ဝၼ်းတီႈ 15/05/2014 (မိူဝ်ႈၼႆႉ) ၵၢင်ၼႂ်ယၢမ်း 3 မူင်းပၢႆ၊ မၢၵ်ႇတႅၵ်ႇတီႈ ယေးငိုၼ်းၵမ်ႇပေႃးၸ တီႈပွၵ်ႉ 3 ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။

ၵူၼ်းၼႂ်းပိုၼ်ႉတီႈလၢတ်ႈဝႃႈ- တႅၵ်ႇ 2 ၵမ်းသွၼ်ႉၵၼ်၊ တီႈဢၼ်မၢၵ်ႇတႅၵ်ႇၼႆႉ ပဵၼ်တီႈယေးငိုၼ်းၵမ်ႇပေႃးၸ ဢၼ်မီးတေႃႇၼႃႈၵၼ်တင်း ပလီႇ (ၵျွင်းၽြႃးမူႇသလိမ်ႇ) ဝဵင်းလႃႈသဵဝ်ႈ။ တႅၵ်ႇသႂ်ႇတီႈၶိူင်ႈတိူၵ်ႈၵုမ်းၾႆး (Transformer) ၊ ႁဵတ်းႁႂ်ႈ Transformer လုလႅဝ်သေ တိူဝ်ႉၺႃးယေးငိုၼ်းလႅဝ်ၽွင်ႈ။ ယွၼ်ႉမၢၵ်ႇတႅၵ်ႇ ၼႆႉသေ လွင်ႈလုသုမ်းတၢႆဝၢတ်ႇ၊ လွင်ႈလုမ်းသုမ်းၼႆႉ မႅၼ်ႈၵႃႈၶၼ်ငိုၼ်းတွင်းမွၵ်ႈၵႃႈႁိုဝ် ၸိူဝ်းၼႆႉပႆႇလႆႈႁူႉ- ဝႃႈၼႆ။

လႆႈႁူႉဝႃႈ မိူဝ်ႈၼႆႉယၢမ်းၵၢင်ၼႂ်ၸဵမ်ၸဝ်ႉ ပလိၵ်ႈမၢၼ်ႈ တင်း ၽူႈမီးပုၼ်ႈၽွၼ်းၼႂ်းပွၵ်ႉယွမ်ႇ ၵႂႃႇထၢႆႇ ၶႅပ်းႁၢင်ႈသေ ဢဝ်ၸိူၵ်ႈၵႂၢင်းဝႆႉႁွႆးဢွင်ႈတီႈမၢၵ်ႇတႅၵ်ႇ၊ ၶိတ်ႇဝႆႉလႅၼ်မၼ်းသေ ၵူတ်ႇထတ်းတူၺ်းၼႂ်းပိုၼ်ႉတီႈ။ လွင်ႈမၢၵ်ႇတႅၵ်ႇၼႆႉ ပဵၼ်ၼမ်ႉမိုဝ်းၸုမ်းလႂ်၊ ပဵၼ်ၽႂ်မႃးႁၢင်ႈၵၢင် ဢမ်ႇလႆႈႁူႉ။ ၵူၺ်းၵႃႈ ၵူၼ်းယူႇၼႂ်း ပိုၼ်ႉတီႈလၢမ်းဝႃႈ- ယွၼ်ႉပိူဝ်ႈ မၼ်းပဵၼ်တေႃႇၼႃႈၵၼ်တင်း ပလီႇလႄႈ မၢင်ၽဝ်ႇၵေႃႈ မီးၵူၼ်းၶႂ်ႈသၢင်ႈလိူင်ႈ ၼႂ်းၵႄႈၵူၼ်းၵိူဝ်းလီ ၽႃႇသႃႇမူႇသလိမ်ႇလႄႈ တင်းၵူၼ်းဝၢၼ်ႈၵူၼ်းမိူင်းႁိုဝ်ၵေႃႈဢမ်ႇႁူႉ- ဝႃႈၼႆ။