ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ၸတ်းပၢင်ၶုၵ်းထူပ်း ဝၼ်းလၢႆးလုၵ်ႉၽိုၼ်ႉ ၸိုင်ႈတႆး ၶွပ်ႈၶူပ်ႇ 56 ပီ တီႈငဝ်ႈငုၼ်းဝၢၼ်ႈႁႆး။ မီးၽူႈယႂ်ႇၵူၼ်းလူင် ၵူၼ်းသိုၵ်းၶဝ်ႈ ႁူမ်ႈၼပ်ႉႁူဝ်ပၢၵ်ႇ။

ဝၼ်းတီႈ 21/05/2014 ယၢမ်း 06:00-08:00 မူင်း၊ ၵႅမ်ႁူဝ်ပဝ်ႈငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်း ၸိုင်ႈတႆး (SSPP/SSA) ၸွမ်ႁၢၼ်ၶိူဝ်းတႆး ဢွၼ်ႁူဝ်ၸတ်းပၢင်ၶုၵ်းထူပ်း ဝၼ်းလၢႆးလုၵ်ႉၽိုၼ်ႉ ယိပ်းၵွင်ႈ ၵၢင်ႇၸိုင်ႈတႆးၶွပ်ႈၶူပ်ႇ 56 ပီ တီႈဝၢၼ်ႈႁႆး ၸႄႈဝဵင်းၵေးသီး ၸိုင်ႈတႆးပွတ်းၸၢၼ်း။ မီးၽူႈယႂ်ႇၵူၼ်းလူင်၊ ၽူႈၵွၼ်းတပ်ႉ ဢိၵ်ႇလုၵ်ႈတပ်ႉ ၵူၼ်းသိုၵ်းၶိုၼ်ႈႁွတ်ႈၶဝ်ႈႁူမ်ႈ တင်းမူတ်း 700 ပၢႆ- ၼႆယဝ်ႉ။

တီႈပၢင်ၶုၵ်းထူပ်းၼၼ်ႉ မီးၵၢၼ်တၵ်ႉယမ်တုင်းၸၢတ်ႈၸိုင်ႈတႆး/ ပႃႇတီႇ/ တပ်ႉသိုၵ်းလႄႈ ၽူႈႁတ်းႁၢၼ် ၸိူဝ်းဢၼ် လႆႈလူႇတၢၼ်းၼိူဝ်ႉလိူတ်ႈၵႂႃႇ ပုၼ်ႈတႃႇၸိူဝ်ႉၸၢတ်ႈလႄႈဝၢၼ်ႈမိူင်း။

ၽူႈၼမ်းၼႂ်းၵူႈလွင်ႈလွင်ႈ SSPP/SSA ၸဝ်ႈသိုၵ်းလူင် ၶုၼ်သႅင် မွၵ်ႇလၢတ်ႈၶေႃႈၵႂၢမ်း ၶူၼ်ႉၶႆႈၼႄပိုၼ်းလင် လွင်ႈပဵၼ်မႃး လၢႆးလုၵ်ႉၽိုၼ်ႉယိပ်းၵွင်ႈၵၢင်ႇၸိုင်ႈတႆးဝႃႈ- ယွၼ်ႉပိူဝ်ႈဢဝ်လၢႆးၵၢၼ်မိူင်းၵႄႈလိတ်ႈပၼ်ႁႃ ဢမ်ႇလႆႈ လႄႈ လိုၼ်းသုတ်း ၸင်ႇလႆႈၸႂ်ႉၵၢၼ်သိုၵ်းတႃႇၵႄႈလိတ်ႈပၼ်ႁႃ။

