ဢိင်ၼိူဝ်ပူႇၵႄႇဝၢၼ်ႈၾၢႆၶႄႇ ၸႄႈဝဵင်းမိူင်းတူၼ် ၸိုင်ႈတႆးပွတ်းဢွၵ်ႇ၊ ႁၢႆဢွၵ်ႇႁိူၼ်းၵႂႃႇသေ သိုၵ်းမၢၼ်ႈ ၼႄးဝႃႈပဵၼ်ၼမ်ႉမိုဝ်းသိုၵ်းတႆး။ ပိူဝ်ႈတႃႇတွပ်ႇတႅၼ်းၼၼ်ႉ သိုၵ်းမၢၼ်ႈၵႂႃႇသွၵ်ႈလုမ်း RCSS တီႈၵဵင်းတုင်လႄႈ တိၺွပ်းႁူဝ်ပဝ်ႈပႃႇတီႇႁူဝ်သိူဝ် ဝၢၼ်ႈၼမ်ႉလိၼ်းမႂ်ႇ။

ပူၼ်ႉမႃးမိူဝ်ႈဝၼ်းတီႈ 22/04/2014 ဢိင်ၼိူဝ်ပူႇၵႄႇ ဝၢၼ်ႈၾၢႆၶႄႇႁၢႆၵႂႃႇၼႆႉသေ ၾၢႆႇတပ်ႉသိုၵ်းမၢၼ်ႈ ၸိၼႄးဝႃႈ ပဵၼ်ၼမ်ႉမိုဝ်းၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) တိၺွပ်းၵႂႃႇ။ ၵပ်းၵၢႆႇလွင်ႈၼႆႉ ဢူးဢွင်ႇမိၼ်း (ၵႅမ်ႁူဝ်ပဝ်ႈ 2 ၸုမ်းၶိုင်ပွင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် UPWC) တင်း ၽွင်းလူင်ၾၢႆႇႁူမ်ႇလူမ်ႈလႄႈလႅၼ်လိၼ် ၸႄႈမိူင်းတႆးၵေႃႈ တႅမ်ႈလိၵ်ႈမႃးၸူးတီႈ RCSS/SSA  ႁႂ်ႈသူင်ႇ/ပွႆႇပၼ်ၶိုၼ်း။

ၵဵဝ်ႇၵပ်းလွင်ႈၼႆႉ ၸဝ်ႈႁၢၼ်လၢဝ်သႅင် ၽူႈၶၢၼ်ပၢၵ်ႇ RCSS/SSA လၢတ်ႈဝႃႈ- ဢၼ်ပူႇၵႄႇဝၢၼ်ႈၾၢႆၶႄႇ ႁၢႆၵႂႃႇၼၼ်ႉ ႁဝ်းၶႃႈဢမ်ႇလႆႈႁပ်ႉႁူႉသင်ၸွမ်း။ ပိူဝ်ႈတႃႇပွႆႇပၼ်ၶိုၼ်းၼၼ်ႉ ဢူးဢွင်ႇမိၼ်း ၶဝ်ၵေႃႈတႅမ်ႈလိၵ်ႈ တုၵ်းယွၼ်းမႃး၊ ၵူၺ်းၵႃႈ ႁဝ်းၶႃႈၵေႃႈတွပ်ႇၵႂႃႇဝႃႈ ႁဝ်းၶႃႈဢမ်ႇလႆႈႁပ်ႉႁူႉၸွမ်း။ လွင်ႈၼႆႉ ၸဝ်ႈယွတ်ႈသိုၵ်း ႁူဝ်ပဝ်ႈၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) တႅမ်ႈလိၵ်ႈသူင်ႇထိုင် ဢူးဢွင်ႇမိၼ်း ၸဵမ်မိူဝ်ႈဝၼ်းတီႈ 09/05/2014 - ဝႃႈၼႆ။

