မၢၵ်ႇတႅၵ်ႇတီႈပၢင်သဝ်းသိုၵ်းမၢၼ်ႈ ပွတ်းၼမ်ႉၶမ်း လုၵ်ႈၼိုင်ႈ၊ ႁဵတ်းႁႂ်ႈၵူၼ်းမိူင်း ဝၢတ်ႇၸဵပ်းၵေႃႉၼိုင်ႈ။ ဝၢႆးမၢၵ်ႇတႅၵ်ႇယဝ်ႉ သိုၵ်းမၢၼ်ႈၵႂႃႇတိၺွပ်းၵူၼ်းႁဵတ်းသူၼ် ႁဵတ်းၼႃးႁိမ်းၼၼ်ႉ ထတ်းထၢမ် ပေႃႉထုပ်ႉ။

ပူၼ်ႉမႃးမိူဝ်ႈဝၼ်းတီႈ 00/05/2014 မၢၵ်ႇတႅၵ်ႇလုၵ်ႈၼိုင်ႈ တီႈၼႂ်းၼႃး ႁိမ်းဝၢၼ်ႈၼွင်ၵဝ်ႇ ၸႄႈဝဵင်းၼမ်ႉၶမ်း (ၸိုင်ႈတႆးပွတ်းႁွင်ႇ)၊ ဢၼ်မီးႁိမ်းသဵၼ်ႈတၢင်းလူင် ပျီႇထွင်ႇၸု။ မၢၵ်ႇတႅၵ်ႇပွၵ်ႈၼႆႉ မီးၵူၼ်းဝၢၼ်ႈတိူဝ်ႉဝၢတ်ႇၸဵပ်းၵေႃႉၼိုင်ႈ။ ဝၢႆးမၢၵ်ႇတႅၵ်ႇယဝ်ႉ သိုၵ်းမၢၼ်ႈၵႂႃႇတိၺွပ်းၵူၼ်းမိူင်း ၸဝ်ႈႁႆႈၸဝ်ႈၼႃးၵေႃႉၼိုင်ႈသေ ႁွင်ႉၵႂႃႇထတ်းထၢမ်ပေႃႉထုပ်ႉ။

ၵဵဝ်ႇၵပ်းလွင်ႈၼႆႉ ၸဝ်ႈႁႆႈၸဝ်ႈၼႃးၵေႃႉၼိုင်ႈ ဢၼ်ၶဝ်ႈပႃးၼႂ်းပႃႇတီႇၵၢၼ်မိူင်းလၢတ်ႈဝႃႈ- တီႈမၢၵ်ႇတႅၵ်ႇၼႆႉ ပဵၼ်တီႈၼႂ်းၼႃး၊ ပဵၼ်တီႈတပ်ႉပၢင်သဝ်း ဢၼ်သိုၵ်းမၢၼ်ႈႁဵတ်းသုမ်ႉထဵင်သေယူႇသဝ်း။ ၵေႃႉဢၼ်တိူဝ်ႉဝၢတ်ႇၸဵပ်းၼႆႉ ပဵၼ်ၸၢႆးဢွင်ႇၺုၼ်ႉ၊ ဢႃႇယု 51 ပီ၊ ပဵၼ်လုၵ်ႈၶိင်းသွႆႈသႅင်ႁိူင်း၊ ယူႇပွၵ်ႉဢွင်ႇမဵတ်ႉတႃႇ ဝဵင်းၼမ်ႉၶမ်း။

ဢွၼ်ၼႃႈၼၼ်ႉ ၸၢႆးဢွင်ႇၺုၼ်ႉ ၵႂႃႇႁဵတ်းသူၼ်ႁဵတ်းၼႃး၊ ပႆလတ်းၵႂႃႇႁိမ်းပၢင်သဝ်း သုမ်ႉထဵင်သိုၵ်းမၢၼ်ႈ ၼၼ်ႉႄလႈ သိုၵ်းမၢၼ်ႈ ၵႂၵ်းမိုဝ်းႁွင်ႉမၼ်းဝႃႈ ၶဝ်ၶႂ်ႈၸပ်းၾႆးလႅၼ်းယႃႈ။ မိူဝ်ႈၸၢႆးဢွင်ႇၺုၼ်ႉ ၵႂႃႇၸပ်းၾႆး လႅၼ်းယႃႈပၼ်ၶဝ်ယဝ်ႉ ပႆဢွၵ်ႇပၢင်သဝ်း သိုၵ်းမၢၼ်ႈမႃး 4-5 ယၢင်ႈ ၵေႃႈယဵပ်ႇၺႃးမၢၵ်ႇတႅၵ်ႇႄလႈ တိူဝ်ႉၺႃးၸၢႆးဢွင်ႇၺုၼ်ႉ တင်း သိုၵ်းမၢၼ်ႈၼင်ႇၵၼ်။ ၵူၺ်းၵႃႈ သိုၵ်းမၢၼ်ႈၸိူဝ်းၼၼ်ႉ ၼုင်ႈဝႆႉသိူဝ်ႈၶူဝ်း ႁႄႉမၢၵ်ႇလႄႈ ၸိူဝ်းၶဝ် ဢမ်ႇဝၢတ်ႇၸဵပ်းသင်။ ၸၢႆးဢွင်ႇၺုၼ်ႉတႄႉ တိူဝ်ႉၸွမ်းဢူၵ်း၊ ၵိင်ႇႁႄႉ၊ ၸွမ်းပဵမ်ႉမၼ်းၸိူဝ်းၼႆႉ။ လႆႈၶဝ်ႈယူတ်းယႃဝႆႉတီႈ ႁူင်းယႃဝဵင်းၼမ်ႉၶမ်း- ၸဝ်ႈႁႆႈၸဝ်ႈၼႃး ဢၼ်ၶဝ်ႈပႃးၼႂ်း ပႃႇတီႇၵၢၼ်မိူင်း လၢတ်ႈၼႄထႅင်ႈၼင်ႇၼႆ။

