ဝၼ်းတီႈ 21/05/2014 ဝၼ်းလုၵ်ႉၽိုၼ်ႉၸိုင်ႈတႆး ၶွပ်ႈၶူပ်ႇ 56 ပီၼၼ်ႉ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်း ၸိုင်ႈတႆး RCSS/SSA ၸတ်းပၢင်ၶုၵ်းထူပ်း ဢဝ်ၵုၼ်းမုၼ် တီႈငဝ်ႈၸိုင်ႈလွႆတႆးလႅင်း။ ၸွမ်သိုၵ်းယွတ်ႈသိုၵ်းမွၵ်ႇလၢတ်ႈ ၶေႃႈၵႂၢမ်း/ ၶႆႈၼႄပိုၼ်းလုၵ်ႉၽိုၼ်ႉ၊ လွင်ႈၵေႃႇသၢင်ႈလွင်ႈငမ်းယဵၼ်၊ လွင်ႈတေဢဝ်လၢႆးငမ်းယဵၼ် ၵႄႈလိတ်ႈပၼ်ႁႃ ၵၢၼ်မိူင်းၵႂႃႇ ၸိူဝ်းၼႆႉ။ ၼွၵ်ႈသေၼၼ်ႉ RCSS/SSA လႆႈဢွၵ်ႇပႃးၶေႃႈပိုၼ်ၽၢဝ်ႇ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၽူႈမီးၸၼ်ႉၸဝ်ႈၼိုင်ႈတီႈလွႆတႆးလႅင်း ဢၼ်ၶဝ်ႈႁူမ်ႈပၢင်ပွႆးဝၼ်းလုၵ်ႉၽိုၼ်ႉ ဢိင်ၼိူဝ် ၶေႃႈပိုၼ် ၽၢဝ်ႇ ဢၼ်ဢွၵ်ႇမိူဝ်ႈဝၼ်းတီႈ 21/05/2014 လၢတ်ႈဝႃႈ- ၾၢႆႇႁဝ်းၶႃႈၼႆႉ ၼင်ႇၵႃႈပဵၼ်လႆႈ၊ ၼင်ႇႁိုဝ်တေဢမ်ႇလႆႈ တေႃႇၼႃႈၵၼ်တင်းသိုၵ်းမၢၼ်ႈ၊ ႁဝ်းၶႃႈၶတ်းၸႂ်ငိူင်ႉဝႄႈမႃး။ ၵူၺ်းၵႃႈ ၾၢႆႇသိုၵ်းမၢၼ်ႈသမ်ႉ ဢမ်ႇၸႅင်ႈဢမ်ႇလၢတ်ႈ၊ ဢမ်ႇယွၼ်းဢၼုၺၢတ်ႈတီႈႁဝ်းၶႃႈသေ ဢဝ်ႁႅင်းသိုၵ်းမႃး ၵူတ်ႇထတ်းလုမ်းႁဝ်း (တီႈၵဵင်းတုင်)ၸိူင်ႉၼႆၼႆႉ ပဵၼ်လၢႆး လူလၢႆလွင်ႈငမ်းယဵၼ် ဢၼ်ၵေႃႇသၢင်ႈဝႆႉ တေႃႇႁဝ်းၶႃႈ။

မိူဝ်းၼႃႈထႃႇပၢႆမႃး သင်ဝႃႈပဵၼ်မႃးၸိူင်ႉၼႆထႅင်ႈၸိုင် မၼ်းတိုၼ်းတေတိူဝ်ႉလွင်ႈငမ်းယဵၼ် ဢၼ်ၵေႃႇသၢင်ႈဝႆႉ။ ၵွပ်ႈၼၼ် ၼင်ႇႁိုဝ်ပေႃးတေၵေႃႇသၢင်ႈလႆႈလွင်ႈငမ်းယဵၼ်သေ မီးသုၼ်ႇလႆႈၽွင်းငမ်းတူဝ်ၵဝ်ႇၼၼ်ႉ ႁဝ်းၶႃႈဢဝ်လၢႆး ၵတ်းယဵၼ်ႁဵတ်းသၢင်ႈမႃး။ ၵူၺ်းၵႃႈ သင်ဝႃႈတပ်ႉသိုၵ်းလူင်ပွင်ၸိုင်ႈမၢၼ်ႈ သမ်ႉဢမ်ႇၸႂ်ႉလၢႆးလီ၊ ၶိုင်ယႃႉလွင်ႈငမ်း ယဵၼ် ဢၼ်ႁဝ်းၵေႃႇသၢင်ႈဝႆႉတိၵ်းတိၵ်းတႄႉ ပိူဝ်ႈတႃႇၸိူဝ်ႉၸၢတ်ႈ လွတ်ႈလႅဝ်းၼၼ်ႉ ၵမ်းလိုၼ်းသုတ်း ၵႃႈလႆႈၸႂ်ႉ ၶိုၼ်းလၢႆးၵဝ်ႇ၊ ၵႃႈလႆႈယိပ်းၵွင်ႈၵၢင်ႇ သိုပ်ႇတိုၵ်းၶိုၼ်းယဝ်ႉ- ၽူႈမီးၸၼ်ႉတီႈလွႆတႆးလႅင်း လၢတ်ႈၵႂႃႇၼင်ႇၼႆ။

ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၼႆႉ ဢိင်ၼိူဝ်ၸွမ်ၸိုင်ႈတဵင်းၸဵင်ႇ ယိုၼ်ႈမိုဝ်းဢုပ်ႇ ဢူဝ်းလွင်ႈငမ်းယဵၼ်သေ လႆႈဢုပ်ႇဢူဝ်းတူၵ်းလူင်းၵိုတ်းယိုဝ်း  ၵေႃႇသၢင်ႈလွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် ၵၼ်မႃး တင်ႈတႄႇႁၢင်ပီ 2011 ။ ဝၢႆးမႃး ပိုတ်ႇလုမ်းၵပ်းသၢၼ်ဝႆႉ ၼႂ်းမိူင်းတႆးတီႈဢေႇသုတ်း ဢမ်ႇယွမ်း 7 တီႈ။