ပူၼ်ႉမႃးမိူဝ်ႈဝၼ်းတီႈ 21/05/2014 ႁူဝ်ၶမ်ႈယၢမ်း 6 မူင်းၶိုင်ႈ၊ လူတ်ႉၵႃးမိူင်းၶႄႇ ဢၼ်မႃးတေႃႉတၢင်ႇ ႁိၼ်ႁႄႈ ၼႂ်းမိူင်းတႆးသေ ဢွၵ်ႇတၢင်းၼမ်ႉၶမ်း (ၶဝ်ႈမိူင်းၶႄႇ) လမ်းၼိုင်ႈ၊ ယွၼ်ႉႁေႃႈဝႆးပူၼ်ႉတီႈလႄႈ ဢမ်ႇႁၢမ်ႈ (ပရဵၵ်ႇ) မၼ်းလႆႈတၼ်းလႄႈ လေႃႇၽႃႇၺႃး လုင်းၸၢႆးယီႈ၊ ယႃႇယု 52 (လုၵ်ႈလုင်းသွႆႈငိုၼ်း၊  ၵူၼ်းဝၢၼ်ႈလွႆၵၢင်) ၽွင်းလုၵ်ႉ တီႈဝၢၼ်ႈၵွင်းၵၢတ်ႇ ၶီႇလူတ်ႉၶိူင်ႈဢွၵ်ႇမႃး။ ဢဝ်မၼ်းၸၢႆးၵႂႃႇသူင်ႇႁူင်းယႃ ထိုင်ၵႂႂႃႇတီႈႁူင်းယႃၵေႃႈ သဵင်ႈၸႂ်တၢႆ။

ၵဵဝ်ႇၵပ်းလွင်ႈၼႆႉ ၽူႈမီးပုၼ်ႈၽွၼ်းတီႈဝၢၼ်ႈလွႆၵၢင် ၵေႃႉၼိုင်ႈလၢတ်ႈဝႃႈ- ၵႃးၵူၼ်းမိူင်းမၢၼ်ႈ မိူင်းတႆးၼႆႉ သင်ၸိူဝ်ႉ ဝႃႈ ၵႂႃႇၽႃႇၺႃး လူတ်ႉၵႃး/ၵူၼ်း ၼႂ်းမိူင်းၶႄႇၸိုင် လႆႈသၢႆႈတႅၼ်းပၼ်ငိုၼ်းၶႄႇ ဢၼ်ၵိုင်ႇၵႃႈၶၼ်ငိုၼ်းမၢၼ်ႈတႃႇ 300 သႅၼ်။ ၵူၺ်းၵႃႈ ပေႃးဝႃႈပဵၼ်ၶႄႇမႃးႁေႃႈၵႃးၼႂ်းမိူင်းႁဝ်းၼႆႉသမ်ႉ 1.ပဵၼ်ပၢႆႉၶႄႇ။ 2.ၶဝ်ႈဢွၵ်ႇ 24 ၸူဝ်ႈမူင်း ဢမ်ႇမီး ၽၵ်းတူႁႄႉႁၢမ်ႈၶဝ်သေတၢင်း။ ပေႃးဝႃႈၽႃႇၺႃးၵူၼ်း မိူင်းမၢၼ်ႈ/ မိူင်းတႆးတၢႆသမ်ႉ သၢႆႈတႅၼ်းပၼ်ငိုၼ်းမၢၼ်ႈ 10-20 သႅၼ်သေ ဝူဝ်းယဵပ်ႇႁၢႆ-ၵႂၢႆးယဵပ်ႇၼႅၼ်ႈ၊ ၶၻီး(ဢမု)မၼ်းၵေႃႈႁၢႆပႅတ်ႈ ဢမ်ႇမီးၽႂ်ဢဝ်ပုၼ်ႈၽွၼ်းပၼ်လွင်ႈၼႆႉ ၼၵ်းၼၵ်းၼႃၼႃမႃးသေပွၵ်ႈ- ဝႃႈၼႆ။

