ၸုမ်းၶၢင် (KIO/KIA) တင်း ၸုမ်းၶိုင်ပွင်လွင်ႈငမ်း ယဵၼ်မၢၼ်ႈ UPWC ၶွင်လူင်ပွင်ၸိုင်ႈ ႁူပ်ႉထူပ်းဢုပ်ႇဢူဝ်း ၵၼ်၊ ၶွတ်ႇၽွတ်ႇမူႇၸုမ်း ပိူဝ်ႈတႃႇၵႄႈလိတ်ႈပၼ်ႁႃ ဝူင်ႈၵၢင်သွင်ၾၢႆႇ။

ပူၼ်ႉမႃးမိူဝ်ႈဝၼ်းတီႈ 13/05/2014  တပ်ႉသိုၵ်းလွတ်ႈလႅဝ်းၶၢင် (KIA/KIO) တင်း တူဝ်တႅၼ်း လူင်ပွင်ၸိုင်ႈ မၢၼ်ႈၸုမ်းၶိုင်ပွင် လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC)  ႁူပ်ႉထူပ်းဢုပ်ႇဢူဝ်းၵၼ်။ သွင်ၾၢႆႇ လႆႈၸႂ်ၵၼ်ၶွတ်ႇၽွတ်ႈမူႇၸုမ်း ပိူဝ်ႈတႃႇၵႄႈလိတ်ႈပၼ်ႁႃ ၼႂ်းၵႄႈသွင်မူႇသွင်ၸုမ်း။ ပၢင်ဢုပ်ႇဢူဝ်းၼႆႉ  ၾၢႆႇမၢၼ်ႈ မီးဢူးဢွင်ႇမိၼ်း (ၵႅမ်ႁူဝ်ပဝ်ႈမၢႆ 2) ဢွၼ်ႁူဝ်။ ၽွင်းတႅၼ်းၵူၼ်းမိူင်း ဢူးတဵင်းၸေႃႇ၊ ၽွင်းလူင်ၸိုင်ႈမိူင်းႁူမ်ႈတုမ် ဢူးဢူင်းမိၼ်ႉ၊ ဢူးၶိၼ်ႇယီႇ၊ ဢူးၶိၼ်ႇမွင်ႇၸူဝ်း။ ၸွမ်ၽွင်းလူင်မိူင်းၶၢင် တင်း ၽူႈမီးပုၼ်ႈၽွၼ်း။ ၾၢႆႇၶၢင် မီးႁူဝ်ၼႃႈ ဢူးသုၼ်ႇလုတ်ႉၵမ်ႇ၊ ၵႅမ်ၽူႈၵွၼ်းသိုၵ်း ၸွမ်သိုၵ်းၵုၼ်ႇမေႃႇ ဢွၼ်ႁူဝ် တင်းၽူႈမီးပုၼ်ႈၽွၼ်း ၸိူဝ်းၼႆႉၶဝ်ႈႁူမ်ႈ။

“မိူဝ်ႈတႄႇမၼ်း ပၢင်ၵုမ်ၼႆႉၶပ်းၶိုင်ဝႆႉဝႃႈတေႁဵတ်း 2 ဝၼ်း၊ ၵူၺ်းၵႃႈ ၽိူဝ်ႇမႃးဢုပ်ႇၵုမ်ၵၼ်ၵေႃႈ ယဝ်ႉတူဝ်ႈၵႂႃႇလီငၢမ်း ၼႂ်းဝၼ်းလဵဝ်ၵူၺ်း၊ ဢမ်ႇမီးလွင်ႈလႆႈထဵင်မေႃးၵၼ်၊ လွင်ႈလႆႈၸႂ်ၵၼ်ယၢပ်ႇၸိူဝ်းၼႆႉ ဢမ်ႇမီး။ ယူႇတီႈတပ်ႉသိုၵ်းၶၢင်တႄႉ ၶႂ်ႈဢဝ်လွင်ႈဢၼ်တိုၵ်ႉပဵၼ်ပၢင်တိုၵ်းၵၼ် တင်းသွင်ၾၢႆႇၼၼ်ႉ ဢုပ်ႇၵုမ်။ ၵူၺ်းၵႃႈ ၽိူဝ်ႇဢုပ်ႇၵၼ် သမ်ႉဢွၼ်ၵၼ်တၢင်ႇ ၼႄဝႃႈ တႃႉႁဝ်းမႃးႁူမ်ႈၵၼ်တင်ႈမူႇၸုမ်း ပိူဝ်ႈတႃႇငူပ်ႉငိၵၼ်ၼႂ်းၵႄႈသွင်ၾၢႆႇၼႆသေ ဢူးဢွင်ႇမိၼ်း ၶဝ်ၵေႃႈလႆႈၸႂ်။ လႆႈၸႂ်ယဝ်ႉ မႃးတႅမ်ႈပိူင် ယုၵ်းယၢင်ႇ တွၼ်ႈတႃႇမူႇၸုမ်း။ ၼွၵ်ႈသေၼၼ်ႉ ဢုပ်ႇၵၼ်ထႅင်ႈဢိတ်းဢွတ်းသေ ပၢင်ၵုမ်ၵေႃႈယဝ်ႉတူဝ်ႈ ၵႂႃႇ မိူဝ်ႈဝၼ်းတီႈ 13 ၼၼ်ႉၵမ်းလဵဝ်- ၵူၼ်းၼႂ်းပႃႇတီႇမႂ်ႇသုင်ၸိုင်ႈတႆး (SSPP) ၵေႃႉဢၼ်ၶဝ်ႈႁူမ်ႈပၢင်ၵုမ် ၵေႃႉၼိုင်ႈ လၢတ်ႈၼႄ။