ဝၢႆးမၢၵ်ႇတႅၵ်ႇယဝ်ႉ သိုၵ်းမၢၼ်ႈၵႂႃႇတိၺွပ်းႁွင်ႉဢဝ် ၸၢႆးၸူဝ်းၼွင်ႇ၊ ဢႃႇယု 40 ပီ၊ ၵူၼ်းဝၢၼ်ႈၵုၼ်လူင်၊ လုၵ်ႈၶိင်း မၢၼ်ႇသႅင်ဢၢႆႈဢေး၊ ၽွင်းမၼ်းၸၢႆးတိုၵ်ႉႁဵတ်းသူၼ်ႁဵတ်းၼႃး ယူႇႁိမ်းႁူင်းထၢတ်ႈၾႆးၾႃႉ သူၺ်ႇလီႇ၊ တီႈဢမ်ႇပေႃးၵႆ ၵၼ်တင်းတီႈမၢၵ်ႇတႅၵ်ႇ။ ၵႂႃႇႁွင်ႉမၼ်းၸၢႆးသေတိၺွပ်း ထတ်းထၢမ် ပေႃႉထုပ်ႉ ။ ဝၢႆးမႃးၵူၼ်းဝၢၼ်ႈၶဝ် ၵႂႃႇႁပ်ႉႁွင်းဝႃႈ မၼ်းၸၢႆးၵႂႃႇႁဵတ်းၵၢၼ်သူၼ်ၵူၺ်း၊ မၼ်းဢမ်ႇမီး တၢင်းၽိတ်းသင် ၼႄလႈသိုၵ်းမၢၼ်ႈၸင်ႇပွႆႇပၼ်ၶိုၼ်း- ဝႃႈၼႆ။

တင်ႈတႄႇၼႂ်းၵၢင်လိူၼ်ဢေႊပရိူဝ်ႊလ် (2014)မႃးၼႆႉ သိုၵ်းမၢၼ်ႈထႅမ်ႁႅင်းသိုၵ်း၊ ၶိုၼ်ႈၵႂႃႇတၢင်းၸိုင်ႈ တႆးပွတ်းႁွင်ႇ၊ လတ်းၵႂႃႇ တၢင်းမိူင်းၶၢင် ဢမ်ႇထၢတ်ႇဢမ်ႇဝၢႆး၊ ပိူဝ်ႈတႃႇယိုဝ်းၸုမ်းသိုၵ်းၸၢဝ်းၶိူဝ်း (သိုၵ်းၶၢင်၊ သိုၵ်းတႆး)။ ပေႃးသိုၵ်းမၢၼ်ႈၶဝ်တူင်ႉၼိုင် ၼႂ်းပိုၼ်ႉတီႈၼမ်မႃးၵေႃႈ ၼႂ်းပိုၼ်ႉတီႈၼၼ်ႉ မီးမၢၵ်ႇတႅၵ်ႇတီႈ ၼိုင်ႈယဝ်ႉတီႈၼိုင်ႈၼမ်မႃး၊ ပဵၼ်ၸုမ်းလႂ်ႁၢင်ႈၵၢင်ဝႆႉဢမ်ႇႁူႉ။ ၵူၺ်းၵႃႈ ဢၼ်တိူဝ်ႉဝၢတ်ႇၸဵပ်းယွၼ်ႉမၢၵ်ႇ တႅၵ်ႇလၢႆပွၵ်ႈလၢႆၵမ်းၸိူဝ်းၼႆႉ ၵမ်ႈၼမ် ပဵၼ်ၵူၼ်းမိူင်း။