ၵပ်းၵၢႆႇလွင်ႈၼႆႉ ၵူၼ်းၸမ်ၸႂ်ၾၢႆႇၸွပ်ႇၶၢဝ်ႇသိုၵ်းမၢၼ်ႈတႄႉ လၢတ်ႈဝႃႈ- RCSS တိၺွပ်းၵႂႃႇ ၵူၼ်းဝၢၼ်ႈ ၵူၼ်းမိူင်း ဢၼ်ဢမ်ႇမီးတၢင်းၽိတ်းသင်။ ပိူဝ်ႈတႃႇပွႆႇပၼ်ၶိုၼ်းၼၼ်ႉ ယူႇတီႈတပ်ႉသိုၵ်းမၢၼ်ႈသေ လႆႈတုၵ်းယွၼ်းၵႂႃႇတီႈ တပ်ႉသိုၵ်းၸိုင်ႈတႆး (RCSS/SSA) ။ ၶဝ်သမ်ႉဢမ်ႇပွႆႇပၼ်ၵူၺ်းပႆႇပေႃး သမ်ႉပၢႆၶႃႈႁႅမ် ပႅတ်ႈလႄႈ ပိူဝ်ႈတႃႇတွပ်ႇတႅၼ်းၶဝ် ၶိုၼ်းၼၼ်ႉ ႁဝ်းၸင်ႇလႆႈၵႂႃႇတိ ၵူၼ်းဢၼ်လႆႈငိၼ်းဝႃႈ တိတ်းတေႃႇ ၵပ်းသိုပ်ႇ RCSS/SSA ႁူဝ်ပဝ်ႈပႃႇတီႇ SNLD ဝၢၼ်ႈၼမ်ႉလိၼ်းမႂ်ႇ။ ၾၢႆႇၼိုင်ႈၵေႃႈ ပိူဝ်ႈတႃႇႁႃတၢင်းၽိတ်း RCSS/SSA ၼၼ်ႉ ၸင်ႇမႃးသွၵ်ႈလုမ်း RCSS/SSA ၊ ၵူၺ်းၵႃႈ ဢၼ်မႃးသွၵ်ႈၸိူဝ်းၼၼ်ႉ ဢမ်ႇလႆႈသင်- ဝႃႈၼႆ။

ၸဝ်ႈၸေႃးမိူင်း ၽူႈမီးပုၼ်ႈၽွၼ်း RCSS/SSA တီႈလုမ်းၵဵင်းတုင် ၵေႃႈလၢတ်ႈဝႃႈ- ဢိင်ၼိူဝ်ပူႇၵႄႇဝၢၼ်ႈ ၾၢႆၶႄႇႁၢႆၵႂႃႇသေ ၽူႈၵွၼ်းၾၢႆႇႁူမ်ႇလူမ်ႈသိုၵ်း (ၸယၽ မူး) တီႈၵဵင်းတုင် ႁွင်ႉၵဝ်ၶႃႈၵႂႃႇတွင်ႈထၢမ်၊ ၵဝ်ၶႃႈတွပ်ႇဝႃႈဢမ်ႇလႆႈႁပ်ႉႁူႉၸွမ်း။ ၵူၺ်းၵႃႈ တေၼမ်းဢဝ်လွင်ႈၼႆႉႁၢႆးငၢၼ်းၼႄၸၼ်ႉတၢင်းၼိူဝ်ယူႇ။  ၵၢင်ၶမ်ႈမွၵ်ႈ 8 မူင်းပၢႆၼၼ်ႉ ၸင်ႇပွၵ်ႈၶိုၼ်းတီႈလုမ်း၊ ပေႃးၽႅဝ်မႃး တီႈလုမ်းၵေႃႈ ၵူၼ်းဝၢၼ်ႈၼမ်ႉလိၼ်း မႂ်ႇၶဝ် သမ်ႉထူဝ်း/တိတ်းတေႃႇၾူၼ်းမႃး လၢတ်ႈဝႃႈ- ႁူဝ်ပဝ်ႈပႃႇတီႇႁူဝ်သိူဝ် ဝၢၼ်ႈၼမ်ႉလိၼ်းမႂ်ႇ ထုၵ်ႇသိုၵ်းမၢၼ်ႈ ၶလယ 245 ဢဵၼ်ႁႅင်းသိုၵ်း 30 ပၢႆမႃးတိၵႂႃႇ၊ ဢဝ်ၵႂႃႇပေႃႉထုပ်ႉ၊ ၶႅၼ်းတေႃႈၵႄႈလိတ်ႈ ပၼ်ၽႂ်းၽႂ်း။ လၢႆးသိုၵ်းမၢၼ်ႈႁဵတ်းၼႆႉ မၼ်းဢမ်ႇထုၵ်ႇမႅၼ်ႈ၊ ႁဝ်းၶႃႈၼႆႉ ပိူဝ်ႈတႃႇဢဝ်လၢႆးၵတ်းယဵၼ်ၵႄႈ လိတ်ႈပၼ်ႁႃသေ ၸင်ႇလႆႈၸႂ်ၵၼ်မႃးပၵ်းလုမ်းတီႈဝဵင်းၵဵင်းတုင်၊ ပိူဝ်ႈတႃႇၵႄႈလိတ်ႈပၼ်ႁႃ ၼႂ်းဝူင်ႈၵၢင်တပ်ႉသိုၵ်းမၢၼ်ႈလႄႈ RCSS/SSA  ၊ ၼႂ်းဝူင်ႈၵၢင်လူင်ပွင်ၸိုင်ႈလႄႈ RCSS/SSA ၊ ၼႂ်းဝူင်ႈၵၢင်ၵူၼ်းမိူင်းလႄႈ RCSS ။ လၢႆးႁဵတ်းၸိူင်ႉၼႆၼႆႉ ႁဝ်းၶႃႈဢမ်ႇယွမ်းႁပ်ႉလႆႈ- ဝႃႈၼႆ။

