လွင်ႈၼႆႉ တူဝ်တႅၼ်းပႃႇတီႇၵၢၼ်မိူင်း ၸိုင်ႈမိူင်းႁူမ်ႈတုမ်မၢၼ်ႈ 4 ပႃႇတီႇ၊ ၻီႇမူဝ်ၶရႅတ်ႉတိၵ်ႉ ပႃႇတီႇၸၢဝ်းၶိူဝ်းတႆး (SNDP) ၊ တႅဝ်းႁူမ်ႈၻီႇမူဝ်ႇၶရႅတ်ႉတိၵ်ႉၸိူဝ်ႉၸၢတ်ႈ (NDF) ၊ ပႃႇတီႇ တၸၺ ၊ ငဝ်ႈငုၼ်းၻီႇမူဝ်ႇၶရေႇသီႇ ၸိူဝ်ႉၸၢတ်ႈရၶႅင်ႇၸိူဝ်းၼႆႉ ၼိုင်ႈပႃႇတီႇ 3 ၵေႃႉ၊ တင်းမူတ်း 12 ၵေႃႉ၊ ၵႂႃႇႁူပ်ႉၼၢင်း ရူႁူၺ်ႁႂႃ (Ms. Rua Huihua) ၵႅမ်ၽူႈၵွၼ်းႁွင်ႈၵၢၼ်ၾၢႆႇတိတ်းတေႃႇၼွၵ်ႈမိူင်း ပႃႇတီႇၶွမ်ႇမိဝ်ႇၼိတ်ႉ မိူင်းၶႄႇ တီႈဝဵင်းလူင်ပိူၺ်ႇၵျိင်း၊ ဝၼ်းတီႈ 23/06/2014 (မိူဝ်ႈဝႃး)။ ဢုပ်ႇၵၼ်လွင်ႈ ၸၢဝ်းၶိူဝ်းၵျိင်းၽေႃး ၼႂ်းမိူင်းၶၢင်၊ လွင်ႈၵၢၼ်မိူင်း၊ လွင်ႈၵၢၼ်လူင်းတိုၼ်း ၼႂ်းမိူင်းမၢၼ်ႈ ၸိူဝ်းၼႆႉ။

ၼႂ်းပႃႇတီႇသိူဝ်ၽိူၵ်ႇ (SNDP) 3 ၵေႃႉ ဢၼ်ၵႂႃႇပွၵ်ႈၵမ်းၼႆႉ ၽွင်းတႅၼ်းၵူၼ်းမိူင်း ၸၢႆးတိၼ်ႇဢူး၊ ၽွင်းတႅၼ်း ၸႄႈမိူင်း ၸၢႆးၵျေႃႇၸေႇယ၊ ႁူဝ်ၼႃႈပႃႇတီႇသိူဝ်ၽိူၵ်ႇ ပွတ်းဢွၵ်ႇၶူင်း မႄႈၶူး (သြႃႇမ) ၼၢင်းငူၺ်ႇမျႃႉ ။

ၵူၼ်းဝၢၼ်ႈၵူၼ်းမိူင်းႁဝ်း မႃးႁႃႁဵတ်းၵိၼ်ၵၢၼ်၊ ႁဵတ်းၵၢၼ်ၵႃႉၶၢႆ ပွတ်းၸႄႈၵဝ်ႇ- မူႇၸႄႈ လႅၼ်လိၼ်မိူင်းၶႄႇၸိူဝ်းၼႆႉ လႆႈထုၵ်ႇၸဝ်ႈၼႃႈတီႈၶႄႇ တီႉၺွပ်းၵႂႃႇ 600 ပၢႆ၊ မီးဝႂ်ၶၢမ်ႈလႅၼ်လိၼ်ယူႇၵေႃႈ ဢၢင်ႈတၢင်ႇလွင်ႈတၢင်ႇပိူင်သေ တီႉၺွပ်းတိၵ်းတိၵ်း၊ ၵွပ်ႈၼၼ်လႄႈ ႁႂ်ႈၵႄႈလိတ်ႈပၼ်-ပၼ်ႁႃလွင်ႈၼႆႉ။ ၵွပ်ႈလွင်ႈၼႆႉသေ ႁဵတ်းႁႂ်ႈၵူၼ်းတၢင်း မိူင်းမၢၼ်ႈ ဢမ်ႇႁတ်းၶဝ်ႈမိူင်းၶႄႇ ယွၼ်ႉၵူဝ်ႁႄယုပ်းၽၢၼ်ႈဢိၵ်ႇတင်းတုမ်ႉယွၼ်ႈၵၢၼ်မၢၵ်ႈမီး ဝူင်ႈၵၢင်သွင်မိူင်း ႁၢဝ်ႈႁႅင်း - ၸၢႆးၵျေႃႇၸေႇယ လၢတ်ႈၼႄၸုမ်းၶၢဝ်ႇ ၽူႈတွႆႇႁွၵ်ႈ။

