ၸွမ်သိုၵ်းယွတ်ႈသိုၵ်း တုၵ်းယွၼ်းႁႂ်ႈလူင်ပွင်ၸိုင်ႈမၢၼ်ႈ သပ်းလႅင်းၵႄႈလိတ်ႈလွင်ႈမၢၼ်ႈဢဝ်ႁႅင်းသိုၵ်း ၶဝ်ႈၶူၼ်ႉသွၵ်ႈ လုမ်းၵပ်းသၢၼ်တီႈဝဵင်းၵဵင်းတုင်။

ပူၼ်ႉမႃးမိူဝ်ႈဝၼ်းတီႈ 06/05/2014 ၼၼ်ႉ ၸဝ်ႈၼႃႈတီႈၾၢႆႇႁူမ်ႇလူမ်ႈသိုၵ်းမၢၼ်ႈ (ၸယၽ) ဢွၼ်ႁူဝ်ၵူၼ်း 20 ပၢႆ ၵႂႃႇၶဝ်ႈၵူတ်ႇ ထတ်းလုမ်းၵပ်းသၢၼ် ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) တီႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇ။ လွင်ႈဢၼ် ၾၢႆႇမၢၼ်ႈဢမ်ႇမွၵ်ႇလၢတ်ႈတီႈၽူႈမီးပုၼ်ႈ ၽွၼ်း RCSS သေ ၶဝ်ႈၵႂႃႇၵူတ်ႇထတ်း လုမ်း RCSS/SSA ၼၼ်ႉ ၶႂ်ႈႁႂ်ႈၾၢႆႇ လူင်ပွင်ၸိုင်ႈ သပ်းလႅင်းၼႄ လွင်ႈတၢင်းမၼ်း- ႁူဝ်ပဝ်ႈၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး ၸဝ်ႈယွတ်ႈသိုၵ်း လူင်းလၢႆးမိုဝ်း တႅမ်ႈလိၵ်ႈသူင်ႇထိုင် ၾၢႆႇႁူမ်ႇလူမ်ႈလႄႈလႅၼ်လိၼ် လူင်ပွင် ၸိုင်ႈၸႄႈမိူင်းတႆးလႄႈ ၸုမ်းၶိုင်ပွင်လွင်ႈ ငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC) ဢူးဢွင်ႇမိၼ်း- တုၵ်းယွၼ်း ႁႂ်ႈၵႄႈလိတ်ႈပၼ်- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၽူႈၶၢၼ်ပၢၵ်ႇ (RCSS/SSA) ၸဝ်ႈႁၢၼ်လၢဝ်သႅင် လၢတ်ႈဝႃႈ- ပိူဝ်ႈတႃႇၵႄႈလိတ်ႈ ပၼ်ႁႃၼႂ်းဝူင်ႈၵၢင်ႁဝ်းၶႃႈလႄႈ လူင်ပွင်ၸိုင်ႈ၊ ပိူဝ်ႈတႃႇၵႄႈလိတ်ႈပၼ်ႁႃၼႂ်းၵႄႈတပ်ႉသိုၵ်းမၢၼ်ႈလႄႈ ႁဝ်းၶႃႈၼၼ်ႉ ႁဝ်းၶႃႈလႆႈၸႂ်ၵၼ် ပိူဝ်ႈတႃႇဢဝ်လၢႆး ၵတ်းယဵၼ်သေၵႄႈလိတ်ႈ။ ႁဝ်းၶႃႈလႆႈၸႂ်တူၵ်းလူင်း ပိုတ်ႇလုမ်းတီႈဝဵင်းၵဵင်းတုင်ဝႆႉ ပဵၼ်တၢင်းၵၢၼ်။ မိူဝ်ႈလဵဝ် ၾၢႆႇမၢၼ်ႈသမ်ႉ ဢမ်ႇဢဝ်လုမ်းၵပ်းသၢၼ်တီႈ ဝဵင်းၵဵင်းတုင် ပဵၼ်လုမ်းတႃႇၵႄႈလိတ်ႈပၼ်ႁႃသေ သမ်ႉဢဝ်ႁဵတ်းမိူၼ်ၸိူင်ႉၼင်ႇယိူဝ်ႇဝူင်ႈၵၢင်သွင်မူႇ သွင်ၸုမ်း၊ မိူၼ်ၼင်ႇဢဝ်လၢႆးဢဵၼ်ႁႅင်းသေ ၵူတ်ႇထတ်းလုမ်း ၸိူင်ႉၼႆၼႆႉ မၼ်းဢမ်ႇတူၵ်းထုၵ်ႇ၊ လွင်ႈၼႆႉ ၾၢႆႇတပ်ႉသိုၵ်းမၢၼ်ႈ ၵေႃႈလီ၊ ၾၢႆႇလူင်ပွင်ၸိုင်ႈမၢၼ်ႈၵေႃႈလီ ဢၼ်ဝႃႈ ၶႂ်ႈၵေႃႇသၢင်ႈလွင်ႈငမ်းယဵၼ်  ၼႆၼၼ်ႉ မၼ်းမီးလွင်ႈထၢင်ႇထိူမ်ငမ်းငဝ်းၼိူဝ်ၶဝ်။ ၵွပ်ႈၼၼ် လွင်ႈဢၼ်သိုၵ်းမၢၼ်ႈ မႃးၵူတ်ႇထတ်းလုမ်း ႁဝ်းၶႃႈၼၼ်ႉ ၶႂ်ႈႁႂ်ႈၽူႈမီးပုၼ်ႈၽွၼ်းၶဝ်ၵႄႈလိတ်ႈ သပ်းလႅင်းပၼ်သေၵမ်း- ဝႃႈၼႆ။

