ၼႂ်းတိုဝ်ႉတၢင်းဝၼ်းလုၵ်ႉၽိုၼ်ႉ ၶွပ်ႈၶူပ်ႇ 56 ပီၼႆႉ SSPP/SSA ႁဵတ်းလိၵ်ႈယိုၼ်ႈထိုင် RCSS/SSA မၢႆတွင်းဝၼ်းလုၵ်ႉၽိုၼ်ႉဝႃႈ SSA ပဵၼ်တပ်ႉဢၼ်လဵဝ်ၵၼ်ၵူၺ်း၊ ဢမ်ႇမီးတပ်ႉႁွင်ႇ တပ်ႉၸၢၼ်း။

လိူၼ်မေႇ 21 ဝၼ်း ဢၼ်ပဵၼ်ဝၼ်းလုၵ်ႉၽိုၼ်ႉ ၶွပ်ႈၶူပ်ႇ 56 ပီ 2014 ၼႆႉ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၸတ်းႁဵတ်းပၢင်ၵႅဝ်ႈ ၶုၵ်းထူပ်းဝၼ်းလုၵ်ႉၽိုၼ်ႉ တီႈငဝ်ႈၸိုင်ႈလွႆတႆးလႅင်း။ ၾၢႆႇၼိုင်ႈၵေႃႈ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ၵေႃႈ ၸတ်းပၢင်ၶုၵ်းထူပ်း တီႈငဝ်ႈငုၼ်းဝၢၼ်ႈႁႆး။ ၼႂ်းတိုဝ်ႉတၢင်းဝၼ်းလုၵ်ႉၽိုၼ်ႉၼႆႉ ယူႇတီႈငဝ်ႈငုၼ်းဝၢၼ်ႈႁႆး (SSPP/SSA) သေ လႆႈယိုၼ်ႈလိၵ်ႈသူင်ႇထိုင် လွႆတႆး လႅင်း RCSS/SSA ဝႃႈ SSA ပွတ်းႁွင်ႇပွတ်းၸၢၼ်း ၼႆႉ ဢမ်ႇထုၵ်ႇလီမီး၊ ပဵၵ်ႉသမ်ႉဝႃႈ ပဵၼ် SSA  ပွတ်းႁွင်ႇ ပွတ်းၸၢၼ်းၵေႃႈ ႁဝ်းပဵၼ်တပ်ႉဢၼ်လဵဝ်ၵၼ်ၵူၺ်း- ၼႆယဝ်ႉ။

ၼႂ်းလိၵ်ႈယိုၼ်ႈထိုင်ၼၼ်ႉ တႅမ်ႈဝႆႉဝႃႈ- ဢိင်ၼိူဝ်ၽူႈၼမ်းမၢၼ်ႈ ၸိူဝ်းလႆႈဢမ်းၼၢၸ်ႈ(ဢႃႇၼႃႇ)ၶဝ် ဢမ်ႇႁဵတ်းၸွမ်း ၶေႃႈၵိၼ်ၵႅၼ်ႇပၢင်လူင်သေ ၸင်ႇမီးမႃးၵၢၼ်လုၵ်ႉၽိုၼ်ႉ၊ ယၢမ်းလဵဝ်လႆႈမႃး 56 ပီယဝ်ႉ။ ၵွပ်ႈၼႆ ၼင်ႇႁိုဝ်ယိူင်းဢၢၼ်းႁဝ်းၶႃႈ ပေႃးတေထိုင်တီႈထိုင်လႅၼ်ၼၼ်ႉ SSA ဢၼ်မီးဝႃႈပွတ်းႁွင်ႇ ပွတ်းၸၢၼ်း/ ပွတ်းဢွၵ်ႇၸိူဝ်းၼႆႉ ဢမ်ႇလီၸႅၵ်ႇယဝ်ႉ၊ ႁဝ်းၶႃႈပဵၼ် SSA ဢၼ်လဵဝ်ၵၼ်ၵူၺ်း- ဝႃႈၼႆ။

