ဝၼ်းတီႈ 11-13/05/2014 ၼႆႉ ထုင်ႉပၢင်ႇလႅင်းသႂ် ၸႄႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း၊ ဢၼ်ပဵၼ်ပိုၼ်ႉတီႈၼႃႈလိၼ်ၵုမ်းၵမ် ၸုမ်းသိုၵ်းၵူၼ်းမိူင်း (MTA မၢၵ်ႇၵႅင်း) မီးၶပ်ႉမၢႆၸတ်းႁဵတ်းပဵၼ် ပၢင်ပွႆးမႁႃႇမဵတ်ႉတႃႇ ႁူမ်ႈ 4 ပွႆး ၼႂ်းၶၢဝ်းယၢမ်းလဵဝ်ၵၼ်။ 1.ပွႆးတၢင်ႇယွတ်ႈထၢတ်ႈၸေႇတီႇလူင် “လႃၽသိၵ်ႉထိ” ။ 2.ပွႆးသၢင်ႇလွင်း။ 3.ပွႆးတူၼ်ႈႁေႃလူမ်း။ 4.ပွႆးပိုတ်ႇႁူင်းႁဵၼ်းၸိူဝ်ႉၸၢတ်ႈ။ ပၢင်ပွႆးမႁႃႇမဵတ်ႉတႃႇၼႆႉ ၸဝ်ႈသိုၵ်းလူင်လႅင်းသႂ် (ၸၢႆးလူႇ) ႁူဝ်ပဝ်ႈၸုမ်းသိုၵ်းၵူၼ်းမိူင်း (MTA) မၢၵ်ႇၵႅင်း ပဵၼ်ၸဝ်ႈတႃႇၼငဝ်ႈသေ ဢွၼ်ႁူဝ်ၼမ်းၼႃႈလုၵ်ႈၼွင်ႉပွင်ႈပၢႆ ဢိၵ်ႇပႃးၵူၼ်းဝၢၼ်ႈၵူၼ်းမိူင်းၼႂ်းပိုၼ်ႉတီႈ ႁူမ်ႈၵၼ်ၶပ်းၶိုင်ပွင်သၢင်ႈ လႄႈ လႆႈၽိတ်ႈပၢင်း/ၼိမၼ်တၼ သင်ၶၸွတ်ႇတူဝ်ႈၸိုင်ႈတႆး မႃးႁပ်ႉတၢင်းလူႇ တၢင်းတၢၼ်း ႁူမ်ႈ 1528 တူၼ်- ဝႃႈၼႆ။

ၸၢႆးဢွင်ႇပႃႉ ၽူႈၶဝ်ႈပႃးၶွမ်ႇမတီႇၶပ်းၶိုင်ပွင်သၢင်ႈပၢင်ပွႆး လၢတ်ႈဝႃႈ- တႃႇပဵၼ်မႃးပွႆးမႁႃႇမဵတ်ႉတႃႇယႂ်ႇလူင်ၼႆႉ ၽူႈယႂ်ႇၵူၼ်းလူင်ၸုမ်းသိုၵ်းၵူၼ်းမိူင်း MTA မၢၵ်ႇၵႅင်း၊ လႆႈၶတ်းၸႂ်သႂ်ႇႁႅင်းႁၢင်ႈႁႅၼ်းမႃး ၶၢဝ်းတၢင်းႁိုင်ပီပၢႆ။ ပိူင်လူင်မၼ်း လႆႈဢွၼ်ၵၼ်ၵေႃႇသၢင်ႈမႁႃႇၸေႇတီႇ (ၵွင်းမူး) ႁဵၵ်ႈၸိုဝ်ႈ “လႃၽသိၵ်ႉထိ) တီႈၵွင်းမုင်ႈမိူင်း၊ ယူႇၸဵင်ႇၸၢၼ်းဝၼ်းတူၵ်းဝၢၼ်ႈပၢင်ႇလႅင်းသႂ်။ ယိူင်းဢၢၼ်းပိူဝ်ႈတႃႇ ႁႂ်ႈပဵၼ်ထၢတ်ႈၸေႇတီႇ တီႈပိုင်ႈဢိင်ဝႆႈသႃ ၸၢဝ်းပုတ်ႉထၵူႈၸၢဝ်းၶိူဝ်း လႄႈ တႃႇႁႂ်ႈမုၼ်ငဝ်းၸဝ်ႈႁူမ်ႇငမ်းပိူင်းပၼ် လွင်ႈၶိုၼ်ႈယႂ်ႇၵတ်းယဵၼ်ၼႂ်းၸိုင်ႈတႆး- ဝႃႈၼႆ။