ပူၼ်ႉမႃးမိူဝ်ႈဝၼ်းတီႈ 06/05/2014 ယၢမ်းႁူဝ်ၶမ်ႈ 4 မူင်းပၢႆတေႃႇထိုင် 5 မူင်းပၢႆ၊ သိုၵ်းမၢၼ်ႈ တူဝ်ၽူႈၵွၼ်း ၾၢႆႇႁူမ်ႇလူမ်ႈသိုၵ်း (ၸယၽ မူး) ၸဝ်ႈႁၢၼ်ယႄးၼေႇလိၼ်း၊ ဢွၼ်ႁူဝ်ႁႅင်းသိုၵ်း 20 ပၢႆ၊ ပႃႈတ်ႂ်ႈတိူင်းသိုၵ်းသၢမ်ၸဵင်ႇ၊ ပႃးၸဵမ်ၾၢႆႇပလိၵ်ႈ ၵႂႃႇဝႅတ်ႉလုမ်းၶွင်ႇသီႇဢဝ်ၶိုၼ်းၸိုင်ႈတႆး (RCSS) တီႈၵဵင်းတုင်။ ၵူတ်ႇသွၵ်ႈ ၶူဝ်းၶွင်ဢၼ်ၵိုၵ်းလုမ်းတင်းသဵင်ႈ။ ယွၼ်ႉပိူဝ်ႈၼႄးဝႃႈ RCSS တိၺွပ်းပူႇၵႄႇ ဝၢၼ်ႈၾၢႆၶႄႇ မိူင်းတူၼ်ၵႂႃႇ၊ မိူၼ်ၼင်ႇဢဝ်လၢႆးႁုၵ်းႁၢႆႉ သေ တွပ်ႇတႅၼ်းၵၼ်ၶိုၼ်းတီႈ RCSS ။

