ၵူၼ်းဝၢၼ်ႈၼွင်ဢေႃႈ ဢိူင်ႇဝၢၼ်ႈၸၢမ် ထုၵ်ႇၵူၼ်းဢမ်ႇႁူႉၸၵ်းၸုမ်း တီႉၺွပ်းဢွၵ်ႇဝၢၼ်ႈၵႂႃႇ ယိုဝ်းတၢႆ။ ၽွင်းၼၼ်ႉ သိုၵ်းမၢၼ်ႈတပ်ႉမ 77 ၵေႃႈ တူင်ႉၼိုင်မီးယူႇႁိမ်းဝၢၼ်ႈ၊ ၵူၺ်းၵႃႈ မၢၼ်ႈၼႄးပဵၼ် ၼမ်ႉမိုဝ်းတႆး။

ပူၼ်ႉမႃးမိူဝ်ႈဝၼ်းတီႈ 15/05/2014 ယၢမ်းၵၢင်ၼႂ် ဢူးၵူဝ်ႇယႄး (သိုၵ်းမၢၼ်ႈထၢၵ်ႈ) ၵူၼ်းဝၢၼ်ႈၼွင်ဢေႃႈ ဢိူင်ႇဝၢၼ်ႈၸၢမ် ၸႄႈဝဵင်းၼမ်ႉတူႈ၊  ထုၵ်ႇၵူၼ်းၸုမ်းၼိုင်ႈ မႃးတီႉၵႂႃႇ၊ ၽိူဝ်ႇထိုင်မႃးပွတ်းၼႂ် ဢွၼ်ဝၼ်း ၽွင်းၶၢဝ်း 11 မူင်း သဵင်ၵွင်ႈတႅၵ်ႇ ႁိမ်းဝၢၼ်ႈ 2 ၵမ်း၊ ဝၢႆးၼၼ်ႉလႆႈႁူႉဝႃႈ ဢူးၵူဝ်ႇယႄး ထုၵ်ႇယိုဝ်းတၢႆပႅတ်ႈ ႁိမ်းဝၢၼ်ႈ။

ၵဵဝ်ႇၵပ်းလွင်ႈၼႆႉ ၵူၼ်းယူႇၼႂ်းပိုၼ်ႉတီႈ ဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈလၢတ်ႈဝႃႈ- တီႈဝၢၼ်ႈၼွင်ဢေႃႈ ဢိူင်ႇဝၢၼ်ႈၸၢမ် ၸႄႈဝဵင်းၼမ်ႉတူႈၼႆႉ သိုၵ်းမၢၼ်ႈတပ်ႉၸုမ်းလူင် (တပ်ႉမ) 77 ဢၼ်လုၵ်ႉတၢင်းပၵူဝ်းမႃး တူင်ႉၼိုင်ဝႆႉ ႁိုင်ၼၢၼ်းမႃးႁၢၼ်ႉ တေႃႇမိူဝ်ႈလဵဝ်။ ၽွင်းၵူၼ်းဢမ်ႇႁူႉၸၵ်းၸုမ်း မႃးတီႉၺွပ်းဢူးၵူဝ်ႇယႄး ၼႂ်းဝၢၼ်ႈၼၼ်ႉ သိုၵ်းမၢၼ်ႈ တပ်ႉမ 77 ၼႆႉၵေႃႈ တူင်ႉၼိုင်ယူႇႁိမ်းဝၢၼ်ႈၼၼ်ႉၵူၺ်း။ လႆႈငိၼ်းဝႃႈ ၵူၼ်းမႃးတီႉၵႂႃႇၼၼ်ႉ မေႃပႃးၵႂၢမ်းတႆး- ဝႃႈၼႆ။

ၽူႈၸွပ်ႇၶၢဝ်ႇၾၢႆႇႁူမ်ႇလူမ်ႈသိုၵ်းမၢၼ်ႈ (ၸယၽ) တီႈဝဵင်းလႃႈသဵဝ်ႈ ၵေႃႉၼိုင်ႈတႄႉလၢတ်ႈဝႃႈ- လွင်ႈဢၼ်ၶႃႈႁႅမ် ၵူၼ်းဝၢၼ်ႈတၢႆၼႆႉ ပဵၼ်သိုၵ်းတႆး SSPP/SSA  ၶဝ် မႃးၵဵပ်းၶွၼ်ႇဢမ်ႇလႆႈလႄႈၶႃႈႁႅမ်တၢႆ။  ၵေႃႉဢၼ်ထုၵ်ႇၶႃႈႁႅမ်တၢႆၼႆႉ သမ်ႉပဵၼ်သိုၵ်းလူင်ပွင်ၸိုင်ႈထၢၵ်ႈလႄႈ လွင်ႈၼႆႉတေဢမ်ႇပွႆႇဝၢင်းၶႂၢင်ႉပၼ်- ဝႃႈၼႆ။

