ပူၼ်ႉမႃးမိူဝ်ႈဝၼ်းတီႈ 11/05/2014 ၵူၼ်းတၢင်းမိူင်းငႅၼ်း ၼႂ်းၸႄႈဝဵင်းမိူင်းၶၢၵ်ႇ (ၸိုင်ႈတႆးပွတ်းဢွၵ်ႇၶူင်း) ႁေႃႈလူတ်ႉၵႃး ဢွၵ်ႇၶၢဝ်းတၢင်းၵႂႃႇ တၢင်းၼႃႈလိၼ်တပ်ႉၸုမ်း 468 မိူင်းပွၵ်ႉ၊ ၺႃးလူတ်ႉၵႃးသိုၵ်းဝႃႉ လမ်းၼိုင်ႈမႃးတၢင်းလင်၊ ပေႃးၵႃးသိုၵ်းဝႃႉၼၼ်ႉ သႅင်းၶၢမ်ႈပူၼ်ႉၵႂႃႇတၢင်းၼႃႈလႆႈၵေႃႈ ဢဝ်ၵႃးၶႂၢင်ဝႆႉသေ ႁႄႉၵိုတ်းလူတ်ႉၵႃးၵူၼ်းမိူင်းငႅၼ်း။ သိုၵ်းဝႃႉလူင်းၵႃးမႃးယဝ်ႉ မႃးတိုတ်ႉလၢၵ်ႈ ၸဝ်ႈၶွင်လူတ်ႉၵူၼ်း မိူင်းငႅၼ်းၼၼ်ႉ လူင်းလူတ်ႉၵႃးသေပေႃႉထုပ်ႉ- ၼႆယဝ်ႉ။

ၸၢႆးဢၢႆႈပၢၼ်း ၵေႃႉၺႃးပေႃႉထုပ်ႉလၢတ်ႈဝႃႈ- တူဝ်ၵဝ်ၶႃႈၵေႃႈပဵၼ်ဝႃႉယဝ်ႉ၊ ပဵၼ်ဝႃႉလေႃးတႆး။ မိူဝ်ႈဝၼ်းၼၼ်ႉ ၶႃႈၵေႃႈသမ်ႉဢမ်ႇသႂ်ႇၶူဝ်းသိုၵ်း၊ ၵွင်ႈၵေႃႈဢမ်ႇပႃး၊ ၶႃႈၵေႃႈႁေႃႈၵႃးၵႂႃႇႁင်းၵူၺ်း ၽွင်းတိုၵ်ႉမႅၼ်ႈ (ဢမ်ႇဝႆးဢမ်ႇထိူင်း)၊ မီးၵႃးသိုၵ်းဝႃႉ ဢၼ်ပဵၼ်ဝီးၵူဝ်ႉ သီလႅင်၊ မၢႆလူတ်ႉၵႃး WLN 087 ၼၼ်ႉ ႁေႃႈမႃးတၢင်းလင်လူတ်ႉၶႃႈသေ တဵၵ်းႁွၼ်းတၢတ်းတၢတ်း၊ သမ်ႉပဵၼ်တီႈတၢင်းၵႅပ်ႈ၊ ၶႃႈသမ်ႉလူင်းတၢင်း ပၼ်ဢမ်ႇတၼ်းၶိုတ်း၊ ၽိူဝ်ႇမၼ်းၶၢမ်ႈသႅင်းပူၼ်ႉၵႃးၶႃႈလႆႈၵေႃႈ မၼ်းမႃးၶႂၢင်ၼႃႈၶႃႈသေ မႃးတိုတ်ႉလၢၵ်ႈ လူင်းၵႃးယဝ်ႉထုပ်ႉပၼ် ၸွမ်းၶေႃး ၵွင်ႇၶေႃႈ ၸွမ်းႁူဝ်ၸိူဝ်းၼႆႉ ၺႃးၵိၼ်လၢႆၵမ်း။ ဢမ်ႇထၢမ်သင်၊ တိုတ်ႉလၢၵ်ႈလူင်းၵႃးၵေႃႈထုပ်ႉၵမ်းလဵဝ်၊ လၢတ်ႈၵႂၢမ်းၶႄႇဝႃႈ ႁဵတ်းသင်မႂ်းဢမ်ႇဝႄႈပၼ်တၢင်း။ ၼႂ်းၵႃးၼၼ်ႉ မီးဝႃႉ 3-4 ၵေႃႉ၊ ၶႄႇၵေႃႈပႃးလၢႆၵေႃႉ၊ ၵူၺ်းၵႃႈ လၢတ်ႈၵႂၢမ်းၶႄႇတင်းမူတ်း- ဝႃႈၼႆ။