“ပၼ်ႁႃၵၢၼ်မိူင်း ၸိုင်ႈမိူင်းႁူမ်ႈတုမ် တႄႇမႃးတီႈလူင်ပွင်ၸိုင်ႈမၢၼ်ႈ ၸိူဝ်းဢမ်ႇႁဵတ်းၸွမ်းၶေႃႈလႆႈ ၸႂ်ပၢင်လူင်၊ ၼမ်ႉၸႂ်ပၢင်လူင်။ ပေႃးဢမ်ႇမီးပၢင်ၵုမ်ပၢင်လူင် ဝၼ်းၸိူဝ်ႉၸၢတ်ႈၸိုင်ႈတႆးၵေႃႈ တေဢမ်ႇမီးမႃး၊ ပေႃးဢမ်ႇမီး ဝၼ်းၸိူဝ်ႉၸၢတ်ႈၸိုင်ႈတႆးၵေႃႈ ဝၼ်းမိူင်းႁူမ်ႈတုမ်လႄႈ ၸိုင်ႈမိူင်းႁူမ်ႈတုမ်မိူဝ်ႈၼႆႉၵေႃႈ တေမီးမႃးလႆႈဢမ်ႇၸႂ်ႈ။ ၶေႃႈတူၵ်းလူင်းလိၵ်ႈႁူမ်ႈမၢႆပၢင်လူင်ၼၼ်ႉ ပႃးဝႆႉလွင်ႈၻီႇမူဝ်ႇၶရေႇၸီႇ၊ လွင်ႈသုၼ်ႇ လႆႈၽဵင်ႇပဵင်းၵၼ်လႄႈ သုၼ်ႇလႆႈ တႅပ်းတတ်းတူဝ်ၵဝ်ႇႁင်းၶေႃတဵမ်ထူၼ်ႈ။ ၼႂ်းပိူင်ငဝ်ႈပိုင်းမိူင်း 1947 ပႃးဝႆႉလွင်ႈသုၼ်ႇလႆႈၽၢတ်ႇဢွၵ်ႇ။ ၵွပ်ႈလူင်ပွင် ၸိုင်ႈမၢၼ်ႈၵူႈသိုပ်ႇသိုပ်ႇ ဢမ်ႇႁဵတ်းၸွမ်းၶေႃႈတူၵ်း လူင်းၶေႃႈလႆႈၸႂ်ပၢင်လူင်သေ မီးလွင်ႈတဵၵ်းတဵင်ပေႉၵိၼ်ၵၼ်၊ ဢမ်ႇမီးသုၼ်ႇလႆႈၽဵင်ႇပဵင်းၵၼ်ၸိူဝ်းၼႆႉလႄႈ ၽူႈဢွၼ်ႁူဝ် ၸိုင်ႈတႆးႁဝ်းၶဝ် ၸင်ႇလႆႈဢွၼ်ၵၼ်ဢဝ်လၢႆးၵၢၼ်မိူင်း ၵႄႈလိတ်ႈမႃး။ ၵူၺ်းၵႃႈ ၶတ်းၸႂ်ၵႄႈ လိတ်ႈမႃးလၢႆပွၵ်ႈလၢႆၵမ်းၵေႃႈ သဵၼ်ႈတၢင်းၵၢၼ်ပၢႆးမိူင်းတိူၵ်ႈတၼ်၊ ၸိုင်ႈတႆး မီးလွင်ႈတုမ်ႉတိူဝ်ႉ ၸဵပ်းၵႅၼ်းမႃးၵူႈၾၢႆႇၾၢႆႇလႄႈ ၵမ်းလိုၼ်းၸင်ႇႁၼ်ဝႃႈ ထုၵ်ႇလၢႆဢဝ်ပၢႆးသိုၵ်းၵႄႈလိတ်ႈၵူၺ်း ၼႆႄလႈ တႄႇဢဝ်ပီ 1958 ၼီႈ၊ လိူၼ်မေႇ 21 ဝၼ်း ၸဝ်ႈၼွႆႉၸင်ႇဢွၼ်ႁူဝ် ၵေႃႇတင်ႈ တပ်ႉၼုမ်ႇသိုၵ်းႁၢၼ် ႁဵတ်းၵၢၼ်ၵွၼ်းၶေႃ ၸိုင်ႈတႆးသေ လုၵ်ႉၽိုၼ်ႉလူင်ပွင်ၸိုင်ႈသိုၵ်းမၢၼ်ႈမႃး။ လႆႈဝႃႈပၼ်ႁႃၵၢၼ်ပၢႆးမိူင်း ၸိုင်ႈမိူင်း ႁူမ်ႈတုမ်ၼႆႉ တႄႇမႃးတီႈလွင်ႈဢမ်ႇႁဵတ်းၸွမ်းၶေႃႈလႆႈၸႂ်ပၢင်လူင်။

