ၾၢႆႇႁူမ်ႇလူမ်ႈသိုၵ်းမၢၼ်ႈ တီႈၵဵင်းတုင်၊ ဢဝ်ႁႅင်းသိုၵ်းၶဝ်ႈ ဝႅတ်ႉလွမ်ႉ ၵူတ်ႇထတ်းလုမ်းၶွင်ႇသီႇဢဝ်ၶိုၼ်း ၸိုင်ႈတႆး တီႈၵဵင်းတုင်။ ၾၢႆႇၼိုင်ႈ တိၺွပ်းႁူဝ်ပဝ်ႈပႃႇတီႇႁူဝ်သိူဝ် ဝၢၼ်ႈၼမ်ႉလိၼ်းမႂ်ႇ ၵႂႃႇပေႃႉထုပ်ႉ ထတ်းထၢမ် ဢဝ်ႁၢႆလၢႆ။

ဝၼ်းတီႈ 06/05/2014 (မိူဝ်ႈဝႃး) ယၢမ်းႁူဝ်ၶမ်ႈ 4 မူင်းပၢႆတေႃႇထိုင် 5 မူင်းပၢႆ၊ သိုၵ်းမၢၼ်ႈ တူဝ်ၽူႈၵွၼ်းၾၢႆႇ ႁူမ်ႇလူမ်ႈသိုၵ်း (ၸယၽ မူး) ၸဝ်ႈႁၢၼ်ယႄးၼေႇလိၼ်း၊ ဢွၼ်ႁူဝ်ႁႅင်းသိုၵ်း 20 ပၢႆ၊ ပႃႈတ်ႂ်ႈတိူင်း သိုၵ်းသၢမ်ၸဵင်ႇ၊ ပႃးၸဵမ်ၾၢႆႇပလိၵ်ႈ ၵႂႃႇဝႅတ်ႉလွမ်ႉ လုမ်းၶွင်ႇသီႇဢဝ်ၶိုၼ်းၸိုင်ႈတႆး (RCSS) တီႈၵဵင်းတုင်။ ၵူတ်ႇသွၵ်ႈ ၶူဝ်းၶွင် ဢၼ်ၵိုၵ်းလုမ်းတင်းသဵင်ႈ- ၼႆယဝ်ႉ။

ဢွၼ်ၼႃႈၼႆႉ ႁူဝ်ပဝ်ႈပႃႇတီႇႁူဝ်သိူဝ် (SNLD) လုင်းၸၢႆးၵျႅၼ်ႇ၊ လုမ်းၽႄဝၢၼ်ႈ ၼမ်ႉလိၼ်းမႂ်ႇ ဢိူင်ႇပဵင်းတဝ်ႉ ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇ၊ ထုၵ်ႇသိုၵ်းမၢၼ်ႈ ႁွင်ႉဢဝ်ၵႂႃႇထတ်းထၢမ် ပေႃႉထုပ်ႉသေ ဢဝ်ႁၢႆလၢႆဝႆႉ။

ၵဵဝ်ႇၵပ်းလွင်ႈၼႆႉ ႁူဝ်ၼႃႈၵူၼ်းၼုမ်ႇမိူင်းတႆးၵေႃႉၼိုင်ႈ တီႈၵဵင်းတုင် လၢတ်ႈဝႃႈ- ပိူဝ်ႈတႃႇၵႄႈလိတ်ႈပၼ်ႁႃ ဢၼ်ႁူဝ် ပဝ်ႈပႃႇတီႇႁူဝ်သိူဝ် ဝၢၼ်ႈၼမ်ႉလိၼ်းမႂ်ႇ ထုၵ်ႇတိၺွပ်းၼႆႉ ႁဝ်းၶႃႈၵူၼ်းၼုမ်ႇ၊ ပႃးၸဵမ်ပႃႇတီႇ ႁူဝ်သိူဝ်၊ ပႃႇတီႇသိူဝ်ၽိူၵ်ႇ မႃးႁူပ်ႉထူပ်းဢုပ်ႇၵုမ်ၵၼ်တီႈလုမ်း RCSS ။ ၼႂ်းၼၼ်ႉ ပႃးတင်းၵူၼ်းၼႂ်းပႃႇတီႇ NLD (ပႃႇတီႇၼူၵ်ႉယုင်း)။ ၵူၺ်းၵႃႈ NLD ပွၵ်ႈမိူဝ်းၵႂႃႇဢွၼ်တၢင်းလႄႈ မိူဝ်ႈသိုၵ်းမၢၼ်ႈမႃးၵူတ်ႇသွၵ်ႈ တီႈလုမ်း RCSS ၼၼ်ႉ ဢမ်ႇပႃး NLD - ဝႃႈၼႆ။

