သိုၵ်းဝႃႉ လုၵ်ႉတၢင်းဢွၵ်ႇၶူင်းၶၢမ်ႈၵႂႃႇတူင်ႉၼိုင်ပွတ်းတူၵ်းၶူင်း ၶုတ်းၶမ်းပွတ်းႁူဝ်ပၼ်ႇႁူဝ်ၶဵၼ်း ပဵၼ်ပၢင်တိုၵ်းၵၼ်တင်း သိုၵ်းတႆး ႁၢဝ်ႈႁႅင်း။ ႁၢၼ်ႉတေႃႇမိူဝ်ႈလဵဝ် သွင်ၾၢႆႇတိုၵ်ႉ ဝႅတ်ႉလွမ်ႉၵၼ် ငႃၵၼ်ဝႆႉယူႇ။

ပူၼ်ႉမႃးမိူဝ်ႈဝၼ်းတီႈ 02/04/2014 တပ်ႉသိုၵ်းၸိုင်ႈတႆး (RCSS/SSA) တင်း တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSA) ပဵၼ်ပၢင်တိုၵ်း ၵၼ်ႁၢဝ်ႈႁႅင်း ပွတ်းႁူဝ်ပၼ်ႇႁူဝ်ၶဵၼ်း ၾၢႆႇတူၵ်းၶူင်း (ၸႄႈဝဵင်းမိူင်းပၼ်ႇ) ၸိုင်ႈတႆး ပွတ်းၸၢၼ်း။ ၵဵဝ်ႇၵပ်းလွင်ႈၼႆႉ သိုၵ်းတႆးတူင်ႉၼိုင်ၵၢၼ်သိုၵ်းသေႁူပ်ႉႁိုၵ်ႉသႂ်ႇသိုၵ်းဝႃႉ ပွတ်းထုင်ႉၼၼ်ႉ လႄႈ ပဵၼ်ပၢင်တိုၵ်းၵၼ်။ သွင်ၾၢႆႇမီးလွင်ႈတၢႆဝၢတ်ႇ ၼင်ႇၵၼ်၊ ၾၢႆႇသိုၵ်းတႆးယိုတ်းလႆႈၵွင်ႈလူင် ၵွင်ႈဢွၼ်ႇ ဢမ်ႇယွမ်း 3 လဝ်း- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၽူႈၵွၼ်းႁွင်ႈလုမ်းၾၢႆႇတိတ်းတေႃႇ RCSS/SSA ၸဝ်ႈၸၢႆးလူး ၵေႃႈတိတ်းတေႃႇ ၸဝ်ႈၼႃႈတီႈ ၾၢႆႇသိုၵ်းဝႃႉသေ ပွင်ႇလၢတ်ႈဝႆႉယဝ်ႉ။ လူၺ်ႈလၢတ်ႈဝႃႈ ဢွၼ်ၼႃႈၼႆႉ ပဵၼ်ၸုမ်းဝႃႉႁိုဝ် ပဵၼ်ၸုမ်းလႂ်ၼၼ်ႉ ႁဝ်းၵေႃႈ ဢမ်ႇလႆႈႁူႉ။ သင်ဝႃႈပဵၼ် သိုၵ်းဝႃႉၵေႃႈ ၾၢႆႇၸုမ်းဝႃႉပူၼ်ႉပႅၼ်ၼႃႈလိၼ ၶဝ်ႈၵႂႃႇတူင်ႉၼိုင်ပွတ်းတွၼ်ႈၼၼ်ႉႄလႈ ႁိုၵ်ႉလေႃႇၺႃးၵၼ်၊ ဝၢႆးယိုဝ်းၵၼ်ယဝ်ႉ ၸင်ႇလႆႈႁူႉဝႃႈပဵၼ် သိုၵ်းဝႃႉ- ဝႃႈၼႆ။

ၶၢဝ်ႇဢမ်ႇယိုၼ်ယၼ်လၢတ်ႈဝႃႈ- ပၢင်တိုၵ်းပွတ်းဢွၵ်ႇၶူင်း ဢၼ်ပဵၼ်တၢင်းလွႆလဵၵ်းၸီး၊ လွႆပၢၼ်းတုင်း ဝၼ်းတီႈ 24/02/2014 ၸိူဝ်းၼႆႉ လႆႈငိၼ်းဝႃႈပဵၼ်သိုၵ်းဝႃႉတင်းသိုၵ်းမၢၼ်ႈႁူမ်ႈၵၼ်မႃးယိုဝ်းသိုၵ်းတႆး။ ၵူၺ်းၵႃႈ တၢင်းပွတ်းဢွၵ်ႇၶူင်းၼႆႉ ဢိင်ၼိူဝ် ၼႃႈလိၼ်ဢမ်ႇတႅၵ်ႇလႅင်ႄလႈ သိုၵ်းဝႃႉၵေႃႈယၢမ်ႈတိၺွပ်း သိုၵ်းတႆးမႃး။ ၵူၺ်းၵႃႈ ဢၼ်ၵႂႃႇ တူင်ႉၼိုင်တၢင်းတူၵ်းၶူင်းပွၵ်ႈၼႆႉ မၼ်းၵေႃႈဢမ်ႇၸႂ်ႈပိုၼ်ႉတီႈၼႃႈလိၼ်ဝႃႉ - ဝႃႈၼႆ။