ၵူၼ်းႁေႃႈၵႃးတေႃႉတၢင်ႇႁိၼ်ႁႄႈ ဢၼ်ဢဝ်တၢင်းၼမ်ႉၶမ်း ၶဝ်ႈၵႂႃႇတၢင်းမိူင်းၶႄႇၼႆႉ ၵွပ်ႈပိူဝ်ႈ ၼိုင်ႈဝၼ်း ၶႂ်ႈတေႃႉ တၢင်ႇလႆႈပွၵ်ႈၵမ်းမၼ်းၼမ်ၼမ်သေ ၵူၼ်းႁေႃႈၵႃးၶဝ် ႁေႃႈဝႆးပူၼ်ႉတီႈ။ လိူဝ်သေၼၼ်ႉ ယင်းတင်ႇၼၵ်းပူၼ်ႉတီႈ ပူၼ်ႉလိူဝ်၊ သဵၼ်ႈတႃႈသၢႆတၢင်းၵေႃႈလူႉလႅဝ်၊ ၶီႈၾုၼ်ႇဢၼ်ပဵၼ်ထၢတ်ႈၶေးမီးၶိူဝ်ႇ ဢၼ်ၸပ်းပႃးမႃးတီႈႁိၼ်ႁႄႈ ၸိူဝ်းၼၼ်ႉၵေႃႈ ၽူင်ႉပိဝ်သႂ်ႇၵူၼ်းဝၢၼ်ႈ၊ ပိဝ်ဝႆႉယူႇၼႂ်းလူမ်း 24 ၸူဝ်ႈမူင်းလႄႈ တိုၼ်းတေတုမ်ႉယွၼ်ႈပၢႆးယူႇလီ ၵူၼ်းဝၢၼ်ႈၵူၼ်းမိူင်းၸိူဝ်း ယူႇၼႂ်းၸႄႈဝဵင်းၼမ်ႉၶမ်း- ၵူၼ်းၼႂ်းပိုၼ်ႉတီႈ ၵေႃႉၼိုင်ႈ လၢတ်ႈၼင်ႇၼႆ။

ၸၢႆးဢၢႆႈယီႈ ၵူၼ်းၼုမ်ႇလႆႈၸုမ်းၶူး ဢၼ်ယူႇၼႂ်းၸႄႈဝဵင်းၼမ်ႉၶမ်း ၵေႃႉၼိုင်ႈၵေႃႈလၢတ်ႈဝႃႈ- လွင်ႈတၢင်း ၸိူဝ်းၼႆႉ ၶႂ်ႈႁႂ်ႈၸဝ်ႈၼႃႈတီႈၽူႈမီးဢမ်းၼၢၸ်ႈ(ဢႃႇၼႃႇ)ၶဝ် ၸွႆႈထႅမ်ပၼ်၊ ႁႂ်ႈၵူၼ်းမိူင်းလႆႈယူႇငၢႆႈလူမ်ၸႂ်သေ ၵၢတ်ႈၵႆၽေးၶဵၼ် ဢၼ်တေၸၢင်ႈပဵၼ်ၽေး တေႃႇၵူၼ်းဝၢၼ်ႈၵူၼ်းမိူင်း။ ႁိၼ်ႁႄႈဢၼ်တေႃႉတၢင်ႇ ယူႇၸိူဝ်းၼႆႉ ႁႂ်ႈႁူမ်ႇတူမ်းပၼ်၊ သႂ်ႇၼႂ်းတူႈ (Container) ပၼ်၊ ယႃႇႁႂ်ႈမီးၶီႈၾုၼ်ႇၶီႈငႂ်ႈၽူင်ႉပိဝ်မႃးသႂ်ႇၵူၼ်းဝၢၼ်ႈၵူၼ်းမိူင်း၊ ယဝ်ႉၵေႃႈ ႁႂ်ႈႁေႃႈၵႃး မီးသတိတႃႇသေႇ- ဝႃႈၼႆ။