ပၢင်ႁူပ်ႉထူပ်းဢုပ်ႇၵုမ်သွင်ၾၢႆႇ (KIA) တင်း  (UPWC) ၼႆႉ ၸတ်းတီႈ ႁွင်ႈႁေႃမၵျွႆႇၶၢၼ်းမ၊ တီႈပၢင်မၼေႃး ပွၵ်ႉသီႇတႃႇပူႇ ဝဵင်းမျိတ်ႉၵျီးၼႃး ၸႄႈမိူင်းၶၢင်၊ မိူဝ်ႈဝၼ်းတီႈ 13/05/2014 ။ မူႇၸုမ်းဢၼ်ၶွတ်ႇၽွတ်ႈ ပိူဝ်ႈတႃႇၵႄႈလိတ်ႈပၼ်ႁႃသွင်ၾၢႆႇၼႆႉ ၼိုင်ႈၾၢႆႇပႃး 5 ၵေႃႉ။ ၾၢႆႇၶၢင် (KIA) ပႃး ႁူဝ်ၼႃႈသုၼ်ႇလုတ်ႉၵမ်ႇ၊ ၸွမ်သိုၵ်းၵုၼ်ႇမေႃႇဢွၼ်ႁူဝ်။ ၾၢႆႇမၢၼ်ႈ ပဵၼ်ဢူးဢွင်ႇမိၼ်း တင်းဢူးတဵင်းၸေႃႇ ဢွၼ်ႁူဝ်- ၼႆယဝ်ႉ။

လွင်ႈတၢင်းလႆႈၶွတ်ႇၽွတ်ႈမူႇၸုမ်း ပိူဝ်ႈတႃႇၵႄႈလိတ်ႈပၼ်ႁႃၼႆႉ ပဵၼ်ၶၵ်ႉတွၼ်ႈတီႈၼိုင်ႈ ၸွမ်းၼင်ႇ ၶေႃႈတူၵ်းလူင်းလႆႈၸႂ်ၵၼ် မိူဝ်ႈဝၼ်းတီႈ 10/10/2013 ၊ ၶွတ်ႇၽွတ်ႈမႃးလူၺ်ႈ ၶေႃႈတႅပ်းဢၼ်ဝႃႈ ႁူမ်ႈၵၼ်ပၵ်းတႃပႂ်ႉတူၺ်း လွင်ႈငမ်းယဵၼ်၊ ပိူဝ်ႈတႃႇ ၼႄၼမ်ႉၼႄတူဝ် ၶၵ်ႉတွၼ်ႈတီႈၼိုင်ႈ။ ပိူဝ်ႈတႃႇလူင်းမိုဝ်း ႁဵတ်းၵၢၼ်ၵႂႃႇၼႆႉ တူဝ်တႅၼ်းတင်းသွင်ၾၢႆႇ ဢၼ်လႆႈၶွတ်ႇၽွတ်ႈမႃး တေဢုပ်ႇၵုမ်ၵၼ် တတ်းမၵ်းဝၼ်း ပိူဝ်ႈတႃႇႁူပ်ႉထူပ်းၵၼ်ထႅင်ႈယူႇ- ၼႆယဝ်ႉ။

