ပူၼ်ႉမႃးမိူဝ်ႈဝၼ်းတီႈ 30/04/2014 ၵူၼ်းဝၢၼ်ႈၵူၼ်းမိူင်း ၼႂ်းၸိုင်ႈတႆးပွတ်းႁွင်ႇ 4-5 ၵေႃႉ ၶီႇလူတ်ႉၶိူင်ႈ ဢွၵ်ႇတၢင်းၵႂႃႇတၢင်းမိူင်းၶၢင်၊ လူတ်ႉၶိူင်ႈလမ်းၼိုင်ႈ ၵႂႃႇၽႃႇၺႃးသၢႆမၢၵ်ႇတႅၵ်ႇ ဢၼ်မီးၵူၼ်းဢမ်ႇႁူႉၸၵ်းမူႇ ၸၵ်းၸုမ်း ႁၢင်ႈၵၢင်ဝႆႉၸွမ်းတၢင်း၊ ႁဵတ်းႁႂ်ႈၵူၼ်းၶီႇလူတ်ႉၶိူင်ႈလမ်းၼၼ်ႉ တၢႆထင်တီႈ 1 ၵေႃႉ၊ ၵူၼ်းၸိူဝ်းၵႂႃႇၸွမ်းၵၼ် တိူဝ်ႉဝၢတ်ႇၸဵပ်း 3 ၵေႃႉ၊ ထႅင်ႈၵေႃႉၼိုင်ႈလွတ်ႈၽေး- ၼႆယဝ်ႉ။

မွင်ႇၽူင်းသျုၼ်ႇ ၵူၼ်းၸၢဝ်းၶိူဝ်းၶႄႇ၊ ၵေႃႉတိူဝ်ႉဝၢတ်ႇၸဵပ်း ဢၼ်ႁွတ်ႈဝႆႉတီႈႁူင်းယႃဝဵင်းၼမ်ႉၶမ်း လၢတ်ႈဝႃႈ- ႁဝ်းၶႃႈႁႃႈၵေႃႉ ၶီႇလူတ်ႉၶိူင်ႈသေဢွၵ်ႇတၢင်းၵႂႃႇ၊ မိူဝ်ႈႁဝ်းပႆႇၵႂႃႇၽႅဝ်တီႈမၢၵ်ႇတႅၵ်ႇၼၼ်ႉ ၵႂႃႇႁၼ်သိုၵ်းမၢၼ်ႈပႂ်ႉႁူမ်ႇလူမ်ႈၸွမ်းတၢင်း။ ၸိူဝ်းႁဝ်းထၢမ်တူၺ်းဝႃႈ သဵၼ်ႈတၢင်းၼႆႉပိူၼ်ႈၵႂႃႇမႃးယူႇႁႃႉ၊ ၸွင်ႇမီးၽေး၊ ႁဝ်းတေၵႂႃႇဝၢၼ်ႈတၢင်းၼႃႈၼႆႉ ၸွင်ႇတေၵႂႃႇလႆႈ။ ၾၢႆႇသိုၵ်းမၢၼ်ႈတွပ်ႇဝႃႈ- ပေႃးၵႂႃႇဝၢၼ်ႈ ၵႆႇထဝ်ႈၵူၺ်း၊ ဢမ်ႇပူၼ်ႉဝၢၼ်ႈၵႂၢႆးထိုၵ်းတႄႉလႆႈယူႇ။ ၵူၺ်းၵႃႈ ၽိူဝ်ႇႁဝ်းသိုပ်ႇၵႂႃႇ ယင်းပႆႇၵႂႃႇၽႅဝ်ဝၢၼ်ႈ ၵႆႇထဝ်ႈၵေႃႈ ၵႂႃႇယဵပ်ႇၺႃးသၢႆမၢၵ်ႇဢၼ်ပိူၼ်ႈၾင် ႁၢင်ႈၵၢင်ဝႆႉသေ မၢၵ်ႇတႅၵ်ႇ၊ ၵေႃႉၶီႇလူတ်ႉၶိူင်ႈ လမ်းဢၼ်ယဵပ်ႇၺႃးမၢၵ်ႇၼၼ်ႉ တၢႆထင်တီႈ၊ ပဵၼ်လိူတ်ႈပဵၼ်ယၢင်ၵႂႃႇသဵင်ႈ- ဝႃႈၼႆ။

ဝၢႆးမၢၵ်ႇတႅၵ်ႇယဝ်ႉ သိုၵ်းမၢၼ်ႈဢၼ်ပႂ်ႉႁူမ်ႇလူမ်ႈၸွမ်းတၢင်းၼၼ်ႉ လႆႈငိၼ်းသေၵႂႃႇဢဝ်ၸိူဝ်းၶဝ် သူင်ႇႁူင်းယႃၼမ်ႉၶမ်း၊ ဢၼ်ဝၢတ်ႇၸဵပ်းလိူဝ်ႁႅင်း 2 ၵေႃႉၼၼ်ႉ သူင်ႇႁူင်းယႃဝဵင်းမူႇၸႄႈယဝ်ႉ- ၸဝ်ႈၼႃႈတီႈ ၾၢႆႇပၢႆးယူႇလီဝဵင်းၼမ်ႉၶမ်း ၵေႃႉၼိုင်ႈလၢတ်ႈ။

