ဝၼ်းတီႈ 26/06/2014 (မိူဝ်ႈဝႃး) ယၢမ်းပွတ်းၼႂ်၊  ပိူဝ်ႈတႃႇမၢႆတွင်း ဝၼ်းသၢၼ်ၶတ်းယႃႈမဝ်းၵမ်ၵူႈၸိုင်ႈမိူင်း (International Day Against Drug Abuse and Illicit Trafficking 26 June)သေ တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSA) ၼႃႈလိၼ်သိုၵ်း 171 ပွတ်းၸၢၼ်း၊ ႁဵတ်းပၢင်ၽဝ်ယႃႈမဝ်းၵမ် တီႈႁူၺ်ႈဢေႃႈ၊ ၼႂ်းၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇ။

ယႃႈမဝ်းၵမ်ၸိူဝ်းဢၼ်ၽဝ်ၵႂႃႇတီႈ ပၢင်ၽဝ်ယႃႈၵမ်းၼႆႉ ယႃႈမႃႉ 5,520,205 မဵတ်ႉ၊ ယႃႈၾိၼ်ႇၽိူၵ်ႇ 56 ၵီးလူဝ်း။ ယႃႈဢႆႊသ် 24 ၵီးလူဝ်း၊ ယႃႈၾိၼ်ႇလမ် 63 ၵီးလူဝ်း။ ၼွၵ်ႈသေၼၼ်ႉ ၼမ်ႉယႃႈၶေးမီး သၢၼ်တင်ႈတူၼ်ႈၸိူဝ်းၼႆႉ မီးထႅင်ႈတင်းၼမ်တင်းလၢႆ တင်းမူတ်းတႃႇ 12 မေႃႈၶၢင်လူင်။

ယႃႈမဝ်းၵမ်ၸိူဝ်းၼႆႉ ပဵၼ်ၸိူဝ်းဢၼ်ၸဝ်ႈၼႃႈတီႈဝႃႉတီႉလႆႈမႃး ၼႂ်းပီ 2014 ၼႆႉ။ ဢၼ်တီႉလႆႈ ၸွမ်းၵၼ်တင်းမူတ်း ၼၼ်ႉ ရူတ်ႉၵႃး 5 လမ်း၊ လူတ်ႉၶိူင်ႈ 44 လမ်း၊ ၸၢၵ်ႈလၢတ်ႈ 14 ၶိူင်ႈ၊ ၶိူင်ႈၾူၼ်း မိုဝ်းထိုဝ် 12 ၶိူင်ႈ၊ ၵူၼ်းၵႃႉၶၢႆယႃႈ 197 ၵေႃႉ၊ ၼႂ်းၼၼ်ႉ ပဵၼ်ၸၢႆး 188 ၊ ၽူႈယိင်း 9 ၵေႃႉ။ ၼွၵ်ႈသေၼၼ်ႉ ၵူၼ်းသူႇၵိၼ်ယႃႈ 470 ၵေႃႉ၊ ၼႂ်းၼၼ်ႉ ပႃးၼၢင်းယိင်း 26 ၵေႃႉ၊ (ၸၢႆး 444 ၵေႃႉ)- ၽူႈၵွၼ်းၼႃႈလိၼ်သိုၵ်း 171 ဝိူၺ်ႉသႅဝ်းယိၼ် လၢတ်ႈ။

ၽွင်းတႅၼ်းၸႄႈမိူင်း မိူင်းတူၼ် ၸၢႆးဝိၼ်းမျၢတ်ႉဢူး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ- ယူႇတီႈတူဝ်ၶႃႈသေ ၵႂႃႇၶဝ်ႈ ႁူမ်ႈၵမ်းလဵဝ်။ ၵူၼ်းမႃးၶဝ်ႈႁူမ်ႈပၢင်ၽဝ်ယႃႈမဝ်းၵမ် ၵမ်းၼႆႉ မီးပဵၼ်ႁူဝ်ႁဵင်၊ ၵႅမ်ၽူႈၵွၼ်း ၸႄႈတွၼ်ႈမိူင်းသၢတ်ႇ ၵေႃႈမႃး၊ ၽူႈမီးၸၼ်ႉၼႂ်း ၾၢႆႇၽွင်းငမ်းၼႂ်းၸႄႈဝဵင်းမိူင်းသၢတ်ႇ ၸႄႈဝဵင်းမိူင်းတူၼ် ၸိူဝ်းၼႆႉၵေႃႈမႃးၼမ်။ ဢၼ်လၢၵ်ႇလၢႆးတႄႉ ဢမ်ႇႁၼ်ၾၢႆႇတပ်ႉသိုၵ်းမၢၼ်ႈမႃးၶဝ်ႈႁူမ်ႈ။ လွင်ႈၼႆႉ ၶဝ်ဢမ်ႇဝွၵ်ႇထိုင်ႁိုဝ်တႄႉ ၵေႃႈဢမ်ႇႁူႉ။ ၼႂ်းထုင်ႉႁဝ်းၶႃႈယူႇၼႆႉ ယႃႈၾိၼ်ႇယႃႈမႃႉ မၼ်းလိူင်ႇၼမ်ႁႅင်းပူၼ်ႉတီႈ။ ၵွပ်ႈၼၼ် ၵၢၼ်တီႇၽဵဝ်ႈယႃႈမဝ်းၵမ်ၼႆႉ ဢမ်ႇထုၵ်ႇလီႁဵတ်းၾၢင်ႁၢင်ႈမၼ်းၵူၺ်း၊ ပႃးၸဵမ်ၸုမ်းယိပ်းၵွင်ႈၵၢင်ႇၸၢဝ်းၶိူဝ်း လႄႈ လူင်ပွင်ၸိုင်ႈ ထုၵ်ႇလႆႈသၢၼ် မိုဝ်းၵၼ်သေ တင်ႈၸႂ်ၵႂၢတ်ႇၽဵဝ်ႈႄတႉႄတႉ- ဝႃႈၼႆ။