ဢွၼ်ၼႃႈၼၼ်ႉ ၾၢႆႇၸဝ်ႈၼႃႈတီႈမၢၼ်ႈႁွင်ႉတူဝ်တႅၼ်းလုမ်းၵပ်းသၢၼ် RCSS တီႈဝဵင်းၵဵင်းတုင် ၸဝ်ႈၸေႃးမိူင်းၵႂႃႇတွင်ႈထၢမ် လွင်ႈပူႇၵႄႇ ဝၢၼ်ႈၾၢႆၶႄႇႁၢႆလၢႆၵႂႃႇ။ ထႅင်ႈဝၼ်းၼိုင်ႈၵေႃႈ မႃးၵူတ်ႇထတ်းလုမ်း RCSS တီႈၵဵင်းတုင်။ ၵဵဝ်ႇၵပ်းလွင်ႈပူႇၵႄႇဝၢၼ်ႈ ၾၢႆၶႄႇႁၢႆၵႂႃႇၼႆႉ ၸဝ်ႈႁၢၼ်လၢဝ်သႅင် လၢတ်ႈဝႃႈ- လွင်ႈၼႆႉ ႁဝ်းၶႃႈဢမ်ႇလႆႈႁူႉၸွမ်း။ လွင်ႈဢမ်ႇလႆႈႁပ်ႉႁူႉၸွမ်းၼၼ်ႉ လႆႈတႅမ်ႈလိၵ်ႈတၢင်ႇထိုင်ဢူးဢွင်ႇမိၼ်းလႄႈ ၾၢႆႇႁူမ်ႇလူမ်ႈလႅၼ်လိၼ် လူင်ပွင်ၸိုင်ႈ မိူင်းတႆး ယဝ်ႉတူဝ်ႈၵႂႃႇလီငၢမ်း မိူဝ်ႈဝႃးၼင်ႇၵဝ်ႇ- ဝႃႈၼႆ။

ဢိင်ၼိူဝ်လွင်ႈတၢင်းၸိူဝ်းၼႆႉသေ သိုၵ်းမၢၼ်ႈယင်းၵႂႃႇတိဢဝ်ႁူဝ်ပဝ်ႈၸၢဝ်းၶိူဝ်းဢႅၼ်ႇ၊ ၵေႃႉပဵၼ်ႁူဝ်ပဝ်ႈ ပႃႇတီႇႁူဝ်သိူဝ် လုမ်းၽႄဝၢၼ်ႈၼမ်ႉလိၼ်းမႂ်ႇ ဢိူင်ႇပဵင်းတဝ်ႉ ၸႄႈဝဵင်းၵဵင်းတုင်ပႃးထႅင်ႈ။ ၼၼ်ႉၵေႃႈ တိၺွပ်းၵႂႃႇပေႃႉထုပ်ႉသေ ဢဝ်ႁၢႆလၢႆဝႆႉ၊ ႁၢၼ်ႉတေႃႇမိူဝ်ႈလဵဝ်ယင်းပႆႇပွႆႇၶိုၼ်း။ လွင်ႈတၢင်းၸိူဝ်းၼႆႉ ပဵၼ်လၢႆးဢၼ်သိုၵ်းမၢၼ်ႈၼႄးသိုၵ်းတႆး တိၵူၼ်းၶဝ်ၵႂႃႇသေ ၶဝ်ၵေႃႈဢဝ်လၢႆးႁုၵ်းႁၢႆႉသေတွပ်ႇတႅၼ်း ၵႄႈလိတ်ႈၶိုၼ်း၊ လွင်ႈၼႆႉမၼ်းဢမ်ႇထုၵ်ႇလီပဵၼ်- ၽူႈမီးပုၼ်ႈၽွၼ်းၼႂ်း RCSS လၢတ်ႈ။

ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၼႆႉတင်းလူင်ပွင်ၸိုင်ႈမၢၼ်ႈ တူၵ်းလူင်း ၵိုတ်းယိုဝ်း၊ ၵေႃႇသၢင်ႈ လွင်ႈငမ်းယဵၼ်ၵၼ်ဝႆႉ ၸၼ်ႉၸိုင်ႈမိူင်းႁူမ်ႈတုမ် မိူဝ်ႈႁၢင်ပီ 2011 ။