တီႈပၢင်ဢုပ်ႇဢူဝ်းၵၼ်ၼၼ်ႉ ၼၢင်းရူႁူၺ်ႇႁႂႃ ၵေႃႈလၢတ်ႈဝႃႈ- ဢၼ်မႃးလႅၵ်ႈလၢႆႈတၢင်းႁူႉတၢင်းႁၼ်ၵၼ်ၼႆႉ ပဵၼ်ဢၼ်မီးၵႃႈၶၼ်။ တၢင်းလႅၼ်လိၼ်မိူင်းမၢၼ်ႈ-မိူင်းၶႄႇၼႆႉ တူဝ်ၵဝ်ၶႃႈၵေႃႈယူႇယူႇၵႆႉၵႂႃႇထိုင်ယူႇ၊ ၵူၺ်းၵႃႈ ပိူဝ်ႈတႃႇၵႄႈလိတ်ႈပၼ်ႁႃလွင်ႈၼႆႉ မၼ်းယူႇတီႈၸဝ်ႈၼႃႈတီႈ ဢၼ်မီးဢမ်းၼၢၸ်ႈ (ဢႃႇၼႃႇ)ၼႂ်းပိုၼ်ႉတီႈ။ ၸိူင်ႉႁိုဝ်ၵေႃႈလီ ႁဝ်းၶႃႈတေၵႂႃႇႁူပ်ႉထူပ်းၶဝ်သေ ဢုပ်ႇဢူဝ်းၵပ်းသၢၼ်ၵႄႈလိတ်ႈပၼ် ပၼ်ႁႃလွင်ႈၼႆႉ- ဝႃႈၼႆ။

မိူင်းမၢၼ်ႈၼႆႉ ဝၢႆးသေပိုတ်ႇၽၵ်းတူမိူင်းယဝ်ႉ မိူင်းဝၼ်းတူၵ်းၵေႃႈ ၽိုတ်ႉၶဝ်ႈမႃး၊ ပႃးၸဵမ်လွင်ႈၵၢၼ်ၵႃႉ ၵၢၼ်မိူင်း။  လွင်ႈၼႆႉမၼ်းတုမ်ႉယွၼ်ႈ ပဵၼ်ပၼ်ႁႃတေႃႇ ၵၢၼ်လူင်းတိုၼ်းၶွင်မိူင်းၶႄႇ/ ၸၢဝ်းၶိူဝ်းၶႄႇၼႂ်းမိူင်းမၢၼ်ႈ။ ၵွပ်ႈၼၼ် ယူႇတီႈမိူင်းမၢၼ်ႈသေ ဢမ်ႇၵိုင်ႇလီႁိူင်ႈၵိူင်းၸွမ်းၾၢႆႇလႂ်၊ ၵိုင်ႇလီဢဝ်ၼမ်ႉလိၼ်ႁိၼ်ၽႃ၊ လွင်ႈၾိင်ႈႄငႈႁိတ်ႈႁွႆး ၸဝ်ႈၵဝ်ႇပဵၼ်လၵ်းသေ ၵေႃႇသၢင်ႈဝၢၼ်ႈမိူင်းလူၺ်ႈလွၵ်းပိူင် ၻီႇမူဝ်ႇၶရေႇၸီႇၼၼ်ႉ လီသေပိူၼ်ႈ- ၼၢင်းရူႁူၺ်ႁႂႃ လၢတ်ႈ။

