ပိူဝ်ႈတႃႇၵိုတ်းယိုဝ်းတင်းၸိုင်ႈမိူင်းပတ်းပိုၼ်ႉၼၼ်ႉ ၸုမ်းၸၢဝ်းၶိူဝ်း NCCT တင်း ၾၢႆႇလူင်ပွင်ၸိုင်ႈ UPWC  တေၶိုၼ်းထူပ်းၵၼ်ၼႂ်းလိူၼ်မေႇ။

ၾၢႆႇဢုပ်ႇဢူဝ်းလွင်ႈငမ်းယဵၼ်ၶွင်လူင်ပွင်ၸိုင်ႈ လႃႉမွင်ႇသူၺ်ႇ ပိုတ်ႇလၢတ်ႈဝႃႈ - ပိူဝ်ႈတႃႇၸၢဝ်းၶိူဝ်း ၸုမ်းယိပ်းၵွင်ႈၵၢင်ႇ တၵ်းတေ လႆႈဢုပ်ႇဢူဝ်းပိၼ်ႇပႆႇၵၼ်။  ပိူဝ်ႈတႃႇၸၢဝ်းၶိူဝ်းၸုမ်းၸိူဝ်းယိပ်းၵွင်ႈၵၢင်ႇၶဝ် ၸုမ်းၼိုင်ႈလႄႈ ၸုမ်းၼိုင်ႈတၵ်းတေလႆႈဢုပ်ႇ ၵိူဝ်းၵုမ်ၵၼ်ၼၼ်ႉ ယင်းထုၵ်ႇလီႁဵတ်းပၢင်ၵုမ်ယူႇ NCCT လၢတ်ႈၼင်ႇၼႆ။ ၵွပ်ႈၼႆလႄႈ တႃႇၶိုၼ်းႁူပ်ႉထူပ်းဢုပ်ႇဢူဝ်းၵၼ်ၼၼ်ႉ ၸင်ႇလႆႈၶၢႆႉၵႂႃႇပဵၼ် မွၵ်ႈၼႂ်းၵၢင်လိူၼ်မေႇ - ဝႃႈၼႆ။

ၸၢဝ်းၶိူဝ်းၸုမ်းၸိူဝ်းယိပ်းၵွင်ႈၵၢင်ႇၶဝ် ႁူပ်ႉထူပ်းႁဵတ်းပၢင်ၵုမ်ၵၼ် မိူဝ်ႈဝၼ်းတီႈ 30 လိူၼ်ဢွၵ်ႉထူဝ်ႇၿိူဝ်ႇ ထိုင်ဝၼ်းတီႈ 2 လိူၼ်ၼူဝ်ႇဝႅမ်းၿိူဝ်ႇ ပီ 2013 တီႈငဝ်ႈငုၼ်းလၢႆၸႃႇပွၵ်ႈတီႈ 1 သေ ဝၼ်းတီႈ 20-25 လိူၼ်ၵျႅၼ်းၼိဝ်းရီး 2014 သမ်ႉ ၸတ်းႁဵတ်း ၵႂႃႇတီႈ လေႃၶီးလႃ ငဝ်ႈငုၼ်းတပ်ႉသိုၵ်းယၢင်း ပဵၼ်ပွၵ်ႈတီႈ 2 ။ 

လိူဝ်ၼၼ်ႉ ပေႃးထိုင်မႃးပွၵ်ႈတီႈ 3 ၸိုင် ႁႂ်ႈတပ်ႉသိုၵ်းမိူင်းဝႃႉၽွမ်ႉႁူမ်ႈ UWSA တင်းတပ်ႉသိုၵ်းဢူၺ်းလီ တီႇမူဝ်ႇၶရႅတ်ႉ ဝၼ်းဢွၵ်ႇၶူင်း မိူင်းလႃး NDAA-ESS ပေႃးတေၶဝ်ႈပႃးမႃးၼႆႄလႈ ၶေးတေၸၢင်းႁဵတ်းတီႈ ပွတ်းလႅၼ်လိၼ် မိူင်းၶႄႇၵေႃႈၸၢင်ႈ ပဵၼ်လႆႈ မီးၶၢဝ်ႇၼင်ႇၼႆ။ ၵူၺ်းၵႃႈ ပုၼ်ႈတႃႇ NCCT ႄတႉ တေႁဵတ်းထႅင်ႈတီႈလႂ်ဢၼ်ဝႃႈၼၼ်ႉ ယင်းပႆႇမီးၶေႃႈပိုၼ်ၽၢဝ်ႇ သင်ဢွၵ်ႇမႃး။

