မၢၼ်ႈပွႆႇပၼ် ၸၢႆးဢၢႆႈၵဵင် ႁူဝ်ပဝ်ႈပႃႇတီႇႁူဝ်သိူဝ် ဝၢၼ်ႈၼမ်ႉလိၼ်းမႂ်ႇ ၵဵင်းတုင်၊ ၵေႃႉဢၼ်လႆႈထုၵ်ႇ သိုၵ်းမၢၼ်ႈ တိၺွပ်းၵႂႃႇ လူၺ်ႈၸိၼႄးဝႃႈမီးၵွင်ႈၵၢင်ႇ၊ ၵမ်ႉထႅမ်သိုၵ်းတႆး၊ ၺႃးၶိုၼ်ႈလုမ်းတြႃး။

ဝၼ်းတီႈ 29/05/2014 (မိူဝ်ႈၼႆႉ) တၢမ်းၶမ်ႈ ယၢမ်း 17:25 မူင်း၊ လူင်ပွင်ၸိုင်ႈမၢၼ်ႈ ပွႆႇပၼ်ၸၢႆးဢၢႆႈၵဵင် ႁူဝ်ပဝ်ႈပႃႇတီႇႁူဝ်သိူဝ် လုမ်းၵိင်ႇၽႄဝၢၼ်ႈၼမ်ႉလိၼ်းမႂ်ႇ ဢိူင်ႇပဵင်းတဝ်ႉ ၸႄႈဝဵင်းၵဵင်းတုင်- ၼႆယဝ်ႉ။

ၸၢႆးဢၢႆႈၵဵင်ၼႆႉ လႆႈထုၵ်ႇသိုၵ်းမၢၼ်ႈၶလယ 245 ဢၼ်ပၵ်းတီႈၵဵင်းတုင် ၵႂႃႇတိၺွပ်း ပူၼ်ႉမႃးမိူဝ်ႈဝၼ်းတီႈ 05/05/2014 ။ ၸိၼႄးဝႃႈ ၵမ်ႉထႅမ်သိုၵ်းတႆးၼႆသေတိၺွပ်းၵႂႃႇပေႃႉထုပ်ႉ၊ ၶိုၼ်းဢဝ်မႃးမွပ်ႈပၼ် ၾၢႆႇပလိၵ်ႈတီႈၵဵင်းတုင် ပူၼ်ႉမႃးမိူဝ်ႈ ဝၼ်းသုၵ်းတီႈ 09/05/2014 ၊ ႁႂ်ႈၵၢဝ်ႇႁႃဢဝ်တူတ်ႈတၢမ်ႇတၢင်းၽိတ်း (ၸွႆးတြႃး)မၼ်း၊ ပၼ်တူတ်ႈတၢမ်ႇၶွၵ်ႈ။ ၾၢႆႇပလိၵ်ႈၵေႃႈ ပိုတ်ႇလိူင်ႈၸႅင်ႈၵႂၢမ်း ၵၢဝ်ႇႁႃတၢင်းၽိတ်း ၸွမ်းၼင်ႇမၢႆမီႈမတ်ႉတႃ 17/1 ဝႃႈလူၺ်ႈၵၢၼ်ၵပ်းသိုပ်ႇတိတ်း တေႃႇ ၸုမ်းၼွၵ်ႈမၢႆမီႈၼၼ်ႉသေ ဢဝ်ၶိုၼ်ႈ လုမ်းတြႃး။

ၸၢႆးဢၢႆႈၵဵင်ၼႆႉ ၼွၵ်ႈၼိူဝ်သေ ပဵၼ်ႁူဝ်ပဝ်ႈပႃႇတီႇႁူဝ်သိူဝ် တီႈဝၢၼ်ႈၼမ်ႉလိၼ်းမႂ်ႇယဝ်ႉ ပဵၼ်ပႃးႁူဝ်ၼႃႈၸၢဝ်းၶိူဝ်းဢႅၼ်ႇ။ ၽွင်းယၢမ်း ၺႃးတိၺွပ်းၵႂႃႇ 3-4 ဝၼ်းၼၼ်ႉ ဢိုပ်းၶဝ်ႈဢိုပ်းၼမ်ႉ။ သိုၵ်းမၢၼ်ႈၸႂ်ႉမၼ်း ၶုတ်းလုၵ်းသေ ၸႂ်ႉယူႇတၢင်းၼႃႈ လုၵ်းဢၼ်ၶုတ်းဝႆႉ၊ တဵၵ်းလွၵ်ႇငိုတ်ႈဝႃႈ ႁႂ်ႈလၢတ်ႈႁပ်ႉပၢၵ်ႇဝႃႈမီးၵွင်ႈၵၢင်ႇ ၼႂ်းႁိူၼ်းၼႂ်းယေး၊ ပေႃးလၢတ်ႈဝႃႈဢမ်ႇမီးၵွင်ႈ တေယိုဝ်းတၢႆသႂ်ႇၼႂ်းလုၵ်းၼႆႉ၊ တေၾင်လိပ်းပႅတ်ႈ။ ၵူၺ်းၵႃႈ ၸၢႆးဢၢႆႈၵဵင်တွပ်ႇဝႃႈ သူၶဝ်ႁႅမ်ၵဝ်ၶႃႈတၢႆၵေႃႈ တၢႆလၢႆလၢႆၵူၺ်း၊ တေဢမ်ႇလႆႈၼမ်ႉတွၼ်း ၽွၼ်းလီသင်၊ ၵဝ်ၶႃႈဢမ်ႇမီးၵွင်ႈ၊ ၵွင်ႈဢၼ်ဝႃႈၼၼ်ႉ ဢမ်ႇယၢမ်ႈယိပ်းသေပွၵ်ႈ ဝႃႈၼႆတိၵ်းတိၵ်းလႄႈ သိုၵ်းမၢၼ်ႈၵေႃႈ ဢမ်ႇၸၢင်ႈႁဵတ်းႁိုဝ်သေ လႆႈဢဝ်တူဝ်မၼ်းမႃးမွပ်ႈပၼ်ၾၢႆႇတပ်ႉပလိၵ်ႈ တီႈၵဵင်းတုင်သေ ႁႂ်ႈၸႅင်ႈၵႂၢမ်း ၸွႆးတြႃး။

ဝၢႆးၸၢႆးဢၢႆႈၵဵင် ၺႃးတိၺွပ်း ၶိုၼ်ႈလုမ်းတြႃးယဝ်ႉ မီးလၢႆၾၢႆႇလၢႆၵေႃႉတုၵ်းယွၼ်း 1.ပွႆႇပၼ်ၸၢႆးဢၢႆႈၵဵင်။ 2.ၵိုတ်းယိုတ်းပႅတ်ႈ လွင်ႈၵၢၼ်တဵၵ်းတဵင်ၵူၼ်းမိူင်းတႆး။ 3.သၢၼ်ၶတ်းၸဝ်ႈဢမ်းၼၢၸ်ႈ (ဢႃႇၼႃႇ) သိုၵ်းမၢၼ်ႈ ၸိူဝ်းၼႆႉ။