တွၼ်ႈတႃႇတေၵႄႈလိတ်ႈပၼ်ႁႃၵၢၼ်မိူင်း ၸိုင်ႈမိူင်းႁူမ်ႈတုမ်ၼၼ်ႉၵေႃႈ တၵ်းလႆႈဢဝ်ၶေႃႈလႆႈၸႂ်ပၢင်လူင်၊ ၼမ်ႉၸႂ်ပၢင်လူင်သေ ၵႄႈလိတ်ႈၸင်ႇတေယဝ်ႉတူဝ်ႈ။ မိူဝ်ႈလႂ် ႁဵတ်းသၢင်ႈႁၢင်ႈပွင်ၸွမ်းၶေႃႈလႆႈၸႂ်/ တူၵ်းလူင်ပၢင်လူင်သေ ဢွၵ်ႇၼမ်ႉဢွၵ်ႇတူဝ် မႃးၵွၼ်ႇ လွင်ႈငမ်းယဵၼ်မၼ်ႈၵိုမ်း/ထႃဝွရ်း(ထႃႇဝရ) ၼၼ်ႉ ၸင်ႇတေပဵၼ်မႃးယဝ်ႉ။ ၵူၼ်းၶိူဝ်းတႆးႁဝ်းၼႆႉ ဢမ်ႇမီးၵၢင်ၸႂ်ၶႂ်ႈ ပိုတ်းယိုဝ်းတိုၵ်းတေႃးၽႂ်၊ ၶႂ်ႈလႆႈငမ်းယဵၼ် လႄႈ ၸင်ႇလႆႈယိပ်းၵွင်ႈၵၢင်ႇ တွၼ်ႈတႃႇ ၵႅတ်ႇၶႄတူဝ်ၸဝ်ႈၵဝ်ႇ။ ၸူဝ်ႈၵႃႈပႆႇထိုင် ယိူင်းမၢႆလူင်ဢၼ်လႆႈ တူၵ်းလူင်း လႆႈၸႂ်ၵၼ်တီႈပၢင်လူင်ၼၼ်ႉ တၵ်းလႆႈသိုပ်ႇၶဝ်ႈပွႆးတိုၵ်းၵႂႃႇ ဢမ်ႇသုတ်ႈဢမ်ႇႁူၼ်”- ဝႃႈၼႆ။

သိုပ်ႇၼၼ်ႉ ပိူဝ်ႈတႃႇပဵၼ်တီႈမၢႆတွင်း ဝၼ်းၵိူတ်ႇလၢႆးလုၵ်ႉၽိုၼ်ႉၶွပ်ႈၶူပ်ႇ 56 ပီသေ ၵႅမ်ၽူႈပွင်ၵၢၼ်သိုၵ်း (မၢႆ 2) ၸဝ်ႈသိုၵ်း ပိုၼ်းမိူင်း ယိုၼ်ႈမွပ်ႈပၼ်ၶႅပ်းဝႂ်လူင်းပၢင်သွၼ် ပိုၼ်ႉထၢၼ်ၵၢၼ်သိုၵ်း တီႈလုၵ်ႈႁဵၼ်း။

ဝၢႆးၼၼ်ႉ ၽူႈပွင်ၵၢၼ်သိုၵ်း တပ်ႉသိုၵ်းၸိုင်ႈတႆး ၸွမ်ႁၢၼ်ၶေႇမိၼ်ႇ မွၵ်ႇလၢတ်ႈၶေႃႈၵႂၢမ်းသူင်ႇသင်ႇထိုင် ၽူႈလူင်းပၢင်သွၼ် ၶဝ်ဝႃႈ- “ႁဝ်းပဵၼ်သိုၵ်းယဝ်ႉ ႁႂ်ႈႁူႉထိုင်ဝႃႈႁဝ်းပဵၼ်သိုၵ်းသေ မေႃထွမ်ႇၶေႃႈပူင်/ ၶေႃႈသင်ႇလႄႈ ၸွမ်းပၵ်းပိူင်လၵ်းမၢႆသိုၵ်း၊ ထုၵ်ႇလီမေႃသူၼ်းတုမ်ၸွႆႈထႅမ်ပေႃႈမႄႈၵူၼ်းမိူင်း လႄႈ ႁၵ်ႉႁွမ်ပေႃႈမႄႈၵူၼ်းမိူင်း၊ ႁႂ်ႈမေႃႁဵတ်းသၢင်ႈၵႂႃႇ ၸွမ်းၼင်ႇၼႃႈ ၵၢၼ်ပုၼ်ႈၽွၼ်းပိုၼ်းပၼ်” - ဝႃႈၼႆ။

ယိူင်းၸူးထိုင် ၵူၼ်းသိုၵ်းဢိၵ်ႇၵူၼ်းမိူင်း ၸိူဝ်းလႆႈလူႇတၢၼ်းၼိူဝ်ႉလိူတ်ႈသၢႆၸႂ်ၵႂႃႇ ပုၼ်ႈတႃႇၸိူဝ်ႉၸၢတ်ႈ လႄႈ ဝၢၼ်ႈမိူင်းသေ ပႃႇတီႇမႂ်ႇသုင်ၸိုင်ႈတႆး လႆႈၼိမၼ်တၼ သင်ၶၸဝ်ႈ 30 တူၼ် ၵၢပ်ႈသွမ်းၼႂ်လူႇ တၢၼ်း ယၢတ်ႇၼမ်ႉ ၶႂမ်ႈတဝ်ႈ ႁဵတ်းတၢင်းလီၵုသူလ် တီႈဝတ်ႉဝေႇလုဝၼ်ႇ ဝၢၼ်ႈႁႆး။