ဝၼ်းတီႈ 1-3/05/2014 ၼႆႉ မီးၵၢၼ်ၸတ်းပၢင်ပွႆးသႂၢင်းၵဵဝ်ႇ (ၽဝ်ၶၢပ်ႈတူဝ်) ၸဝ်ႈသြႃႇၼၼ်ႇတႃႇ ဢမ်ႇၼၼ် ၸဝ်ႈသြႃႇထုၼ်းလူႇ သင်ၶလုၵ်ႈဝတ်ႉၼွင်ၵွၵ်ႇၶမ်း ဢိူင်ႇပဵင်းလူင် ၸႄႈဝဵင်းဝဵင်းႁႅင် ၸႄႈတွၼ်ႈၵဵင်းမႆႇ၊ ၽူႈယၢမ်ႈႁၢပ်ႇၵၢၼ်ၸိူဝ်ႉၸၢတ်ႈ ၼႂ်းတပ်ႉသိုၵ်းၼုမ်ႇသိုၵ်းႁၢၼ် ဢၼ်ၸဝ်ႈၼွႆႉ (သေႃးယၼ်ႇတ) ဢွၼ်ႁူဝ်။ မၼ်းၸဝ်ႈၼႆႉ သဵင်ႈၵမ်သုတ်းမုၼ်ၵႂႃႇ ပူၼ်ႉမႃးမိူဝ်ႈဝၼ်းတီႈ 23/02/2014 ၵၢင်ၶိုၼ်းယၢမ်း 23:25 မိၼိတ်ႉ လူၺ်ႈတၢင်းပဵၼ်ထဝ်ႈၵႄႇ ၽွင်းဢႃယုၸဝ်ႈလႆႈ 87 ပီ၊ 26 ဝႃႇသႃ။

ၸဝ်ႈသြႃႇၼၼ်ႇတႃႇ (ၸၢႆးထုၼ်းလူႇ) ၵိူတ်ႇမိူဝ်ႈပီ 1927 ၊ ပဵၼ်ၵူၼ်းၸႃႇတိဝၢၼ်ႈႁၢင်ၼႃး ဢိူင်ႇၼမ်ႉတွင်း ၸႄႈဝဵင်းမိူင်းပၼ်ႇ။ ယၢမ်ႈႁၢပ်ႇၵၢၼ်သိုၵ်းလုၵ်ႉၽိုၼ်ႉ မိူဝ်ႈပၢၼ်ၸဝ်ႈၼွႆႉ ဢွၼ်ႁူဝ် ဢၼ်တႄႇၵၢၼ် လုၵ်ႉၽိုၼ်ႉမိူဝ်ႈပီ 1985 ၊ ၶဝ်ႈပႃးၼႂ်းၸုမ်းတႄႇတင်ႈၵၢၼ်လုၵ်ႉၽိုၼ်ႉ 31 ၵေႃႉ၊ ၵိၼ်ၼမ်ႉသၸ်ႉၸႃႇ၊ ပိုၼ်ၽၢဝ်ႇလုၵ်ႉၽိုၼ်ႉ တိုၵ်းဢဝ်ၶိုၼ်းမိူင်းတႆး တီႈသူပ်းႁူၺ်ႈသမၢၼ်း ၾင်ႇမႄႈၼမ်ႉၶူင်း။

ဝၢႆးၸဝ်ႈၼွႆႉ (သေႃးယၼ်ႇတ) ၽႃႈဝၢင်းၵၢၼ်တူင်ႉၼိုင်ၵၢၼ်သိုၵ်းသေ မွပ်ႈပၼ်ၸဝ်ႈၵွၼ်းၸိူင်း သိုပ်ႇႁပ်ႉပုၼ်ႈၽွၼ်းယဝ်ႉ ၼႂ်းပီ 1986 ၸၢႆးထုၼ်းလူႇ ၸင်ႇတႅပ်းတတ်းၸႂ်ၶဝ်ႈႁၢပ်ႇၵၢၼ်သႃသၼႃ ၼုင်ႈပဵၼ်သၢင်ႇပဵၼ်ၸၢင်းသေ သႂ်ႇၸိုဝ်ႈႁွင်ႉ ၸဝ်ႈၼၼ်ႇတႃႇ။ ဝၢႆးၼၼ်ႉ လႆႈႁပ်ႉပဵၼ်ၸဝ်ႈၵွၼ်းဝတ်ႉ ၼမ်ႉတွင်း ၼႂ်းၸႄႈဝဵင်းမိူင်းပၼ်ႇ။ ထိုင်မႃးၼႂ်းပီ 2006 လႆႈၶဝ်ႈမိူင်းထႆး မႃးယူႇသဝ်းတီႈဝတ်ႉၼွင်ၵွၵ်ႇၶမ်း ဢိူင်ႇပဵင်းလူင် တေႃႇပေႃးလုလွၼ်ႇ သဵင်ႈၵမ်သုတ်းမုၼ်ၵႂႃႇၼႆႉ။