လုၵ်ႈႁဵၼ်းသင်ၶတႆး လႆႈႁပ်ႉၸုမ်ႈၶူး တီႈၸၼ်ႉၸွမ်မိူင်းၵွၵ်ႇ ၸိုင်ႈထႆး။ ပီႈၼွင်ႉတႆး ၸိူဝ်းယူႇသဝ်းၼႂ်း ဝဵင်းမိူင်းၵွၵ်ႇ ၼပ်ႉႁူဝ်ပၢၵ်ႇႁူမ်ၸူမ်းၸွမ်း။

ပူၼ်ႉမႃးမိူဝ်ႈဝၼ်းတီႈ 18/05/2014 လုၵ်ႈႁဵၼ်းသင်ၶတႆး လႆႈႁပ်ႉၸုမ်ႈၶူး B.A.  M.A. တီႈၸၼ်ႉၸွမ် မႁႃၸုလႃးလူင်းၵွၼ်း ဝၢင်းၼွႆႉ ဝဵင်းလူင်မိူင်းၵွၵ်ႇ (ၵုင်းထဵပ်ႈ) ၸိုင်ႈထႆး၊ ၸုပ်ႈ 59 ။ တီႈပၢင်ႁပ်ႉၸုမ်ႈၶူး ၼၼ်ႉ မီးပီႈၼွင်ႉၵူၼ်းမိူင်းတႆး ၸိူဝ်းပိုင်ႈဢိင် ယူႇသဝ်းၼႂ်းဝဵင်းလူင်မိူင်းၵွၵ်ႇ ၵႂႃႇၶဝ်ႈႁူမ်ႈႁူမ်ၸူမ်းယိၼ်းလီ ယုၵ်ႉယွင်ႈပၼ်ႁႅင်း 600 ပၢႆ။ မီးသင်ၶၸဝ်ႈ ၸိူဝ်းတိုၵ်ႉၶိုၼ်ႈၸၼ်ႉ ၸွမ်ယူႇလႄႈ ၸိူဝ်းလႆႈႁပ်ႉၸုမ်ႈၶူးယဝ်ႉ ၶဝ်ႈႁူမ်ႈတင်းၼမ်။

ၸၢႆးသႅင်ႁၢၼ် လၢတ်ႈဝႃႈ- ႁဝ်းၶႃႈၸူမ်းသိူဝ်းဢၼ်လႆႈၵိူတ်ႇမႃးပဵၼ်တႆး လႄႈ ႁူမ်ၸူမ်းၸွမ်းၸဝ်ႈသင်ၶတႆး ၸိူဝ်းလႆႈ ႁပ်ႉၸုမ်ႈၶူးတင်းသဵင်ႈ။ တီႈပၢင်ပွႆးၼၼ်ႉ ပီႈၼွင်ႉတႆးဢွၼ်ၵၼ်ၼုင်ႈသိူဝ်ႈၶူဝ်းတႆး ၵႂႃႇၶဝ်ႈႁူမ်ႈ ပၼ်ႁႅင်း။ လႆႈၼႄတၢင်းၵႃႈလႄႈ တၢင်းၵႃႈၼူၵ်ႉၵိၼ်ႇၼရီႇ (ၼၢင်းၼူၵ်ႉ) တင်းႁွင်ႉၵႂၢမ်းတႆးပၢၼ်ၵဝ်ႇ ၸိူဝ်းၼႆႉ။ ပီႈၼွင်ႉတႆးႁဝ်းၼႆႉ မႃးၶဝ်ႈႁူမ်ႈပၼ် ႁႅင်းၸိူင်ႉၼႆၵူႈပီ၊ ၵူၺ်းၵႃႈပီၼႆႉ ပေႃးတႅၵ်ႈၵၼ်တင်း လၢႆလၢႆပီပူၼ်ႉမႃး၊ ပၢင်ပွႆးၶိုၵ်ႉယႂ်ႇၵိုၼ်းၶွၼ်ႈ တႄႉတႄႉ- ဝႃႈၼႆ။

ၸၼ်ႉၸွမ် မႁႃႇၸုလႃးလူင်းၵွၼ်း မိူင်းၵွၵ်ႇၼႆႉ မီးသင်ၶၸဝ်ႈ ၼႂ်းၸိုင်ႈမိူင်းႁူမ်ႈတုမ်မၢၼ်ႈ မႃးၶဝ်ႈႁဵၼ်း မီးၼပ်ႉႁူဝ်ပၢၵ်ႇ၊ ပႃးၸဵမ်သင်ၶၸၢဝ်းမၢၼ်ႈ၊ တႆး၊ ယၢင်း လႄႈ ပဢူဝ်း ၸိူဝ်းၼႆႉ။ လၢႆလၢႆပီပူၼ်ႉမႃးၼႆႉ မီးသင်ၶတႆး လုၵ်ႉမိူင်းတႆးမႃးႁဵၼ်းလိၵ်ႈ တီႈၸၼ်ႉၸွမ်ၼႆႉ ၼိုင်ႈပီဢမ်ႇယွမ်းမွၵ်ႈ 20-30 တူၼ်။