ယိူင်းဢၢၼ်းပိူဝ်ႈတႃႇလွတ်ႈလႅဝ်းၵွၼ်းၶေႃသေ ၸဝ်ႈၾႃႉမိူင်းတႆး၊ ၽူႈၼမ်းတႆး ဢိၵ်ႇပႃးၽူႈၼမ်းၸၢဝ်းၶိူဝ်း ၶျၢင်း/ၶၢင် ႁူပ်ႉဢုပ်ႇၵုမ်ၵၼ် တင်းၽူႈၼမ်းမၢၼ်ႈ ဢွင်ႇသၢၼ်းသေ လူင်းလၢႆးမိုဝ်းၶေႃႈၵိၼ်ၵႅၼ်ႇၵၼ်မိူဝ်ႈ ပီ 1947 တီႈဝဵင်းပၢင်လူင် ၸိုင်ႈတႆးပွတ်းၸၢၼ်း။ ၼႂ်းပိူင်ငဝ်ႈပိုင်းမိူင်း 1947 လၢတ်ႈဝႆႉၶေႃႈလႆႈၸႂ်ဝႃႈ ပေႃးႁူမ်ႈႁွမ်းၵၼ်တဵမ် 10 ပီယဝ်ႉ သင်ဝႃႈမီးလွင်ႈ ဢမ်ႇမိူၼ်ၼင်ႇၸႂ်၊ ဢမ်ႇမီးလွင်ႈၽဵင်ႇပဵင်းၸိူဝ်းၼႆႉ ၸိုင်ႈမိူင်းလႂ် ၶႂ်ႈၽၢတ်ႇဢွၵ်ႇၵေႃႈလႆႈ- ၼႆယဝ်ႉ။

ဝၢႆးၸိုင်ႈတႆး ဢဝ်လွတ်ႈလႅဝ်းၵွၼ်းၶေႃၸွမ်းၸိုင်ႈမိူင်းမၢၼ်ႈ မိူဝ်ႈပီ 1948 ယဝ်ႉ ယူႇႁူမ်ႈႁွမ်းၵၼ်မႃး၊ ဝၢႆးၼၼ်ႉ ၵွပ်ႈလႆႈထုၵ်ႇ သိုၵ်းမၢၼ်ႈပူၼ်ႉပႅၼ်ၶဝ်ႈမႃးၼႂ်းၸိုင်ႈတႆး၊ ဢဝ်တပ်ႉသိုၵ်းမၢၼ်ႈၶဝ် ၶဝ်ႈမႃးဝၢင်းၼႂ်း ၸိုင်ႈတႆးသေ ၶီႇၼဵၵ်းတဵၵ်းတဵင်ပေႉၵိၼ်၊ ၵၼ်ႉၸၼ် လူလၢႆ၊ ဢဝ်တၢႆ၊ ၽဵဝ်ႈၸိူဝ်ႉၽဵဝ်ႈၶိူဝ်း မူၺ်ႉမွတ်ႇ၊  ႁဵတ်းႁႂ်ႈၵူၼ်းမိူင်းၸိုင်ႈတႆး ဢမ်ႇဢူတ်းယိူၼ်ႉၵၼ်ႈလႆႈယဝ်ႉလႄႈ ထိုင်မႃး 1958 လိူၼ်မေႇ 21 ဝၼ်း ၵၢၼ်ယူႇႁူမ်ႈႁွမ်းၵၼ် ထူၼ်ႈထိုင်လႆႈမႃး ၶွပ်ႈတဵမ် 10 ပီ ယဝ်ႉၵေႃႈ ဢမ်ႇလီသင်မႃး ယိင်ႈၶႅၼ်းႁၢႆႉၸႃႉ လိူဝ်ၵဝ်ႇတိၵ်းတိၵ်းလႄႈ ၸဝ်ႈၼွႆႉ (သေႃးယၼ်ႇတ) ၸင်ႇဢွၼ်ႁူဝ် ၽူႈၸိူဝ်းႁၵ်ႉၸၢတ်ႈ 31 ၵေႃႉသေ ၵေႃႇတင်ႈတပ်ႉသိုၵ်း “ၼုမ်ႇသိုၵ်းႁၢၼ် ႁဵတ်းၵၢၼ်ၵွၼ်းၶေႃ” ပိူဝ်ႈတႃႇတေႃႇသူႈ တိုၵ်းတေႃး ဢဝ်ၸိုင်ႈတႆး ပူတ်းပွႆႇလႆႈလွင်ႈ ထၢင်ႇႁၢင်ႈ လွတ်ႈလႅဝ်းၵွၼ်းၶေႃမႃးတေႃႇႁၢၼ်ႉၼႆႉ။