ပူၼ်ႉမႃးမိူဝ်ႈဝၼ်းတီႈ 14-16/05/2014 ၊ ၵူၼ်းၼုမ်ႇၵူႈၸၢဝ်းၶိူဝ်း ၼႂ်းၸိုင်ႈတႆးပွတ်းႁွင်ႇ ၸတ်းပၢင်ႁူပ်ႉထူပ်း ဢုပ်ႇၵုမ် လႅၵ်ႈလၢႆႈပိုၼ်ႉႁူႉပၢႆးႁၼ် တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။ မီးၵူၼ်းၼုမ်ႇၶဝ်ႈႁူမ်ႈ မွၵ်ႈ 150 ပၢႆ။ ႁူဝ်ၶေႃႈဢုပ်ႇၵုမ်ၵၼ် မီး 4 ႁူဝ်ၶေႃႈ၊ ပိူင်လူင်မၼ်း ဝႆႉၼၵ်းလွင်ႈၸိုင်ႈမိူင်းႁူမ်ႈတုမ် ၾႅတ်ႉတရႄႇလ် လႄႈ ယႃႈမဝ်းၵမ်သေ ဢုပ်ႇၵုမ်ၵၼ်ၵႂႃႇ- ၼႆယဝ်ႉ။

ၽူႈမီးပုၼ်ႈၽွၼ်းတီႈပၢင်ၵုမ်လၢတ်ႈဝႃႈ- ႁဝ်းၶႃႈဢုပ်ႇၵုမ်ၵၼ်ၵႂႃႇမီး 4 ႁူဝ်ၶေႃႈ- 1.ၵူၼ်းၼုမ်ႇလႄႈ ယႃႈမဝ်းၵမ်။ 2.ၶူင်းၵၢၼ်လူင်ပွင်ၸိုင်ႈၼၼ်ႉ မႃးတုမ်ႉယွၼ်ႈၼိူဝ်ၵူၼ်းမိူင်းၸိူင်ႉႁိုဝ်။ 3.ၵူၼ်းၼုမ်ႇလႄႈ ပၼ်ႁႃၵၢၼ်မိူင်းၼႂ်းမိူင်း။ 4.ၵူၼ်းၼုမ်ႇလႄႈၵၢၼ်မိူင်း ၸိူဝ်းၼႆႉ။ ပိူင်လူင်တႄႉ လႆႈပိုတ်ႇဢူၵ်းပိုတ်ႇၸႂ် ဢုပ်ႇၵုမ်ၵၼ်လွင်ႈပၼ်ႁႃယႃႈမဝ်းၵမ် ဢၼ်တုမ်ႉယွၼ်ႈၵူၼ်းၼုမ်ႇၼႂ်းၸိုင်ႈတႆးပွတ်းႁွင်ႇ။ ထႅင်ႈလွင်ႈၼိုင်ႈ ပဵၼ်လွင်ႈၵၢၼ်ၵေႃႇသၢင်ႈလွင်ႈငမ်းယဵၼ် ဢၼ်ၵူၼ်းၼုမ်ႇၶဝ် ဢမ်ႇၶိုတ်းၸႂ်ၶိုတ်းၶေႃးၸိူဝ်းၼႆႉ၊ ၵေႃႉၼိုင်ႈလႄႈၵေႃႉၼိုင်ႈ ပိုတ်ႇဢူၵ်းပိုတ်ႇၸႂ်သေ ဢုပ်ႇၵုမ်ၵၼ်ၵႂႃႇၵႂၢင်ႈၵႂၢင်ႈၶႂၢင်ၶႂၢင်- ၸၢႆးသႅင်မိူင်း ၽူႈၶၢၼ်ပၢၵ်ႇၸုမ်းၵူၼ်းၼုမ်ႇ လၢတ်ႈၼႄၼင်ႇၼႆ။

ပိူဝ်ႈတႃႇပဵၼ်မႃးပၢင်ဢုပ်ႇၵုမ်ၼႆႉ မီးၵၢၼ်ၽိတ်ႈမွၵ်ႇထိုင်တီႈၵူၼ်းၼုမ်ႇ ၸိူဝ်းတူင်ႉၼိုင်ၵဵဝ်ႇၵပ်း ၵၢၼ်ၸိူဝ်ႉၸၢတ်ႈ၊ သုၼ်ႇလႆႈၵူၼ်း လႄႈ ၵၢၼ်မိူင်း ၸိူဝ်းမီးၼႂ်းၸိုင်ႈတႆးပွတ်းႁွင်ႇ။ ယိူင်းဢၢၼ်း ပိူဝ်ႈတႃႇမိုတ်ႈၵိုဝ်းၸမ်ၸႂ်ၵၼ်၊ ၵွပ်ႈဝႃႈၾၢႆႇၼိုင်ႈၵေႃႈ ပဵၼ်ၽွင်းၶၢဝ်းၵေႃႇသၢင်ႈ လွင်ႈယုမ်ႇယမ်ၵၼ်။ ၵွပ်ႈၼႆ ဢၼ်လႆႈဢုပ်ႇၵုမ်ၵၼ်ၵႂၢင်ႈၵႂၢင်ႈၶႂၢင်ၶႂၢင်ၼႆႉ ပဵၼ်ပိူင်ၵၢၼ်ၾႅတ်ႉတရႄႊလ်၊ လွင်ႈယႃႈမဝ်းၵမ်၊ ပၼ်ႁႃၵၢၼ်မိူင်းၼႂ်းမိူင်း၊ လွင်ႈငမ်းယဵၼ် ၸိူဝ်းၼႆႉ။