သိုပ်ႇလၢတ်ႈထႅင်ႈဝႃႈ- တီႈႁူင်းယႃၼမ်ႉၶမ်းၼႆႉတႄႉ ၵိုတ်းၵူၼ်းဝၢတ်ႇၸဵပ်းဢိတ်းဢွတ်း။ ဢၼ်ဝၢတ်ႇၸဵပ်း ၸွမ်းဢူၵ်း ၸွမ်းၶႃလူင်ၸိူဝ်းၼႆႉ၊ ၸၢၵ်ႇမၢၵ်ႇၼႆႉ မၼ်းၶဝ်ႈလိုၵ်ႉဝႆႉလႄႈ တေလႆႈၽႃႇဢွၵ်ႇယူႇ။ ဢၼ်မႃးဢႅဝ်ႇမႃးၸႂ်းၵူၼ်းဝၢတ်ႇၸဵပ်းၸိူဝ်းၼႆႉ မီးပႃႇတီႇၵၢၼ်မိူင်း လႄႈ ပီႈပီႈၼွင်ႉၼွင်ႉၸိူဝ်းႁူႉၸၵ်းၵၼ်၊ တင်းထဝ်ႈဝၢၼ်ႈထဝ်ႈၼႃး- ဝႃႈၼႆ။

မိူဝ်ႈလဵဝ် ၼႂ်းပိုၼ်ႉတီႈဢၼ်သိုၵ်းမၢၼ်ႈႁၢင်ႈႁႅၼ်းသိုၵ်း ၶဝ်ႈသွၵ်ႈတဝ် ၸုမ်းၸၢဝ်းၶိူဝ်းယိပ်းၵွင်ႈၵၢင်ႇယူႇ ပွတ်းမိူင်းၶၢင်ၼႆႉ မၢၵ်ႇၵမ်းၵမ်းတႅၵ်ႇ - ၵူၼ်းၼႂ်းပိုၼ်ႉတီႈလၢတ်ႈ။

ၵူၼ်းႁႃႈၵေႃႉၸိူဝ်းဢွၵ်ႇတၢင်းၵႂႃႇတၢင်းမိူင်းၶၢင်၊ ၵႂႃႇၽႃႇၺႃးမၢၵ်ႇတႅၵ်ႇၼၼ်ႉ 1.မွင်ႇယိၼ်ႇထူၺ်းႁေႃႇ (ၸၢဝ်းၶိူဝ်းၶႄႇ) ဢႃႇယု 33 ပီ၊ ယူႇပွၵ်ႉဢွင်ႇမဵတ်ႉတႃႇ ဝဵင်းၼမ်ႉၶမ်း၊  မၼ်းၸၢႆးၼႆႉ တၢႆထင်တီႈ။ 2.မမူၺ်းၵျူႇ။ 3.ယဵၼ်ႇထူၺ်းၽႃႉ၊ ယူႇဝၢၼ်ႈပၢင်မူ ၸႄႈဝဵင်းၵူတ်ႉၶၢႆ။ 4.မွင်ႇၽူင်းသျုၼ်ႇ ယူတ်းယႃတူဝ်ဝႆႉ တီႈႁူင်းယႃၼမ်ႉၶမ်း။ တႃႇၵေႃႉၼိုင်ႈ လွတ်ႈၽေး- ၵူၼ်းဝဵင်းၼမ်ႉၶမ်းၵေႃႉၼိုင်ႈလၢတ်ႈ။

ဢွၼ်ၼႃႈၼႆႉ မိူဝ်ႈဝၼ်းတီႈ 29/04/14 ၵၢင်ၼႂ်ယၢမ်း 11 မူင်း ၵေႃႈ မၢၵ်ႇတႅၵ်ႇတီႈႁိမ်း ၶူဝ်ၼမ်ႉဝၼ်း၊ လႅၼ်လိၼ်ၶႄႇ-မၢၼ်ႈ၊ ဢၼ်မီးႁိမ်းဝၢၼ်ႈၼွင်မူၼ်း ၸႄႈဝဵင်းမၢၼ်ႈၸႄႈ၊ ဢိူင်ႇဝၢၼ်ႈမေႃႇ မိူင်းၶၢင်။ မီးၵူၼ်းဝၢတ်ႇၸဵပ်းၵေႃႉၼိုင်ႈ၊ ပဵၼ်ၼၢင်းယိင်း ဢႃႇယု 20 ပီ၊ ပဵၼ်ၵူၼ်းဝၢၼ်ႈၼမ်ႉႁီး။

ၶူဝ်ၼမ်ႉဝၼ်းၼႆႉ ဢွၼ်ၼႃႈၼႆႉ ပဵၼ်သိုၵ်းၶၢင် (KIA) ၵုမ်းယိပ်း တူင်ႉၼိုင်ဝႆႉ။ တပ်ႉသိုၵ်းၸိုင်ႈတႆး ၼႃႈလိၼ်သိုၵ်း 701 ၵေႃႈ တူင်ႉၼိုင်ၸွမ်းပွတ်းတွၼ်ႈၼၼ်ႉ။ ၵူၺ်းၵႃႈ ဢိင်ၼိူဝ်သိုၵ်းမၢၼ်ႈႁၢင်ႈသိုၵ်း ၶိုၼ်ႈလေႃႇသိုၵ်းၶၢင် (KIA) ပူၼ်ႉမႃးမိူဝ်ႈ 11/04/2014 သေ ယိုတ်းလႆႈပႃးၶူဝ်ၼမ်ႉဝၼ်း။ တင်ႈတႄႇ ၼၼ်ႉမႃး ပွတ်းၶူဝ်ၼမ်ႉဝၼ်းၼႆႉ မၢၵ်ႇၵေႃႈၵႆႉၵႆႉတႅၵ်ႇ။