ပူႇၵႄႇ/ၽူႈၵွၼ်းဝၢၼ်ႈၾၢႆၶႄႇ ဢၼ်ႁၢႆၵႂႃႇၼႆႉ ၸိုဝ်ႈႁွင်ႉဢူးတိၼ်ႇဢွင်ႇ၊ ယၢမ်ႈႁၢပ်ႇၵၢၼ်ၼႂ်းတပ်ႉ သိုၵ်းမၢၼ်ႈ ၶလယ 65 ဢၼ်ပၵ်းတီႈမိူင်းတူၼ်၊ ၸၼ်ႉႁူဝ်သိုၵ်း (2 မႆ)။ ထိုင်မႃးမိူဝ်ႈဝၼ်းတီႈ 07/05/2014 ၼၼ်ႉ ၵူၼ်းဝၢၼ်ႈလႆႈႁၼ်တူဝ်တၢႆမၼ်း တီႈႁိမ်းသူၼ်ထူဝ်ႇၼဝ်ႈၵူၼ်းဝၢၼ်ႈၵေႃႉၼိုင်ႈ။ ၵူၺ်းၵႃႈ ၵူၼ်းဝၢၼ်ႈၵႂႃႇ ထတ်းတူၺ်းတီႈၶၢပ်ႈတူဝ်တၢႆမၼ်းၼၼ်ႉ ၵမ်ႈၽွင်ႈဝႃႈ ဢမ်ႇပေႃးမိူၼ်ဢူးတိၼ်ႇဢွင်ႇ၊ ၶေးပဵၼ်တၢင်ႇၵေႃႉ ယူဝ်ႉ ဝႃႈၼႆၵေႃႈမီး။ ၵမ်ႈၽွင်ႈယင်းဝႃႈ ဢူးတိၼ်ႇဢွင်ႇၼႆႉ ယင်းတေပႆႇ တၢႆႁိုဝ် ဝႃႈၼႆလူးၵွၼ်ႇ။

လႆႈႁူႉထႅင်ႈဝႃႈ ဢူးတိၼ်ႇဢွင်ႇၼႆႉ ဝၢႆးဢွၵ်ႇသိုၵ်းယဝ်ႉ မႃးပႂ်ႉတီႈလၢၼ်ႇ/ၵဵတ်ႉၵဝ်ႇသိုၵ်းမၢၼ်ႈသေ ၵဵပ်းၵိၼ်ၶွၼ်ႇၵူၼ်းၵႂႃႇ မိူင်းထႆး ၼိုင်ႈၵေႃႉၵဵပ်း 150 ၵျၢတ်ႈ။ ၾၢႆႇၼိုင်ႈၵေႃႈ မီးၶၢဝ်ႇလိုဝ်းဝႃႈဢူးတိၼ်ႇ ဢွင်ႇၼႆႉ ပဵၼ်သၢႆၶၢဝ်ႇၶွင်သိုၵ်းမၢၼ်ႈၼႆၵေႃႈမီး။ (လွင်ႈၵူၼ်းဝၢၼ်ႈ ဝႃႈ ဢူးတိၼ်ႇဢွင်ႇ  ပဵၼ်သၢႆလပ်ႉသိုၵ်း မၢၼ်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ ပႆႇယိုၼ်ယၼ်)။