ၵပ်းၵၢႆႇလွင်ႈၼႆႉ ၽူႈၶၢၼ်ပၢၵ်ႇတပ်ႉသိုၵ်းၸိုင်ႈတႆး (SSPP/SSA) တႄႉလၢတ်ႈဝႃႈ- ၵဵဝ်ႇၵပ်းလွင်ႈၼႆႉ ပဵၼ်ၸုမ်းႁဝ်း ၸႂ်ႈ/ဢမ်ႇၸႂ်ႈၼၼ်ႉ ႁဝ်းတိုၵ်ႉၸွပ်ႇထတ်းတူၺ်းယူႇ၊ ပိုၼ်ႉတီႈၼႃႈလိၼ်ပွတ်းတွၼ်ႈၼၼ်ႉ ဢၼ်ၵူၼ်းႁဝ်းၵႂႃႇတူင်ႉ ၼိုင်ၵေႃႈမီးယူႇ- ဝႃႈၼႆ။

တပ်ႉၸုမ်းလူင် (တပ်ႉမ) 77 ၼႆႉ ပၵ်းတီႈဝဵင်းပႃႇၵိူဝ် မိူင်းမၢၼ်ႈ၊ ၶိုၼ်ႈမႃးတူင်ႉၼိုင်တၢင်းမိူင်းတႆး ပွတ်းၼမ်ႉတူႈ မီးႁိမ်းပီယဝ်ႉ။

မိူဝ်ႈၽွင်း ဢူးၵူဝ်ႇယႄး ထုၵ်ႇၶႃႈတၢႆၼၼ်ႉ သိုၵ်းမၢၼ်ႈတပ်ႉမ 77 ၵေႃႈ မီးယူႇႁိမ်းဝၢၼ်ႈ။ ဢူးၵူဝ်ႇယႄးၼႆႉ ပေႃးဝႃႈဢွၵ်ႇ တပ်ႉသိုၵ်းယဝ်ႉၵေႃႈ မႃးတႄႇၼႃႈႁိူၼ်းၵိုၵ်းၵူၼ်းဝၢၼ်ႈၼွင်ဢေႃႈ၊ တင်ႈတႄႇဢွၵ်ႇသိုၵ်းမၢၼ်ႈ မႃးယူႇဝၢၼ်ႈၼွင်ဢေႃႈၼႆႉ မီးၶၢဝ်းတၢင်း 10 ပီပၢႆယဝ်ႉ။ မၼ်းၼႆႉ လႆႈႁူႉဝႃႈပဵၼ်ၽူႈၸွပ်ႇၶၢဝ်ႇပၼ်ၾၢႆႇ သိုၵ်းၵေႃႉၼိုင်ႈ- ၼႆယဝ်ႉ။ (လွင်ႈဢူးၵူဝ်ႇယႄး ပဵၼ်ၽူႈၸွပ်ႇၶၢဝ်ႇသိုၵ်းမၢၼ်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ တႄႉ ဢမ်ႇယိုၼ်ယၼ်)။

လွင်ႈတၢင်းဢၼ်ပဵၼ်တီႈၼွင်ဢေႃႈ ဝၢၼ်ႈၸၢမ်-မိူင်းမု ပွၵ်ႈၵမ်းၼႆႉ ဢမ်ႇပေႃးၶႂ်ႈပိူင်ႈၵၼ်တင်း လွင်ႈတၢင်း ဢၼ်ၵိူတ်ႇ ၶိုၼ်ႈၼႂ်းၸႄႈဝဵင်းမိူင်းတူၼ် မိူဝ်ႈၼႂ်းလိူၼ်ဢေႇပရိူဝ်ႇလ်ပူၼ်ႉမႃးၼၼ်ႉ။ လွင်ႈၼၼ်ႉၵေႃႈ ၵွပ်ႈဢူးတိၼ်ႇဢွင်ႇ ၽူႈၵွၼ်းဝၢၼ်ႈၾၢႆၶႄႇ မိူင်းတူၼ် ထုၵ်ႇၶႃႈတၢႆႄလႈ သိုၵ်းမၢၼ်ႈၸီႉၼႄးဝႃႈ ပဵၼ်ၼမ်ႉမိုဝ်း သိုၵ်းတႆး (RCSS/SSA) ။ ဝၢႆးၼၼ်ႉ ဝၼ်းတီႈ 05/05/2014 ၾၢႆႇႁူမ်ႇလူမ်ႈသိုၵ်း (ၸယၽ) ၵႂႃႇတီႉၺွပ်း ႁူဝ်ပဝ်ႈပႃႇတီႇႁူဝ်သိူဝ် တီႈဝၢၼ်ႈ ၼမ်ႉလိၼ်းမႂ်ႇ ဢိူင်ႇပဵင်းတဝ်ႉ ၸႄႈဝဵင်းၵဵင်းတုင်။ ထိုင်မႃးဝၼ်းတီႈ 6 ၵႂႃႇသွၵ်ႈလုမ်း ၶွင်ႇသီႇဢဝ်ၶိုၼ်းၸိုင်ႈတႆး (RCSS/SSA) တီႈၵဵင်းတုင်။