ဝၼ်းတီႈ 27/05/2014 (မိူဝ်ႈၼႆႉ) ဝၢႆးဝၼ်း ၶၢဝ်းယၢမ်းမွၵ်ႈ 3 မူင်းၶိုင်ႈ တေႃႇထိုင် 4 မူင်းၶိုင်ႈ တီႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၼၼ်ႉ လူမ်းလႅင်ႉလူင်ပတ်ႉႁႅင်း၊ ၾူၼ်ၵေႃႈႁႅင်းသေ တူၼ်ႈမႆႉယႂ်ႇတူၼ်ႈမႆႉလူင် ၵူၼ်ႇလူမ်ႉတဵင်တၢင်း တဵင်ႁိူၼ်း၊ လင်ႁိူၼ်းၵူၼ်ႇပင်းလူႉၵွႆလၢႆလင်၊ ၾႆးၾႃႉလပ်းတင်းဝဵင်း- ၼႆယဝ်ႉ။

ပီႈၼွင်ႉၵဵင်းတုင် ၵေႃႉၼိုင်ႈလၢတ်ႈဝႃႈ- မိူဝ်ႈၼႆႉ တီႈၵဵင်းတုင်ၼႆႉလူမ်းႁႅင်း။ တီႈၼႃႈႁူင်းႁဵၼ်းၼၼ်ႉ မႆႉသပေႇတူၼ်ႈယႂ်ႇတူၼ်ႈလူင် လူမ်ႉတဵင်တၢင်း။ တီႈၸဝ်ႈမိူင်း ႁိမ်းဝတ်ႉႁူဝ်ၶူင်ႇ (ဝတ်ႉၾႃႉၵႅဝ်ႈ ၵၢင်ၸႂ်မိူင်း) ၵေႃႈ သဝ်လၵ်းၾႆးလူမ်ႉတဵင်တၢင်း။ တီႈၵဵင်းၶုမ်ႇ (တၢင်းၶိုၼ်ႈၵႂႃႇဝတ်ႉၵျွင်းလူင်) ႁိူၼ်းမၢၵ်ႇဢုတ်ႇလိပ်း လင်ၼိုင်ႈ လူမ်ႉၵႂႃႇၽၢၵ်ႇၼိုင်ႈ၊ ႁိူၼ်းမုင်းလဵၵ်းၽိူၵ်ႇ ၵႂႃႇၽၢၵ်ႇၼိုင်ႈ။ မႆႉၶီႈလဵၵ်း (မႆႉၸီႇလီႇ) တီႈၵၢင်ၸႂ်ဝၢၼ်ႈၵေႃႈ လူမ်ႉတဵင်ႁိူၼ်းသြႃႇမၶၢင်- ဝႃႈၼႆ။

မိူဝ်ႈလဵဝ်ၼႆႉ တၢင်ႇတီႈတႄႉပႆႇလႆႈႁူႉလွင်ႈလူႉၵွႆ/သုမ်း။ မိူဝ်ႈၵႆႈၼၼ်ႉ ႁေႃႈၵႃးၽၢတ်ႈၽၢၼ်ႇၵႂႃႇလႄႈႁၼ်ၵူၺ်း။ ၸွမ်သၵ်း ၸွမ်တွင်းၸိူဝ်းၼႆႉၵေႃႈ လွင်ႈလူႉၵွႆၼၼ်ႉ ပႆႇလႆႈႁူႉ။ မိူဝ်ႈၼႆႉ တီႈၵဵင်းတုင်ၼႆႉ ၾႆးလပ်းသိင်ႇ မူတ်းယဝ်ႉလႄႈ လႅပ်ႈလုၵွႆၼမ်ယူႇ- ပီႈၼွင်ႉၵဵင်းတုင် သိုပ်ႇလၢတ်ႈၵႂႃႇၼင်ႇၼႆ။