ၼႂ်းလွင်ႈငမ်းယဵၼ်ၼၼ်ႉ တူဝ်ယၢင်ႇ မိူၼ်ၼင်ႇၸုမ်းၸၢဝ်းၶိူဝ်း တင်း လူင်ပွင်ၸိုင်ႈမၢၼ်ႈ သမ်ႉပေႃး လူင်းလၢႆးမိုဝ်း ၵိုတ်းယိုဝ်းၵၼ်ၵေႃႇသၢင်ႈလွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ်ယဝ်ႉ၊ ၵွပ်ႈသင်ၼႂ်း မိူင်းႁဝ်းပႆႇၵတ်းယဵၼ် ၸိူဝ်းၼႆႉ။ လွင်ႈၾႅတ်ႉတရႄႇလ်ၼၼ်ႉၵေႃႈ ၵေႃႉၼိုင်ႈလႄႈၵေႃႉၼိုင်ႈ တၢင်းႁၼ်ထိုင် ပႆႇမိူၼ်ၵၼ်၊ ၵမ်ႈၽွင်ႈယင်းပႆႇႁူႉၸၵ်း ၾႅတ်ႉတရႄႇလ်ပဵၼ်သင်တႄႉတႄႉ။ မၢင်ၵေႃႉၼႆႉ ပေႃးဝႃႈၾႅတ်ႉတရႄႇလ်ၼႆ တီႇမူဝ်ႇၶရေႇသီႇတင်း သုၼ်ႇလႆႈၵူၼ်းၵေႃႈတိုၼ်းပႃးၸွမ်းၼႂ်း ၾႅတ်ႉတရႄႇလ် ၼၼ်ႉယဝ်ႉၼႆ ၶဝ်ၵေႃႈဢမ်ႇႁူႉ။ ၵွပ်ႈၼႆလႄႈ ၵူၼ်းၼုမ်ႇႁဝ်းၶဝ် ဢိၵ်ႇ ၸၢဝ်းၶိူဝ်းႁဝ်းတင်းၼမ် တင်းလၢႆၼႆႉ ယွၼ်ႉပိူဝ်ႈလူင်ပွင်ၸိုင်ႈ ၵုမ်ႇဢွၼ်ဝႃႈ တီႇမူဝ်ႇၶရေႇသီႇ ၼႆလႄႈ ၶဝ်ၵေႃႈထၢင်ႇဝႃႈ တီႇမူဝ်ႇၶရေႇသီႇ ပဵၼ်ပိူင်လူင်၊ တီႇမူဝ်ႇၶရေႇသီႇ လမ်ႇလွင်ႈသေပိူၼ်ႈ။ တီႈတႄႉမၼ်း ၵွပ်ႈပိူဝ်ႈဢမ်ႇမီး ၾႅတ်ႉတရႄႇလ်လႄႈ မိူင်းႁဝ်းၼႆႉ လႆႈထုၵ်ႇတဵၵ်းတဵင်ပေႉၵိၼ်၊ ဢမ်ႇမီးသုၼ်ႇလႆႈၽဵင်ႇပဵင်း၊  ဢမ်ႇၸၢင်ႈၸုၵ်းမၼ်ႈၼိူဝ်ၶႅင်ႈၶႃ တူဝ်ၵဝ်ႇၸိူဝ်းၼႆႉ ယင်းပႆႇႁူႉၵၼ်ၵေႃႈမီး။

ယွၼ်ႉလွင်ႈတၢင်းၸိူဝ်းၼႆႉသေ ဝၢၼ်ႈမိူင်းဢမ်ႇၶိုၼ်ႈယႂ်ႇမႂ်ႇသုင် ၸိူဝ်းၼႆႉၵေႃႈ လႆႈဢုပ်ႇၵုမ်ၵၼ်။ ဝၢႆးၼၼ်ႉ ပိူင်ၾႅတ်ႉတရႄႇလ်ၼႆႉ ပဵၼ်ဢီႈသင်တႄႉတႄႉ ၵူၼ်းၼုမ်ႇႁဝ်းၶဝ်ၵေႃႈၶဝ်ႈၸႂ်/ပွင်ႇၸႂ်ၵၼ်ၵႂႃႇသေ မီးၶေႃႈတူၵ်းလူင်းလႆႈၸႂ်ၵၼ်ဝႃႈ တေၶတ်းၸႂ်ႁူမ်ႈမိုဝ်းၵၼ်ႁဵတ်းသၢင်ႈၵႂႃႇ တေႃႇထိုင်ပေႃးလႆႈ ၾႅတ်ႉတရႄႇလ်- ၸၢႆးသႅင်မိူင်း သပ်းလႅင်းၼႄၼင်ႇၼႆ။

ပၢင်ဢုပ်ႇၵုမ်လႅၵ်ႈလၢႆႈပိုၼ်ႉႁူႉ ၵူၼ်းၼုမ်ႇၸၢဝ်းၶိူဝ်း ၸိုင်ႈတႆးပွတ်းႁွင်ႇ၊ ဢၼ်ၸတ်းႁဵတ်းတီႈဝဵင်းလႃႈသဵဝ်ႈ ယဝ်ႉတူဝ်ႈၵႂႃႇလီငၢမ်း မိူဝ်ႈဝၼ်းတီႈ 16/05/2014 ။ ၸုမ်းၵူၼ်းၼုမ်ႇယင်းလႆႈၸႂ်ၵၼ်ထႅင်ႈဝႃႈ တေၶတ်းၸႂ် ႁႂ်ႈပဵၼ်မႃး ပၢင်ႁူပ်ႉထူပ်းဢုပ်ႇၵုမ်ၵၼ် ၵူၼ်းၼုမ်ႇၼႂ်းၸိုင်ႈတႆးပတ်းပိုၼ်ႉ- ၼႆယဝ်ႉ။