(သိုပ်ႇမႃးတွၼ်ႈ ဢွၼ်ၼႃႈၼႆႉ)။
မိူင်းႁူမ်ႈတုမ်ႁဝ်းဝၼ်းမိူဝ်ႈၼႆႉ ………… ဢၼ်ဝႃႈၸုမ်းလဵၵ်ႉၸုမ်းၼွႆႉၼႆႉ ဢမ်ႇၸႂ်ႈပၼ်ႁႃ၊ မၼ်းထုၵ်ႇလီ တူၺ်းဝႃႈ ၸွင်ႇမီးလွင်ႈၽဵင်ႇပဵင်း။ ပေႃးဢုပ်ႇတၢင်းၵၢၼ်မိူင်းၼႆႉ ၽႅၼ်ႇလိၼ်မိူင်းတႆးႁဝ်းၵေႃႈ ဢုပ်ႇတႃႇမိူင်းတႆး၊ မိူင်းၶၢင် ဢမ်ႇပႃးၵေႃႈဢမ်ႇပဵၼ်သင်။ ပေႃးဝႃႈမိူင်းၶၢင်ပႆႇပႃး ပႆႇဢုပ်ႇလႆႈၼႆၸိုင် ဢၼ်ၼႆႉ ပႆႇၸႂ်ႈၵၢၼ်မိူင်း။ မူႇႁဝ်းမီးဝႆႉ ၸိူင်ႉၼႆ ႁဝ်းတေဢုပ်ႇၸိူင်ႉၼႆၼႆႉ ႁဝ်းႁႂ်ႈၶဝ်ႁူႉ၊ ပေႃးၶဝ်ၶႂ်ႈၶဝ်ႈပႃးမႃးၵေႃႈလႆႈ၊ ဢမ်ႇၶႂ်ႈၶဝ်ႈပႃးၵေႃႈ ဢုပ်ႇႁင်းၵူၺ်း ၵေႃႈလႆႈ၊ မႃးႁၢမ်ႈႁဝ်းၵေႃႈဢမ်ႇလႆႈ။ တႆးၵေႃႈဢမ်ႇတၢင်တူဝ် မိူင်းၶၢင်လႆႈ၊ ၶၢင်ၵေႃႈဢမ်ႇတၢင်တူဝ်မိူင်းတႆးလႆႈ။

ထၢမ်- လွင်ႈတီႈလုမ်းၵဵင်းတုင်ၼႆႉ ၵူၼ်းၵဵင်းတုင်ၵေႃႈ တူၵ်းၸႂ်တူၵ်းၶေႃးၵၼ်ၼမ်၊ မီးၵူၼ်းထၢမ်ၼမ်ဝႃႈ မိူဝ်ႈလဵဝ် ပဵၼ်ႁိုဝ်ဝႆႉ၊ ပိူၼ်ႈတေဢိုတ်းပႅတ်ႈယဝ်ႉႁႃႉ၊ ႁဝ်းၵေႃႈ ဢမ်ႇပေႃးႁတ်းၵႂႃႇမႃး၊ လွင်ႈၼႆႉ သပ်းလႅင်းပၼ်ၽွင်ႈၶႃႈ။

