ပႃႇတီႇႁူဝ်သိူဝ် (SNLD) တင်း ၸုမ်းယၢင်း (KNU) ႁူပ်ႉထူပ်းၵၼ်တီႈ ဝဵင်းလူင်တႃႈၵုင်ႈ၊ ဢုပ်ႇဢူဝ်းၵုမ်ၵၼ် ပိူဝ်ႈတႃႇ ၸၢဝ်းၶိူဝ်းႁူမ်ႈမိုဝ်းၵၼ် သိုပ်ႇႁဵတ်းသၢင်ႈၼႃႈၵၢၼ် တႃငၢၼ်း ၵႂႃႇမိူဝ်းၼႃႈထႅင်ႈ။

ဝၼ်းတီႈ 06/05/2014 ၵၢင်ၼႂ်ယၢမ်း 10:00-11:30 မူင်း၊ ငဝ်ႈငုၼ်းတီႇမူဝ်ႇၶရေႇသီႇၸိူဝ်ႉၶိူဝ်းတႆး ႁိုဝ် ပႃႇတီႇႁူဝ်သိူဝ် (SNLD) တင်း ႁူမ်ႈတုမ်ၸိူဝ်ႉၸၢတ်ႈယၢင်းၽိူၵ်ႇ (KNU) ႁူပ်ႉထူပ်းဢုပ်ႇဢူဝ်းၵၼ် တီႈလုမ်းပႃႇတီႇႁူဝ်သိူဝ် ၼိူဝ်သဵၼ်ႈတၢင်းပျီႇ ၸႄႈဝဵင်းမယၢၼ်းၵူင်း ဝဵင်းလူင်တႃႈၵုင်ႈ။ ၾၢႆႇယၢင်းၽိူၵ်ႇ မီးၵႅမ်ႁူဝ်ပဝ်ႈၼေႃႇသီႇၽူဝ်းလႃႇၸဵင်ႇဢွၼ်ႁူဝ်၊ ၵႅမ်ၽူႈၼမ်းၼႂ်း တင်း ၶွမ်ႇမတီႇငဝ်ႈငုၼ်း 11 ၵေႃႉ။ ပိူင်လူင်မၼ်း ဢုပ်ႇၵုမ်လွင်ႈၵၢၼ်မိူင်း မိူင်းမၢၼ်ႈ၊ လွင်ႈပိူင်ငဝ်ႈပိုင်းမိူင်း၊ လွင်ႈငမ်းယဵၼ်လႄႈ လွင်ႈၸၢဝ်းၶိူဝ်းၸိူဝ်းၼႆႉ- ၽူႈၶၢၼ်ပၢၵ်ႇပႃႇတီႇႁူဝ်သိူဝ် ၸၢႆးလဵၵ်ႉ လၢတ်ႈ ၼင်ႇၼႆ။

ၸၢႆးလဵၵ်ႉ သိုပ်ႇလၢတ်ႈဝႃႈ- ဢၼ်ၸုမ်းႁဝ်းတင်းပီႈၼွင်ႉယၢင်း လႆႈဢုပ်ႇၵုမ်ၵၼ်ၵႂႃႇၼႆႉ ၵဵဝ်ႇၵပ်းလွင်ႈ ၸုမ်းတူဝ်တႅၼ်းၸၢဝ်းၶိူဝ်း / ၶွမ်ႇမတီႇၵပ်းသၢၼ် ၵၢၼ်ၵိုတ်းယိုဝ်းပတ်းပိုၼ်ႉၸိုင်ႈမိူင်း (NCC) တင်း လူင်ပွင်ၸိုင်ႈ ၸုမ်းၶိုင်ပွင် လွင်ႈငမ်းယဵၼ် ၸၼ်ႉၸိုင်ႈ မိူင်းႁူမ်ႈတုမ် (UPWC) ၊ ဢၼ်ၶိုင်ပွင်လွင်ႈ ငမ်းယဵၼ်ယူႇၼႆႉ ၽႅဝ်ၸၼ်ႉလႂ်ယဝ်ႉ၊ တီႈၸၼ်ႉလႂ် မီးလွင်ႈယူပ်ႈယွမ်းၵႃႈႁိုဝ်။ ပေႃးၵဵဝ်ႇၵပ်းၵၢၼ်ၵေႃႇ သၢင်ႈလွင်ႈငမ်းယဵၼ်မႃး၊ ယူႇတီႈပႃႇတီႇၵၢၼ်မိူင်း ဢၼ်ၼိုင်ႈသေ တေၶဝ်ႈႁူမ်ႈမိုဝ်းၵၼ်လႆႈထႅင်ႈၸိူင်ႉႁိုဝ် ၸိူဝ်းၼႆႉ ႁဝ်းလႆႈဢုပ်ႇၵုမ်သပ်းလႅင်းၼႄၵၼ်ၵႂႃႇ- ဝႃႈၼႆ။

