ဢိင်ၼိူဝ်ၵူၼ်းမိူင်းႁိမ်းႁွမ်းၸႅင်ႈလၢတ်ႈသေ ပူၼ်ႉမႃးမိူဝ်ႈဝၼ်းသဝ် တီႈ 17/05/2014 ၵၢင်ၼႂ် ယၢမ်း 7 မူင်းပၢႆ၊ ၸဝ်ႈၼႃႈတီႈပလိၵ်ႈထႆး (ၽၢၵ်ႈ 5) ၵႂႃႇၶဝ်ႈၵူတ်ႇထတ်းထတ်း ႁၢၼ်ႉၵႃႇရႃႇဢူဝ်ႇၶေႇ ၸိတ်ႇၶမ်း ဢၼ်မီးၼႂ်းၵဵင်းမႆႇလႅၼ်း။ တီႉၺွပ်းလႆႈပီႈၼွင်ႉတႆး  ၸိူဝ်းလုၵ်ႉမိူင်းတႆးမႃးမႂ်ႇမႂ်ႇ လူၺ်ႈဢမ်ႇထုၵ်ႇမႅၼ်ႈ ၸွမ်းမၢႆမီႈဝၢၼ်ႈမိူင်းထႆး တင်းမူတ်းၵူၼ်း 38 ၵေႃႉ။ ၵမ်ႈၼမ် ပဵၼ်ပီႈၼွင်ႉတႆးၸိူဝ်းလုၵ်ႉၼႂ်း ၸႄႈတွၼ်ႈတူၼ်ႈတီး လႄႈ လွႆလႅမ် မႃး- ၼႆယဝ်ႉ။

လႆႈႁူႉဝႃႈမိူဝ်ႈဝႃးၼႆႉ သူင်ႇၸိူဝ်းၶဝ်ၵႂႃႇမီးတီႈၶွၵ်ႈ ၵွင်မိူင်း ယဝ်ႉ၊ ပေႃးဝႃႈထတ်းသၢင်ၶၻီး (ဢမု) ၵဵဝ်ႇၵပ်းလွင်ႈ ၵူၼ်းထႆး ဢၼ်ႁပ်ႉႁွင်းၶဝ်ဝႆႉ ဢၼ်မီးတီႈၵဵင်းမႆႇလႅၼ်းသေ တႅပ်းတတ်းပၼ်တူတ်ႈတၢမ်ႇၵူၼ်းထႆး ၼၼ်ႉယဝ်ႉ လႆႈႁူႉဝႃႈၸိူဝ်းၶဝ်ၵေႃႈ တေၺႃးလုမ်းတြႃးတတ်းသိၼ်၊ တေသူင်ႇပွၵ်ႈမိူဝ်း၊ ၾၢႆႇထႆးတေဢဝ်မွပ်ႈ ပၼ်တၢင်းလူင်ပွင်ၸိုင်ႈမၢၼ်ႈ တီႈဝဵင်းတႃႈၶီႈလဵၵ်း- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၸၢႆးၼွင်ႉ လၢတ်ႈဝႃႈ- ၵူၼ်းတၢင်းတူၼ်ႈတီးႁဝ်းၶႃႈလၢႆလၢႆၵူၺ်း ပႃး 8 ၵေႃႉ။ မိူဝ်ႈဝႃးၼႆႉ ၸိူဝ်းၶဝ်ၵႂႃႇမီးတီႈၶွၵ်ႈၵွင်မိူင်းသေ ၵၢင်ၼႂ်မိူဝ်ႈၼႆႉ ၶႃႈႁဝ်းလႆႈၵႂႃႇႁူပ်ႉၶဝ်၊ ပၼ်ၶဝ်ႈၼမ်ႉတၢင်းၵိၼ်ၶဝ်။ လႆႈႁူႉဝႃႈ မိူဝ်ႈလဵဝ်ၼႆႉ ႁပ်ႉႁွင်းဢဝ်ၸိူင်ႉႁိုဝ်ၵေႃႈ ဢဝ်ဢွၵ်ႇဢမ်ႇလႆႈယဝ်ႉ။ ယွၼ်ႉပိူဝ်ႈ ၶၻီးမၼ်းပႃး ၵႂႃႇၵိုၵ်းၸွမ်းၵူၼ်းထႆး ဢၼ်မီးတၢင်းၽိတ်း လၵ်ႉတေႃႉၵူၼ်းၶဝ်ႈမိူင်းၼၼ်ႉဝႆႉ။ ပေႃးဝႃႈတတ်းသိၼ် ပၼ်တူတ်ႈတၢမ်ႇၵူၼ်းထႆးၼၼ်ႉယဝ်ႉ ၸင်ႇတေတတ်းသိၼ် ဢဝ်ၶဝ်မိူဝ်းပွႆႇတႃႇၶီႈလဵၵ်းၶိုၼ်းၼႆၶႃႈဢေႃႈ- ဝႃႈၼႆ။

ႁၢင်ႈထၢႆႇ ဝႅပ်ႉသၢႆႉပလိၵ်ႈထႆး (ၽၢၵ်ႈ 5)

ၸွမ်းၼင်ႇမၢႆမီႈမိူင်းထႆးၼၼ်ႉ မၢႆမီႈမတ်ႉတႃ 63 လၢတ်ႈဝႃႈ- ၵူၼ်းမိူင်းထႆးၵေႃႉလႂ်ဢမ်ႇဝႃႈ သင်ဝႃႈၼမ်း ဢဝ်ၵူၼ်းတၢင်ႇမိူင်းၶဝ်ႈမႃးၼႂ်းမိူင်းထႆး၊ ဢမ်ႇၼၼ် ၸွႆႈပၼ်လွင်ႈငၢႆႈလူမ် ႁႂ်ႈၵူၼ်းတၢင်ႇမိူင်းၶဝ်ႈမႃးၼႂ်းမိူင်းထႆး လူၺ်ႈဢမ်ႇထုၵ်ႇမႅၼ်ႈၸွမ်းမၢႆမီႈဝၢၼ်ႈမိူင်းထႆးၸိုင် တၵ်းၺႃးတူၺ်ႈတၢမ်ႇၶွၵ်ႈ ဢမ်ႇပူၼ်ႉ 10 ပီ လႄႈၺႃးမၢပ်ႇမႂ်ငိုၼ်းထႆး 100,000 ဝၢတ်ႇ။ မၢႆမီႈမတ်ႉတႃ 64 လၢတ်ႈဝႃႈ- ၽူႈလႂ်ပၼ်ၵူၼ်းတၢင်ႇမိူင်း (ၵူၼ်းဢမ်ႇမီးဝတ်းဝႂ်) ပိုင်ႈဢိင်ႇယူႇၼႂ်းႁိူၼ်းၼႂ်းယေးၸဝ်ႈၵဝ်ႇ၊ ဢဝ်ၵူၼ်းၸိူဝ်းၼၼ်ႉလၵ်ႉသိူင်ႇဝႆႉ ဢမ်ႇၼၼ် ၸွႆႈထႅမ်ပၼ်သေလွင်ႈလွင်ႈ ႁႂ်ႈၵူၼ်းၸိူဝ်းၼၼ်ႉပူၼ်ႉလွတ်ႈ လွင်ႈတီႉၺွပ်းၸိုင် တၵ်းၺႃးတူတ်ႈ တၢမ်ႇၶွၵ်ႈဢမ်ႇပူၼ်ႉ 5 ပီ လႄႈ ၺႃးမၢပ်ႇမႂ်ငိုၼ်း ဢမ်ႇပူၼ်ႉ 50,000 ဝၢတ်ႇ။