ၵူၼ်းၼႂ်းၸႄႈဝဵင်းမိူင်းတူၼ် ၵေႃႉၼိုင်ႈၵေႃႈလၢတ်ႈဝႃႈ- ဢူးတိၼ်ႇဢွင်ႇၼႆႉ တၢင်းမိူင်းမၢၼ်ႈၵေႃႈမီးမေး၊ ဢွၵ်ႇၼႃႈသိုၵ်းယဝ်ႉ မႃးတႄႇၼႃႈႁိူၼ်းတီႈဝၢၼ်ႈၾၢႆၶႄႇသေ မႃးပဵၼ်ၽူႈၵွၼ်းဝၢၼ်ႈၾၢႆၶႄႇၼႆႉ 2 ပွၵ်ႈ။ မိူဝ်ႈၵူႈပွၵ်ႈပဵၼ်ၵူၼ်းလူင်ဝၢၼ်ႈ (ယႂႃႇတၵျီး)၊ ၵူၺ်းၵႃႈ ပၢၼ်သိုၵ်းမၢၼ်ႈလႅၵ်ႈလၢႆႈမႃးၼႆႉ ယင်းပႆႇမီးၼိုင်ႈပီ မႃးပဵၼ်ထႅင်ႈၽူႈၵွၼ်းဝၢၼ်ႈၾၢႆၶႄႇ (ယႂႃႇဢူၵ်ႉၶျူၵ်ႉယေးမူး)။ တီႈဝၢၼ်ႈၾၢႆၶႄႇၼႆႉၵူၺ်း မၼ်းမီးမေး 2 ၵေႃႉ၊  မေးၵဝ်ႇမၼ်းၼၼ်ႉ မၼ်းၵႆႉပေႃႉထုပ်ႉၼႅၼ်ႇလႄႈ ပၢႆႈၵႂႃႇတၢင်းမိူင်းထႆး။ မိူဝ်ႈလဵဝ် ဢဝ်ဝႆႉမေးမႂ်ႇၵေႃႈ လႆႈငိၼ်းဝႃႈ ၵႆႉၽိတ်းၽႅၵ်ႇသေ ပေႃႉထုပ်ႉၵၼ်လၢႆပွၵ်ႈယဝ်ႉ။ လွင်ႈၼႆႉ ပဵၼ်ၾိင်ႈထုင်းလွင်ႈၽူဝ် လွင်ႈမေး လႄႈ ႁဝ်းၶႃႈဢမ်ႇၶႂ်ႈဝႃႈသင်ၸွမ်း၊ ယူႇတီႈႁဝ်းၶႃႈၵူၼ်းဝၢၼ်ႈတႄႉ ႁၵ်ႉၵေႃႈဢမ်ႇႁၵ်ႉ၊ ၸင်းၵေႃႈဢမ်ႇ ၸင်းမၼ်း၊ ဝႆႉၸႂ်ၽႃႇၵၢင်ဝၢင်းၶိုင်ႈၵူၺ်း- ဝႃႈၼႆ။

တပ်ႉသိုၵ်းၸိုင်ႈတႆး RCSS/SSA ၼႆႉ တင်းလူင်ပွင်ၸိုင်ႈမၢၼ်ႈ ၵေႃႇသၢင်ႈဝႆႉလွင်ႈငမ်းယဵၼ် ၸၼ်ႉၸိုင်ႈမိူင်း ႁူမ်ႈတုမ်။ ပိူင်ပဵၼ် ဢၼ်ပဵၼ်မႃးၼႆႉ ယူႇတီႈ RCSS/SSA ႁၼ်ဝႃႈ ၽွင်းယၢမ်းၵေႃႇသၢင်ႈလွင်ႈငမ်း ယဵၼ်လႄႈ ဢဝ်လၢႆးႁုၵ်းႁၢႆႉ ၼွၵ်ႈပၵ်းပိူင် မၢႆမီႈသေႁဵတ်းတေႃႇၵၼ်ၸိူဝ်းၼႆႉ ဢမ်ႇတူၵ်းထုၵ်ႇ။ ၵွပ်ႈၼၼ် ဢၼ်ၵႂႃႇသွၵ်ႈ လုမ်း RCSS တီႈၵဵင်းတုင်လႄႈသင်၊ ဢၼ်ၼႄး ႁူဝ်ပဝ်ႈဝၢၼ်ႈၼမ်ႉလိၼ်းမႂ်ႇ ၶွင်ပႃႇတီႇႁူဝ်သိူဝ် ဝႃႈပဵၼ်သၢႆသိုၵ်းတႆးသေ ဢဝ်ၵႂႃႇပေႃႉထုပ်ႉႁႅမ်လႄႈသင်၊ ယူႇတီႈႁဝ်းၶႃႈ ႁၼ်ထိုင်ဝႃႈမၼ်းဢမ်ႇထုၵ်ႇမႅၼ်ႈ။ ၵွပ်ႈၼၼ်လႄႈ ယူႇတီႈတပ်ႉသိုၵ်းၸိုင်ႈတႆး (RCSS/SSA) သေ ၸင်ႇလႆႈတႅမ်ႈလိၵ်ႈထိုင်ပႃး UPWC သေ ႁႂ်ႈၵႄႈလိတ်ႈပၼ် ပၼ်ႁႃလွင်ႈၼႆႉၽႂ်းၽႂ်း- ၼႆယူႇ။