ဝၢႆးပၢင်ၵုမ် ဝၼ်းတီႈ 13/05/2014 ၼႆႉ တင်းသွင်ၾၢႆႇႁူမ်ႈၵၼ် ဢွၵ်ႇလိၵ်ႈၶေႃႈပိုၼ်ၽၢဝ်ႇ 5 ၶေႃႈ။ ၼႂ်းၼၼ်ႉ ၶေႃႈလမ်ႇလွင်ႈ ပႃးမိူၼ်ၼင်ႇ သွင်ၾၢႆႇတေၶတ်းၸႂ် သိုပ်ႇႁဵတ်းၵၢၼ်ၵႂႃႇ တွၼ်ႈတႃႇၶၵ်ႉၵၢၼ် ငမ်းယဵၼ်၊ ၼင်ႇႁိုဝ်တေဢမ်ႇမီးမႃး ဢၼ်ႁႄႉဢၼ်ႁၢမ်ႈ။ လွင်ႈၵေႃႇသၢင်ႈလွင်ႈငမ်းယဵၼ်ၼၼ်ႉ  တေၶတ်း ၸႂ်ၵႄႈလိတ်ႈပၼ်ႁႃၵႂႃႇ။ ၸုမ်းသိုဝ်ႇၶၢဝ်ႇ (Media) ၶဝ် ဢၼ်ဢွၵ်ႇၶၢဝ်ႇၵႂႃႇၸိူဝ်းၼႆႉ မၢင်လွင်ႈမၼ်း တုမ်ႉတိူဝ်ႉ လွင်ႈၶဝ်ႈၸႂ်/ပွင်ႇၸႂ်ၵၼ်။ ၵွပ်ႈၼၼ် ၼင်ႇႁိုဝ်တေဢမ်ႇမီးမႃးလွင်ႈ တုမ်ႉတိူဝ်ႉၼၼ်ႉ သွင်ၾၢႆႇတေၶတ်းၸႂ်သေ ပၵ်းတႃပႂ်ႉတူၺ်းၾၢႆႇသိုဝ်ႇၶဝ် လွင်ႈတႅမ်ႈပိုၼ်ၽႄႈဝႃႇတ၊ ပေႃႇလသီႇၸိူဝ်းၼႆႉ။ ပိူင်လူင်မၼ်း ယိူင်းဢၢၼ်းပိူဝ်ႈတႃႇႁႂ်ႈ လွင်ႈငမ်းယဵၼ် ၶိုပ်ႈၼႃႈၶိုၼ်ႈသင်ႉ- ၼႆယဝ်ႉ။

ၼႂ်းပၢင်ႁူပ်ႉထူပ်းဢုပ်ႇၵုမ်ၵၼ် လႆႈဢုပ်ႇၵၼ်ပႃးဝႃႈ- တီႈၼႂ်းမိူင်းၶၢင်ၼႆႉ ဢၼ်ပဵၼ်ပၢင်တိုၵ်းယူႇ တိၵ်းတိၵ်းၼႆႉၵေႃႈ ယွၼ်ႉပိူဝ်ႈ တင်းသွင်ၾၢႆႇဢမ်ႇၸွမ်း ၶေႃႈလႆႈၸႂ်တူၵ်းလူင်းၵၼ်  မိူဝ်ႈပၢင်ဢုပ်ႇၵုမ်ၵၼ် ၵႃႈပူၼ်ႉမႃး။ ၵွပ်ႈဢမ်ႇၸွမ်းလႆႈၽဵၼ်ႈၽဵၼ်ႈ တႅတ်ႈတေႃးလႄႈ ၸင်ႇလႆႈပဵၼ်ပၢင်တိုၵ်းတိၵ်းတိၵ်း- ၼႆယူႇ။

ၶႅၵ်ႇၶိုၵ်ႉတွၼ်း ဢၼ်ၶဝ်ႈႁူမ်ႈထွမ်ႇၸွမ်းပၢင်ဢုပ်ႇၵုမ်ပွၵ်ႈၼႆႉ မီးတူဝ်တႅၼ်း ၵဵဝ်ႇၵပ်းဢေးသျိူဝ်း ၸိုင်ႈမိူင်းၶႄႇ၊ တူဝ်တႅၼ်းလုမ်း ၸၢတ်ႈၸိုင်ႈလုမ်ႈၾႃႉ။ ၾၢႆႇၸုမ်းၸၢဝ်းၶိူဝ်း ယိပ်းၵွင်ႈၵၢင်ႇ မီးၸုမ်း ၶွင်ႇသီႇႁူမ်ႈတုမ်ၵူႈၸၢဝ်းၶိူဝ်း (UNFC) ၊ ၸုမ်းတူဝ်တႅၼ်း ၸၢဝ်းၶိူဝ်း / ၶွမ်ႇမတီႇၵပ်းသၢၼ်ၵၢၼ်ၵိုတ်းယိုဝ်း ပတ်းပိုၼ်ႉၸိုင်ႈမိူင်း (NCCT) ၊ တႅဝ်းႁူမ်ႈတီႇမူဝ်ႇၶရႅတ်ႉတိၵ်ႉ လုၵ်ႈႁဵၼ်းမိူင်း မၢၼ်ႈပတ်းပိုၼ်ႉ (ABSDF) ၊ တပ်ႉသိုၵ်းယၢင်းပုတ်ႉထ (DKBA) ၊ ၸုမ်းပူတ်းပွႆႇၸိူဝ်ႉၸၢတ်ႈပဢူဝ်း (PNLO) ၊ တႅဝ်းႁူမ်ႈၸိူဝ်ႉ ၸၢတ်ႈၶျၢင်း CNF ၊ ပႃႇတီႇမႂ်ႇသုင်ၸိုင်ႈတႆး (SSPP) ၸိူဝ်းၼႆႉ ၶဝ်ႈႁူမ်ႈထွမ်ႇငိၼ်း လဵပ်ႈႁဵၼ်းၸွမ်း။ ၵူၺ်းၵႃႈ ၼႂ်းၸၢဝ်းၶိူဝ်းၼႆႉ ၸုမ်းဝႃႉ (UWSA) တင်းၸုမ်းမိူင်းလႃး (NDAA)  ဢမ်ႇၶဝ်ႈႁူမ်ႈ- ၼႆယဝ်ႉ။