ၵၼ်သီႇ

တဝ်ၼၼ်ႉ ဝၢင်ႈပဝ်ႇ
ၵူၺ်းတီႈၸႂ်ႉမၼ်း ဢမ်ႇမီးမိူဝ်ႈသဵင်ႈသုတ်း
လိုၵ်ႉဢမ်ႇတိူၵ်ႈ
ပဵၼ်မေႃႇၵိူတ်ႇၵူႈသမ်ႇသႅၼ်ပိူင်။

မၼ်းႁဵတ်းႁႂ်ႈတၢင်းၽၢႆၼၼ်ႉထိုင်ႉၵႂႃႇ။
ၵီႈဢၼ်ၶွတ်ႇဝႆႉ။
သၢႆတႃလိူၵ်ႇၼၼ်ႉဢွၼ်ႇၵႂႃႇ။
ၵူမ်ၵဵဝ်ၶဝ်ႈၵၼ်တင်းမိူင်းၶူင်းၾုၼ်ႇ
မၼ်းယူႇယိုၼ်းလႆႈႁိုင်ၼၢၼ်း
ၵဝ်ဢမ်ႇႁူႉဝႃႈပဵၼ်လုၵ်ႈၽႂ်
မၼ်းယင်းၵႄႇလိူဝ်မွၼ်ႇၵေႃႉဢွၼ်တၢင်းသုတ်း။

ၵၼ်ႁႃႈ

ၾႃႉလိၼ်ဢမ်ႇၶဝ်ႈၶၢင်ႈၽႂ်
ၵူႈသမ်ႇသႅၼ်ပိူင် မိူၼ်ႁုၼ်ႇၽိူင်းတေႃႇၶဝ်
ၽူႈႁူႉယႂ်ႇဢမ်ႇၶဝ်ႈၶၢင်ႈၽႂ်
ၵူၼ်းတင်းလၢႆ မိူၼ်ႁုၼ်ႇၽိူင်းတေႃႇၶဝ်။

ၵူၺ်းၵႃႈ ၾႃႉလိၼ်ဢိၵ်ႇတီႈဝၢင်ႈပဝ်ႇ ၼႂ်းၵႄႈၶဝ်
မိူၼ်သဝ်ႇႁုတ်ႇလူမ်း။

ဝၢင်ႈပဝ်ႇယူႇတီႈၸႂ်ႉမၼ်း သမ်ႉဢမ်ႇမီးမိူဝ်ႈသဵင်ႈသုတ်း

ယိင်ႈယူႇယိင်ႈပူင်ႇၵီႈ
လၢတ်ႈၵႂၢမ်းယၢဝ်းၼႆႉ ဢူၼ်ႈၼူၼ်းၸႂ်
တႃႉၵိုတ်းသေတင်ႈသမႃႇထိၼႂ်းတူဝ်ၵဝ်ႇ။

ၵၼ်ႁူၵ်း

ၽီႁူၺ်ႈႁၢမ်းပဝ်ႇ ဢမ်ႇမီးဝၼ်းတၢႆ
ႁဵၵ်ႈဝႃႈ ပဵၼ်ယိင်းၽူႈလိုၵ်ႉလပ်ႉ
တၢင်းၶဝ်ႈၸူး ယိင်းၽူႈလိုၵ်ႉလပ်ႉ
ႁဵၵ်ႈဝႃႈ ပဵၼ်ငဝ်ႈၶွင်ၾႃႉလိၼ်
လႆဢမ်ႇမီးဝၼ်းႁႅင်ႈ
ပဵၼ်ႁႅင်းလူင်ၸႂ်ႉဢမ်ႇမီးဝၼ်းသဵင်ႈသုတ်း။

ၵၼ်ၸဵတ်း

ၾႃႉယိုၼ်းယၢဝ်း လိၼ်ယိုၼ်းႁိုင်
ယိုၼ်းယၢဝ်းလႄႈယိုၼ်းႁိုင်
ယွၼ်ႉဢမ်ႇယူႇပိူဝ်ႈတူဝ်ၶဝ်
ၸင်ႇဝႃႈၽူႈႁူႉယႂ်ႇၼႆႉ-
ယၢင်ႈထွႆႁၢင်ႇ    ၵူၺ်းၵႂႃႇမီးၼႃႈပိူၼ်ႈ
ယၢင်ႈဢွၵ်ႇၼွၵ်ႈ    ၵူၺ်းၵႂႃႇမီးၼႂ်းပိူၼ်ႈ
ဢမ်ႇၸႂ်ႈယွၼ်ႉပွႆႇဝၢင်းတူဝ်ၵဝ်ႇႁိုဝ်
ၵၢၼ်တူဝ်ၵဝ်ႇၸင်ႇတဵမ်ထူၼ်ႈၵႂႃႇ။

ၵၼ်ပႅတ်ႇ

ဢမ်ႇမီးသင်လီလိူဝ်ယူႇမိူၼ်ၼမ်ႉ
ႁဵတ်းၽွၼ်းလီတေႃႇၵူႈသမ်ႇသႅၼ်ပိူင် လႄႈ ဢမ်ႇၵႂႃႇၶေႉၶႅင်ႇၽႂ်။
မၼ်းယူႇတီႈၽူႈၵူၼ်းလၢႆ မိူဝ်ႇၸၢၼ်ႈ
ယူႇၸမ်ႁိမ်းတဝ်။
ယူႇတီႈတၼ်းႁဵင်းလီ
ဢဝ်ၸႂ်ဝႆႉတီႈလိုၵ်ႉ
တိုဝ်းၵမ်တေႃႇပိူၼ်ႈလီလီ
မီးသၸ်ႉၸႃႇတေႃႇၵႂၢမ်းတူဝ်ၵဝ်ႇ
ဝၢင်းမၢႆမီႈဢၼ်ထုၵ်ႇပိူၼ်ႈထုၵ်ႇႁဝ်း (ပဵၼ်ထမ်း)
ႁဵတ်းၵၢၼ်ဢၼ်ထုၵ်ႇမႅၼ်ႈ
ႁဵတ်းၵၢၼ်မိူဝ်ႈထိုင်ၶၢဝ်းယၢမ်း
ၵူၺ်းယႃႇၶႅင်ႇတင်းၽႂ်
ၸဝ်ႈၵဝ်ႇၸင်ႇတေဢမ်ႇၵႂႃႇတၢင်းၽိတ်း။

ၵၼ်ၵဝ်ႈ

တၵ်ႉသႂ်ႇတဵမ်
ဢမ်ႇလီပဵင်း ၵိုတ်းမိူဝ်ႈထိုင်ယၢမ်း
တႅၵ်ႈထုပ်ႉလပ်ႉ
မၼ်းတေဢမ်ႇၽၢႆၵႂႃႇလႆႈႁိုင်။
ၶမ်းသႅင်ၶဵဝ်တဵမ်ႁွင်ႈ
တေဢမ်ႇၸၢင်ႈၵႅတ်ႇၶႄဝႆႉ။
မင်ႈမီးလႄႈႁူဝ်ၸႂ်သုင်
ၸၢင်ႈမႅင်ႇဝႆႉတၢင်းၽိတ်း။
ထွၼ်တူဝ်မိူဝ်ႈၵၢၼ်ယဝ်ႉတူဝ်ႈ
ပဵၼ်တဝ်ၶွင်ၾႃႉၼိူဝ်ဢိူဝ်ႈ။