ဢွၼ်ၼႃႈၼႆႉ ၸုမ်းယၢင်း KNU ဢၼ်ၼေႃႇသီႇၽူဝ်းလႃႇၸဵင်ႇ ဢွၼ်ႁူဝ် မႃးၶဝ်ႈႁူမ်ႈပၢင်ႁူပ်ႉထူပ်းဢုပ်ႇၵုမ် ၸုမ်းတူင်ႇဝူင်း ၵူၼ်းယၢင်း၊ ဢၼ်ၸတ်းတီႈၼႂ်းတိူင်းဢီႇရႃႇဝၻီႇ။ မီးၸႂ်ၶႂ်ႈႁူပ်ႉထူပ်း SNLD သေ  ပွင်ႇၶၢဝ်ႇၸႅင်ႈမႃး ပိူဝ်ႈတႃႇႁူပ်ႉႁဝ်းၶႃႈ။ ၾၢႆႇႁဝ်းၶႃႈ  SNLD တႄႉ မီးႁူဝ်ပဝ်ႈလူင်ၸဝ်ႈၶုၼ်ထုၼ်းဢူး၊ ၵႅမ်ႁူဝ်ပဝ်ႈ တင်း ၽူႈၼမ်းၼႂ်း ၵူႈလွင်ႈလွင်ႈႄလႈ ၽူႈၼင်ႈလုမ်း ၸိူဝ်းၼႆႉ  ႁူပ်ႉထူပ်းဢုပ်ႇၵုမ်ၵၼ်။ ႁဝ်းၶႃႈဢုပ်ႇၵုမ် လႆႈၸႂ်ၵၼ်ၼၼ်ႉ ပိူဝ်ႈတႃႇ ၵေႃႇသၢင်ႈလွင်ႈငမ်းယဵၼ်၊ တႃႇတီႇမူဝ်ႇၶရေႇသီႇ၊ တႃႇလွင်ႈၽဵင်ႇပဵင်းၸၢဝ်းၶိူဝ်း၊ တႃႇတေပဵၼ်မႃးၸိုင်ႈမိူင်းႁူမ်ႈတုမ် ၾႅတ်ႉၻရႄႇလ်ၸိုၼ်ႈၸၢင်ႇ။ လွင်ႈၼႆႉ ႁဝ်းၶႃႈၸၢဝ်းၶိူဝ်း တေႁူမ်ႈမိုဝ်းၵၼ်သေ တူင်ႉၼိုင်တုၵ်းယွၼ်းၵႂႃႇ။ ႁဝ်းၶႃႈ တေဢုပ်ႇၵုမ်ၵၼ်၊ လႅၵ်ႈလၢႆႈၶေႃႈမုလ်း/ တၢင်းႁူႉတၢင်းႁၼ်ၵၼ်သေ ႁူမ်ႈမိုဝ်းၵၼ်ႁဵတ်းသၢင်ႈၵႂႃႇ၊ ႁဝ်းၶႃႈလႆႈၸႂ် ၵၼ်ဝႆႉ ဢမ်ႇပဵၼ်တၢင်းၵၢၼ်ၼင်ႇၼႆ-  ၸၢႆးလဵၵ်ႉ လၢတ်ႈၼႄၼင်ႇၼႆ။

ၵႅမ်ႁူဝ်ပဝ်ႈ ၼေႃႇသီႇၽူဝ်းလႃႇၸဵင်ႇ လၢတ်ႈတီႈၼႂ်းပၢင်ဢုပ်ႇဢူဝ်းဝႃႈ- ႁဝ်းၶႃႈ (KNU) တႄႉ ပိူင်ငဝ်ႈပိုင်းမိူင်း 2008 ၵေႃႈ ဢမ်ႇႁပ်ႉ၊ ဢမ်ႇၵမ်ႉထႅမ်။ ၼႂ်းပီ 2015 ၵေႃႈ တေဢမ်ႇၶဝ်ႈၵၢၼ်လိူၵ်ႈတင်ႈ။ ၼွၵ်ႈသေၼၼ်ႉ ႁဝ်းၶႃႈၵမ်ႉထႅမ် ပၢႆးဝူၼ်ႉပၢႆးႁၼ်ၵဵဝ်ႇၵပ်း လွင်ႈၵၢၼ်မိူင်း ၶွင် SNLD ၵူႈလွင်ႈလွင်ႈ။ ဢၼ်ၸုမ်း KNU ၵေႃႇသၢင်ႈလွင်ႈငမ်းယဵၼ် ယူႇၼႆႉလႄႈသင်၊ ဢၼ်ၶဝ်ႈပႃးတူင်ႉၼိုင် ပိူဝ်ႈတႃႇၵိုတ်းယိုဝ်းပတ်းပိုၼ်ႉ ၸိုင်ႈမိူင်းၼၼ်ႉလႄႈသင်၊ ၶႅၼ်းတေႃႈ SNLD ၵမ်ႉယၼ်ပၼ်ႁႅင်း ၸုင်ၸၼ် KNU ၊ ၸွႆႈထႅမ် KNU ႁဵတ်းသၢင်ႈၵႂႃႇ- ဝႃႈၼႆ။