ဢိင်ၼိူဝ်ၾၢႆႇသိုၵ်းမၢၼ်ႈ ႁႂ်ႈဢဝ်လိူင်ႈၽူႈၶဝ်ႈၸုမ်းပႃႇတီႇႁူဝ်သိူဝ် တီႈၵဵင်းတုင်၊ ၸွမ်းမၢႆမီႈမတ်ႉတႃ 17/1 ၼၼ်ႉသေ ယူႇတီႈႁူဝ်သိူဝ် တုၵ်းယွၼ်းတီႈၸွမ်ၸိုင်ႈ ႁႂ်ႈၵိုတ်းယိုတ်းၵႄႈလိတ်ႈပၼ်။

လွင်ႈၽူႈၶဝ်ႈၸုမ်း ငဝ်ႈငုၼ်းတီႇမူဝ်ႇၶရေႇသီႇၸိူဝ်ႉၶိူဝ်းတႆး ႁိုဝ် ပႃႇတီႇႁူဝ်သိူဝ် (SNLD) ဝဵင်းၵဵင်းတုင်၊ ႁူဝ်ပဝ်ႈလုမ်းၵိင်ႇၽႄ ဝၢၼ်ႈၼမ်ႉလိၼ်းမႂ်ႇ ဢိူင်ႇပဵင်းတဝ်ႉ ၸႄႈဝဵင်းၵဵင်းတုင်၊ ဢၼ်ထုၵ်ႇသိုၵ်းမၢၼ်ႈ တိၺွပ်းၵႂႃႇ ပူၼ်ႉမႃးမိူဝ်ႈဝၼ်းတီႈ 05/05/2014 ၼၼ်ႉသေ ဝၢႆးမႃးၾၢႆႇတပ်ႉသိုၵ်းမၢၼ်ႈဝႃႈ ႁႂ်ႈၵၢဝ်ႇႁႃ ဢဝ်လိူင်ႈ ၸွမ်းမၢႆမီႈမတ်ႉတႃ 17/1 လႄႈသင်။ ဢိၵ်ႇတင်းလွင်ႈသိုၵ်းမၢၼ်ႈ ၶဝ်ႈၵူတ်ႇသွၵ်ႈလုမ်းၵပ်းသၢၼ် ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) တီႈၵဵင်းတုင်ၼၼ်ႉလႄႈသင်။ သွင်လွင်ႈၼႆႉ ႁႂ်ႈတူဝ်ၸွမ်ၸိုင်ႈမႃးၵႄႈလိတ်ႈပၼ်ႁႃ ပၼ်သေၵမ်း- ယူႇတီႈပႃႇတီႇႁူဝ်သိူဝ် (SNLD) တုၵ်းယွၼ်းၵႂႃႇၼင်ႇၼႆ။

ၵဵဝ်ႇၵပ်းလွင်ႈၼႆႉ ႁူဝ်ပဝ်ႈပႃႇတီႇႁူဝ်သိူဝ် လႆႈဢုပ်ႇလၢတ်ႈတီႈဢူးဢွင်ႇမိၼ်း (ၵႅမ်ႁူဝ်ပဝ်ႈမၢႆ 2 ၸုမ်းၶိုင်ပွင် လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် UPWC) ဝႃႈ- ႁႂ်ႈၸွႆႈထႅမ် ၵိုတ်းယိုတ်းပၼ်လွင်ႈတေၵၢဝ်ႇႁႃ ဢဝ်လိူင်ႈ (ၸွႆႈတြႃး) ၽူႈၶဝ်ႈၸုမ်း SNLD တီႈၵဵင်းတုင်၊ ႁႂ်ႈၸွႆႈလၢတ်ႈတုၵ်းယွၼ်းပၼ်တီႈတူဝ်ၸွမ်ၸိုင်ႈ၊ ႁႂ်ႈၵူတ်ႇထတ်းပၼ်လွင်ႈၼႆႉဝႆးဝႆး။

