ၵဵဝ်ႇၵပ်းလွင်ႈၼႆႉ ပေႃးဝႃႈၸဝ်ႈၼႃႈတီႈၶႄႇၶဝ် ႁၼ်ၵူၼ်းမိူင်းတႆး/မိူင်းမၢၼ်ႈ ၶဝ်ႈၵႂႃႇထိုင်ၼႂ်းလႅၼ်လိၼ် မိူင်းၶႄႇ ပွတ်းၼၼ်ႉၸိုင် ၶဝ်ႁွင်ႉထဵတ်ႈထၢမ်ၵူတ်ႇထတ်းမိူၼ်ၼင်ႇမိူင်းထႆး။ ႁွင်ႉထၢမ်ဝႂ်၊ ပေႃးမီးဝႂ်ၼႄၵေႃႈ ၵူတ်ႇယဵဝ်ႈ၊ ပေႃးၵူတ်ႇယဵဝ်ႈယဝ်ႉ ႁႃတၢင်းၽိတ်းလွင်ႈၼိုင်ႈယဝ်ႉလွင်ႈၼိုင်ႈသေတီႉၺွပ်းၵႂႃႇ။ လႆႈႁူႉဝႃႈ ၵမ်ႈၽွင်ႈ ၺႃးဢဝ်ၵႂႃႇၸႂ်ႉၼႂ်းၵၢၼ်ၵေႃႇသၢင်ႈ သဵၼ်ႈတႃႈသၢႆတၢင်း၊ တၢင်းလူတ်ႉၾႆးလႄႈ သဵၼ်ႈတၢင်းလူင်မိူင်းၶႄႇ ဢၼ်တေႃႇၶဝ်ႈမႃးတိတ်းၵၼ်တင်း ၸိုင်ႈမိူင်းႁူမ်ႈတုမ်မၢၼ်ႈ- ၼႆယဝ်ႉ။

ၼၢင်းၶမ်းၶိၼ်ႇ ၵေႃႉဢၼ်ၽူဝ်မၼ်းၼၢင်း ၺႃးတီႉၺွပ်းၵႂႃႇလၢတ်ႈဝႃႈ- ၽူဝ်ၶႃႈၼႆႉ ၺႃးတီႉၵႂႃႇမိူဝ်ႈ ဝၼ်းတီႈ 11/04/2014 ။ မၼ်းၵႂႃႇတၢင်းၼွင်တဝ်းသေ ၵႂႃႇၺႃးၸဝ်ႈၼႃႈတီႈၶႄႇၶဝ်ႁွင်ႉထတ်းၵူတ်ႇယဵဝ်ႈ၊ ပေႃးဝႃႈၵူတ်ႇယဵဝ်ႈၵေႃႈ ၸိၼႄးဝႃႈပဵၼ်ၵူၼ်းၸပ်းယႃႈ၊ ပဵၼ်ၵူၼ်းသူႇသမ်းယႃႈမဝ်းၵမ်ၼႆသေ ႁွင်ႉၵႂႃႇတေႃႇထိုင်ဝၼ်းမိူဝ်ႈလဵဝ် ပႆႇပွႆႇပၼ်ၶိုၼ်း- ဝႃႈၼႆ။

ၽူဝ်ၼၢင်းၶမ်းၶိၼ်ႇၼႆႉ ၸိုဝ်ႈႁွင်ႉဝႃႈၸၢႆးမွင်ႇလႅင်း။ မၼ်းၸၢႆးၼႆႉ ၺႃးတီႉၺွပ်းၵႂႃႇမီးတီႈႁွင်ႈၶင် မိူင်းမၢဝ်း လႆႈၶၢဝ်းတၢင်းလိူၼ်ပၢႆယဝ်ႉ။ တၢင်းႁိူၼ်း ၵႂႃႇယွၼ်းႁူပ်ႉၵေႃႈဢမ်ႇပၼ်ႁူပ်ႉ၊ ယွၼ်းဢဝ်ငိုၼ်းထုတ်ႇၵေႃႈ ဢမ်ႇလႆႈ။ ၸဝ်ႈၼႃႈတီႈၶႄႇၶဝ်ဢိင်ဢၢင်ႈဝႃႈ ဢမ်ႇၸၢင်ႈႁဵတ်းႁိုဝ်ၶိုင်ပွင်ပၼ်ယဝ်ႉ၊ ၸိုဝ်ႈမၼ်းလႆႈမၢႆပႃး ၵႂႃႇၼႂ်းၶွမ်ႇၽိဝ်ႇတိူဝ်ႇယဝ်ႉ- ဝႃႈၼႆ။

