ဝဵင်းၼမ်ႉၶမ်းပိုတ်ႇႁူင်းႁဵၼ်းထမ်ႇမ ၸွမ်းပိူင်သွၼ်ႁဵၼ်းၽႃသႃပုတ်ႉထ မိူင်းသီႇႁူဝ်ႇ
သင်ၶၸဝ်ႈ ပေႃႈမႄႈၵူၼ်းမိူင်း
ဢိၵ်ႇၵူၼ်းၼုမ်ႇ မုင်ႈၼႃႈႁၼ်ၵႆ သၢၼ်မိုဝ်းၵၼ် ပိုတ်ႇႁူင်းႁဵၼ်း ထမ်ႇမ
ၾိင်ႈငႄႈပုတ်ႉထ တီႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ
ၸႂ်ႉပိူင်သွၼ်ႁဵၼ်းပုတ်ႉထ မိူင်းသီႇႁူဝ်
ႁူင်းႁဵၼ်းထမ်ႇမ ဝဵင်းၼမ်ႉၶမ်း ပိုတ်ႇသွၼ် ဝၼ်းထိ 2 (Photo: TMMG)
ဝၼ်းထိ 11 မေႇ 2014 ၼီႈ ႁူင်းႁဵၼ်းထမ်ႇမ တီႈဝတ်ႉၸေႇယသုၶ ဝဵင်းၼမ်ႉၶမ်း ပိူတ်ႇသွၼ်ထမ်ႇမ ၵဵဝ်ႇၵပ်းသႃသၼႃ ပုတ်ႉထ ၸဝ်ႈပဵၼ်ဝၼ်းထိ 2 ။ လုၵ်ႈႁဵၼ်းမႃးၶဝ်ႈ ႁဵၼ်းဢဝ်လၢႆး မီး 130 ပၢႆ။ ၶူးပူင်သွၼ် ၸဝ်ႈၶူးထမ်ႇမသိရိ ထမ်းယွတ်ႈ ပဵၼ်ၵဝ်ႉၵၼ်း။ မီးပႃး ၶူးသွၼ် ယိင်း ၸၢႆးလၢႆၵေႃႉ။ ပပ်ႉတင်ႈႁဵၼ်း ႁိုဝ် လၵ်ႇသုတ်ႇ လၵ်းပိူင်သွၼ်ႁဵၼ်း ဢဝ်ပိူင်ႁဵၼ်း မိူင်းသီႇႁူဝ် - တင်းမူတ်းမီးတေႃႇထိုင် Grade 11 (ၸၼ်ႉ 11 )။
“ၶေႃႈယိူင်းဢၢၼ်း ဢၼ်လႆႈႁဵတ်းႁူင်းႁဵၼ်းထမ်ႇမ ၼႆႉယွၼ်ႉၼုမ်ႇႁၢႆးၸၢႆးယိင်း သႅၼ်းမႂ်ႇ ဢမ်ႇပေႃး မေႃၶဝ်ႈႁႃ ဝတ်ႉၵျွင်းၽြႃး၊ ဢမ်ႇပေႃးလဵပ်ႈႁဵၼ်း ပိုၼ်းပုတ်ႉထ ယွၼ်ႉၼႆ ၼင်ႇႁိုဝ် ၵၢၼ်သႃသၼႃ တေဢမ်ႇႁၢႆ တေႁိူဝ်ႈႁိူင်း ၵႂႃႇမိူဝ်းၼႃႈၼၼ်ႉ ၸင်ႇလႆႈပိုတ်ႇႁူင်းႁဵၼ်းၼႆႉမႃး” - ၽူႈၵွၼ်းႁူင်းႁဵၼ်း ၸဝ်ႈထမ်ႇမသီရိ ဝတ်ႉၸေႇယသုၶ ဝဵင်းၼမ်ႉၶမ်းလၢတ်ႈ။
ဝၼ်းထိ 9/3/2014 ၼၼ်ႉ လႆႈႁဵတ်း ပၢင်ၵုမ် တႃႇမၵ်းမၼ်ႈ ၸုမ်းႁူင်းႁဵၼ်းထမ်ႇမ တီႈဝိႁၢရ် ၵၢင်ဝဵင်း။ ၼႂ်းပၢင်ၵုမ်ၼၼ်ႉ ဢုပ်ႇလၢတ်ႈၶႆႈၼႄ ၶေႃႈယိူင်းဢၢၼ်းႁူင်းႁဵၼ်း၊ ပိူင်ၶွတ်ႇၽွတ်ႈ ၽူႈပွင် ၵၢၼ် မူႇၸုမ်းႁူင်းႁဵၼ်း လႄႈ ပၵ်းပိူင်ဢၼ်ထုၵ်ႇမီးတီႈၼႂ်းႁူင်းႁဵၼ်း။
လုၵ်ႈႁဵၼ်း(Photo: TMMG)
“ဢွင်ႈတီႈသွၼ်ႁဵၼ်း ဢမ်ႇၵွမ်ႉၵႃႈတီႈဢၼ်ပိုတ်ႇဝႆႉတီႈ ဝတ်ႉၸေယသုၶ ၵူၺ်း။ ဝတ်ႉၵျွင်းဝၢၼ်ႈၽႂ် သူၼ်မၼ်း၊ ၼိုင်ႈဝူင်ႈ တေသွၼ်ၼိုင်ႈဝၼ်း (ဝၼ်းဢႃးတိတ်ႉ) ဝၼ်းလဵဝ်။ ၶၢဝ်းယၢမ်းသွၼ်ႁဵၼ်း ဢိင်ၼိူဝ်ငဝ်းလၢႆးဝၢၼ်ႈၽႂ်ဝၢၼ်ႈမၼ်းသွၼ်ႇၵႂႃႇလႆႈယူႇ။ သင်ဢဵၼ်ႁႅင်း ၶူးသွၼ် ဢမ်ႇတဵမ်ထူၼ်ႈ ယိုၼ်ႈယွၼ်းမႃးတီႈ ႁူင်းႁဵၼ်းထမ်ႇမ လႆႈယူႇ” - ၼႆ ၸဝ်ႈၶူးထမ်ႇမသီႇရိ သပ်းလႅင်းၼင်ႇၼႆ။
ပၢင်သွၼ်ၼႆႉ ဢမ်ႇၵွမ်ႉၵႃႈ တေပိုတ်ႇ တီႈ ဝတ်ႉၸေယသုၶ တီႈလဵဝ် မီးၽႅၼ်ၵၢၼ်ပိုတ်ႇၵႂႃႇ ၸွမ်းဝတ်ႉ ၸွမ်းဝႃး ၼႂ်းၸေႈဝဵင်းၼမ်ႉၶမ်းၵႂႃႇလၢႆတီႈ - ဝႃႈၼႆ။
Tags: Culture, News
