ယိင်းၸၢႆးသွင်ၵေႃႉ ဝၢၼ်ႈၼမ်ႉၸၢင်ႉ ဢိူင်ႇၸႄႈလၢၼ်ႉ၊ ဢၼ်ပဵၼ်ၸူႉႁၵ်ႉၵၼ် ၼတ်ႉၽတ်း (ၶိၼ်း) ႁူပ်ႉဢုပ်ႇၵၼ်ၵၢင်ၶိုၼ်း ႁိမ်းဝၢၼ်ႈ၊ ပီႇတုၸိတ်ႉ 2 ၵေႃႉမႃးႁၼ်မႅၼ်ႈသေ တီႉၺွပ်းၵႂႃႇပေႃႉထုပ်ႉ ၸူၼ်ဢဝ်ငိုၼ်းၶမ်း၊ ဢၢင်ႈၵၼ်ႉၸၼ်ပႃး။

ၸၢႆးယိင်းသွင်ၵေႃႉ၊ ၸၢႆးၸိုဝ်ႈ လေႃႇၵျႃႇ၊ ယိင်းၸိုဝ်ႈမႃႇပၼ်ႇ ယူႇဝၢၼ်ႈၼမ်ႉၸၢင်ႉ ဢိူင်ႇၸႄႈလၢၼ်ႉ၊ ၸႄႈဝဵင်းမူႇၸႄႈ ၸိုင်ႈတႆးပွတ်းႁွင်ႇ။ ၸၢႆးယိင်း 2 ၵေႃႉၼႆႉ ပဵၼ်ၸူႉႁၵ်ႉၵၼ်သေ ပူၼ်ႉမႃးမိူဝ်ႈဝၼ်းတီႈ 21/05/2014 ၶၢဝ်းယၢမ်းၵၢင်ၶိုၼ်းမွၵ်ႈ 10 မူင်းပၢႆ ၶႃသွင်ၵေႃႉၼတ်ႉၽတ်း(ၶိၼ်း) ႁူပ်ႉဢုပ်ႇၵၼ်တီႈ ထဵင်လင်ၼိုင်ႈ ႁိမ်းလႅၼ်ဝၢၼ်ႈ။ ၽွင်းသွင်ၶႃႈတိုၵ်ႉဢုပ်ႇၵၼ် ယူႇၼၼ်ႉ မီးၵူၼ်းၼုင်ႈၶူဝ်းပီႇတုၸိတ်ႉ ၼႂ်းပိုၼ်ႉတီႈ 2 ၵေႃႉ မႃးႁၼ်မႅၼ်ႈၶႃသွင်ၵေႃႉသေ တီႉၺွပ်းဢဝ်ၵႂႃႇပေႃႉထုပ်ႉ ၸူၼ်ႁိမ်ဢဝ်ငိုၼ်းၶမ်း- ၼႆယဝ်ႉ။

ပီႇတုၸိတ်ႉသွင်ၵေႃႉၼၼ်ႉ တီႉဢဝ်ၶႃသေၵႂႃႇၶတ်းသေႃးမိုဝ်း၊ ဢဝ်ၽႃႈဢိုတ်းပၢၵ်ႇဢိုတ်းတႃ ၵေႃႉပဵၼ် ၵူၼ်းၸၢႆးၼၼ်ႉသေ မတ်ႉဝႆႉ၊ ဢဝ်ၵႂႃႇပေႃႉထုပ်ႉၵူၺ်းပႆႇပေႃး ထွတ်ႇဢဝ်ၶူဝ်းငိုၼ်းၶူဝ်းၶမ်းတီႈ ၵူၼ်းၸၢႆး ၼၼ်ႉၵႂႃႇ၊ လႆႈၵႂႃႇငိုၼ်း 30,000 (ၵျၢတ်ႈ)ပၢႆ၊ ၶမ်းသမ်ႉၵႂၢင်းသႅင် 3 ဢၼ်။ ပီႇတုၸိတ်ႉ 2 ၵေႃႉၼႆႉ ပဵၼ်ပီႇတုၸိတ်ႉဢၼ်မီးၼႂ်းဝၢၼ်ႈၼွင်ႉၸၢင်ႉၵူၺ်း၊ ယၢမ်ႈႁၼ်ၶဝ် မိုတ်ႈၼႃႈမိုတ်ႈတႃၶဝ်ယူႇ။ ၶဝ် 2 ၵေႃႉၼႆႉ လၢတ်ႈၵႂၢမ်းမၢၼ်ႈတင်းသွင်ၵေႃႉ၊ ၵူၺ်းၵႃႈ ၵေႃႉၼိုင်ႈလၢတ်ႈၵႂၢမ်း မၢၼ်ႈပီႇပႅတ်ႉ၊ ထႅင်ႈၵေႃႉၼိုင်ႈတႄႉ လၢတ်ႈၵႂၢမ်းမၢၼ်ႈဢမ်ႇပေႃးပီႇ- လုင်းဢၢႆႈၵျေႃႇ ၵူၼ်းဝဵင်းမူႇၸႄႈ လၢတ်ႈၼင်ႇၼႆ။