ၼၢင်းၶမ်းၶိၼ်ႇ တင်း ၸၢႆးမွင်ႇလႅင်း မီးလုၵ်ႈလၢင်းႁူမ်ႈၵၼ် 2 ၵေႃႉ၊ တိုၵ်ႉယူႇႁူင်းႁဵၼ်းၼင်ႇၵၼ်။ ၵေႃႉပဵၼ်ပေႃႈဢၼ်ယူႇသဝ်းဝႆႉတၢင်းႁိူၼ်းၵေႃႈ ၵွပ်ႈဢႃႇယုၵႄႇယဝ်ႉလႄႈ ဢမ်ႇၸၢင်ႈႁဵတ်းၵၢၼ်။ ၵွပ်ႈၼၼ် လွင်ႈၸၢႆးမွင်ႇလႅင်းၺႃးတီႉၼႆႉ တၢင်းႁိူၼ်းၺႃးတၢင်းတုၵ်ႉၶ ယၢပ်ႇၽိုတ်ႇၵၢၼ်ႁႃလဵင်ႉတွင်ႉတႄႉတႄႉ- ဝႃႈၼႆ။

ၵဵဝ်ႇၵပ်းလွင်ႈၵူၼ်းဝၢၼ်ႈၵူၼ်းမိူင်း ၺႃးၶႄႇတီႉၺွပ်းၼႆႉ ပူၼ်ႉမႃးမိူဝ်ႈဝၼ်းတီႈ 15/05/2014 ၾၢႆႇၽွင်းငမ်းပွၵ်ႉယွမ်ႇ လႄႈ ၾၢႆႇၽွင်းငမ်း ၸႄႈဝဵင်းၼမ်ႉၶမ်းၵေႃႈ ႁူပ်ႉထူပ်းဢုပ်ႇဢူဝ်းၵၼ်။

ၽူႈၵႂႃႇၶဝ်ႈႁူမ်ႈပၢင်ၵုမ်ၵေႃႉၼိုင်ႈလၢတ်ႈဝႃႈ- ဢူးၸေႃႇမိၼ်း ၽူႈၵွၼ်းၸႄႈဝဵင်းၼမ်ႉၶမ်းလၢတ်ႈဝႃႈ ႁၢၼ်ႉတေႃႇထိုင်ယၢမ်းလဵဝ် ၵဵဝ်ႇၵပ်းလွင်ႈၶႄႇတီႉၺွပ်းၵူၼ်းမိူင်းႁဝ်းၼႆႉ ပႆႇမီးၽႂ်မႃးတၢင်ႇလၢတ်ႈသေၵေႃႉ။ ပေႃးမီးၵူၼ်းမႃးတၢင်ႇလၢတ်ႈတႄႉ တေၸၢင်ႈႁႃလွၵ်းလၢႆးလုမ်းၽွင်းတၢင်သေ တိတ်းတေႃႇၵပ်းသိုပ်ႇ ၶဝ်ႈႁႃၵၼ်မိူင်းတေႃႇမိူင်း ၸွႆႈၵႄႈလိတ်ႈပၼ်ယူႇ- ဝႃႈၼႆ။

ၽူႈၶဝ်ႈပႃႇတီႇၵၢၼ်မိူင်း ၼႂ်းၸႄႈဝဵင်းၼမ်ႉၶမ်း ၵေႃႉၼိုင်ႈလၢတ်ႈဝႃႈ- ၼႂ်းမိူင်းႁဝ်းၶႃႈၼႆႉ ၸၢဝ်းၶႄႇၼႂ်း မိူင်းၶႄႇ ဢၼ်ဢမ်ႇမီးဝတ်းဝႂ်မိူင်းမၢၼ်ႈသင်သေ မႃးယူႇသဝ်းႁႃၵိၼ်ၼႆႉ မီးတင်းၼမ်တင်းလၢႆ။ ၸဝ်ႈၼႃႈတီႈမိူင်းႁဝ်း ယင်းဢမ်ႇတွၼ်ႉတီႉၺွပ်းၶဝ်သေပွၵ်ႈ၊ ၶဝ်ၵႂႃႇမႃးႁႃၵိၼ် ႁေႃႈလူတ်ႉၵႃးပၢႆႉမိူင်းၶႄႇသေ တေႃႉဢဝ်ၶူဝ်းၶွင်မိူင်းႁဝ်းၶဝ်ႈမိူင်းၶႄႇၼႆႉ 24 ၸူဝ်ႈမူင်း ယင်းဢမ်ႇလိုဝ်ႈဢမ်ႇယင်ႉ၊ လွင်ႈၼႆႉၵေႃႈ ယင်းဢမ်ႇတီႉၺွပ်း- ဝႃႈၼႆ။