သိုၵ်းမၢၼ်ႈၵိုင်ႉၵၢင်ႉၶဝ်ႈမႃးၼႂ်းၵၢင်ၶူင်ႇႁူဝ်ႉႁိူၼ်းသေ ဢဝ်ၵွင်ႈငႃ၊ လၢတ်ႈဝႃႈယႃႇပေလုၵ်ႉသေၵေႃႉ၊ ႁႂ်ႈၼင်ႈယူႇဝႆႉၵူၺ်း၊ ဢိုတ်းၽၵ်း တူတၢင်းလင်ဝႆႉ ဢမ်ႇပၼ်တူင်ႉၼိုင်သင်။ ပေႃးယဝ်ႉထၢမ်ဝႃႈ ၽႂ်မီးပုၼ်ႈ ၽွၼ်းၼင်ႈလုမ်း။ ၵူၼ်းၸိူဝ်းယူႇၼႂ်းလုမ်းလၢတ်ႈဝႃႈ ပေႃးၶဝ်ႈႁိူၼ်းတေလႆႈထွတ်ႇၶႅပ်းတိၼ်၊ လွင်ႈၼႆႉပဵၼ် ၾိင်ႈတိုဝ်းၵမ်တႆးႁဝ်း။ ၵူၼ်းၸိူဝ်းဢမ်ႇၼုင်ႈၶူဝ်းသိုၵ်းၼၼ်ႉ ထွတ်ႇၶႅပ်း တိၼ်ယူႇသေတႃႉ၊ ၸိူဝ်းၼုင်ႈ ၶူဝ်းသိုၵ်းၼၼ်ႉတႄႉ ဢမ်ႇယွမ်းထွတ်ႇ သွၵ်းတိၼ်လႃးလႃး၊ သွၵ်ႈတဝ်ၶူဝ်းႁိူၼ်း ၶူဝ်းယေးၵူႈႁွင်ႈ၊ ၶူဝ်းလုမ်းၶူဝ်းၸႆးတင်းသဵင်ႈ။ တဵၵ်းၸႂ်ႉၵူၼ်းၸိူဝ်းယူႇ ၼႂ်းလုမ်း (RCSS/SSA) ၼၼ်ႉ လူင်းလၢႆးမိုဝ်း၊ တႅမ်ႈပၼ်ၸိုဝ်ႈ တီႈယူႇမၢႆၾၢင် ႁဵတ်းၵၢၼ်သင် ၸိူဝ်းၼႆႉ၊ ၸႂ်ႉၶၢဝ်း ယၢမ်းၵူတ်ႇထတ်း ႁိုင်ၸူဝ်ႈမူင်းပၢႆ- ႁူဝ်ၼႃႈၵူၼ်းၼုမ်ႇမိူင်းတႆး တီႈၵဵင်းတုင် လၢတ်ႈထႅင်ႈၼင်ႇၼႆ။

ၵဵဝ်ႇၵပ်းလွင်ႈၼႆႉ ၽူႈၼင်ႈလုမ်း RCSS တီႈၵဵင်းတုင်၊ ၸဝ်ႈၸေႃးမိူင်းၵေႃႈ လၢတ်ႈဝႃႈ- မိူဝ်ႈဝႃး (06/05/2014) မွၵ်ႈယၢမ်းၸမ်ၸမ် 12.00 မူင်းၼၼ်ႉ သိုၵ်းမၢၼ်ႈမႃးႁွင်ႉၵႂႃႇတီႈတိူင်းသိုၵ်းမၢၼ်ႈ သၢမ်ၸဵင်ႇၵဵင်းတုင် ဝၢႆးၼၼ်ႉၵေႃႈ သိုပ်ႇႁွင်ႉၵႂႃႇတီႈလုမ်း ၸယၽ ၵူၺ်းၵႃႈတူဝ်ၽူႈၵွၼ်း ၸယၽ ဢမ်ႇယူႇလႄႈႁ်ႈၼင်ႈပႂ်ႉယူႇတင်းႁိုင်တေႃႇထိုင် ဝၢႆႇ 4.00 မူင်း။ ၽွင်းၼင်ႇၼၼ် ၽူႈၵွၼ်း ၸယၽ သမ်ႉမႃးၵူတ်ႇၶူၼ်ႉတီႈလုမ်းၵပ်းသၢၼ် RCSS/SSA ၵဵင်းတုင်။