ဢွၼ်ၼႃႈၼႆႉ သိုၵ်းဝႃႉတင်းၸုမ်းၶုတ်းမိူင်ၶုတ်းၶမ်း၊ ၸုမ်းတႅပ်းမႆႉတႅပ်းတွၵ်ႇ ၶၢမ်ႈၵႂႃႇတၢင်းတူၵ်းၶူင်း၊ ၵႂႃႇၶုတ်းၶမ်း ပွတ်းထုင်ႉႁူဝ်ပၼ်ႇႁူဝ်ၶဵၼ်း။ ထိုင်မႃးဝၼ်းတီႈ 02/04/14 သိုၵ်းတႆး (RCSS/SSA) မႃးႁိုၵ်ႉၺႃးသႂ်ႇႄလႈပဵၼ်ပၢင်တိုၵ်း ၵၼ်ႁၢဝ်ႈႁႅင်း။  ဝၢႆးၼၼ်ႉ သိုပ်ႇဝႅတ်ႉၵၼ်ဝႆႉသေယိုဝ်းၵၼ်မႃး၊ ၵူၺ်းၵႃႈ ဢမ်ႇႁၢဝ်ႈႁႅင်း။ ထိုင်မႃးဝၼ်းတီႈ 05/04/14 ၼႆႉ သွင်ၾၢႆႇယိုဝ်းၵၼ်ထႅင်ႈႁၢဝ်ႈႁႅင်း။ မိူဝ်ႈဝႃး (07/04/14)ၼႆႉ သိုၵ်းဝႃႉ ႁႅင်းသိုၵ်းလူတ်ႉၵႃး 10 လမ်း လုၵ်ႉတၢင်း ဢွၵ်ႇၶူင်း ၵႂႃႇၵိုတ်းႁိမ်းၾင်ႇၶူင်းယဝ်ႉၶၢမ်ႈ တၢင်းႁိူဝ်းသေ ၵႂႃႇယိုဝ်းထႅင်ႈ၊ သွင်ၾၢႆႇပဵၼ်ပၢင်တိုၵ်းၵၼ်ထႅင်ႈ၊ ၾၢႆႇသိုၵ်း တႆး ၵေႃႈ မီးၵၢၼ်ထႅမ်ႁႅင်းသိုၵ်း ၶွၼ်ႈႁႅင်းၵၼ်- ၼႆယဝ်ႉ။

ၵဵဝ်ႇၵပ်းလွင်ႈပၢင်တိုၵ်းၼႆႉ ၽူႈမီးၸၼ်ႉၼႂ်း RCSS/SSA ၵေႃႉၼိုင်ႈလၢတ်ႈဝႃႈ- ပၢင်တိုၵ်းၼႆႉ ဢမ်ႇၶႂ်ႈႁႂ်ႈၵႂႃႇၶၢဝ်းယၢဝ်း၊ တၢင်းပွတ်းတွၼ်ႈၼၼ်ႉၵေႃႈ ဢမ်ႇၸႂ်ႈပိုၼ်ႉတီႈၼႃႈလိၼ်ၸုမ်းဝႃႉတူင်ႉၼိုင်။ ၵွပ်ႈၼၼ် သင်ဝႃႈတပ်ႉသိုၵ်းမၢၼ်ႈ မႃးၶဝ်ႈယူႇၼႂ်း ၵၢင်သေၸွႆႈၵႄႈလိတ်ႈၸိုင် တီႈလိၼ်ပွတ်းတွၼ်ႈၼႆႉ သိုၵ်းမၢၼ်ႈတေမႃးပၵ်း။ ႁဝ်းထုၵ်ႇလီဢဝ်လၢႆးၵတ်းယဵၼ်သေၵႄႈလိတ်ႈ။ ၵူၺ်းၵႃႈ မိူဝ်ႈလဵဝ်ၼႆႉ ၾၢႆႇသိုၵ်းမၢၼ်ႈ သမ်ႉဢမ်ႇယွမ်းၶဝ်ႈၵႄႈမၼ်း၊ တင်ႈၸႂ်ပွႆႇပၼ်တႆးတင်းဝႃႉယိုဝ်းၵၼ်၊ ၵွပ်ႈၼၼ် ပၢင်တိုၵ်းၵေႃႈၶၢဝ်းယၢဝ်းမႃး။ မိူဝ်ႈလဵဝ် တၢင်းထုင်ႉႁူဝ်ပၼ်ႇႁူဝ်ၶဵၼ်း ၼႆႉ သွင်ၾၢႆႇတိုၵ်ႉဝႅတ်ႉၵၼ်ဝႆႉ ပဵၼ်ၸၼ်ႉပဵၼ်ၸၼ်ႉယူႇ- ဝႃႈၼႆ။