လိူဝ်သေထၢတ်ႈၸေႇတီႇလူင်ယဝ်ႉ တၢင်းမူႇၸုမ်း MTA မၢၵ်ႇၵႅင်း လႆႈၵေႃႇသၢင်ႈႁူင်းႁဵၼ်းၸိူဝ်ႉၸၢတ်ႈ ပၢင်ႇလႅင်းသႂ် တီႈဝၢၼ်ႈပၢင်ႇလႅင်းသႂ်၊ ၶူးပူင်သွၼ်လူင်လုင်းၸၢႆးၾႃႈ ပဵၼ်ၽူႈၸွႆႈပၼ်တၢင်းႁၼ်ထိုင် ၼႂ်းၵၢၼ်ၵေႃႇသၢင်ႈပူၵ်းတင်ႈ၊ ယိူင်းဢၢၼ်းတႃႇႁႂ်ႈပဵၼ်ႁူင်းႁဵၼ်းၽိူမ်ႉထႅမ်ၼမ်ႉၵတ်ႉၵူၼ်းၼုမ်ႇၸိူဝ်ႉၸၢတ်ႈ ၸိုင်ႈတႆး ႁႂ်ႈလႆႈမီးတိုဝ်ႉတၢင်းသိုပ်ႇၶိုၼ်ႈႁဵၼ်းၸၼ်ႉသုင်။ ႁူင်းႁဵၼ်းၼႆႉ တေပိုတ်ႇသွၼ်လိၵ်ႈလၢႆး လၢႆၽႃႇသႃႇမိူၼ်ၼင်ႇ တႆး၊ ထႆး၊ ဢိင်းၵလဵတ်ႈ၊ ၶႄႇ လႄႈ ပိုၼ်ႉႁူႉလၢႆးၸႂ်ႉၶွမ်ႇပိဝ်ႇတိူဝ်ႇ ၸိူဝ်းၼႆႉ။

ယၢမ်းလဵဝ် ၵၢၼ်ၵေႃႇသၢင်ႈထၢတ်ႈၸေႇတီႇလူင် လႄႈ ႁူင်းႁဵၼ်းၸိူဝ်ႉၸၢတ်ႈၸမ်ယဝ်ႉတူဝ်ႈလီငၢမ်း ယဝ်ႉလႄႈ ႁူဝ်ပဝ်ႈပွင်ပဵၼ်ပၢင်ပွႆး ၸင်ႇလိူၵ်ႈဢဝ်ဝၼ်းလိူၼ် ယၢမ်းလီ (လိူၼ်ႁူၵ်းမူၼ်း) ႁဵတ်းပဵၼ်ပွႆး မင်ႇၵလႃႇသေ လႆႈႁူမ်ႈႁဵတ်းပႃးပွႆးသၢင်ႇလွင်း လႄႈ ပွႆးတူၼ်ႈႁေႃလူမ်းၵိုၵ်းႁွမ်းၸွမ်းၵၼ်။ ၼႂ်းပၢင်ပွႆးမႁႃႇ မဵတ်ႉတႃႇၼႆႉ ၸဝ်ႈတႃႇၼၶဝ် လႆႈၽိတ်ႈပၢင်းသင်ၶလႄႈပီႈၼွင်ႉၸမ်ၸႂ်ၵူႈမူႇၸုမ်း ဢိၵ်ႇပီႈၼွင်ႉ ၵူၼ်းမိူင်းၵူႈတီႈၵူႈတၢင်း ၵူႈၸႄႈဝဵင်းမႃးၶဝ်ႈႁူမ်ႈ- ၼႆယဝ်ႉ။