင်း ၾၢႆႇသိုၵ်းၵေႃႈၼင်ႇၼၼ် တၵ်းမုင်းႁၼ်ၵူၼ်းမိူင်းမိူၼ်ပေႃႈမိူၼ်မႄႈ (ၼင်ႇၵႂၢမ်းဢၼ်ၵႆႉလၢတ်ႈၸပ်းသူပ်း ၸပ်းပၢၵ်ႇဝႃႈ - ပေႃႈမႄႈၵူၼ်းမိူင်း) ၼႆၼၼ်ႉသေ ၸွႆႈႄၵႈပၼ်ႁႃ ၼၵ်းၼႃၵူႈၸိူဝ်ႉၵူႈပိူင်၊ သၢင်ႈလွင်ႈယုမ်ႇယမ် ၸမ်ၸႂ် (ဢမ်ႇၸႂ်ႈ ၵူၼ်းမိူင်းႁၼ်သိုၵ်းမိူဝ်ႈလႂ်ၵေႃႈ တေမႃးၵဵပ်းၶဝ်ႈၵဵပ်းငိုၼ်း တေမႃးတဵၵ်းၸႂ်ႉႁႅင်းၵၢၼ်၊ ႁၼ်ၵူၼ်း ပႃႇတီႇၵၢၼ်မိူင်းေၵႃႈ တေမႃးၸႂ်ႉႁဝ်းႁဵတ်းၼၼ် ႁဵတ်းၼႆ) ၸိူဝ်းၼႆႉ။

တေႃႈဢမ်ႇသင် ပႃႇတီႇၵၢၼ်မိူင်းၶွင်ႁဝ်း သိုၵ်းတႆးႁဝ်း ယင်းဝႆႉၸႂ် သၢင်ႈလွင်ႈယုမ်ႇယမ် တင်းလူင်ပွင်ၸိုင်ႈမၢၼ်ႈ ပိူဝ်ႈတႃႇလႆႈလွင်ႈငမ်းယဵၼ် ပိူဝ်ႈတႃႇၻီႇမွၵ်းၶရေႊသီႊႄလႈမိူင်းႁူမ်ႈတုမ် ဢၼ်တိုၵ်ႉၼွၼ်းၾၼ်လူမ်းလူမ်း လႅင်ႉလႅင်ႉ။ ၵူၺ်းၵႃႈ ပဵၼ်ဢမ်ႇပဵၼ် လႆႈဢမ်ႇလႆႈၼၼ်ႉ ၶဝ်ၸဝ်ႈႁူႉလီႁင်းၽႂ်ႁင်းမၼ်းယူႇ။ ၸိူင်ႉႁိုဝ်ၵေႃႈလီ တွၼ်ႈတႃႇတႆးႁဝ်း ၼင်ႇၵၼ်ႄတႉ တၵ်းတေဢမ်ႇလိူဝ်ဝႃႇၵႂႃႇႁႅင်း ဢမ်ႇယၢပ်ႇယဵၼ်းပဵင်းၵၢၼ်ဢၼ်ႁဝ်းတင်းပိူၼ်ႈ ဢုပ်ႇၵၼ်ယူဝ်ႉ  ယုမ်ႇယမ်ၼင်ႇၼႆ။

ပိူင်လူင်မၼ်း တႆးႁဝ်းၵူႈၵေႃႉ ဢွၼ်ၵၼ်ပူတ်းထွတ်ႇလွၼ်ႉပႅတ်ႈ တေႃးသ မေႃးႁ လေႃးၽ မႃႇၼ ဢတ်းတ ႄလႈ မီး သတိ ဝိရိယ ပၺ်ၺႃ ၵတိ သိုဝ်ႈသႂ် ၸႂ်ၵႂၢင်ႈ ႄတႉႄတႉၼၼ်ႉၵူၺ်း။

  

မွၼ်းၶိူဝ်း
27/06/2014