ၵဵဝ်ႇၵပ်းလွင်ႈၼႆႉ ၽူႈၵွၼ်းၼႃႈလိၼ်သိုၵ်း 171 ဝိူၺ်ႉသႅဝ်းယိၼ် ၵေႃႈလၢတ်ႈဝႃႈ- ၼႂ်းပိုၼ်ႉတီႈ ဢၼ်ႁဝ်းၶႃႈ ၵုမ်းၵမ် တႄႉ ႁဝ်းၶႃႈတိုၼ်းတေတီႇၽဵဝ်ႈၵႂႃႇတိၵ်းတိၵ်းယဝ်ႉ။ ၵူၼ်းဢၼ်ၵဵဝ်ႇၶွင်ႈယႃႈမဝ်းၵမ်ၼႆႉ ၼႂ်းၼႃႈလိၼ်လူင်ပွင်ၸိုင်ႈ ၵုမ်းၵမ်တႄႉ ပေႃးဢမ်ႇလႆႈလွင်ႈႁူမ်ႈမိုဝ်းၶဝ်/ လႆႈဢၼုၺၢတ်ႈတီႈၶဝ် ဢမ်ႇၸၢင်ႈၵႂႃႇတီႇၽဵဝ်ႈ- ဝႃႈၼႆ။

ဝိူၺ်ႉသႅဝ်ႇယိၼ်ၼႆႉ ပဵၼ်ၼွင်ႉၸၢႆးဝိူၺ်ႉသႅဝ်ႇၵင်း (ဢၼ်တၢင်းထႆး သႂ်ႇဝႆႉၼႂ်းသဵၼ်ႈမၢႆဝႃႈပဵၼ်ႁေႃၶမ်း ယႃႈမဝ်းၵမ် ႄလႈ ပိုၼ်ၽၢဝ်ႇတင်ႈၵႃႈႁူဝ်ဝႆႉ)။ မိူဝ်ႈလဵဝ် ဝိူၺ်ႉသႅဝ်ႇၵင်း ပဵၼ်ၸၼ်ႉၽူႈၼမ်းဝႃႉသေ ယူႇသဝ်းဝႆႉတီႈ ပၢင်သၢင်း။

တီႈပၢင်ၽဝ်ယႃႈမဝ်းၵမ်ၼၼ်ႉ မီးၽူႈၵွၼ်းၼႃႈလိၼ်သိုၵ်း 171 ဝိူၺ်ႉသႅဝ်းယိၼ်၊ ၽူႈၵွၼ်းႁွင်ႈၵၢၼ် ၾၢႆႇၵၢၼ်မိူင်း (မၢႆ1)  ၸဝ်ႈဢၢႆႈၵေႃႇ၊ ၽူႈၵွၼ်းႁွင်ႈၵၢၼ်ၾၢႆႇၵၢၼ်မိူင်း (မၢႆ2)  ၸဝ်ႈၺီႈသေး၊ ၽူႈၵွၼ်း ၾၢႆႇၽႅၼ်ၵၢၼ်လၢႆးတိုၵ်း တႃႉမၢၼ်း၊ ၽူႈၼင်ႈလုမ်းသိုၵ်း ၼႂ်းပိုၼ်ႉတီႈ ဢႃးယင်ႇၵေႃး၊ ၽူႈၵွၼ်းႁွင်ႈၵၢၼ်လုမ်း 171 ဢႃးယူင်ႇၶၢႆႉ၊ ၽူႈၵွၼ်းႁွင်ႈၵၢၼ်ၾၢႆႇတီႇၽဵဝ်ႈယႃႈမဝ်းၵမ် ယၢင်ၵေႃႇၸူင်း ၸိူဝ်းၼႆႉ။