ၽူႈၶၢၼ်ပၢၵ်ႇပႃႇတီႇႁူဝ်သိူဝ် ၸၢႆးလဵၵ်ႉ လၢတ်ႈဝႃႈ- “မႃးဢဝ်လိူင်ႈလၢဝ်း တီႈလုၵ်ႈၸုမ်း/ၵူၼ်းၶဝ်ႈပႃႇတီႇ ၼိုင်ႈၵေႃႉၸိူင်ႉၼႆ ဢိၵ်ႇတင်း ဢၼ်ၶဝ်ႈသွၵ်ႈလုမ်းၵပ်းသၢၼ် RCSS ၸိူင်ႉၼႆၼႆႉ မၼ်းႁဵတ်းႁႂ်ႈ လွင်ႈငမ်းယဵၼ်ဢၼ်တိုၵ်းၵေႃႇသၢင်ႈလု၊ မၼ်းဢမ်ႇလီတႃႇတင်းသွင်ပႃႈသွင်ၾၢႆႇ၊ ႁဵတ်းႁႂ်ႈၵူၼ်းမိူင်းဢမ်ႇ ယုမ်ႇယမ်ၼိူဝ်ၸွမ်ၸိုင်ႈ၊ ႁဵတ်းႁႂ်ႈလွင်ႈယုမ်ႇယမ်ၼႂ်း ၵႄႈသွင်ပႃႈသွင်လူတ်းယွၼ်ႇၵႂႃႇ၊ ၵွပ်ႈၼႆ ႁဝ်းထုၵ်ႇလႆႈ ဢွၼ်ၵၼ်ၵိုတ်းယိုတ်း လွင်ႈၼႆႉဝႆးဝႆး- ဝႃႈၼႆ။

ပူၼ်ႉမႃးမိူဝ်ႈဝၼ်းတီႈ 11/05/2014 တူဝ်ႁူဝ်ပဝ်ႈ SNLD ၸဝ်ႈၶုၼ်ထုၼ်းဢူး လႆႈသိုပ်ႇၾူၼ်းဢုပ်ႇလၢတ်ႈ တင်း ၵႅမ်ႁူဝ်ပဝ်ႈ UPWC ဢူးဢွင်ႇမိၼ်း။ သွင်ၾၢႆႇလႆႈဢုပ်ႇၵုမ်ၵၼ် ပိူဝ်ႈတႃႇၵႄႈလိတ်ႈ ပၼ်ႁႃ ဢၼ်ၵိူတ်ႇၶိုၼ်ႈတီႈဝဵင်းၵဵင်းတုင်။

ၸၢႆးလဵၵ်ႉ လၢတ်ႈဝႃႈ- ပူၼ်ႉမႃးမိူဝ်ႈဝၼ်းတီႈ 11/05/2014 ႁူဝ်ပဝ်ႈႁဝ်း တင်း ဢူးဢွင်ႇမိၼ်း သိုပ်ႇၾူၼ်းဢုပ်ႇၵုမ်ၵၼ်။ ဢူးဢွင်ႇမိၼ်း လႆႈလၢတ်ႈတီႈႁူဝ်ပဝ်ႈႁဝ်းဝႃႈ တႃႇတေၵႄႈလိတ်ႈပၼ်ႁႃလွင်ႈၼႆႉ  တူဝ်မၼ်းတေတႅမ်ႈလိၵ်ႈသူင်ႇထိုင် တူဝ်ၸွမ်ၸိုင်ႈ။ မိူဝ်ႈဝၼ်းတီႈ 12/05/2014 ဢူးၸူဝ်းတဵင်း (ၵႅမ်ႁူဝ်ပဝ်ႈ UPWC) ၵႂႃႇၼေႇပျီႇတေႃႇသေ ၵႂႃႇႁူပ်ႉထူပ်းၵၼ်တင်း ၸွမ်ၸိုင်ႈ၊ ဢူးၸူဝ်းတဵင်း ဢဝ်လိၵ်ႈဢၼ် ဢူးဢွင်ႇမိၼ်း သူင်ႇၵႂႃႇၸွမ်းၼၼ်ႉ ၵႂႃႇပၼ်တီႈၸွမ်ၸိုင်ႈယဝ်ႉ- ဝႃႈၼႆ။