လိူဝ်သေၼၼ်ႉ ၵူၼ်းႁေႃႈလူတ်ႉၵႃးၵႂႃႇမႃးၼႂ်းပိုၼ်ႉတီႈ ဢၼ်ဢမ်ႇၸႂ်ႈသိုၵ်းဝႃႉၵေႃႈၵႆႉၵႆႉၺႃးၸိူင်ႉၼႆ၊ ၼိုင်ႈလိူၼ်ၼႆႉ ဢမ်ႇယွမ်း 2-3 ပွၵ်ႈၼႆ မီးၶၢဝ်ႇဢွၵ်ႇယူႇတိၵ်းတိၵ်း။ လွင်ႈၼႆႉ ပဵၼ်ၽူႈမီးၸၼ်ႉဢွၼ်ႇ တင်းလုၵ်ႈၵူၼ်းဝႃႈလႆႈပွင်ပဵၼ် ၽူႈယႂ်ႇၵူၼ်းလူင် ၼႂ်းတပ်ႉ 468 ၶဝ်ႈႁဵတ်းပဵၼ်- လႆႈႁူႉၼင်ႇၼႆ။

ၵဵဝ်ႇၵပ်းလွင်ႈၼႆႉ ၵူၼ်းမိူင်းငႅၼ်းၵေႃႉၼိုင်ႈၵေႃႈ လၢတ်ႈဝႃႈ- ႁဝ်းၶႃႈၵေႃႈတေၵႂႃႇတၢင်းမိူင်းပွၵ်ႉ၊ တူဝ်ၶႃႈၵေႃႈ ၺႃးသိုၵ်းဝႃႉ ႁႄႉၵိုတ်းၵႃးသေ ပေႃႉတီႈႁိမ်းၶူဝ်ၼမ်ႉသေႃႉ၊ တၢင်းၶိုၼ်ႈလွႆတပ်ႉပၢင်သဝ်း သႅၼ်ၽွင်း၊ ၼၼ်ႉၵေႃႈ ၶႃႈဢမ်ႇလူင်းဝႄႈပၼ်တၢင်းလႄႈ ၶဝ်မႃးႁႄႉၵိုတ်းၵႃးၶႃႈသေ တိုတ်ႉလၢၵ်ႈလူင်းၵႃးယဝ်ႉပေႃႉထုပ်ႉ။ ပိူင်လူင်မၼ်း ၵူၼ်းၸိူဝ်းဢမ်ႇမေႃၵႂၢမ်းၶႄႇ၊ ဢမ်ႇမေႃၵႂၢမ်းဝႃႉ ၶဝ်ၸိူဝ်းၼႆႉ လႆႈထုၵ်ႇဝႃႉတဵၵ်းတဵင်ပေႉၵိၼ်- ဝႃႈၼႆ။

ၵဵဝ်ႇၵပ်းလွင်ႈၼႆႉ ၽူႈဢမ်ႇၶႂ်ႈဢွၵ်ႇၸိုဝ်ႈၼႂ်းတပ်ႉဝႃႉ ၵေႃႉၼိုင်ႈၵေႃႈလၢတ်ႈဝႃႈ- ၼႂ်းတပ်ႉဝႃႉႁဝ်းၶႃႈၼႆႉ ဢမ်ႇမီးပေႃႇလသီႇ တဵၵ်းတဵင်ပေႉၵိၼ်ၵူၼ်းမိူင်း၊ လွင်ႈဝႃႈၵႆႉပေႃႉထုပ်ႉၸဝ်ႈၵႃးၼႆၼၼ်ႉ ႁဝ်းၶႃႈၵေႃႈငိၼ်းယူႇ၊ ၵမ်ႈၼမ်တႄႉ ပဵၼ်လုၵ်ႈလၢင်းၵူၼ်းမီးၸၼ်ႉ ၵူၼ်းမီးငိုၼ်း ၸိူဝ်းတၢင်းႁူႉတၢင်းႁၼ်ဢမ်ႇတဵမ်ထူၼ်ႈ ထၢင်ႇတူဝ်ၶဝ်ၶိုၵ်ႉ တင်းၽူႈမီးၸၼ်ႉဢွၼ်ႇၶဝ်ၸိူဝ်းၼႆႉ။ ၵဵဝ်ႇၵပ်းလွင်ႈၼႆႉ ပိူဝ်ႈတႃႇၵုမ်းၵမ်လႆႈၼၼ်ႉ ႁဝ်းၶႃႈတေတၢင်ႇႁၢႆးငၢၼ်း ထိုင်တၢင်းၼိူဝ်သေ တေထတ်းသၢင်ၶိုၼ်းယူႇ- ဝႃႈၼႆ။