ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး (SHRF) တုၵ်းယွၼ်းႁႂ်ႈ တပ်ႉသိုၵ်းမၢၼ်ႈၵိုတ်းယိုတ်း လွင်ႈပေႃႉထုပ်ႉ ႁဵတ်းၶဵၼ်တီႈ ၵူၼ်းဝၢၼ်ႈ၊ ၸူၼ်ႁိမ်ဢဝ်ၶူဝ်းၶွင်။

ၵဵဝ်ႇၵပ်းလွင်ႈၼႆႉ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး (SHRF) ဢွၵ်ႇလိၵ်ႈပိုၼ်ၽၢဝ်ႇ ဝၼ်းတီႈ 08/04/2014 ဝႃႈ- ပူၼ်ႉမႃးမိူဝ်ႈဝၼ်းတီႈ 23/03/2014 လုင်းၸၢႆးသၢင်ႇ….. ဢႃႇယု 46 လုၵ်ႉမိူင်းၵၢဝ် ၸႄႈဝဵင်းတၢင်ႉ ယၢၼ်း၊ ၶီႇလူတ်ႉ ၶိူင်ႈ ၵႂႃႇတူၵ်းလိၵ်ႈၽိတ်ႈမွၵ်ႇပွႆးသၢင်ႇလွင်း ပွတ်းမိူင်းဢွတ်ႇ ၸႄႈဝဵင်းမိူင်းသူႈ။ မိူဝ်ႈၵႂႃႇၽႅဝ်တီႈႁိမ်းတပ်ႉမၢၼ်ႈ ၶမယ 515 တီႈၵွင်းၾၢႆႇတူၵ်းဝၢၼ်ႈႁူၺ်ႈလူင်ၼၼ်ႉ သိုၵ်းမၢၼ်ႈ ဢၼ်ပႂ်ႉတီႈတပ်ႉ သင်ႇလုင်းၸၢႆးသၢင်ႇ… ႁႂ်ႈသိုဝ်ႉပုမႃး။ မိူဝ်ႈပွၵ်ႈၶိုၼ်းၼၼ်ႉ လုင်းၸၢႆးသၢင်ႇၵေႃႈ မႃးပၼ်ပုတီႈတပ်ႉမၢၼ်ႈယဝ်ႉ ပူၼ်ႉပွၵ်ႈမိူဝ်းၵႂႃႇႁႃဝၢၼ်ႈမၼ်းၸၢႆး၊ ယၢၼ် တပ်ႉမၢၼ်ႈမွၵ်ႈ 1 လၵ်းၼၼ်ႉ ၺႃးသိုၵ်းမၢၼ်ႈ 2 ၵေႃႉ၊ ၼုင်ႈၶူဝ်းၵူၼ်းႁိူၼ်း၊ ပႃးမိတ်ႈသေ ပႂ်ႉႁႄႉၵိုတ်းပေႃႉထုပ်ႉ၊ ဢဝ်မိတ်ႈတႅင်း လႄႈ ၸူၼ်ႁိမ်ဢဝ်ငိုၼ်း 50,000 ၵျၢတ်ႈ တင်းလူတ်ႉၶိူင်ႈၵႂႃႇ။

လုင်းၸၢႆးသၢင်ႇ…ၼႆႉ ထုၵ်ႇသိုၵ်းမၢၼ်ႈ ဢဝ်မိတ်ႈတႅင်းၵႅမ်ႈသွင်ၽၢၵ်ႇ၊ တႅင်းၸွမ်းႁူဝ်၊ တႅင်းတီႈ ၵွင်ႇၵေႃႈ တေႃႇပေႃးတၢႆလိုမ်းၵႂႃႇ။ သိုၵ်းမၢၼ်ႈ 2 ၵေႃႉၼၼ်ႉ ၵိူဝ်းဝႃႈမၼ်းၸၢႆးတၢႆယဝ်ႉၼႆသေ ဢဝ်ၵႂႃႇပႅတ်ႈ ၼႂ်းယုမ်းၾၢႆႇဢွၵ်ႇတၢင်း။ ဝၢႆးၼၼ်ႉ ၸၢႆးသၢင်ႇႁူႉ တူဝ်ၶိုၼ်းမႃးသေ ၵၢၼ်းမိူဝ်းၸူးဝၢၼ်ႈႁူၺ်ႈလူင်၊ ၵူၼ်းဝၢၼ်ႈႁူၺ်ႈလူင် ပွင်ႇလၢတ်ႈပၼ်ပီႈ ၼွင်ႉၸၢႆးသၢင်ႇ… ၶဝ်မႃးႁပ်ႉဢဝ်ၵႂႃႇ ယူတ်းယႃတီႈႁူင်းယႃ လႃႈသဵဝ်ႈ၊ ယွၼ်ႉတၢင်းၸဵပ်းႁၢဝ်ႈႁႅင်း ႁူင်းယႃလႃႈသဵဝ်ႈ ဢမ်ႇႁပ်ႉလႄႈ လႆႈသိုပ်ႇသူင်ႇၵႂႃႇႁူင်းယႃဝဵင်းလိူဝ်ႇ (မၼ်းတလေး)- ၼႆယဝ်ႉ။

