ၸွမ်သိုၵ်းလူင် မိၼ်းဢွင်ႇလႅင်ႇ ႁူပ်ႉထူပ်းပႃႇတီႇမႂ်ႇသုင် ၸိုင်ႈတႆး/တပ်ႉသိုၵ်းၸိုင်ႈတႆး မွၵ်ႇလၢတ်ႈၶေႃႈ ၵႂၢမ်းတိုၵ်းသူၼ်း ႁႂ်ႈဢွၼ်ၵၼ်ၵေႃႇသၢင်ႈဝၢၼ်ႈမိူင်း ၸွမ်းၼင်ႇပၵ်းပိူင်တမ်း ဝၢင်းမီးမႃး၊ ပႆၼိူဝ်သဵၼ်ႈတၢင်း တီႇမူဝ်ႇၶရေႇၸီႇ ဢၼ်ၸွမ်ၸိုင် တဵင်းၸဵင်ႇဢွၼ်ႁူဝ်။

ဝၼ်းတီႈ 06/04/2014 ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ႁူပ်ႉထူပ်း SSPP/SSA တီႈႁွင်ႈ လုၵ်းလူင် သူၺ်ႇလီႇယဵၵ်ႉတႃႇ ၼႂ်းတိူင်းသိုၵ်းၸဵင်ႇႁွင်ႇဝၼ်းဢွၵ်ႇ ဝဵင်းလႃႈသဵဝ်ႈ 8:45 မူင်းတေႃႇ 9:30 မူင်း။ ၾၢႆႇ SSPP/SSA ၸွမ်ႁၢၼ်ၶိူဝ်းတႆး ၵႅမ်ႁူဝ်ပဝ်ႈ ဢွၼ်ႁူဝ်ႁႅင်းၵူၼ်း (5) ၵေႃႉ ၶိုၼ်ႈႁွတ်ႈ ထွမ်ႇၶေႃႈလၢတ်ႈသပ်း လႅင်းဝႃႈ-“တႃႇၵေႃႇသၢင်ႈလွင်ႈ ငမ်းယဵၼ်ၼႆႉ ယႃႇဢဝ်ၼမ်ႉတွၼ်း၊ ႁဵတ်းၵႂႃႇသိုဝ်ႈသိုဝ်ႈသႂ်သႂ်၊ ႁဵတ်းၸွမ်း ပၵ်းပိူင်ဢၼ်မီး၊ ယႃႇႁႂ်ႈပဵၼ်ၶူဝ်းၼၵ်း ၶူဝ်းၼႃ ပုၼ်ႈၵူၼ်းမိူင်း၊ မီးလွင်ႈယၢပ်ႇၽိုတ်ႇသင် တႃႇတေၸွႆႈ ထႅမ်ၼၼ်ႉ တပ်ႉမတေႃႇႁဝ်းတူဝ်ႈတၼ်းဝႆႉယူႇ တႃႇဝၢၼ်ႈမိူင်း ၶိုၼ်ႈယႂ်ႇ၊ တႃႇတွၼ်ႈလိၼ်ၶိုၼ်ႈယႂ်ႇၼၼ်ႉ ႁဝ်းဢဝ်ၵွင်ႈဝႆႉၾၢႆႇၶၢင်ႈသေ ႁဵတ်းသၢင်ႈၵႂႃႇ၊ ၵူၺ်းၵႃႈ ပေႃးၶိုၼ်းယိပ်းၵွင်ႈ တႄႉၵေႃႈ ပၼ်ႁႃၸၢင်ႈၵိူတ်ႇ ၶိုၼ်ႈမႃးတင်းၼမ်ယူႇ”- ဝႃႈၼႆ။

SSPP/SSA ဢမ်ႇမီးၶေႃႈတုၵ်းယွၼ်း တၢင်ႇလၢတ်ႈသင်လႄႈ မိၼ်းဢွင်ႇလႅင်ႇၶိုၼ်းလၢတ်ႈထႅင်ႈဝႃႈ “လွင်ႈတီႉၵူၼ်း ၺွပ်းၵူၼ်းၼၼ်ႉ ဢမ်ႇထုၵ်ႇလီႁဵတ်း၊ လွင်ႈၵဵပ်းငိုၼ်းယွၼ်းငိုၼ်းၼၼ်ႉ ၵွပ်ႈဢမ်ႇမီး ဢၼ်ၵိၼ်ဢၼ်ယႅမ်ႉလႄႈယွၼ်းၼႆ ယင်းၸၢင်ႈပွင်ႇၸႂ်ပၼ်ယူႇ၊ လွင်ႈဢၼ်တဵၵ်းၺွပ်းၵူၼ်း၊ ၶွၼ်ႈတုမ်ၵူၼ်းၼၼ်ႉ ပဵၼ်လွင်ႈသၢၼ်ၶတ်းပၵ်းပိူင်ၸိုင်ႈမိူင်း ဢမ်ႇထုၵ်ႇလီႁဵတ်းၼႆ လွင်ႈၸိူဝ်းၼႆႉ လႆႈလၢတ်ႈၼႄၵူႈၸုမ်းယူႇ၊ တႃႇမုၵ်ႉၸုမ်းၼိုင်ႈဢၼ်၊ တႃႇၵူၼ်းၼိုင်ႈၵေႃႉ ၸုၵ်းမၼ်းလႆႈၼၼ်ႉ ထုၵ်ႇလီႁႃတၢင်းငိုၼ်းၶဝ်ႈ ၸွမ်းၼင်ႇပၵ်းပိူင်ဝၢၼ်ႈမိူင်း”

ၵမ်းလိုၼ်း ၶိုၼ်းလၢတ်ႈၵႂႃႇဝႃႈ “မိူင်းၶေႇၵေႃႈၸၢဝ်းၶိူဝ်းမီးတင်းၼမ်၊ ပိူၼ်ႈဢွၼ်ၵၼ်ၸႂ်ႉလိၵ်ႈၶႄႇ ၵႂၢမ်းၶႄႇၵူၺ်း၊ မိူၼ်ၼင်ႇမိူင်းဢိၼ်းတိယိူဝ်းၵေႃႈ ၸၢဝ်းၶိူဝ်းမီးတင်းၼမ် ဢွၼ်ၵၼ်ၸႂ်ႉၵႂၢမ်းလိၵ်ႈၵလႃး ၵႂၢမ်းၵလႃး၊ မိူၼ်ၼင်ႇ မိူင်းထႆး ၵေႃႈမီးၸၢဝ်းၶိူဝ်းၼမ် ဢွၼ်ၵၼ်ၸႂ်ႉလိၵ်ႈထႆးၵႂၢမ်းထႆး၊ မိူၼ်ၼင်ႇမိူင်း မၢၼ်ႈႁဝ်း မီးၸၢဝ်းၶိူဝ်းၼမ်ၵေႃႈ တေလႆႈၸႂ်ႉ လိၵ်ႈမၢၼ်ႈၵႂၢမ်းမၢၼ်ႈၵူၺ်း”-  ၸဝ်ႈၼႃႈတီႈၼႂ်း SSPP/SSA ပိုတ်ႇလၢတ်ႈၼႄၼင်ႇၼႆ။