မၼ်းၸၢႆးသိုပ်ႇလၢတ်ႈဝႃႈ- မိူဝ်ႈပူၼ်ႉမႃး 3 လိူၼ်ၼၼ်ႉၵေႃႈ လူတ်ႉၵႃးတၢင်ႇႁိၼ်ႁႄႈ ၵႂႃႇၽႃႇၺႃး ၸဝ်ႈသၢင်ႇဢွၼ်ႇ ဝတ်ႉဝေႇပုၺ်ႇလ (တိူၵ်ႈသွၼ်လိၵ်ႈ)၊ ၶႃၸဝ်ႈသၢင်ႇဢွၼ်ႇပေႃးႁၵ်းၵႂႃႇၶွၼ်ၼိုင်ႈ။ လွင်ႈၼႆႉ ၾၢႆႇၸဝ်ႈၼႃႈတီႈမၢၼ်ႈ ၶဝ် မႃးတီႉၺွပ်းၵႂႃႇၵူၼ်းႁေႃႈၵႃးၵေႃႈ တီႉၵႂႃႇၵမ်းၼိုင်ႈၵူၺ်း၊ ထႅင်ႈဝၼ်းၼိုင်ႈမႃး ပေႃးမႃးတေႃႉတၢင်ႇမၢၵ်ႇႁိၼ် ၵႂႃႇမႃး မိူၼ်ၵဝ်ႇၶိုၼ်းယဝ်ႉ၊ ဢမ်ႇႁၼ်ဢဝ်လိူင်ႈသင်ပၼ်- ဝႃႈၼႆ။

ဢၼ်ၵႂႃႇၶုတ်းႁိၼ်ႁႄႈၼႂ်းၸႄႈဝဵင်းၼမ်ႉၶမ်းၼႆႉ မိူၼ်ၼင်ႇၶွမ်ႇပၼီႇ ငူၺ်ႇၵပႃႇၵျေႃႇ၊ မျၢၼ်ႇမႃႉမျႃးဢူး၊ ၸဵင်ႇပတေႇတႃႇ၊ ပၢၼ်းတဵတ်ႉၸႃႇ (ၶွင်ပၢၼ်းသေး ၵျေႃႇမိၼ်ႉ)၊ ၸွမ်ငိုၼ်းၶမ်း၊ GSM ၶဝ်ၸိူဝ်းၼႆႉ။ ၸိူဝ်းၶဝ် မႃးမဝ်ၶုတ်းဢဝ်ႁိၼ်ႁႄႈသေ ၵႂႃႇႁႃၵူၼ်းမဝ်သိုဝ်ႉတၢင်းမိူင်းၶႄႇ မႃးတေႃႉဢဝ်ၵႂႃႇ၊ တေႃႉတၢင်ႇ 24 ၸူဝ်ႈမူင်း ဢမ်ႇလိုဝ်ႈဢမ်ႇယင်ႉ၊ ဢဝ်ဢွၵ်ႇတၢင်းႁူးလႅၼ်လိၼ် ဢၼ်ဢမ်ႇၸႂ်ႈၽၵ်းတူမိူင်းပဵၼ်တၢင်းၵၢၼ်၊ မိူၼ်ၼင်ႇ ဢဝ်ဢွၵ်ႇၸွမ်းတႃႈႁိူဝ်းၼမ်ႉမၢဝ်း၊ ၵမ်ႈၼမ်တႃႈႁိူဝ်းၼွင်တိူၼ်း- ၼႆယဝ်ႉ။

လွင်ႈတၢင်းၸိူဝ်းၼႆႉ ၽူႈၵွၼ်းၸႄႈဝဵင်းၼမ်ႉၶမ်း ဢူးၸေႃႇမိၼ်းၵေႃႈ ယၢမ်ႈႁွင်ႉပၢင်ၵုမ်ၵူၼ်းဝၢၼ်ႈ ၵူၼ်းမိူင်းသေ လၢတ်ႈဝႃႈ- ပေႃးဝႃႈၵူၼ်းဝၢၼ်ႈၵူၼ်းမိူင်းၶဝ် ႁၼ်ၵႃးတၢင်ႇႁိၼ်တၢင်ႇႁႄႈၸိူဝ်းၼႆႉ ႁေႃႈဝႆး ဢမ်ႇၼၼ် တၢင်ႇၼၵ်း လိူဝ်ဢၼ်တမ်းဝၢင်းဝႆႉၸိုင် ႁႂ်ႈတီႉၺွပ်းသေ မႃးလၢတ်ႈပၼ်ၽူႈမီးပုၼ်ႈၽွၼ်းၶဝ်၊ တေဢဝ်လိူင်ႈပၼ်ၼၵ်းၼၵ်း ၼႃၼႃ- ဝႃႈၼႆ။