မိူဝ်ႈဝၼ်းတီႈ 5 - 8 လိူၼ်ဢေးပရိူဝ်လ် ပူၼ်ႉမႃးၼႆႉ တူဝ်တႅၼ်းၸၢဝ်းၶိူဝ်းၸုမ်းၸိူဝ်းယိပ်းၵွင်ႈၵၢင်ႇ တင်းၸုမ်းတူဝ် တႅၼ်းလူင်ပွင်ၸိုင်ႈ မီးၵၢၼ်ႁူပ်ႉထူပ်းၵၼ်တီႈဝဵင်းလူင်တႃႈၵုင်ႈသေ ၶဵၼ်ႇတႅမ်ႈယုၵ်းယၢင်ႇ ပိူင်ၵိုတ်းယိုဝ်းပတ်းပိုၼ်ႉ တင်းၸိုင်ႈမိူင်း။ ၵူၺ်းၵႃႈ တႃႇပုၼ်ႈၵူၼ်းၼမ်တေဢၢၼ်ႇလဵပ်ႈႁဵၼ်းယင်းပႆႇၽွမ်ႉ - ဝႃႈၼႆ။

NCCT ၸုမ်းၵၢပ်းသၢၼ်ဢုပ်ႇၵိူဝ်းၵုမ် ပိူဝ်ႈတႃႇၵိုတ်းယိုဝ်းတင်းၸိုင်ႈမိူင်းပတ်းပိုၼ်ႉ ႄလႈ ၸုမ်းဢုပ်ႇ လွင်ႈငမ်းယဵၼ် ၸၼ်ႉၸိုင်ႈမိူင်းၶွင်လူင်ပွင်ၸိုင်ႈ UPWC လႆႈႁူပ်ႉထူပ်းဢုပ်ႇဢူဝ်းၵၼ်မႃး 7 ပွၵ်ႈယဝ်ႉ။ မိူဝ်ႈဝၼ်းတီႈ 4-5 လိူၼ်ၼူဝ်ႇဝႅမ်းၿိူဝ်ႇ 2013 တီႈမိတ်ႉၵျီးၼႃး၊ ဝၼ်းတီႈ 2 လိူၼ်ၻီႇသႅမ်းၿိူဝ်ႇ တီႈတႃႈၵုင်ႈ။ ဝၼ်းတီႈ 12-13 လိူၼ်ၻီႇသႅမ်းၿိူဝ်ႇ 2013 တီႈတႃႈၵုင်ႈ။ ဝၼ်းတီႈ 29 လိူၼ်ၻီႇသႅမ်းၿိူဝ်ႇ 2013 ၻီႈဝဵင်းၵဵင်းမႆႇ ၸိုင်ႈထႆး။ ဝၼ်းတီႈ 29 လိူၼ်ၵျႅၼ်ႇ ၼိဝ်းရီး 2014 တီႈဝဵင်းၵဵင်းမႆႇ ၸိုင်ႈထႆး။ ဝၼ်းတီႈ 9-10 လိူၼ်မၢတ်ႉၶျ် 2014 တီႈ တႃႈၵုင်ႈ ႄလႈ ဝၼ်းတီႈ 5-8 လိူၼ်ဢေႇပရိူဝ်လ်  2014 တီႈတႃႈၵုင်ႈ ၸိူဝ်းၼႆႉ။

ၸိူင်ႉႁိုဝ်ၵေႃႈလီ တေႃႇဝၼ်းၼႆႉ ၸၢဝ်းၶိူဝ်းၸုမ်းယိပ်းၵွင်ႈၵၢင် တပ်ႉသိုၵ်းၶၢင်လွတ်ႈလႅဝ် KIA ၊ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ၊ ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA တင်း သိုၵ်းမၢၼ်ႈၵေႃႈ တိုၵ်ႉပဵၼ်ပၢင်တိုၵ်းၵၼ်ယူႇတေႃႇႁၢၼ်ႉၼႆႉ။