ၵူၺ်းၵႃႈ ၼႂ်းၽွင်းတႅၼ်းၶဝ် ၸိူဝ်းၵႂႃႇႁူပ်ႉထူပ်းမၼ်းၼၢင်း လၢတ်ႈဝႃႈ- ၵၢၼ်လူင်းတိုၼ်းၶွင်ၶႄႇ ဢၼ်မႃးလူင်းတိုၼ်း ၼႂ်းမိူင်းမၢၼ်ႈၼႆႉ ပေႃးၶႂ်ႈပဵၼ်ၵၢၼ်တႄႉ ဢမ်ႇလီဢဝ် ဢၼ်ၾၢႆႇလူင်ပွင်ၸိုင်ႈတေႃႇ လူင်ပွင်ၸိုင်ႈၼင်ႇၵၼ်ဝႃႈၵူၺ်း၊ လီထွမ်ႇပႃးသဵင်ၵၢင်ၸႂ်ၵူၼ်းမိူင်းၼႂ်းပိုၼ်ႉတီႈ ဢၼ်ၵဵဝ်ႇၶွင်ႈၵမ်းသိုဝ်ႈ၊ ပႃးၸဵမ်ပႃႇတီႇၶွင်ၸၢဝ်းၶိူဝ်းၸိူဝ်းၼႆႉ။ ၵႂၢမ်းၼႂ်း ဢူၵ်းၼႂ်းၸႂ်ၶဝ်မီးၸိူင်ႉႁိုဝ်ၸိူဝ်းၼႆႉ လီထွမ်ႇတူၺ်းသေ ႁဵတ်းသၢင်ႈၵႂႃႇၼႆတႄႉ တေသၢင်ႇထုၵ်ႇ- ဝႃႈၼႆ။

ဢၼ်ပႃႇတီႇၵၢၼ်မိူင်း 4 ပႃႇတီႇ၊ တူဝ်တႅၼ်း 12 ၵေႃႉ ဢွၵ်ႇၶၢဝ်းတၢင်းၵႂႃႇမိူင်းၶႄႇၵမ်းၼႆႉ ၵႂႃႇဢႅဝ်ႇယဵမ်ႈပႃး ၼႂ်းၸႄႈ မိူင်းယုၼ်ၼၼ်၊ ဝၢၼ်ႈၸၢဝ်းၶိူဝ်း တီႈယုၼ်ၼၼ်၊ ပိုၼ်ႉတီႈၼႃႈလိၼ်ဢၼ် မီးပီႈၼွင်ႉတႆး ယူႇသဝ်းၼမ်သေ ဢႅဝ်ႇယဵမ်ႈပႃးသူၼ်ၽုၵ်ႇၼဵင်ႈ၊ လဵပ်ႈႁဵၼ်းတူၺ်းလွင်ႈၶိုၼ်ႈယႂ်ႇမႂ်ႇသုင်ၼႂ်းမိူင်းၶႄႇ၊ လွင်ႈဝႃႈၶႄႇၶဝ်ႁဵတ်းႁိုဝ်ပူၵ်းပွင် ၵူၼ်းဝၢၼ်ႈၵူၼ်းမိူင်း ၸိူဝ်းၼႆႉ။ လႆႈဢွၵ်ႇၶၢဝ်းတၢင်းၵႂႃႇ တႄႇဝၼ်းတီႈ 16/06/2014 သေ တေသုတ်းသဵင်ႈၶၢဝ်းတၢင်း ဝၼ်းတီႈ 25/06/2014 ၼႆႉ ။ မိူဝ်ႈလဵဝ် တိုၵ်ႉႁွတ်ႈဝႆႉတီႈဝဵင်းလူင်ပိူၺ်ႇၵျိင်း။