တွပ်ႇ- ဢူးဢွင်ႇမိၼ်း မႃးႁူပ်ႉႁဝ်းၼႆႉ ပိူင်လူင်မၼ်းၵေႃႈ ပဵၼ်လွင်ႈၵဵင်းတုင်။ မၼ်းလၢတ်ႈဝႃႈ ဢမ်ႇၸႂ်ႈပေႃႇလသီႇ၊ ပဵၼ်ၵူၼ်းတၢင်းတႂ်ႈၵူၺ်း၊ မၼ်းၵေႃႈလၢတ်ႈဝႃႈ ၶႂ်ႈယွၼ်းၼွမ်းတူတ်ႈ(တွင်းပၢၼ်ႇ)။ ၵူၺ်းၵႃႈ ပဵၼ်ၸိူင်ႉႁိုဝ်ၵေႃႈလီ ၶႂ်ႈႁႂ်ႈၵူၼ်းမိူင်းႁဝ်းယုမ်ႇယမ်မၼ်ႈၸႂ်၊ ပၼ်ႁႃလဵၵ်ႉလဵၵ်ႉၼႆႉ ႁဝ်းဢမ်ႇၶႂ်ႈႁႂ်ႈမၼ်းယႂ်ႇ။ ဢၼ်ပဵၼ်တီႈၵဵင်းတုင်ၼႆႉ ပေႃးမႃးတူၺ်းလွင်ႈၽိတ်းၼႆႉ မၼ်းပဵၼ်ၾၢႆႇတပ်ႉသိုၵ်းမၢၼ်ႈၶဝ်၊ ၵွပ်ႈပိူဝ်ႈၶဝ် ဢမ်ႇမီးလွင်ႈၵပ်းသၢၼ်။ ၶဝ်ထၢင်ႇ ၽိတ်းထၢင်ႇပိူင်ႈ ၸိူင်ႉႁိုဝ်ၵေႃႈယဝ်ႉ တေလႆႈၵပ်းသၢၼ်ၵွၼ်ႇ၊ ၵွပ်ႈပိူဝ်ႈမၼ်းၶဝ်ႈတြႃးယဝ်ႉ။

တႃႇႁႂ်ႈမၼ်းပဵၼ်ၵႂႃႇထႅင်ႈတၢင်းၼႃႈၼၼ်ႉ ပွၵ်ႈၼႆႉမၼ်းပဵၼ်တွၼ်ႈသွၼ်ယဝ်ႉ၊ ၶဝ်ၵေႃႈတေဢမ်ႇႁဵတ်း။ သင်ဝႃႈၶဝ် ႁဵတ်းၶိုၼ်ႈမႃးၵေႃႈ ၶဝ်ဢမ်ႇသၢင်ႈလွင်ႈယုမ်ႇယမ်၊ ပေႃးၶဝ်ဢမ်ႇသၢင်ႈလွင်ႈယုမ်ႇယမ်ၵေႃႈ ပိူဝ်ႈတႃႇႁဵတ်းလွင်ႈ ငမ်းယဵၼ်ၸွမ်းၵၼ်ၵေႃႈ မၼ်းၵေႃႈဢမ်ႇပဵၼ်လႆႈ။ ၵွပ်ႈၼႆ မိူဝ်းၼႃႈၼႆႉ ၶႂ်ႈႁႂ်ႈၵူၼ်းမိူင်းႁဝ်းမၼ်ႈၸႂ်၊ ႁဝ်းထုၵ်ႇလီလႆႈ တိတ်းတၢမ်ၸွမ်းၶၢဝ်ႇ၊ ႁဝ်းၶႅၼ်းလီလႆႈၸမ်ၸႂ်ၵၼ် သၢင်ႈလွင်ႈယုမ်ႇယမ် ၵၼ်ထႅင်ႈ၊ ႁဝ်းၶႅၼ်းထုၵ်ႇၶဝ်ႈႁႃၵၼ်ထႅင်ႈ။ ပိူၼ်ႈဢဝ်မၢၵ်ႇႁိၼ်ပိုဝ်ႈမႃး ႁဝ်းတူၵ်းၸႂ်ၵေႃႈ မိူၼ်ၵူၼ်းၵူဝ်ၽဵတ်ႇၵူၺ်း၊ ပေႃးၵူဝ်ၽဵတ်ႇၵေႃႈ ထုၵ်ႇၶီႈပိူၼ်ႈ။

(ၶႅၼ်းတေႃႈပႂ်ႉသိုပ်ႇဢၢၼ်ႇထႅင်ႈ ၸဝ်ႈယွတ်ႈသိုၵ်း လၢတ်ႈတွၼ်ႈလိၵ်ႈလၢႆးတႆး)။ (ထၢမ်-တွပ်ႇ)