လွင်ႈၼႆႉပူၼ်ႉမႃးမိူဝ်ႈၶမ်ႈဝၼ်းတီႈ 05/05/2014 ၼၼ်ႉ ၵူၼ်းဝၢၼ်ႈၼမ်ႉလိၼ်းမႂ်ႇၶဝ် တိတ်းတေႃႇ ၾူၼ်းမႃး လၢတ်ႈဝႃႈ- ႁူဝ်ပဝ်ႈပႃႇတီႇႁူဝ်သိူဝ် ဝၢၼ်ႈၼမ်ႉလိၼ်းမႂ်ႇ ထုၵ်ႇသိုၵ်းမၢၼ်ႈ ၶလယ 245 ဢဵၼ်ႁႅင်းသိုၵ်း 30 ပၢႆ မႃးတိၵႂႃႇ၊ ပေႃႉထုပ်ႉ- ဝႃႈၼႆ။  ၵွပ်ႈၼၼ် ထိုင်မႃးမိူဝ်ႈဝႃး (ဝၼ်းတီႈ 06/05/2014) ၼႆႉ ၸင်ႇလႆႈတိတ်းတေႃႇ ယွၼ်းတၢင်းၸွႆႈ ထႅမ်တီႈပႃႇတီႇႁူဝ်သိူဝ်၊ ပႃႇတီႇသိူဝ်ၽိူၵ်ႇ၊ ပႃႇတီႇၼူၵ်ႉယုင်း (NLD) ဢၼ်ယူႇၼႂ်းဝဵင်းၵဵင်းတုင် မႃးဢုပ်ႇၵုမ်ၵၼ် ပိူဝ်ႈတႃႇႁႃတၢင်းၵႄႈလိတ်ႈပၼ်ႁႃ ၸွႆႈလုင်းၸၢႆးၵျႅၼ်ႇ ႁူဝ်ပဝ်ႈပႃႇတီႇႁူဝ်သိူဝ် ဝၢၼ်ႈၼမ်ႉလိၼ်းမႂ်ႇ။

လုင်းၸၢႆးၵျႅၼ်ႇၼႆႉ ပဵၼ်ၸၢဝ်းၶိူဝ်းဢႅၼ်ႇ၊ ပဵၼ်ႁူဝ်ပဝ်ႈ ပႃႇတီႇႁူဝ်သိူဝ် လုမ်းၽႄဝၢၼ်ႈၼမ်ႉလိၼ်းမႂ်ႇ ဢိူင်ႇပဵင်းတဝ်ႉ ၸႄႈဝဵင်းၵဵင်းတုင်။ လုမ်းပႃႇတီႇႁူဝ်သိူဝ်ၼႆႉၵေႃႈ ပိုတ်ႇဝႆႉတီႈမၼ်း။ ၼွၵ်ႈသေၼၼ်ႉ လုင်းၸၢႆးၵျႅၼ်ႇ ပဵၼ်ပႃး ႁူဝ်ၼႃႈ ၸၢဝ်းၶိူဝ်းဢႅၼ်ႇ ။

ၸိူင်ႉႁိုဝ်ၵေႃႈလီ ၽူႈၶၢၼ်ပၢၵ်ႇတီႈငဝ်ႈငုၼ်းပႃႇတီႇႁူဝ်သိူဝ် ၸၢႆးလဵၵ်ႉ လၢတ်ႈဝႃႈ- လၢႆးဢၼ်သိုၵ်းမၢၼ်ႈ ႁဵတ်းၼႆႉ၊ ၵႂႃႇႁဵတ်းၼိူဝ် ၵူၼ်းၵေႃႉဢၼ် ၶႂ်ႈၵေႃႇသၢင်ႈဝၢၼ်ႈမိူင်းလီၼၼ်ႉ မၼ်းဢမ်ႇၵိုင်ႇလီပဵၼ်။ မိူၼ်ၼင်ႇ ပဵၼ်မိူင်းဢၼ် ဢမ်ႇမီးမၢႆမီႈၽွင်းငမ်း၊ ဢမ်ႇမီးၸဝ်ႈမီးၸွမ်။ ၵွပ်ႈၼၼ် ၾၢႆႇၼိုင်ႈၵေႃႈ မၼ်းၼႄၾၢင်ႁၢင်ႈဝႃႈ ဝၢၼ်ႈမိူင်းႁဝ်းဢမ်ႇမီးပၵ်းပိူင်မၢႆမီႈႁူမ်ႇငမ်းၼိူဝ် ဝၢၼ်ႈမိူင်း/ၵူၼ်းမိူင်း၊ ႁဵတ်းႁႂ်ႈၵၢၼ်ၵေႃႇသၢင်ႈလွင်ႈငမ်းယဵၼ်ၸၢင်ႈလု။ ယွၼ်ႉပိူဝ်ႈပဵၼ် ၶၢဝ်းယၢမ်းလႅၵ်ႈလၢႆႈလႄႈ လၢႆးႁဵတ်း ၸိူင်ႉၼႆ မၼ်းဢမ်ႇၸႂ်ႈၾၢင်ႁၢင်ႈဢၼ်လီ။ ၵွပ်ႈၼၼ် ပႃႇတီႇႁူဝ်သိူဝ် ဢၼ်ၵူၼ်း ပႃႇတီႇႁူဝ်သိူဝ် ထုၵ်ႇတိၺွပ်းပေႃႉထုပ်ႉသေ ဢဝ်ၵႂႃႇၶင် ဝႆႉၸိူဝ်းၼႆႉ တေဢဝ်လၢႆးလုမ်းတြႃးသေ ႁဵတ်းသၢင်ႈၵႂႃႇ- ဝႃႈၼႆ။