ပူၼ်ႉမႃးမိူဝ်ႈဝၼ်းတီႈ 05/05/2014 သိုၵ်းမၢၼ်ႈၶလယ 245 ဢၼ်ပၵ်းတီႈၵဵင်းတုင် ၵႂႃႇတိၺွပ်းဢဝ် ၸၢႆးဢၢႆႈၵဵင်၊ ႁူဝ်ပဝ်ႈပႃႇတီႇႁူဝ်သိူဝ် လုမ်းၵိင်ႇၽႄဝၢၼ်ႈၼမ်ႉလိၼ်းမႂ်ႇ ဢိူင်ႇပဵင်းတဝ်ႉ ၸႄႈဝဵင်း ၵဵင်းတုင်။ သိုၵ်းမၢၼ်ႈၸိၼႄးဝႃႈ တိတ်းတေႃႇၵပ်းသိုပ်ႇၸုမ်းလုၵ်ႉၽိုၼ်ႉ၊ ၵမ်ႉထႅမ်သိုၵ်းတႆးၼႆသေတိၺွပ်းၵႂႃႇ ပေႃႉထုပ်ႉၵုမ်းၶင်၊ ၶိုၼ်းဢဝ်မႃးမွပ်ႈပၼ် ၾၢႆႇပလိၵ်ႈတီႈၵဵင်းတုင် ပူၼ်ႉမႃးမိူဝ်ႈဝၼ်းသုၵ်းတီႈ 09/05/2014 ၊ ႁႂ်ႈၵၢဝ်ႇႁႃဢဝ်တူတ်ႈတၢမ်ႇတၢင်းၽိတ်း (ၸွႆးတြႃး)မၼ်း၊ ၸွမ်းၼင်ႇမၢႆမီႈမတ်ႉတႃ 17/1 ဝႃႈလူၺ်ႈ ၵၢၼ်ၵပ်းသိုပ်ႇတိတ်းတေႃႇ ၸုမ်းၼွၵ်ႈမၢႆမီႈ၊ ႁႂ်ႈဢဝ်ၶိုၼ်ႈလုမ်းတြႃး၊ ပၼ်တူတ်ႈတၢမ်ႇၶွၵ်ႈ- ၼႆယဝ်ႉ။

ၸၢႆးဢၢႆႈၵဵင်ၼႆႉ ပဵၼ်ၸၢဝ်းၶိူဝ်းဢႅၼ်ႇ။ ၼွၵ်ႈၼိူဝ်သေ ပဵၼ်ႁူဝ်ပဝ်ႈပႃႇတီႇႁူဝ်သိူဝ် တီႈဝၢၼ်ႈၼမ်ႉလိၼ်း မႂ်ႇယဝ်ႉ ပဵၼ်ပႃးႁူဝ်ၼႃႈ ၸၢဝ်းၶိူဝ်းဢႅၼ်ႇ။ လုမ်းပႃႇတီႇႁူဝ်သိူဝ်ၵေႃႈ ပိုတ်ႇဝႆႉတီႈႁိူၼ်းမၼ်း- ၼႆယဝ်ႉ။

ၼႂ်းၸိုင်ႈတႆးၼႆႉ တပ်ႉသိုၵ်းတႆး SSA မီးၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) လႄႈ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ။ သွင်ၸုမ်းၼႆႉ ပဵၼ်ၸုမ်းဢၼ်ၵေႃႇသၢင်ႈလွင်ႈ ငမ်းယဵၼ် တင်းလူင်ပွင်ၸိုင်ႈမၢၼ်ႈ ၼေႇပျီႇတေႃႇ ၸၼ်ႉၸိုင်ႈမိူင်းႁူမ်ႈတုမ်ဝႆႉၼင်ႇၵၼ်။

ၾၢႆႇၼိုင်ႈ ပိူဝ်ႈတႃႇၵေႃႇသၢင်ႈလွင်ႈငမ်းယဵၼ်ၼၼ်ႉ တၢင်းလူင်ပွင်ၸိုင်ႈမၢၼ်ႈ လႆႈမွပ်ႈမၢႆပၼ် တီႈႁူဝ်ပဝ်ႈ (SNLD) ၸဝ်ႈၶုၼ်ထုၼ်းဢူး၊ ႁႂ်ႈမၼ်းၸဝ်ႈတိတ်းတေႃႇၵပ်းသိုပ်ႇ/ ၵၢႆႇၶူဝ်ပၼ်ၼႂ်းၵႄႈၵၢင် သိုၵ်းတႆးသွင်ၸုမ်း တင်းလူင်ပွင်ၸိုင်ႈ။