ၵူၼ်းမိူင်းတႆး / ဝဵင်းၼမ်ႉၶမ်း ၸိူဝ်းၺႃးတီႉၺွပ်းၵႂႃႇၼၼ်ႉ
    ၸိုဝ်ႈ    ဢႃႇယု    ပေႃႈ/မႄႈ    တီႈယူႇ/ဝၢၼ်ႈ    ထုၵ်ႇတီႉၺွပ်းမိူဝ်ႈ
1    ၸၢႆးမွင်ႇလႅင်း    32    ၶိင်းထီးၶမ်း    ပွၵ်ႉၵုၼ်ႁႆး    ဝၼ်းတီႈ 11/4/2014
2    ၸၢႆးဢွင်ႇမျၢတ်ႈ    45    ၶိင်းမၢၼ်ႇႁိူင်း    ၼမ်ႉတီး    ၼႃႈသွၼ်းၼမ်ႉ /သၢင်းၵျၢၼ်ႇ
3    ၸၢႆးဢၢႆႈၸၢႆး    26    ပႃႈၼၢင်းၸိင်ႇ     ပွၵ်ႉတႂ်ႈ    ၺႃးတီႉလႆႈ လိူၼ်ပၢႆ
4    ၸၢႆးတၢၼ်းလၢႆႇ    27    လုင်းလၢဝ်းသီႇ    ပွၵ်ႉတႂ်ႈ    ၺႃးတီႉလႆႈ လိူၼ်ပၢႆ
5    ၸၢႆးဢၢႆႈယီႈ    27     လုင်းဢူင်းမွင်ႇ    ပွၵ်ႉတႂ်ႈ    ဝၼ်းတီႈ 11/5/2014
6    သၢင်ႇဢွင်ႇမျၢတ်ႈ    46    ၶိင်းၵျွင်းႁိူင်း    မၢၼ်ႈႁွင်း    ဝၼ်းတီႈ 6/4/2014
7    ၸၢႆးတၢင်းၶႄႇ    21    ၶိင်းသွႆႈငိုၼ်း    ႁူဝ်သၢႆး    ဝၼ်းတီႈ 15/4/2014
8    ၸၢႆးဢၢႆႈၸၢႆး    43        ငွၼ်ႈဢိၼ်ႇ  
9     ၶိင်းသွႆႈႁွင်း    58    ၶိင်းၾႃႉမႆႇ    ပွၵ်ႉၶေးၶွၼ်  
10    ၸၢႆးဢၢႆႈလႅင်း    27        ပွၵ်ႉၶေးၶွၼ်  
11    ၸၢႆးယီႈလႅင်    23    ၶိင်းဢၢႆႈသႃႇ    ၼမ်ႉမႃႉ    ဝၼ်းတီႈ 13/2/2014
12    ၸၢႆးဢၢႆႈထုၼ်း    35        ၵုၼ်ႁႆး    

ၶဝ်ၸိူဝ်းၼႆႉ တေႃႇထိုင်ယၢမ်းလဵဝ် ပႆႇပွၵ်ႈမႃးႁိူၼ်းၶိုၼ်း၊ ၵူၼ်းႁိူၼ်းၵူၼ်းယေးၵေႃႈမႆႈၸႂ်။ ၵွပ်ႈၼၼ် ယူႇတီႈၾၢႆႇပႃႇတီႇၵၢၼ်မိူင်းတေဢုပ်ႇဢူဝ်း ၾၢႆႇၸဝ်ႈၼႃႈတီႈ သေ တေၸွႆႈၵႄႈလိတ်ႈၼႂ်းဝူင်ႈၵၢင် ပၼ်ႁႃမိူင်းတေႃႇမိူင်း ၵႂႃႇယူႇ- ၼႆယဝ်ႉ။