ယွၼ်ႉပိူဝ်ႈထုၵ်ႇပေႃႉထုပ်ႉသေ လုင်းၸၢႆးသၢင်ႇ…ၼႆႉ ၶဵဝ်ႈသွၼ်ႇ 2 သိၵ်ႈ၊ ဢၼ်ၵိုတ်းလိူဝ်ၼၼ်ႉၵေႃႈ ၶွၼ်းမူတ်း၊ ႁွႆးၸဵပ်းၸွမ်း ၼႃႈၸွမ်းတႃမၼ်းၸၢႆးၵေႃႈလိူဝ်ၸႂ်.၊ ၵၢင်းၵေႃႈၸတ်ႉ၊ သမ်ႉလႆႈယဵပ်ႉသူပ်း/ပၢၵ်ႇ မၼ်းၸၢႆးဝႆႉလႄႈ ဢမ်ႇၸၢင်ႈၵိၼ် ဢမ်ႇၸၢင်ႈ လၢတ်ႈၵႂၢမ်း။ မိူဝ်ႈပႆႇယဵပ်ႉသူပ်းၼၼ်ႉ မၼ်းၸၢႆးၵေႃႈ လၢတ်ႈၼႄလွင်ႈၼႆႉယူႇ။

ၵဵဝ်ႇၵပ်းလွင်ႈၼႆႉ ၽူႈမီးပုၼ်ႈၽွၼ်း ၼႂ်းၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး (SHRF) ၼၢင်းၶႂၢၼ်လဵၵ်း လၢတ်ႈဝႃႈ- ဢၼ်ပူၼ်ႉ ပႅၼ်သုၼ်ႇလႆႈၵူၼ်း ၼိူဝ်ၵူၼ်းဝၢၼ်ႈၵူၼ်းမိူင်းၼႆႉ ဢမ်ႇၸႂ်ႈၶၢဝ်းမၼ်းယဝ်ႉ၊ ထိုင်ၶၢဝ်းယၢမ်းထုၵ်ႇလႆႈၵိုတ်းယင်ႉယဝ်ႉ။ ၵူၺ်းၵႃႈ သိုၵ်းမၢၼ်ႈၼႆႉ ဢမ်ႇၵိုတ်းဢမ်ႇယင်ႉသေ တိုၵ်ႉသိုပ်ႇ ႁဵတ်းႁၢႆႉတေႃႇၵူၼ်းဝၢၼ်ႈၵူၼ်းမိူင်းယူႇ။ လွင်ႈၼႆႉ မၼ်းၸၢင်ႈတုမ်ႉတိူဝ်ႉ လွင်ႈငမ်းယဵၼ်။ ဢၼ်တိၺွပ်းၵူၼ်းဝၢၼ်ႈ/ ႁိမ်ဢဝ်ၶူဝ်းၶွင်ၵူၼ်းဝၢၼ်ႈၸိူဝ်းၼႆႉ ဢမ်ႇၵိုင်ႇလီမီးယဝ်ႉ။ ၵွပ်ႈၼၼ် တုၵ်းယွၼ်း ႁႂ်ႈတပ်ႉသိုၵ်းမၢၼ်ႈၵိုတ်းယိုတ်းပၼ်လွင်ႈၼႆႉသေၵမ်း- ဝႃႈၼႆ။

တပ်ႉပၢင်သဝ်း သိုၵ်းမၢၼ်ႈၶမယ 515 ၼႆႉ ယၢၼ်ဝၢၼ်ႈႁူၺ်ႈလူင် 1 လၵ်း၊ ယူႇၼႂ်းၸႄႈဝဵင်းတၢင်ႉယၢၼ်း ၸိုင်ႈတႆး ပွတ်းႁွင်ႇ၊ ယၢၼ်မိူင်းၵၢဝ် 12 လၵ်း၊ မီးၼႂ်းၵႄႈမိူင်းၵၢဝ်တင်း မိူင်းဢွတ်ႇ။ သိုၵ်းမၢၼ်ႈတပ်ႉၼႆႉ ၶၢႆႉမႃးပၵ်း ၽွင်းႁၢင်လိူၼ် ၾႅပ်ႊၿိဝ်ႊရီႊ 2014 ။ ၵူၺ်းၵႃႈ တပ်ႉပၢင်သဝ်းၼႆႉတႄႉ ပၵ်းမႃးၸဵမ်မိူဝ်ႈ ဝၢႆးပၢင်တိုၵ်းသိုၵ်းမၢၼ်ႈ တင်း တပ်ႉသိုၵ်းၸိုင်ႈတႆး (SSPP/SSA) ၽွင်းလိူၼ်ၵျူႊလၢႆႊ ပီ 2012 - ၼႂ်းလိၵ်ႈပိုၼ်ၽၢဝ်ႇ SHRF ႁၢႆးငၢၼ်းၵႂႃႇ ၼင်ႇၼႆ။