ပီႇတုၸိတ်ႉ 2 ၵေႃႉၼႆႉ ၸၼ်ဢဝ်ၼၢင်းယိင်းၵေႃႉၼႆႉ ၵႂႃႇဝႆႉတီႈထဵင်၊ ႁိမ်းဝၢၼ်ႈၼွင်ၶၢင်သေ ဢၢင်ႈၵၼ်ႉၸၼ်။ ဢၢႆႈၵေႃႉဢၼ် ဢမ်ႇလၢတ်ႈၵႂၢမ်းမၢၼ်ႈလႅၼ်ႇၼၼ်ႉ လၢတ်ႈၼႄတီႈဢၢႆႈၵေႃႉလၢတ်ႈ ၵႂၢမ်းမၢၼ်ႈလႅၼ်ႇၼၼ်ႉဝႃႈ- ၼၢင်းယိင်းဢွၼ်ႇၵေႃႉၼႆႉမၼ်းတိုၵ်ႉလဵၵ်ႉယူႇ၊ ယႃႇပေႁဵတ်းၸိူင်ႉၼၼ် မၼ်းဢမ်ႇလီ။ ၵူၺ်းၵႃႈ ၵေႃႉမေႃၵႂၢမ်းမၢၼ်ႈ လႅၼ်ႇၼၼ်ႉ ဢမ်ႇထွမ်ႇသေ ဢၢင်ႈၵၼ်ႉၸၼ်ႉ။ ၼၢင်းယိင်း ဢွၼ်ႇၼၼ်ႉသမ်ႉ တဵၼ်ႈတဵၼ်ႈထုပ်ႉထုပ်ႉထိပ်ႇထိပ်ႇသေ လႅၼ်ႈပၢႆႈ။ ပီႇတုၸိတ်ႉ 2 ၵေႃႉၼၼ်ႉၵေႃႈ လမ်းပေႃႉ၊ ပေႃႉၺႃးၼႃႈတႃမၼ်းၼၢင်းပေႃးမၢၼ်ႉပေႃးလွၵ်ႈၵႂႃႇ၊ ၵူၺ်းၵႃႈ ဢမ်ႇတၼ်းလႆႈၵၼ်ႉၸၼ် ၼင်ႇၵဝ်ႇ- ၵူၼ်းဝဵင်းမူႇၸႄႈ လၢတ်ႈၼင်ႇၼႆ။

ဝၢၼ်ႈၼမ်ႉၸၢင်ႉ ဢိူင်ႇၸႄႈလၢၼ်ႉၼႆႉ မီးၼိူဝ်သဵၼ်ႈတၢင်းလူင် မူႇၸႄႈ-ၼမ်ႉၶမ်း။ ပွတ်းတွၼ်ႈၼၼ်ႉ ပီႇတုၸိတ်ႉၵၢင်ဝဵင်း (မျူဝ်ႉမ) ဢၼ်ပၵ်းတီႈဝဵင်းၼမ်ႉၶမ်း ၵႂႃႇတူင်ႉၼိုင်ထိုင်ဝႆႉ။ ၵူၺ်းၵႃႈ လွင်ႈၼႆႉ ပဵၼ်ၼမ်ႉမိုဝ်းပီႇတုၸိတ်ႉၼမ်ႉၶမ်းၸႂ်ႈ ဢမ်ႇၸႂ်ႈၼၼ်ႉ ၸုမ်းၶၢဝ်ႇၽူႈတွႆႇႁွၵ်ႈၵေႃႈ ပႆႇလႆႈၶေႃႈယိုၼ်ယၼ်။